Numere 4:1-49

E Bapale

Mosebetsi wa Bakohathe (1-20)
Mosebetsi wa Bagershone (21-28)
Mosebetsi wa Bamerari (29-33)
Kakaretso ya palo ya batho (34-49)

4 Jwale Jehova a bua le Moshe le Arone, a re: ² “Balang bara ba Kohathe+ hara bara ba Levi ho ya ka malapa a bona le ho ya ka matlo a bontate ba bona, ³ bohle ba dilemo di 30+ ho ya ho ba dilemo di 50+ ba leng sehlopheng se abetsweng ho sebetsa ka tenteng ya pokano.+ ⁴ Ona ke mosebetsi wa bara ba Kohathe ka tenteng ya pokano.+ Ke mosebetsi o halalelang ka ho fetisisa: ⁵ Ha batho ba hlomolla ditente tsa bona mme ba tloha, Arone le bara ba hae ba kene mme ba theole kgaretene ya sehalalelo+ ebe ba kwahela areka+ ya Bopaki ka yona. ⁶ Ba e kwahele ka matlalo a diqibi* mme ka hodima ona ba ale lesela le leputswa mme ba kenye dipalo+ tseo e jarwang ka tsona. ⁷ Hape ba ale lesela le leputswa hodima tafole ya bohobe ba pontsho+ mme hodima yona ba behe dijana, dikopi, dikotlolo le dijeke tsa nyehelo ya seno.+ Bohobe bo nyehelwang ka mehla+ bo dule bo le hodima yona. ⁸ Ba ale lesela le lefubedu* hodima tsona mme ba kwahele tafole ka matlalo a diqibi* ebe ba kenya dipalo+ tseo e jarwang ka tsona. ⁹ Ka mora moo, ba nke lesela le leputswa mme ba kwahele sedulwana sa lebone+ ha mmoho le mabone a sona,+ ditong* tsa sona, dipane tsa sona tsa mollo+ le dijana tsohle tsa sona tsa oli tse sebediswang ho e hlokomela. ¹⁰ Ba se phuthele ha mmoho le disebediswa tsohle tsa sona ka matlalo a diqibi* mme ba se behe hodima palo eo se jarwang ka yona. ¹¹ Ba ale lesela le leputswa hodima aletare ya kgauta,+ ba e kwahele ka matlalo a diqibi* mme ba kenye dipalo+ tseo e jarwang ka tsona. ¹² Ka mora moo, ba nke disebediswa+ tsohle tseo ba di sebedisang ho sebeletsa ka mehla sebakeng se halalelang. Ba di behe ka hara lesela le leputswa mme ba di kwahele ka matlalo a diqibi* ebe ba di beha hodima palo eo di jarwang ka yona. ¹³ Ba tlose molora* aletareng+ mme ba ale lesela le entsweng ka ulu e pherese hodima yona. ¹⁴ Ba behe disebediswa tsohle tsa aletare hodima yona, tse sebediswang ha ba sebeletsa aletareng: Dipane tsa mollo, difereko, dikgarafu le dikotlolo e leng disebediswa tsohle tsa aletare+ mme ba e kwahele ka matlalo a diqibi* ebe ba kenya dipalo+ tseo e jarwang ka tsona. ¹⁵ Ha batho ba hlomolla ditente tsa bona mme ba tloha, Arone le bara ba hae ba kwahele dintho tsa sebaka se halalelang le thepa yohle ya sebaka se halalelang.+ Ha ba qetile, bara ba Kohathe ba tle ba di nke+ empa ba se ke ba thetsa dintho tsa sebaka se halalelang, ho seng jwalo ba tla shwa.+ Boikarabelo* ba bara ba Kohathe ke ho hlokomela dintho tsena tse amanang le tente ya pokano. ¹⁶ Boikarabelo ba Eleazare+ mora wa moprista Arone ke ho ba molebedi wa oli ya ho kgantsha,+ dibano tse nkgang ha monate,+ nyehelo ya ka mehla ya dijo* le oli e halalelang.*+ Ke yena molebedi wa tabernakele yohle le dintho tsohle tse ka ho yona, ho akarelletsa le sebaka se halalelang le disebediswa tsa sona.” ¹⁷ Jehova a boela a bua le Moshe le Arone, a re: ¹⁸ “Le se ke la etsa hore leloko la malapa a Bakohathe+ le fediswe hara Balevi. ¹⁹ Empa le etse mosebetsi wa lona hantle e le hore ba tswele pele ba phela mme ba se ke ba shwa ka lebaka la ho atamela dintho tse halalelang ka ho fetisisa.+ Arone le bara ba hae ba tle mme ba abele e mong le e mong mosebetsi wa hae le seo a lokelang ho se jara. ²⁰ Ba se ke ba kena ebe ba bona dintho tse halalelang le ha e le ka motsotswana, ho seng jwalo ba tla shwa.”+ ²¹ Yaba Jehova o bua le Moshe, o re: ²² “O bale bara ba Gershone+ ho ya ka matlo a bontate ba bona le ho ya ka malapa a bona. ²³ O ngodise bohle ba dilemo di 30 ho ya ho ba dilemo di 50, ba sehlopheng se abetsweng ho sebeletsa ka tenteng ya pokano. ²⁴ Dintho tsena ke tseo malapa a Bagershone a abetsweng ho di hlokomela le ho di jara:+ ²⁵ Ba jare masela a tente a tabernakele,+ lesela la tente ya pokano, lesela la tente le entsweng ka matlalo a diqibi* le lesela la tente le ka tlasa lona.+ Hape ba jare kgaretene ya monyako wa tente ya pokano,+ ²⁶ masela a lepeletseng a lebala,+ kgaretene ya monyako wa keiti ya lebala+ le potolohileng tabernakele le aletare, dithapo tsa tsona tsa tente le disebediswa tsohle tsa tsona le dintho tsohle tse sebediswang tshebeletsong ya yona. Ona ke mosebetsi wa bona. ²⁷ Arone le bara ba hae e be balebedi ba mosebetsi wohle le mejaro yohle ya Bagershone.+ A ba abele mejaro ena yohle hore e be boikarabelo ba bona. ²⁸ Ena ke tshebeletso eo malapa a Bagershone a tla e etsa ka tenteng ya pokano.+ Ithamare mora wa moprista Arone e be motsamaisi wa mosebetsi wa bona.+ ²⁹ Ha e le bara ba Merari,+ o ba ngodise ho ya ka malapa a bona le ho ya ka matlo a bontate ba bona. ³⁰ O ba ngodise ho tloha ka ba dilemo di 30 ho ya ho ba dilemo di 50, bohle ba sehlopheng se abetsweng ho sebeletsa tenteng ya pokano. ³¹ Tsena ke dintho tseo ba lokelang ho di jara+ mabapi le tshebeletso ya bona ya tente ya pokano: Diforeimi+ tsa tabernakele, dipalo tsa yona,+ dipilara+ tsa yona le ditshehetso tsa yona tse sekoti,+ ³² dipilara+ tse potolohileng lebala, ditshehetso tsa tsona tse sekoti,+ ditshepe* tsa tsona tsa tente+ le dithapo tsa tsona tsa tente ha mmoho le disebediswa tsohle tsa tsona le tshebeletso yohle e amanang le dintho tsena. O ba abele disebediswa tseo ba lokelang ho di jara ho ya ka mabitso a bona. ³³ Ena ke tsela eo malapa a bara ba Merari+ a tla sebeletsa ka yona tenteng ya pokano. Ithamare mora wa moprista Arone+ e be motsamaisi wa mosebetsi wa bona.” ³⁴ Jwale Moshe le Arone le dikgosana+ tsa setjhaba ba ngodisa bara ba Bakohathe+ ho ya ka malapa a bona le ho ya ka matlo a bontate ba bona, ³⁵ bohle ba dilemo di 30 ho ya ho ba dilemo di 50 ba neng ba le sehlopheng se abetsweng ho sebeletsa tenteng ya pokano.+ ³⁶ Palo ya bohle ba ngodisitsweng ho ya ka malapa a bona e ne e le 2 750.+ ³⁷ Bana ke ba neng ba ngodisitswe ho tswa ho malapa a Bakohathe, bohle ba neng ba sebeletsa tenteng ya pokano. Moshe le Arone ba ile ba ba ngodisa ka taelo ya Jehova a sebedisa Moshe.+ ³⁸ Bara ba Gershone+ ba ile ba ngodiswa ho ya ka malapa a bona le ho ya ka matlo a bontate ba bona, ³⁹ bohle ba dilemo di 30 ho ya ho ba dilemo di 50 ba neng ba le sehlopheng se neng se abetswe ho sebeletsa tenteng ya pokano. ⁴⁰ Palo ya bohle ba ngodisitsweng ho ya ka malapa a bona le ho ya ka matlo a bontate ba bona, e ne e le 2 630.+ ⁴¹ Ena ke tsela eo malapa a bara ba Gershone a ileng a ngodiswa ka yona, bohle ba neng ba sebeletsa tenteng ya pokano. Moshe le Arone ba ile ba ba ngodisa ho ya ka taelo ya Jehova.+ ⁴² Bara ba Merari ba ile ba ngodiswa ho ya ka malapa a bona le ho ya ka matlo a bontate ba bona, ⁴³ bohle ba dilemo di 30 ho ya ho ba dilemo di 50 ba neng ba le sehlopheng se neng se abetswe ho sebeletsa tenteng ya pokano.+ ⁴⁴ Palo ya bohle ba ngodisitsweng ho bona ho ya ka malapa a bona e ne e le 3 200.+ ⁴⁵ Ena ke tsela eo malapa a bara ba Merari a ileng a ngodiswa ka yona, bao Moshe le Arone ba ileng ba ba ngodisa ho ya ka taelo ya Jehova a sebedisa Moshe.+ ⁴⁶ Moshe le Arone le dikgosana tsa Iseraele ba ile ba ngodisa Balevi bana bohle ho ya ka malapa a bona le ho ya ka matlo a bontate ba bona. ⁴⁷ E ne e le ba dilemo di 30 ho ya ho ba dilemo di 50 mme kaofela ha bona ba ne ba abetswe hore ba sebeletse tenteng ya pokano le ho jara mejaro ya yona.+ ⁴⁸ Palo ya bohle ba ngodisitsweng e ne e le 8 580.+ ⁴⁹ E mong le e mong o ile a ngodiswa ho ya ka mosebetsi oo a o abetsweng le ho ya ka mojaro wa hae. Ba ile ba ngodiswa ho ya ka taelo ya Jehova a sebedisa Moshe. Ba ngodiswa feela jwalo ka ha Jehova a ne a laetse Moshe.