Tshenolo e yang ho Johanne 18:1-24
18 Ka mora moo, ka bona lengeloi le leng le theoha lehodimong le ena le matla a maholo. Lefatshe la kgantshwa ke kganya ya lona.
2 La hweletsa la re: “O wele! O wele Babilona e Moholo!+ O fetohile sebaka seo bademona ba dulang ho sona le seo bademona* le nonyana e nngwe le e nngwe e nyonyehang le e ditshila di ipatang ho sona.+
3 Ditjhaba kaofela di tahilwe ke veine ya hae e etsang hore batho ba be le takatso e matla ya ho etsa bohlola.*+ Marena a lefatshe a ile a etsa bohlola le yena+ mme borakgwebo* ba lefatshe ba ile ba rua ka lebaka la dintho tse ngata tse turu tseo a ipokeletseng tsona ebile a sa swabele ho di bokella.”
4 Ka utlwa lentswe le leng le tswang lehodimong le re: “Tswang ho yena setjhaba sa ka+ haeba ha le batle ho kenella dibeng tsa hae le ho fumana karolo ya dikotlo tsa hae.+
5 Dibe tsa hae di ngata ebile di fihla lehodimong+ mme Modimo o tla mo ahlolela dintho tse mpe tseo a di entseng.+
6 Le mo tshware ka tsela eo a ileng a tshwara batho ba bang ka yona,+ le mo etse dintho tseo a neng a di etsa ba bang di imenne habedi.+ Ka hara senwelo+ seo a neng a tshetse motswako ka ho sona, le mo tshelle motswako oo habedi.+
7 O lokela ho utlwa bohloko le ho lla hobane o a ikgohomosa ebile o ipokeletse maruo a sa swabe. Ka pelong ya hae o ntse a re: ‘Ke mofumahadi, ha ke mohlolohadi mme nke ke ka utlwa bohloko lekgale.’+
8 Ke ka lebaka leo dikotlo tsa hae di tla tla ka letsatsi le le leng, e leng lefu, ho utlwa bohloko le tlala mme o tla tjheswa lore!+ Jehova* Modimo ya mo ahlotseng o matla.+
9 Marena a lefatshe a ileng a etsa bohlola* le yena le a ileng a phela le yena mabothobothong a hae ao a a bokeletseng a sa swabe, a tla lla le ho bontsha hore a utlwile bohloko ha a bona mosi wa ha a tjheswa.
10 A tla emella thoko hobane a tshaba hore a tla hlokofatswa jwalo ka yena ebe a re, ‘Ho utlwisa bohloko hore ebe o hlahetswe ke ntho e tjena wena Babilona, motse o moholo le o matla+ hobane kahlolo ya hao e fihlile ka tshohanyetso.’*
11 Borakgwebo ba lefatshe le bona ba a lla ba bile ba utlwile bohloko ka lebaka la hae hobane ha ho sa na motho ya tla reka dintho tsohle tseo ba di rekisang.
12 Dintho tseo e ne e le kgauta, silevera, majwe a bohlokwa, diperela, line ya boleng bo phahameng, masela a pherese, masela a silika, masela a mafubedu, ntho e nngwe le e nngwe e entsweng ka lepolanka le nkgang ha monate, ntho e nngwe le e nngwe e entsweng ka lenaka la tlou le e entsweng ka lepolanka la bohlokwa, koporo, tshepe, mmabole,
13 sinamone, dinoko tsa India, dibano, oli e nkgang ha monate, dibano tse tshweu, veine, oli ya mohlwaare, phofo e sitsweng hantle, koro, dikgomo, dinku, dipere, dikariki, makgoba le batho.
14 Dintho tse molemo tseo o di batlang di nkuwe. Dijo tsa hao tse monate le dintho tsa hao tse ntlehadi di nyametse mme batho ba ke ke ba hlola ba di fumana.
15 Borakgwebo ba rekisang dintho tsena ba ileng ba rua ka lebaka la hae ba tla emella thoko hobane ba tshaba ho hlokofatswa jwalo ka yena mme ba tla lla le ho utlwa bohloko.
16 Ba tla re: ‘Ho utlwisa bohloko hakaakang hore ebe motse o moholo o hlahetswe ke ntho e tjee! Motse oo o apere diaparo tse entsweng ka line ya boleng bo phahameng, tse pherese le tse kgubedu. O ikgabisitse ka kgauta, majwe a bohlokwa le diperela.+
17 Maruo a mangata a sentswe ka tshohanyetso.’*
Batsamaisi bohle ba dikepe, bohle ba nkang maeto ka dikepe, basesisi ba tsona le bohle ba phelang ka ho sebetsa lewatleng ba ne ba emeletse thoko.
18 Ba lla haholo hobane ba bona mosi wa ha a tjha yaba ba re: ‘Ha ho na motse o moholo jwalo ka ona.’
19 Ba ile ba itshela ka mobu hloohong yaba ba lla haholo le ho utlwa bohloko mme ba re: ‘Ho utlwisa bohloko hakaakang hore ebe motse o moholo o ile wa fediswa ka nako e kgutshwanyane hakaale!*+ Etswe bohle ba nang le dikepe lewatleng ba ile ba rua ka lebaka la wona.’
20 Wena lehodimo,+ le lona bahalaledi,+ baapostola le baprofeta, le thabele se etsahaletseng motse oo hobane Modimo o o ahlotse ka lebaka la dintho tseo o le entseng tsona.”+
21 Lengeloi le matla la phahamisa lejwe le kang lelwala le leholo yaba le le lahlela ka lewatleng la re: “Babilona motse o moholo o tla lahlelwa tlase ka sekgahla se jwalo mme o ke ke wa hlola o fumanwa.+
22 Ha ho sa tla hlola ho eba le motho ya utlwang motho ya binang, ya binang a letsitse harepa, ya letsang lekodilo kapa terompeta Babilona. Ho ke ke ha hlola ho fumanwa motho ya etsang mosebetsi wa matsoho, le modumo wa lelwala o ke ke wa utluwa.
23 Ha ho sa tla hlola ho eba le lebone le tla kganya ebile ha ho sa tla utluwa lentswe la monyadi le la monyaduwa. Borakgwebo ba hao e ne e le batho ba boemo bo hodimo lefatsheng. Ditjhaba tsohle di kgelositswe ke boloi ba hao.+
24 Ho wona ho ile ha fumanwa madi a baprofeta, a bahalaledi+ le a bohle ba bolailweng lefatsheng.”+
Dintlha tse qetellong ya sehloho
^ Kapa mohlomong: “phefumoloho; moya o tjhefo; mantswe a susumeditsweng.”
^ Kapa: “bahwebi ba yang dibakeng tse fapaneng bakeng sa kgwebo.”
^ Sheba Ntlha ya A5.
^ Ka Segerike: “hora e le nngwe.”
^ Ka Segerike: “ka hora e le nngwe.”
^ Ka Segerike: “ka hora e le nngwe.”
