Tshenolo e yang ho Johanne 19:1-21
19 Ka mora moo, ka utlwa ntho e kang mantswe a phahameng a batho ba bangata ba lehodimong. Ba re: “Rorisang Jah!*+ Modimo wa rona o a pholosa, o na le matla ebile o a hlompheha.
2 O ahlola ka toka le ka botshepehi.+ O otlile letekatse le leholo le sentseng lefatshe ka bohlola* ba lona. O ipheteditse ho lona hobane le bolaile bahlanka ba hae.”+
3 Hanghang ba re ka lekgetlo la bobedi: “Rorisang Jah!*+ Mosi wa lona ha le tjheswa o nyolohela hodimo ka ho sa feleng.”+
4 Baholo ba 24+ le dikerubime tse nne+ tsa kgumama tsa rapela Modimo ya dutseng teroneng tsa re: “Amen! Rorisang Jah!”*+
5 Ka boela ka utlwa lentswe le tswang teroneng le re: “Lona bahlanka bohle ba Modimo ba mo hlomphang,+ ba baholo le ba banyenyane,+ rorisang Modimo wa rona.”
6 Ka utlwa ntho e kang modumo wa metsi a mangata, modumo wa diaduma tse matla le mantswe a batho ba bangata. Ba re: “Rorisang Jah*+ hobane Jehova* Modimo wa rona ya Matla Ohle+ o se a qadile ho busa.+
7 A re thabeng haholo mme re mo tlotliseng hobane letsatsi la mokete wa lenyalo la Konyana le fihlile mme mosadi wa yona o se a itokisitse.
8 O dumeletswe hore a apare diaparo tsa line ya boleng bo phahameng, e kganyang le e hlwekileng ka ha line ya boleng bo phahameng e emela diketso tse lokileng tsa bahalaledi.”+
9 Lengeloi la re ho nna: “Ngola o re: Batho ba menngweng dijong tsa mantsiboya tsa lenyalo la Konyana+ ba tla thaba.” Hape la re: “Tsena ke dipolelo tsa nnete tsa Modimo.”
10 Ka kgumama maotong a lona e le hore ke le rapele empa la re: “Butle, o se ke wa etsa jwalo.+ Rapela Modimo.+ Ke mpa feela ke le mohlanka wa Modimo jwalo ka wena le bana beno ba fuweng mosebetsi wa ho bolela nnete ka Jesu.+ Morero wa boprofeta ke ho bolela nnete ka Jesu.”+
11 Ka bona lehodimo le buleha yaba ke bona pere e tshweu.+ Ya e palameng o bitswa Ya Tshepahalang+ le Wa Nnete,+ o ahlola ka toka ebile o lwana ntwa e lokileng.+
12 Mahlo a hae ekare lelakabe la mollo+ mme o rwetse dikorone tse ngata. O ngotswe lebitso le tsejwang ke yena feela.
13 O apere seaparo se qaphaleditsweng ke* madi mme lebitso la hae ke Lentswe+ la Modimo.
14 Hape, mabotho a lehodimo a ne a mo setse morao a palame dipere tse tshweu, a apere line ya boleng bo phahameng, e tshweu le e hlwekileng.
15 Molomong wa hae ho tswa sabole e telele e bohale+ eo a tlo bolaya ditjhaba ka yona. O tla busa* ditjhaba ka lere la tshepe.+ Hape o hatakela morara o ka sehatelong sa veine sa Modimo ya Matla Ohle se emelang bohale ba hae bo tukang.+
16 Seaparo sa hae se ngotswe lebitso lena seropeng: Morena wa marena le Kgosi ya dikgosi.+
17 Ka bona lengeloi le emeng letsatsing. La hweletsa dinonyana tse fofang hodimo la re: “Tloong le tle dijong tse ngata tsa mantsiboya tsa Modimo.+
18 Le je dinama tsa marena, tsa balaodi ba sesole, tsa banna ba matla,+ tsa dipere le ba di palameng,+ tsa makgoba le bao e seng makgoba, tsa ba banyenyane le ba baholo le dinama tsa batho ba bang bohle.”
19 Ka bona sebata, marena a lefatshe le mabotho a marena a lefatshe a bokane ha mmoho e le hore a tle a lwantshe ya palameng pere le lebotho la hae.+
20 Sebata sa tshwarwa ha mmoho le moprofeta wa bohata+ ya ileng a etsa mehlolo ka pela sona e le ho kgelosa batho ba nang le letshwao la sebata+ le ba rapelang setshwantsho sa sona.+ Ba dihelwa ka letsheng la mollo le sebabole ba ntse ba phela.+
21 Marena le mabotho a ona a bolawa ka sabole e telele e tswileng molomong wa ya palameng pere.+ Dinonyana kaofela tsa kgora dinama tsa bona.+
Dintlha tse qetellong ya sehloho
^ Kapa: “Halelujah.” “Jah” ke kgutsufatso ya lebitso Jehova.
^ Kapa: “Halelujah!” “Jah” ke kgutsufatso ya lebitso Jehova.
^ Kapa: “Halelujah!” “Jah” ke kgutsufatso ya lebitso Jehova.
^ Kapa: “Halelujah!” “Jah” ke kgutsufatso ya lebitso Jehova.
^ Sheba Ntlha ya A5.
^ Kapa mohlomong: “fafaditsweng ka.”
^ Ka Segerike: “disa.”
