Ka lebaka la hore batho ba bangata ba buang puo tse ding ba fallela naheng ya Germany, bahweletsi ba moo ba lokela ho ithuta dipuo tseo e le hore ba ba bollele molaetsa wa Bibele. Dikgweding tse 9 haufinyane tjena, ho se ho thehilwe dihlopha tse 229 tsa dipuo tseo. Bahweletsi ba ka bang 800 ba kena ditlelase tse tshwarwang ka dipuo tse 13 moo ba ithutang dipuo tse 30.

Barababo rona ba bolela molaetsa wa Bibele dibakeng tseo batho bana ba fihlelang ho tsona. Ba sebedisa ditoroli tsa dingolwa dibakeng tse ka hodimo ho tse 200 mme ba se ba fane ka dingolwa tse ka bang 640 000.

 Sehlopha se Busang se ile sa dumella hore ho be le letsholo la ho bolela molaetsa wa Bibele ho tloha ka May ho ya ka July 2016. Bahweletsi ba ka bang 700 ba buang Searabia ba tswang dinaheng tse 7, ba ile ba etela dibaka tse 10 naheng ya Austria le ya Germany, e le hore ba ka bolella batho ba bangata ba moo ba buang Searabia ditaba tse molemo.

Bahweletsi ba 50 ba Phutheho ya Kriol e naheng ya Belize, hangata ba itsamaela ka maoto ha ba ya tshimong. Ke nnete hore boholo ba barababo rona ba moo ba kolla ntsi hanong, ho ntse ho le jwalo, ba rata ho fana. Dilemo tse seng kae tse fetileng, bara bana babo rona ba ile ba qala ho Ithonakela tjhelete ha ba ntse ba le tseleng. Esale ho tloha ka nako eo, mafelong a selemo se seng le se seng ba kopanya tjhelete eo, ba e hlatswe ebe ba e bala.

Le hoja tjhelete e nngwe e se ya boleng bo bokaalo, selemo le selemo ba bokella tjhelete e kaalo ka R3 000. Ba sebedisa tjhelete eo ho kwahela ditshenyehelo tsa Holo ya Mmuso, ha halofo e nngwe ba e romela ho tshehetsa mosebetsi wa lefatshe lohle.

Ka la 5 March 2016, ha Morabo rona Anthony Griffin, e leng moemedi wa ntlokgolo a ne a etetse Burundi, ho ile ha eba le ketsahalo e ke keng ya lebalwa. Lenaneo le kgethehileng le ile la haswa diphuthehong naheng yohle ka kgaso ya radio ya setjhaba. Ho ne ho mametse batho ba dimilione tse ka bang nne!

 Kgaso ena ya radio e ile ya fana ka bopaki mme batho ba bangata ba ne ba e tjhaela monwana. Mohlophisi e mong wa tsa taolo ya kgaso o ile a re: “Mananeo a tjena a a hlokwa!” Mookamedi wa radio yena a re: “Ke le kgothalletsa hore le tswele pele ho hasa mananeo a na kaha a tla sokolla batho.” Esita le bapalami ba neng ba le ka dibeseng le ditheksing ba ne ba mametse lenaneo leo.

Letsatsi pele ho Sehopotso ka selemo sa 2016, barababo rona ba sehlopheng se senyenyane sehlekehlekeng sa Nepal ba ne ba kgathatsehile. Ba ile ba utlwa hore ho tlo ba le konsarete e kgolo ya mmino sekolong se pela holo eo ba neng ba e hirile.

E ne e tlo ba konsarete tse mona tse lerata. Ha barababo rona ba ntse ba hloekisa holo eo ba neng ba tlo ba le Sehopotso ho yona, mohlophisi wa konsarete o ile a re: “Ho tlo tjha mmino wa rona feela bosiung bona.”

Konsarete e ile ya qala mme ho ne ho le lerata le thibang ditsebe. Barababo rona ba ile ba hira dipikara tse kgolo. Le ha ho le jwalo, ho ne ho tshwana feela kaha ba ne ba sa utlwe letho le tswang dimaekrofounong. Boemo bo ne bo nyahamisa e le kannete empa barababo rona ba ile ba bua le Jehova ka bothata bona. Metsotso e 30 pele ho Sehopotso, mmino o ile wa emisa. Ho ile ha ba le ntwa konsarenteng kahoo maponesa a ile a kwala mokete oo. Bara le baradibabo rona ba ile ba ba le Sehopotso ntle ho mathata a letho.

Morabo rona Giuseppe ke pulamadiboho naheng ya Italy. O sebeletsa khamphani e nngwe ya Inthanete a le  lapeng. Selemong se fetileng ka May, o ile a ya sebokeng sa khamphani le batho ba bang ba 70 moo ba neng ba bua ka hore na ba ka ntlafatsa kae mosebetsing wa bona. Mookamedi o ile a hlalosa hore ba ka ithuta ho hongata mosebetsing o etswang ke dikhamphani tse ding tse sebetsang ka diwebsaete. Ka mora moo, o ile a hlahisa setshwantsho botong. Giuseppe o ile a bona eka mahlo a hae a mo thetsa ha a bona ho hlaha leqephe le qalang la websaete ya rona ya jw.org. Mookamedi o ile a re: “Ha ho websaete e tshwanang le ena lefatsheng!” Yaba o qalella ho bua ka yona. O ile a bua ka hore motho o kgona ho kena ha bonolo feela moo a batlang ebile e na le ditshwantsho tse ntle haholo.

 Giuseppe o re: “Basebetsimmoho le nna ba ne ba maketse ha ba bona hore websaete ya rona e na le dipuo tse ngata. Ha seboka se fela, mmanejara waka o ile a re ho Mookamedi le ba bang: ‘Giuseppe ke Paki ya Jehova.’ Yaba Mookamedi o re ho nna: ‘Kannete le etsa mosebetsi o motle. Ha hona khamphani, mokgatlo kapa feme e ka reng ha e batle websaete e tshwanang le ya lona. Tsela eo e leng ka yona e bontsha hore e tlameha e be le sebetsa ka thata hore batho ba e thabele tjena.’ Kannete ena e ne e le thoriso e sa ntshwaneleng. Empa ke ile ka thabela ho bona hore batho ba neng ba sa tsebe letho ka Dipaki Tsa Jehova ba se ba tseba ka tsona. Hona jwale ke se ke bua le basebetsimmoho lenna ka Bibele mme ke ithuta le ba bararo.” Khamphani eo Giuseppe a e sebeletsang e dula e kena websaeteng ya rona.

Jorge ke motjha e mong ya dulang naheng ya Argentina. Maqalong a selemo sa 2010, ngwana e mong ya kenang tlelase le yena o ile a mo pakela. A qetella a se a ithuta Bibele ka buka ya Ha e le Hantle ke Eng Seo Bibele e se Rutang? Ka nako eo e ne e le sebapadi sa bolo. Kahoo o ile a qetella a se a bapalla thimi e nngwe e tsebahalang. Ka April 2014, o ile a kupuwa ho ya bapalla thimi e nngwe ya Germany. E ne e ka o a lora yaba hanghang o dumela kopo eo. Matsatsi pele a ya Germany, mokwetlisi wa hae o ile a re: “O Paki ya Jehova neh? Haeba o ka tsamaya, o ke ke wa thaba. Ke ne ke le Paki ya Jehova le nna ha ke sa le motjha. Yaba ke kopuwa ho ya bapalla thimi e nngwe naheng ya Asia. Ba ile ba ntshepisa mafatshe le mahodimo yaba ke ya nkeha.  Ke ile ka tsamaya le ba lelapa leso mme dintho tseo ba neng ba ntshepisitse tsona e ne e le toro feela.” Jorge o re: “Mantswe a mokwetlisi a ile a etsa hore ke fetole tsela eo ke neng ke nahana ka yona. Kahoo, ke ile ka etsa qeto ya ho se ye Germany. Ka 2015, ke ile ka ba mohweletsi mme hamorao ka kolobetswa.”

Ka September 2015, ho ile ha ba le Kopano ya Setereke ya “Etsisang Jesu!” Kampala, Uganda. Batho ba ile ba thaba haholo ha Morabo rona, Mark Sanderson wa Sehlopha se Busang a lokolla Bibele ya Phetolelo ea Lefatše le Lecha ea Mangolo a Halalelang ka Seluganda.

Motho e mong ya ntseng a ithuta Bibele o ile a re: “Kannete Bibele ena ke mpho! Nakong eo batho ba neng ba itokiselletsa ho tla ha mopapa, ho ile ha rekiswa dirosari, e le ho eketsa mokotla wa kereke mme e le nngwe e ne e le R433. Kaha ho ne hothwe dirosari tseo di a halalela, batho ba ne ba di batla empa ka maswabi ba se na tjhelete. Empa nna ke fumane mpho e halalelang mahala. Jehova o file motho e mong le e mong ya neng a le kopanong mpho ena, ebile motho o ne a ntsha seo a ka se kgonang. Tsatsi le leng le leng ha ke bala Bibele ka puo yaka, seo ke se balang se fihla pelong. Kannete ena ke tlhohonolofatso! Ke leboha Jehova haholo ka ho mpha Bibele.”

Baetapele ba kereke e nngwe e Kinshasa e leng motsemoholo wa naha ya Congo, ba ne ba batla ho senya Dipaki Tsa Jehova lebitso. Kahoo, ba ile ba re ho batho, dingolwa tsa rona di na le bodemona. E le ha ba batla  hore batho ba ba kgolwe, ba ile ba re “www,” e websaeteng ya rona, e tsamaisana le nomoro ya 666 e hlahang lengolong la Tshenolo. (Tšen. 13:18) Ka lebaka leo, batho ba neng ba ithuta Bibele ba ile ba kgaotsa ho ithuta.

Ka mora hore banyalani ba bang ba bopulamadiboho ba rapelle taba ena, ba ile ba memela baithuti ba Bibele hammoho le balekane ba bona ntlong ya bona. Ho ile ha tla banyalani ba bararo mme kamora hore ba je, ba shebella video ya Lipaki Tsa Jehova—Li Hlophiselitsoe ho Bolela Litaba Tse Molemo. Dintho tseo banyalani bao ba ileng ba ithuta tsona videong eo, di ile tsa etsa hore ba bone hore dingolwa tsa rona ha di na bodemona. Bekeng e latelang, monna wa mme e mong ya neng a ithuta Bibele o ile a fana ka monehelo wa R1 445.00 le hoja yena a ne a sa ithuti.

Le hoja bara le baradibabo rona ba motseng o mong o ka thoko naheng ya Papua New Guinea ba sena Inthanete, ba rata ho ithuta dipina tse ntjha tsa Mmuso. Ka lebaka leo, Phutheho ya Mundip e romela morabo rona e mong toropong e nang le Inthanete. E le hore morabo rona a fihle moo, o lokela ho tsamaya dihora tse pedi ka maoto e be o tsamaya dihora tse ding hape tse pedi ka bese. Ha a fihla, o kena Inthaneteng e be o ngola mantswe a dipina fatshe mme ha a kgutlela Holong ya Mmuso o a ntshetsa botong e le hore batho ba ka ingolla ona. Ka tsela ena, bara le baradibabo rona ba kgona ho bina dipina tsena ha ba le dibokeng. Ba thabela ho bina le diphutheho tse ding lefatsheng lohle, e le hore ba rorise Jehova.