KA LABORARO la la 23 September 2015, Sehlopha se Busang se ile sa tsebisa lelapa la Bethele lefatsheng lohle ka diphetoho tse neng di tla ba teng e le hore ho ka sebediswa tjhelete dinthong tse ding. Yaba ka Moqebelo wa la 3 October 2015, Sehlopha se Busang sa boela sa hlalosa lebaka la diphetoho tseo ka hore: “Ho Bafilipi 1:10, re bolellwa hore re ‘nepisise dintho tsa bohlokwa haholo.’ Ka hona, jwaloka Sehlopha se Busang, re batla ho latela keletso ena e le hore re ka behella mesebetsi ya bohlokwa ka pele bakeng sa ho tiisa tumelo ya lona  bara le baradibabo rona le hore ditaba tse molemo di ka bolelwa lefatsheng lohle.”

Morabo rona Stephen Lett wa Sehlopha se Busang o ile a hlalosa ka mantswe a latelang ho JW Broadcasting: “Sehlopha se Busang se ikemiseditse ho sebedisa tjhelete tshimong, ke ka hona se ileng sa bona ho loketse hore se fokotse palo ya ditho tsa Bethele lefatsheng lohle. Ka mohlala, ditshebeletso tse ding tse neng di etswa Bethele di fokoditswe mme tse ding di fedisitswe. Sena se tla hafola palo ya basebeletsi ba Bethele.”

Kahoo, ho tloha ka September 2015, ditho tsa Bethele tse ka bang 5 500 lefatsheng lohle di kgutletse tshimong. Ke nnete hore batho ba bangata ba ile ba ameha ka lebaka la diphetoho tsena, le ha ho le jwalo, Jehova o ba hlohonolofaditse mme mosebetsi wa boboledi le wa ho ruta o ile wa atleha le ho feta.

Banyalani ba bang ba Sri Lanka ba ileng ba fuwa kabelo ya ho ya tshimong, ba ile ba nka seo e le monyetla wa ho bontsha hore ba na le tumelo e matla ho Jehova le hore ba tshepa mokgatlo wa hae. Ba ile ba re: “Re ne re sa tsebe se larileng ka pele ho rona. Empa re ne re kgodisehile hantle hore Jehova a ke ke a re lahla. Ka lebaka leo re ile ra rapela ra re: ‘Jehova hle, re kopa o re thuse hore re be bopulamadiboho ba kamehla ho sa tsotellehe maemo a ka hlahang.’ Ke nnete hore kgweding ya pele, re ne re sena tjhelete e kaalo. Le ha ho le jwalo, re ne re utlwa hore jwale Jehova o re hlokometse ebile o a re rata. Hona jwale re se re fumana tjhelete e kenang kgwedi le kgwedi. Re phathahane, ka ho theohela, ho etsa mosebetsi wa ka tlung le bopulamadibo.  Empa re kgona ho sebedisa nako hantle ka lebaka la kwetliso eo re e fumaneng Bethele. Ha hona ntho e monate bophelong jwalo ka ho sebeletsa re le bopulamadibo e le hore re thuse batho ho tseba nnete.”

Ditho tse ding tsa Bethele naheng ya Colombia tse ileng tsa fuwa kabelo e ntjha, di ithutile puo e nngwe yaba di ya dibakeng tse hole hore di ilo bolela ditaba tse molemo moo. Bara le baradi bana babo rona, ebile tlhohonolofatso diphuthehong tseo ba leng ho tsona. Ha mopotolohi e mong a bua ka banyalani ba bang ba potolohong eo a e sebetsang o re: “Bara le baradibabo rona ka phuthehong, ba ananela thuso ya bona haholo. Ditho tsa phutheho di ntlafaditse boboleding mme barababo rona ba kwetliseditswe ho etsa mesebetsi e mengata ya phutheho.” Bara le baradibabo rona ba bang ba neng ba sebeletsa Bethele pele, ba ithaopela ho ya thusa Bethele ka matsatsi a itseng.

Morabo rona e mong ya sebeleditseng Bethele ka dilemo tse 31 naheng ya Japan, o ile a iswa phuthehong e nang le baholo ba babedi feela. Kaha ditho tsa phutheho eo di ne di tlo lokisa Holo ya Mmuso, morabo rona o ile a kgona ho thusa hobane ka nako eo o ne a sa sebetse. Empa nakwana pele ho lokiswa Holo ya Mmuso, ho ile ha ba le tshisinyeho ya lefatshe toropong ya Kumamoto, e leng moo Holo ya Mmuso e neng e le teng. Morabo rona o ile a boela a kenya letsoho ho tataisa mosebetsi wa diphallelo le ho etsa maeto a bodisa. O di beha tjena: “Ha ke sheba morao, ke a bona hore Jehova o ile a mpeha sebakeng se nepahetseng ka nako e loketseng.”

 Banyalani ba bang ba neng ba sebeletsa lekaleng la Australasia e leng Phil le Sugar ba re: “Ha re fuwa kabelo e ntjha, re ne re ikemiseditse ho phela bophelo bo itekanetseng. Re ile ra kopa Jehova hore a re tataise ele hore re etse diqeto tse molemo le hore a di hlohonolofatse. Seo re neng re se batla fela e ne e le ho ya tshimong ya puo e nngwe. Jehova o ile a fela a hlohonolofatsa diqeto tsa rona mme a re thusa hore re mo sebeletse ka pelo yohle!” Hona jwale ba sebeletsa sehlekehlekeng sa Samal se Davao naheng ya Philippines, sehlopheng sa puo ya Senyesemane, moo ho nang le bahweletsi ba 34 le bopulamadiboho ba 9. Ba se ba ena le diaterese tsa batho ba thabelang ho ithuta Bibele tse ka bang 120. Phil le Sugar ba re: “Kannete dikgolo di sa tla! Re ya thaba hore ebe re ile ra beha tshepo ya rona ho Jehova. Hona jwale re se re na le tumelo e matla le hofeta!”

Moradiwabo rona e mong ya neng a sebeletsa Bethele naheng ya Russia, ya ileng a fuwa kabelo ya ho ba pulamadiboho e kgethehileng o re: “Bopulamadiboho bo mphile monyetla wa ho kenya letsoho mosebetsing wa bohlokwa ka ho fetisisa, o ke keng wa phetwa, e leng wa ho ruta batho ka Mmuso wa Modimo. Ke thabiswa ke ho sebediswa ke Jehova.” Ha re bua tjena, o ithuta Bibele le batho ba 6 ba tswang Iraq, Nigeria, Sri Lanka, Syria, le Zambia.

Ditho tse ngata tsa Bethele e naheng ya Zambia, tse ileng tsa fuwa kabelo e ntjha, di re di thabela ho kenya letsoho mosebetsing ona o kgathollang wa boboledi. Andrew le mosadi wa hae le bona ke bopulamadiboho.  Ba re: “Nakwana kamora hore re fuwe kabelo e ntjha, re ile ra thusa batho ba babedi ba neng ba sa tsebe ho bala le ho ngola. Hape haufinyane moshanyana e mong eo re ithutang Bibele le yena ya dilemo di 10, o tlo fana ka puo ya hae ya pele sebokeng sa hara beke. Ho feta moo, banyalani ba bang bao re ithutang Bibele le bona, ba ile ba tla Sehopotsong mme haesale ho tloha ka nako eo, ha ba foswe ke diboka. Ba tswela pele hantle. Ke ka thuso ya Jehova feela, re finyelletseng dintho tsena.”

Edson le Artness, le bona ke banyalani ba Zambia. Ba ile ba fuwa kabelo e ntjha kamora dikgwedi tse itseng feela ba nyalane. Artness o re: “Kwetliso eo re e fumaneng ha re ntse re le Bethele, e re thusitse hore re sebedise tjhelete hantle le ho dula re se na dikoloto. Ha re ikwahlayele taba ya hore ebe re ile ra sebeletsa Bethele. Re ithutile ho fetoha le maemo e le hore re kgone ho sebediswa ke Jehova hohle moo a batlang hore re ye teng. Re se re ena le tumelo e matla ebile re ikemiseditse ho tshepahalla Jehova dinthong tsohle.”