Maqalong a bo1990, diphutheho tse ngata Georgia di ne di e na le moholo kapa mohlanka ya sebeletsang a le mong. Haele hantle bahweletsi ba ne ba arotswe ka dihlopha kaha ba ne ba dula dibakeng tse arohaneng haholo.

Joni Shalamberidze le Pavle Abdushelishvili, ba neng ba sebeletsa tshimong e ka thoko, ba ile ba abelwa ho ya thusa Telavi e leng toropo ya Kakheti. Phuthehong ya moo ho ne ho e na le bahweletsi ba 300, empa ho se na moholo. E ne e arotswe ka dihlopha tse 13 tse neng di kopanela dibakeng tse sa tshwaneng.

 Joni le Pavle ba ile ba bona lebaka le neng le sitisa barababo rona hore e be baholo le bahlanka ba sebeletsang. Joni o re: “Barababo rona ba bangata ba ne ba e na le masimo le dirapa tsa morara. Mahaeng ho tlwaelehile hore baahisane ba thusane ha ba sebetsa masimong, ka lebaka leo barababo rona ba ne ba qeta nako e ngata ba e na le batho bao e seng Dipaki.”—1 Bakor. 15:33.

Joni le Pavle ba ile ba etsa tlhahiso ya hore barababo rona ba thusane ha ba lema. Ka ho etsa jwalo ba ne ba tla thabela setswalle ha ba ntse ba sebetsa masimong. (Moek. 4:9, 10) Joni o re, “Lerato la rona la bara ba motho le ile la e ba matla.” Ha Joni le Pavle ba tloha Kakheti dilemo tse tharo hamorao, ho ne ho se ho e na le baholo ba 5 le bahlanka ba sebeletsang ba 12.

Kaha mosebetsi wa ho bolela o ne o ntse o thibetswe ho fihlela maqalong a bo1990, Dipaki di ne di ba le diboka tsa Thuto ya Bibele ya Phutheho le Toya ya ho Lebela ka dihlopha tse nyane. Le hoja diboka tsena di ne di kgothatsa, bahweletsi ba ne ba ntse ba hloka ho kwetlisetswa tshimo.

Ha mmuso o neng o busa Georgia o fela, mokgatlo wa Jehova o ile wa fana ka tataiso ya hore diphutheho di be le seboka sa Sekolo sa Tshebeletso sa Puso ya Modimo le sa Tshebeletso.

Naili Khutsishvili le ausi wa hae Lali Alekperova, ba hopola dinako tse monate tseo ba bileng le tsona dibokeng tseo. Lali o re: “Ho ne ho le monate haholo. Motho e mong le e mong o ne a thabetse ho bona ha baradibabo rona le bona ba fana ka dipuo dibokeng.”

Naili o re: “Pontshong e nngwe monga ntlo o ne a ntse a bala koranta sethalleng, yaba motho o a kokota. O ne a  kokota monyakong o pela sethalla wa holo. Ha monga ntlo a re ‘kena,’ baradibaborona ba babedi ba ile ba kena ka monyako oo mme ba fetela sethalleng.” Lali o boetse o re: “Le hoja ka dinako tse ding ho ne ho etsahala dintho tse sa tlwaelehang dibokeng tseo, di ile tsa re thusa ho ntlafatsa bokgoni ba rona ba ho ruta.”

Barababo rona ba mmalwa ba ile ba qeta dilemo tse ngata ba fetolela dingolwa tsa Bibele malapeng a bona. E le ho etsa dingolwa tse ngata, barababo rona ba ile ba hira dikhaphani tse printang e le hore di ba etsetse dimakasine ka theko e tlaase.

Barababo rona ba ne ba etsa dipatlisiso ha ba lokisetsa sengolwa se ilo printwa. Ba ne ba fetolela dingolwa ka Segeorgia, ba di thaepa le ho etsa hore di tshwane le tsa Senyesemane. Barababo rona ba ne ba bokella dipapiso ho tswa dimakasineng tsa pele ebe ba di thaepa. Qetellong ba ne ba seha mongolo o motle o hlahang dikoranteng ebe ba o mamaretsa ka ntle makasineng. Makasine o ne o se o loketse ho printwa.

Ha nako e ntse e eya dikhompiyutha di ile tsa eba teng, kahoo batjha ba babedi e leng Levani Kopaliani le Leri Mirzashvil ba ile ba ya sekolong e le hore ba ithute ho di sebedisa. Leri o re: “Re ne re sa tsebe dintho tse ngata ka dikhompiyutha mme ka dinako tse ding dintho di ne di sa tsamaye hantle. Empa Jehova o ile a re thusa, kahoo re ile ra kgona ho thaepa le ho printa dimakasine.”

Ho sa tsotellehe mathata ao ba kopaneng le ona, diphutheho tse ngata Georgia, di ile tsa qala ho fumana dimakasine tse ntle tse nang le mebala. Ha nako e ntse e ya, ho ile ha e ba thata ho etsa dimakasine tse lekaneng hobane  palo ya batho ba di hlokang e ne entse e eketseha. Empa Jehova o ile a fa bahlanka ba hae ba Georgia tataiso, a sebedisa mokgatlo wa hae.

Kopano e ileng ya ba ka 1992, St. Petersburg, naheng ya Russia, e ile ya etsa hore barababorona ba kopane le baemedi ba lekala ba tswang Germany. Genadi Gudadze o re :“Ba ile ba re hlalosetsa hore na mosebetsi wa phetolelo o etswa jwang. Ba ile ba boela ba re bolella hore haufinyane re tla fumana thupelo e tswang lekaleng Germany, e tla re thusa hore re kgone ho fetolela.”

Ho printa dingolwa tsa Bibele ka puo ya Segeorgia ho ne ho se bonolo. Kaha Segeorgia e ne e le puo e sa tshwaneng le tse ding, lenaneo la mokgatlo le sebediswang ha ho fetolelwa, e leng MEPS le ne le sa kgone ho sebedisa ditlhaku tsa Segeorgia. Kahoo, ho ile ha tlameha ho etswe mongolo o motjha e le hore dingolwa di etswe le ho printwa ka Segeorgia.

Lelapa la ha Datikashvi le ile la fallela United States mafelong a selemo sa 1970. Hamorao Marina e leng moradi e mong wa ba ha Datikashvi o ile a ithuta nnete. Marina o ile a thusa barababorona ba Bethele e Brooklyn ho etsa litlhaku tsa Segeorgia e le hore ba ka di kenya lenaneong la MEPS. Ka mora nakwana, dipampitshana tse seng kae hammoho le bukana ya Senyesemane ya “Look! I Am Making All Things New” di ile tsa printwa, Germany.

Ka 1993, Michael Fleckenstein le mosadi wa hae Silvia ba tswang ofising ya lekala Germany, ba ile ba fihla Tbilisi e le hore ba tlo bula ofisi ya phetolelo. Michael. o re: “Ke ne ke ntse ke hopola dintlha tseo re ileng ra bua ka tsona  ha re le kopanong, St. Petersburg. Ha re fihla Tbilisi, kamora likgwedi tse 18 feela re tswa kopanong eo, re ile ra makala ha re bona hore ho se ho ena le sehlopha sa bafetoledi se sebetsang hantle!”

Kamora dikgwedi tse seng kae, bafetoledi ba 11 ba ne ba se ba sebeletsa diofising tse mohahong o mong o monyenyane. Ruri ke ho thabisang ho bona kamoo mokgatlo wa Jehova o thusitseng bara le baradibabo rona ba Tbilisi ka hore e be ba ile ba fumana dingolwa tse ba thusitseng hore ba dule ba ena le kamano e ntle le Jehova!

Kamora hore puso ya Soviet Union e fele, ho ile ha e ba le dintwa tsa lehae dinaheng tse ngata ho akarelletsa le Georgia. Ka lebaka leo ho ne ho le thata ho bile ho le kotsi ho etela dibakeng tse ding.

Ka November 1994, Aleko Gvritishvili le bara ba bang babo rona ba babedi ba ne ba tshelela karolong e nngwe ya naha ha sehlopha se neng se na le dibetsa sa banna se ba thibela mme se ba laela hore ba tswe ka koloing. Aleko o re: “Ba ile ba kwata ha ba bona dingolwa tsa rona tsa Bibele.  Ba ile ba re re eme ka laene jwalo kaha eka ba tlo re bolaya. Re ile ra rapela Jehova ka tiyo. Kamora hoo e ka bang dihora tse pedi, e mong wa bona o ile a re, ‘Nkang dingolwa tsena tsa lona le tsamaye, empa ha le ka kgutla feela re tla tjhesa koloi ena ya lona re be re le bolaye.’”

Ho sa tsotellehe mathata ao, barababorona ba ile ba tswelapele ho tsamaisa dingolwa tsa Bibele. Moraborona Zaza Jikurashvili o ile a sebetsa ka thata e le hore a ise dingolwa tsa Bibele Georgia, o re: “Re ne re tseba hore barababo rona ba hloka dingolwa tsa Bibele. Basadi ba rona ba ile ba re thusa haholo.”

Aleko o re: “Barababo rona ba bangata ba neng ba tsamaisa dingolwa tsena e ne e le dihlooho tsa malapa.” Ke eng e ba thusitseng hore ba sebetse ka thata hakaale ho sa tsotsellehe dikotsi tse neng di ka nna tsa ba hlahela? Aleko o re: “Ntho ya bohlokwa e ileng ya re thusa ke hobane re ne re rata Jehova haholo. Re ne re bile re batla ho etsisa Jehova ka ho kgathalla bara le baradibabo rona.”

Ka lebaka la boitelo ba bara le baradibabo rona batho ba ile ba tswela pele ho fumana dingolwa le hoja ho ne ho le thata dilemong tseo. Hamorao barababo rona ba ile ba hlokomela tsela e molemo le e sireletsehileng ya ho tsamaisa dingolwa ho tloha Germany ho ya Georgia.

Ha maemo a dipolotiki a kokobela ka 1995, Dipaki di ile tsa etsa ditokisetso tsa ho ba le kopano ya pele ya setereke. Lehlabuleng la 1996, baeti ba ka bang 6 000 ba neng ba tswa dibakeng tsohle tsa Georgia ba ile ba ya kopanong ya setereke ditoropong tse tharo, e leng Gori, Marneuli le Tsnori.

Kopano e neng e le toropong ya Gori e ile ya e ba monate  hoo ba bileng teng ho yona ba ntseng ba e hopola ho fihlela kajeno. Sena se ile sa ba hopotsa Sehopotso seo ba kileng ba ba le sona ka selemo se seng ha ba ne ba sa nahane hore batho ba ka tlala holo eo ba neng ba e hirile. Lekgetlong lena ba ne ba lebeletse batho ba fetang 2 000 ho tla kopanong, empa ba ne ba sa fumane sebaka se boholo bo lekaneng. Ba ile ba etsa qeto ya ho tshwarela kopano ka ntle haufi le motse wa Gori, pela dithaba tse ntle.

Morabo rona Kako Lomidze, eo e neng e le setho sa komiti ya kopano o re: “Kamora kopano bara le baradibaborona ba ile ba qeta nako ba bina le ho thabela botswalle. Sena se ile sa bontsha bohle hore batho ba Modimo ba kopantswe ke bonngwe le lerato.”—Joh. 13:35.

Maqalong a 1996, ho ile ha etswa ditokisetso tsa hore balebedi ba potoloho ba etele phutheho e nngwe le e nngwe beke kaofela. E le ho finyella seo, ho ile ha kgethwa balebedi ba potoloho ba bang ho potoloha ka botjhabela le bophirimela ba Georgia.

Ho hlakile hore, ‘mosebetsi o lerato’ le botshepehi ba balebedi ba potoloho di ile tsa thusa diphutheho ho hola le ho latela tataiso ya Modimo haholwanyane. (1 Bathes. 1:3) Ho tloha ka 1990 ho ya ho 1997, ho ile a e ba le keketseho e makatsang. Ka 1990 bahweletsi ba ne ba le 904 empa dilemo tse 7 hamorao ba ile ba eba 11 082.

Tswelopele e ileng ya qala dilemong tse mashome tse fetileng, e ne e se e bonahala ho batho bohle, mme molaetsa o ile wa fihla dikarolong tsohle tsa naha. Seo barababo rona ba Georgia ba ileng ba se latswa e ne e se letho ha se bapiswa le dithlohonolofatso tseo Jehova a neng a tla ba fa tsona hamorao.