Bara le baradibabo rona ba Georgia, ha ba a ka ba tshoswa ke letho empa ba ile ba nna ba ya dibokeng. Baholo ba ile ba nka mehato ya ho sireletsa bahweletsi. Moraborona André Carbonneau wa Canada, eo e neng e le mmuelli wa molao wa bara le baradibabo rona ba Georgia o re: “Hangata morabo rona e mong o ne a ema haufi le moo diboka di kenetseng teng a tshwere selefouno. Haeba a ne a bona sehlopha sa batho se tlo ba hlasela o ne a tsebisa baholo hanghang.”

Nako le nako kamora hore barababo rona ba hlaselwe, baemedi ba babedi ba lekala ba ne ba ba etela ho ya ba matlafatsa. André o re: “Ho e na le hore baemedi ba lekala ba fumane bara le baradibabo rona ba nyahame, ba ne ba ba fumana ba bososela mme ba thabile.”

Batho ba neng ba sa hlaselwa, ho akarelletsa le ba neng  ba ithuta Bibele, ba ne ba tshehetsa bara le baradibabo rona. Andre o hopola a buisana le mosadi e mong ya neng a le haufi le ho hlahlobelwa tshimo. Mosadi eo o ile a re ho yena, “Ha ke ntse ke shebelletse ha Dipaki di hlaselwa thelevisheneng, ke ile ka bona phapang pakeng tsa Bakreste ba nnete le ba bohata, kahoo ke batla ho ba Mokreste wa nnete.”

Bahweletsi ba ile ba bontsha sebete le tumelo e matla ka ho tswela pele ba etsa mosebetsi wa boboledi le hoja ho ne ho le thata. Batho ba neng ba buella bara le baradibabo  rona makgotleng, le bona ba ile ba bontsha tumelo e tshwanang.

Hangata Dipaki di ne di buuwa hampe metjheng ya ditaba, ho ne ho thwe di qhala malapa, di hana ho phekolwa ebile di kgahlanong le Mmuso. Batho ba neng ba leka ho buella Dipaki Tsa Jehova lekgotleng la dinyewe ba ne ba ipeha kotsing ya ho buuwa hampe le ho fellwa ke mosebetsi.

John Burns, e leng mmuelli wa Dipaki ya hlahang ofising ya lekala ya Canada ya ileng a thusa barababo rona ba Georgia o re: “Bara le baradibabo rona bao e neng e le  babuelli sebakeng seo, ba ile ba ithaopa ho tla thusa. Ho sa tsotellehe hore na seo se ne se kanna sa etsa hore ba fellwe ke mesebetsi hakae, ba ile ba e ba sebete mme ba itsebahatsa hore ke Dipaki Tsa Jehova.” Ba ile ba thusa “ho sireletseng le ho theheng ka molao ditaba tse molemo.”—Bafil. 1:7.

Dipaki Tsa Jehova di ne di ntse di hloriswa. Kahoo ho tloha ka la 8 January, 2001, di ile tsa etsa boipiletso ba hore di sireletswe kgahlanong le ditlhaselo tseo le hore bohle ba molato ba qoswe.

Morabo rona Burns o hlalosa sepheo sa boipiletso bona, o re: “Re ne re batla batho ba bone hore ha se motho e mong le e mong ya kgahlanong le Dipaki, le hore ke sehlopha se senyenyane feela sa batho ba tjhesehelang bodumedi se bakang ditlhaselo tsena.”

 Dibekeng tse pedi feela, batho ba ka bang 133 375 ho hlaha dikarolong tsohle tsa Georgia, bao boholo ba bona e neng e le Maorthodox ba ile ba saena lengolo la boipiletso. Ke nnete hore lengolo lena la boipeletso le ile la fihla ho Mopresidente Shevardnadze, le ha ho le jwalo ditlhaselo ha di a ka tsa kgaotsa. Batho ba tjhesehelang bodumedi ba ile ba tswela pele ho hlasela Dipaki.

Le hara ditlhaselo tsena, Jehova o ile a tswela pele ho hlohonolofatsa batho ba hae. Ha dira di ntse di hlorisa bahlanka ba Jehova, o ile a tswela pele ho ntsha batho bodumeding ba bohata le ho ba hulela mokgatlong wa hae.

Babilina Kharatishvili e bile setho sa kereke ya Orthodox e Georgia ka dilemo tse ngata. Ha a se a le dilemo tse kabang 30, o ile a tsamaya dibaka tse ngata a ntse a ruta batho ka hore na bahalaledi ba phela jwang.

Empa Babilina o ne a batla ho tseba se eketsehileng ka Modimo. Kahoo o ile a etsa qeto ya ho ya ditlelaseng tsa kwetliso tsa kereke ya Orthodox e Georgia. Ka letsatsi le leng moruti o ile a bontsha bamamedi ba hae buka ya Tsebo e Isang Bophelong bo sa Feleng yaba o ba kgothalletsa hore ba e kope ho Dipaki Tsa Jehova. O ile a re, “Buka ena e tla le ruta dintho tse ngata ka Bibele.”

Babilina o ile a tshoswa ke taba ena haholo. Haesale a sa batle ho kopana le Dipaki Tsa Jehova, empa jwale ke moo moruti o se a re ba lokela ho kopa dibuka tsa tsona! O ile a re, ‘Haeba ke lokela ho ithuta ka Modimo ho Dipaki Tsa Jehova, jwale ke hobaneng ha ke ntse ke senya nako ya ka mo?’ Hanghang o ile a ikopanya le Dipaki Tse Jehova tse motsemoholo Poti yaba o qala ho ithuta Bibele.

 Ha Babilina a ntse a ithuta dintho tse ngata ka Bibeleng, o ile a qala ho etsa diphetoho bophelong ba hae. O ile a re: “Ha ke hlokomela hore Bibele e re ha ke a lokela ho rapela ditshwantsho, ke ile ka di tlohela ka ho feletseng. Ke ne ke kgodisehile hore ha ke di tlohela ke etsa ntho e nepahetseng.” Ha a se a atametse dilemo tse 80, Babilina o ile a kgetha ho ba e mong wa Dipaki tsa Jehova.

Ka bomadimabe, ka 2001, Babilina o ile a kula haholo yaba o hlokahala le pele a kolobetswa. Le ha ho le jwalo hamorao setloholo sa hae, Izabela, o ile a kolobetswa mme hona jwale o sebeletsa Jehova ka botshepehi.

Eliso Dzidzishvili o ne a le dilemo di 28 ha a etsa qeto ya ho ba lesistere. Kaha ho ne ho se na matlo a masistere haufi le moo a neng a dula teng Tkibuli, ka 2001 o ile a fallela Tbilisi. Ha a ntse a batla mosebetsi ntlong ya masistere, o ile sebetsa ka nakwana e le titjhere. E mong wa  baithuti ba hae e ne e le moradi wa Paki ya Jehova e nngwe e bitswang Nunu.

Eliso o re: “Re ne re atisa ho buisana ka Bibele. Nunu o ile a mpontsha ditemana tse ngata tsa Bibele, empa ke ne ke dula ke buella bodumedi ba Orthodox ka tjheseho. Ka letsatsi le leng o ile a mpalla bukana ya Ke Eng Seo Molimo a se Hlokang ho Rōna? Ha re ntse re e bala mme re sheba le mangolo a bontshitsweng, ke ile ka hlokomela hore ho rapela ditshwantsho ke ho tlola molao wa Modimo ka boomo.”

Ka letsatsi le leng Eliso o ile a ya kerekeng yaba o botsa moruti dipotso. Tsela eo moruti a ileng a mo arabela ka yona, e ile ya mo bontsha hore dithuto tse neng di rutwa kerekeng, e ne e se nnete di bile di sa thehwa Bibeleng. (Mar. 7:7, 8) Kaha o ne a kgodisehile hore o fumane nnete, Eliso o ile qala ho ithuta Bibele le Dipaki Tsa Jehova mme kamora nakwana a kolobetswa.

Ka 2001, diphutheho di ne di eketseha mme ho ne ho hlokahala dibaka tse loketseng tsa borapedi. Ho hakanngwa hore ho ne ho hlokahala Diholo Tsa Mmuso tse ka bang 70. Ka lebaka lena ho ile ha qalwa letsholo la ho haha Diholo tse eketsehileng tsa Mmuso le hoja batho ba ne ba hanyetsa naheng eo.—Esdr. 3:3.

Sehlopha sa kaho se ile sa qala ho ntjhafatsa moaho o neng o sebediswa ke diphutheho tse ngata tsa Tbilisi. Kamora moo ho ile ha hahuwa dibaka tse pedi tsa borapedi, se seng Tbilisi mme se seng Chiatura, karolong e ka bophirimela ya Georgia.

Morabo rona Tamazi Khutsishvili, ya ileng a thusa ka mosebetsi wa kaho Chiatura o re: “Re ne re sebetsa moo re le 15 letsatsi le letsatsi. Ho e so ye kae, ke ha batho bohle ba sebakeng seo ba se ba tseba hore re ntse re haha Holo ya Mmuso. Re ile ra utlwa menyenyetsi ya hore ho na le batho ba batlang ho tla senya Holo ena eo re ntseng re e haha.”

 Na mosebetsi oo o ne o ka atleha le hoja batho ba leka ho o thibela? Tamazi o re: “Re ile ra tswela pele ka mosebetsi wa rona mme ra qeta ho haha kamora dikgwedi tse tharo. Ke nnete hore re ne re dula re tshoswa, empa ha ho mohla bahanyetsi ba ileng ba tla.” *

Ka October 2003, ho ile ha qadiswa mosebetsi wa kaho toropong ya Samtredia. Batho ba tjhesehelang bodumedi ba ile ba boela ba tshosa Dipaki Tsa Jehova. Mabota a ne a sa tswa hahwa mme taka e ne e sa ntse e le metsi ha bahanyetsi ba tla mme ba diha marako.

Le ha ho le jwalo, ka November 2003, dintho di ile tsa fetoha. Mmuso o motjha o ile wa dumella hore  madumedi a rapele ka bolokolohi. Kahoo, sena se ile sa etsa hore ditho tse neng di tjhesehela bodumedi tsa kereke ya Orthodox tse neng di hlasetse Dipaki Tsa Jehova di kwallwe teronkong.

Nakwana kamora hore mahloriso a fele, bahlanka ba Jehova ba Georgia ba ile ba hlohonolofatswa haholo. Kopanong ya setereke ya 2004, ho ile ha lokollwa Phetolelo ea Lefatše le Lecha ea Mangolo a Segerike a Bakreste ka Segeorgia.

Ketsahalo e nngwe e sa lebaleheng ke e ileng ya etsahala ka 2006, Kopanong ya Setereke ya “Topollo e Atametse!”  Batho bohle ba ne ba thabile ha ba utlwa hore Geoffrey Jackson, eo e leng setho sa Sehlopha se Busang o tlo fana ka puo. Ba ile ba thaba haholo ha ba bona Morabo rona Jackson a lokolla Bibele e feletseng ya Phetolelo ea Lefatše le Lecha ea Mangolo a Halalelang ka Segeorgia!

Batho ba ile ba lla ke thabo. Moradiwabo rona e mong o re: “Ke sitwa ho hlalosa kamoo ke neng thabile ka teng ha re ne re fumana Bibele e feletseng. . . . Ruri eo ke ketsahalo e sa lebaleheng.” Batho ba fetang 17 000 ba ile ba thabela kopano ena haholo, mme ketsahalo eo e ile ya eba ya bohlokwa ka ho fetisisa ho batho ba Georgia.