KE QADILE ho tseba Dipaki ha ke ne ke le kholejeng ea Kutaisi. Mohaisane wa ka o ile a mpolella hore Dipaki ha di sebedise ditshwantsho ha di rapela le hore ha di dumele hore Jesu ke Modimo ya Matla Ohle. Dintho tsena di ne di hanyetsana le seo ke neng ke se rutilwe kerekeng ya ka.

Ha ke ne ke kgutlela hae Tsageri lehlabuleng la 1992, ke ile ka fumana ho se ho e na le Dipaki. Ha ke ne ke fihla lapeng Mme o ne a se a rata Dipaki haholo kaha o ne a utlwile dintho tse ngata tse ntle ka tsona. Nna ke ne ke sa di rate kahoo o ile a re ho nna, ‘Tsamaya o ilo ikutlwela ha ba ruta.’

Bopulamadiboho ba babedi e leng Pavle le Paata ba ne ba tlwaetse ho tjhakela baahisane ba rona. Baahisane ba bang le bona ba ne ba sebedisa monyetla oo ebe ba se ba botsa bara bana baborona dipotso. Kahoo ke ile ka etsa qeto ya ho  ba teng ha ba buisana ka Bibele. Nako le nako ha ke ne ke botsa dipotso, barabarona ba ne ba mpontsha karabo ka Bibeleng ebe ba re ke ipalle. Sena se ile sa nthabisa. Ke ile ka iponela ka mahlo seo Bibele e se rutang!

Nakwana kamora moo, le nna ke ile ka ba sehlopheng sa batho ba rutwang ke bara bana babo rona. Ke ne ke le hara batho ba leshome ba ileng ba kolobetswa lehlabuleng le latelang. Hamorao Mme le yena o ile a kolobetswa mme ya e ba Paki ya Jehova.

Ke thaba haholo hore ebe ba ile ba araba dipotso tsohle tsa ka ba sebedisa Bibele mme ba ntumella hore ke ipalle tsona. Sena se ile sa nthusa ho fumana dikarabo tsa dipotso tseo ke neng ke dula ke ipotsa tsona ka bodumedi ba ka. Kamora ho hlokomela molemo wa ho bontsha motho dikarabo ka Bibeleng ka hore a ipalle, ke ile ka sebedisa mokgwa ona ha ke thusa ba bang hore ba tsebe nnete.