HA NNA le mosadi wa ka Tsitso re e ba Dipaki Tsa Jehova, mme o ile a re halefela haholo. Ka tsatsi le leng, o ile a bitsa ba lelapa leso e le hore ba tlo re bolella hore re kgaotse ho ikopanya le Dipaki. Ba ile ba re re kgethe hore na re batla ho ba Dipaki kapa re kgetha arohana le lelapa.

Re ile ra etsa qeto ya ho tsamaya. Kaha ke ne ke etsa mosebetsi wa matsoho, re ile ra fallela Kutaisi, e leng toropo e nngwe ya Georgia, moo nka fumanang mosebetsi ha bonolo. Ke ne ke boetse ke tseba hore ho hlokahala baboledi ba ditaba tse molemo motseng oo, kahoo pele ke etsa qeto ya ho ya moo, ke ile ka kopa tataiso ya Jehova.

Hamorao, ke ile ka kopana le motho eo ke neng ke ithuta Bibele le yena, ya neng a dula, Jvari. Ha a utlwa hore re batla ho ya Kutaisi, o ile a nkopa hore re ye Jvari . O ile a re: “Re na le ntlo. Nna le mosadi wa ka le bana re tla dula ka kamoreng e nngwe mme lona le tla sebedisa e nngwe.”

 Kaha ke ne ke ntse ke rapella tataiso ho Jehova, ke ile ka bolella moithuti wa ka hore ke tla ya Jvari hang ha ke fumana mosebetsi le sebaka sa bodulo. Mantsiboyeng ao o ile a fihla a tshwere koranta e neng e ngotse mesebetsi e fumanehang.

Kamora matsatsi a seng makae, re ile ra fumana bodulo Jvari. Ke ile ka fumana mosebetsi o patalang hantle. Mongaka o ile a mpha bodulo ntlong e kholo ya khamphani. Nakwana kamora moo, barababo rona ba ile ba nkopa hore ke printe dingolwa tsa Bibele ka sephiri. Kaha ntlo ya rona e ne e le kgolo, re ile etsa qeto ya hore re tla printela ka tlung.

Re ne re boetse re sebedisa ntlo ya rona ho tshwara sehopotso le diketsahalo tse ding tsa bohlokwa ka dilemo tse ngata. Batho ba fetang 500 ba ile ba kolobeletswa hona ntlong eo ya rona! Ke thaba haholo ha ke bona kamoo Jehova a ileng a ntataisa kateng mme ke motlotlo hore ebe ke ile ka mo mamela!