Morumuwa e mong wa naheng ya Sierra Leone eo lebitso la hae e leng Crystal, ya sebeletsang tshimong ya batho ba buang puo ya matsoho, o ile a qala letsatsi la hae ka ho rapella hore a fumane batho ba sebedisang puo eo. Hoseng hoo, o ile a nka tsela e fapaneng le eo a neng a tlwaetse ho tsamaya ka yona ha a kgutlela ho batho ba thabelang ho ithuta Bibele.  O ile a botsa baahisani hore na ebe ba tseba batho ba sebedisang puo ya matsoho, yaba ba mo supisa ntlo e nngwe tjena. Ha a fihla moo, a fumana motho e mong ya neng a thabela ho ithuta Bibele mme a ba a re o tla ya sebokeng sa puo ya matsoho. Batho ba dulang haufi le moo a neng a kene teng, ba ile ba mo botsa hore na a ka rata ho kopana le motho e mong ya sebedisang puo ya matsoho. Kahoo, o ile a fumana motho e mong hape ya neng a rata ho ithuta Bibele. O ne a kile a sebetsa tshimo eo pele, le ha ho le jwalo, o ne a qala ho fumana batho bao ba puo ya matsoho. Seo se ile sa etsa hore Crystal a kgodisehe hore ke feela ka thuso ya Jehova a fumaneng batho bao.

Morabo rona Emmanuel, ya dulang naheng ya Liberia, o ne a ya sebokeng sa mafelobeke. Ha a ntse a le tseleng, o ile a bona monna e mong a eme ka thoko ho tsela a bonahala ahlile a kgathatsehile tjena. Emmanuel o ile a nahana hore e tlameha ebe ho na le hohong ka monna eo ya neng a apere hantle yaba o emisa koloi. Lebitso la monna eo e ne e le Moses. O ile a re bosiung bo fetileng ba ile ba mo nkela tjhelete yohle ya hae mme jwale o ne a batla ho ipolaya. Kamora ho mamela Moses, Emmanuel o ile a re ho yena, “Ke kopa o tsamaye le nna re ye Holong ya Mmuso.” Ba ile ba tsamaya mmoho. Seo Moses a ileng a se utlwa sebokeng se ile sa mo llisa. Ha puo ya phatlalatsa e  fela, Moses o ile a re: “Puo ena e ne e etseditswe nna! Dipaki Tsa Jehova di a ikgetha.” Qetellong ya seboka, Moses o ile a dumela ho ithuta Bibele mme hona jwale o se a ya dibokeng kamehla.

Aminata ke ngwanana ya dilemo di 15 ya dulang naheng ya Guinea-Bissau. Ha a le dilemo di 13, titjhere ya hae e ile ya re ba toroye dimmampokisi le dintho tse ding tse sebediswang meketeng ya bodumedi. Aminata yena o ile a toroya diphohofolo le dimela yaba o ngola “Paradeise” pela ditshwantsho tseo. Ha titjha a phutha dibuka, o ile a bolella Aminata hore o toroile ditsiebadimo mme a mo fa ziro. Kamora tlelase, Aminata o ile a ya ofising ya titjhere yaba o re, “Titjha, ke ne ke kopa ho botsa hore na dintho tseo o neng o re re di toroye ke tsang?”

Titjhere a re:“Ke tsa kereke.”

Yaba Aminata o re: “Nna ha ke kene kereke, jwale, nke ke ka toroya ditshwantsho tsa kereke. Ke dumela hore Ntate Modimo o tlo etsa hore lefatshe e be paradeise, ene ke sona seo ke se toroileng.” Titjhere o ile a re o tla etsa tlhahlobo e nngwe hape ya dipotso tse ngolwang. Aminata o ile a fumana 18 hodima 20.

Sehlopha se seng se ka thoko motseng o monyenyane o Malawi, se na le bahweletsi ba 7. Ba ba le diboka moahong o entsweng ka jwang, dipalo le mahlaka. Molebedi wa potoloho o ile a ba kgothalletsa hore ba meme batho  ba bangata kamoo ba ka kgonang ho tla Sehopotsong sa lefu la Kreste. Ho ne ho laetilwe ka lampi e beuweng marulelong ele hore sebui se fane ka puo ya Sehopotso. Sebui se ne se sa kgone le ho sisinyeha ho latela bongata ba batho ba neng ba tlile. O se o ka inahanela feela hore na bahweletsi bao ba 7 ba ile ba thaba hakaakang ha ba bona batho ba 120 ba tlile Sehopotsong!

Ho bolela ditaba tse molemo ka toroli ya dingolwa, ho na le ditlhohonolofatso le hoja hangata di sa bonahale hanghang. Motsemoholong wa naha ya Togo o bitswang Lomé, mme e mong o ile a atamela toroli a belaela tjena, yaba o inkela bukana ya Ho ka ba le Thabo Lelapeng la Hao. Dipaki tse neng di le moo toroling, di ile tsa qoqisana le yena ka lengolo la Baefese 5:3 mme kamora moo ba fanana dinomoro tsa founo. Dibeke tse pedi hamorao, mme eo o ile a founa mme a re: “Ke ne ke sa rate Dipaki Tsa Jehova. Ho ntse ho le jwalo, ke ile ka bala bukana eo ya lona mme ke e ratile. Ke bua tjena hobane e se e nthusitse ho rarolla mathata a ka a lelapa, hape ke se ke bile ke thusitse banyalani ba bang ba babedi. Ho hlakile hore ke ne ke fositse ha ke re Dipaki ke batho ba babe. Ke kopa hore le tlo ithuta Bibele le nna.” Mme eo hammoho le ba bang ba banyalani bao a ileng a ba thusa ba ile ba qalella ho ithuta Bibele.

Ankasie ke torotswana e nyane e Ghana. Batho ba moo ba rekisang, ba beha dintho tseo ba di rekisang ka thoko ho tsela. Mantaha o mong le o mong, bara le baradibabo rona le bona ba beha toroli ya dingolwa. Kamora hore Morabo rona Samuel, a fe Enoch bukana ya Mamela Modimo,  Enoch o ile a botsa Samuel hore na o na le dingolwa ka puo ya Sekusaal.

Samuel o ile a re: “Ka maswabi ha re a di tshwara. Empa re tshwere tsa Sefrafra.” Enoch o ile a kopa dingolwa e le hore a ka di fa ba lelapa labo ha a ya ha habo.

Eitse ha a kgutlela Ankasie hape, o ile a fihla a fa Samuel bukana ya Mamela Modimo. Enoch o ne a se a fetoletse bukana ena ka Sekusaal! Hona jwale, ha a foswe ke diboka mme o ithuta Bibele kamehla.