Ka tsatsi le leng, Jonathan ya dulang naheng ya Philippines, o ne a emetse ngaka. Ka lebaka la tsela eo a neng a apere hantle ka yona, mme e mong ya sebetsang moo ngakeng, eo lebitso la hae e leng Laila, o ile a nahana hore Jonathan o sebetsa inshorenseng. Jonathan o ile a jwetsa mme eo hore ke Paki ya Jehova mme o tlile moo ho tla thusa Paki mmoho le yena e  neng e tlile ngakeng. Laila o ile a jwetsa Jonathan hore ntate wa hae, ya seng a hlokahetse, o ne a bala Tora ya ho Lebela. Jonathan o ile a mo balla lengolo la Johanne 5:28, 29 yaba o mo fa pampitshana ya, Ho na le Tšepo Efe Bakeng sa Baratuoa ba Shoeleng?

Jonathan o ne a tlwaetse hore kgafetsa ha a ya ngakeng, a tlele Laila dingolwa tsa Bibele. O ile a ba a hlophisa hore moradiwabo rona e mong, a ilo ithuta Bibele le yena. Nakwana  kamora moo, monna wa Laila, ausi wa Laila le mme wa hae, ba ile ba mo joena.

Moahisane wa Laila ya bitswang Rose, o ile a mo atamela, a mo botsa hore na ke hobaneng ha a dula a ena le baeti tjena. Laila o ile a mo jwetsa hore o ntse a ithuta Bibele le Dipaki Tsa Jehova. Ka lebaka leo, Rose le yena o ile a ithuta, eitse ha a fihla ha habo, a fihla a jwetsa ausi wa hae Abigail hore o ntse a ithuta Bibele. Ausi wa hae le yena, a utlwa a se a kgadile, yaba o kopa ho ithuta Bibele. Athe mme wa Rose le yena o tla thabela ho ithuta.

Laila o sa tswa kolobetswa haufinyane tjena kopanong ya setereke. Hona jwale mme wa hae le yena o kolobeditswe. Rose le ausi wa hae ba ile ba kolobetswa. Mme wa Rose ha a foswe ke diboka le ka mohla. Ba bang ba leloko la Laila ba ithuta Bibele mme ba tswela pele hantle. Diketsahalo tsena tsohle di etsahetse ka lebaka la motho a le mong!

Bara le baradibabo rona ba tsimong ya puo ya matsoho, naheng ya Sri Lanka, ba sebetsa ka thata haholo. Ka selemo sa 2015, Dipaki di ne di na le diaterese tse ka tlase ho tse 80 tsa batho ba sebedisang puo ya matsoho, mme repoto ya bona e ile ya bolokwa. Kamora nako eo, ho ile ha thehwa phutheho ya pele ya Puo ya Matsoho Sri Lanka. Ho ile ha ba ha hlophiswa lenaneo la khompiyutha leo ho lona, ho neng ho ngotswe mabitso a ka bang 420 a batho le dinomoro tsa moo ba dulang. Barababo rona ba moo ba se ba ithutile Bibele le batho ba kabang 336 mme ba bang, ba ne ba ithuta le bona malapeng. Banyalani ba bang ba barumuwa ba re: “Nakong e fetileng bahweletsi ba ne ba bua fela le batho ba ba tlwaetseng. Empa hona jwale ho se ho  le bonolo hore re ba fe tshimo eo ba ka e sebetsang ya puo ya matsoho.”

Morabo rona e mong wa naheng ya Mongolia, o paka a sebedisa toroli ya dingolwa esita le ha maemo a lehodimo a moo, a sa jese ditheohelang. Ka tsatsi le leng, mohlanka e mong wa mmuso o ile a fihla a nka dingolwa toroling. Hamorao, a ngola lengolo le neng le ngotse mantswe a latelang a bontshang hore o a leboha. O ile a re: “Ke Mobuddha. Empa tjhe ha ke na bothata ka ditumelo tse ding hobane ke dumela hore ha o le motho, o tlameha o ke o tsebe seo batho ba bang ba se dumelang. Kamora ho bala tse ding tsa dingolwa tsa lona, ke ile ka susumelletseha ho ngola lengolo lena. Ke a hlokomela hore kannete le itetse e le hore le kgone ho fa batho tlhahisoleseding. Ntho e nngwe eo ke ithutileng yona ka dingolwa tsa lona ke hore Bibele ke buka eo motho a lokelang ho e bala. Bibele e bua nnete. Ebile e fana ka tataiso e nepahetseng e ka re tswelang molemo bophelong. Ke rata ho leboha bohle ba ikitlaelletsang ho fetolela dingolwa ka Semongolia. Ke thabela le taba ya hore le sebetsa ka thata, ho bata kapa ho tjhesa.”

Morabo rona e mong wa pulamadiboho ya dulang Hong Kong ya bitswang Brett, o ile a fa mohlankana e mong ya dilemong tse ka hodimo ho tse 25 pampitshana ya Keng e Tlisang Thabo ka Lapeng? Mohlankana enwa, o ile a itshela ka dikgapha ha a bona pampitshana eo. O ile a re o holetse lelapeng la Dipaki mme batswadi ba hae ba ne ba mo rutile nnete, empa ha a le dilemo di 16 a baleha lapeng. Kamora moo, e ile ya eba le street kid ka dilemo tse 5 a ba a sebedisa dithethefatsi. Hamorao, o ile a thuswa ke ba lefapha la tlhokomelo ya setjhaba.

 O ile a bolella Brett hore pele a kopana le yena, o ne a ile a rapela a re: “Modimo, haeba bodumedi ba lapeng bo nepahetse, ke kopa o mpontshe.” O ile a utlwa eka thapelo ya hae e arabetswe. Bobedi ba bona ba ile ba ya restjhurenteng yaba ba tshohla bukana ya Kgutlela ho Jehova. Kaha mohlankana enwa, o ne a lokela ho kgutlela France bosiung boo, ba ile ba fanana dinomoro tsa founo. Nakwana kamora moo, o ile a ngolla Brett a re: “Morabo rona Brett ya ratehang, Jehova o arabetse thapelo yaka. Ke tlo ya sebokeng holong e haufi le nna ka Sontaha.” O ile a kopana le Dipaki tsa France mme a qalella ho ithuta Bibele a ba a ya dibokeng.