Naheng ya Georgia, monna e mong o ile a atamela pela toroli ya dingolwa yaba o re: “Tlosang ntho ena ya lona mona! Georgia ke naha ya Bakreste ba Maorthodox.” Morabo rona ya neng a eme pela toroli o ile a botsa monna eo hore o kile a bala dingolwa tsa rona na. Monna eo o ile a re, “Tjhe, ha ke so di bale.” Morabo rona o ile a mo kopa hore a ke  a ilo di bala. Tsela eo e bonolo, e ile ya etsa hore monna eo a nke dingolwa. Kamora matsatsi a seng makae, monna eo o ile a kgutlela toroling yaba o kopa tshwarelo. O ile a re o balletse mme wa hae ya sa boneng, dimakasine tsa rona. Di ile tsa ba natefela hoo ba ileng ba batla tse ding. Hona jwale, o se a tla toroling kamehla ho tla kopa dingolwa tse ntjha.

Ha barababo rona ba babedi ba le mosebetsing wa boboledi naheng ya Azerbaijan, ba ile ba kopana le monna e mong ya neng a eme ka pela mohaho mme ba leka ho mo pakela. Monna eo o ile a re, “Haeba nka le mamela ke tlabe ke etsa sebe.” O ile a ntsha thipa yaba o re, “Hona le motho ya nkwatisitseng mme ke batla ho lo mo bolaya hona jwale!”

Barababo rona ba ne ba tshohile, le ha ho jwalo ba re ho yena, “Empa ho bolaya ke sebe.”

Monna eo o ile a re, “Jwale le batla ke etseng?” Ba ile ba mo balla lengolo la Baroma 12:17-21 mme ba mo bolella hore phetetso ke ya Modimo yaba ba re, re lokela hore re se ke ra ‘itlohela hore re hlolwe ke bobe, empa re nne re hlole bobe ka botle.’ Ba ile ba boela ba mo bollella hore ke phoso ho kwata hobane haeba a ne a ka lematsa motho kapa a mo bolaya, letswalo la hae le ne le tla mo ja. Kamora hore a utlwe mantswe ao a monate, o ile a tsamaya.

Kamora nako e ka etsang hora, o ile a kgutlela ho barababo rona yaba o re: “Ke tswa ho motho elwa eo ke neng  ke batla ho mo bolaya. Re lokisitse ditaba. Kannete le nthusitse.” Barababo rona bao, ba ile ba mo bolella hore ke Jehova ya mo thusitseng.

Dilemong tse seng kae tse fetileng, moradiwabo rona e mong wa Norway o ile a tlohela ho ya dibokeng. Kaha jwale ho se ho sebediswa ditoroli tsa dingolwa ho bolela ditaba tse molemo, o ne a hlola a feta ho tsona ha a ya dishopong.

Le hoja a ne a so ka a nka dingolwa tsa Dipaki Tsa Jehova, o ne a hlola a bona dingolwa tse mebalabala le diphoustara tse ntle tse neng di le ditoroling tseo. Dintho tseo hammoho le tsela e ntle eo Dipaki Tsa Jehova di neng di apara ka yona, di ile tsa etsa hore a kgalle ho kgutlela ho Jehova le ho batho ba hae.

O ile a boela a bona letshwao la websaetse ya rona yaba o kena ho yona. Ha a kena ho jw.org o ile a bona aterese ya Holo ya Mmuso e haufi le moo a dulang teng le hore diboka tsa teng di kena neng, a ba a downloada dingolwa. Le hoja a ne a tshohile, o ile a ya sebokeng. Bara le baradibabo rona ba ne ba mo thabetse, mme baholo ba ile ba kopa moradiwabo rona e mong hore a mo badise. O ile a ba le bakgotsi ka phuthehong. Hona jwale o se a ya dibokeng le tshimung mme o thabela ho ba motswalle wa Jehova hape.

Ha Ronja e leng ngwanana ya dilemo tse 15, ya dulang naheng ya Norway, a le ka beseng ya sekolo, o ile a bua le bashemane ba bang ba bararo ka ho iphetola ha dintho. Bashemane bao ba ne ba mo etsetsa manganga  mme seo sa etsa hore Ronja a nyahame. Kaha e ne e se e le kgale a qetetse ho bua ka taba eo, o ile a re mme wa hae a mo thuse ho bontsha batho hore Modimo o bopile dintho tsohle.

Letsatsing le latelang, Ronja o ile a leka ho bua le bashemane bao hape kaha o ne a se a lokiseditse. Le ha ho le jwalo, bashemane bao ba ile ba ba manganga le ho feta. E mong o ile a hweletsa a re: “Ha hona motho ya dumelang ho Jehova ka beseng ena! O tla bona, e re ke ba botse. Ke mang ya dumelang hore Jehova o bopile dintho?” Ronja o ile a makala ha moshemane e mong a re, “Ke nna!” Bana ba bang ba babedi le bona ba ile ba re, “Le rona!” Le hoja Ronja a ne a sa bue le bana bao, ho bonahala ba ne ba mametse hantle, mme ba dumela dintho tseo a neng a di bua.

Ka tsatsi le leng, banna ba babedi ba buang Searabia ba ile ba fihla ofising ya lekala ya Denmark. Ba ile ba bolella baradibabo rona ba sebetsang moo hore ba ntse ba batlana le Dipaki Tsa Jehova. Ha ba utlwa hore ba sebakeng se nepahetseng, ba ile ba thaba haholo. Empa ba ne ba fumane aterese ya ofisi hokae? Ba ile ba bontsha motho e mong ya sebetsang laebraring senepe se founung. E ne e le senepe sa leqhephe le qalang la buka ya Ha e le Hantle ke Eng Seo Bibele e se Rutang?. Motho eo o ile a kgona ho ba fa aterese ya ofisi ya lekala.

Banna bao ba ne ba sa tsebe Sedanishe. Kahoo, ho ile ha bitswa morabo rona ya tsebang Searabia. Ho ile ha bonahala hore e mong wa bona, o ne a batla ho rutwa Bibele. Morabo rona o ile a nka dinomoro tsa hae le aterese mme a re o tla tla le moraborona e mong eo le yena a tsebang Searabia.

Ha barababo rona ba mo tjhaketse, monna eo o ile a re ha a so ka a tjhakelwa ke Dipaki Tsa Jehova. O ile a ba bolella hore o fumane buka ya Searabia ka lebokoseng la poso. Kaha jwale o ne a sa tsebe ho bala, o ile a kopa motswalle wa hae hore a mo balle yona mme ba ile ba e qeta ka matsatsi a mararo feela. Seo a ileng a se utlwa bukeng eo, se ile sa mo bontsha hore o fumane bodumedi ba nnete.

Monna enwa o ne a dula hole le lelapa la hae mme sena, se ne se dula se mo utlwisa bohloko empa o ile a fumana matshediso ka Bibeleng. Ha barababo rona ba qala ho mo etela o ile a re: “Le ntse le le hokae nako e yohle? Esale ke le emetse.” O ntse a tswela pele hantle mme o thabela dintho tseo a ntseng a ithuta tsona.

Monna e mong ya bitswang Dmitry, e ne e le mmanejara khampaneng ya dithethefatsi Ukraine. Ha a ithuta hore dithethefatsi di kotsi, o ile a tlohela mosebetsi oo o patalang hantle. Kamora dikgwedi tse tharo, mme wa hae le mme wa mosadi wa hae ba ile ba hlokahala. O ile a utlwa bohloko bo sa tsweng madi. O ile a nahana hore o tla fumana matshediso le dikarabo tsa dipotso tsa hae kerekeng empa seo, ha se a ka sa etsahala. Mokgotsi wa hae o ile a mo bolella hore ho ba le Orthodox ho bolela ho “rwala sefapano le hoja motho a sa tsebe letho ka Modimo.” Kannete Dmitry o ne a ikutlwa ka tsela yona eo. O ne a bona hore ha a tsebe letho ka Modimo le ka Bibele. O ne a batla dikarabo, kahoo o ile a rapela. Dmitry o ile a hopola hore o kile a utlwela ka Dipaki Tsa Jehova. Ha ntse a kene Inthaneteng, o ile a fumana websaete ya rona mme a bona hore e ruta dintho tse ngata ka Bibele. Yaba jwale o batla Holo ya Mmuso e haufi. Ha a fihla Holong, mohlokomedi o ile a mo amohela mme a mo botsa hore na a ka mo thusa jwang. Dmitry o ile a re, “Ke batla ho rutwa Bibele.” E se e le dikgwedi tse 6 jwale Dmitry a ithuta Bibele mme o dula a le dibokeng.

Paul le Faith e leng banyalani ba dulang Britain, ba ile ba thabela ho bua le mosadi e mong ya bitswang Susan mme ba lokisetsa ho kgutlela ho yena. Ha ba kgutlela ho yena ba ile ba fumana a le siyo. Paul le Faith ba ile ba hopola dintlha tse ileng tsa hlaha Tšebeletsong ea ’Muso ya November 2014, yaba ba siya molaetsa wa hore ba tla tla hape hosane monyako. Ha ba kgutla ba ile ba fumana Susan a ba ngolletse molaetsa. O ile a ba bolella hore o ne a  ilo reka dintho tsa lenyalo la moradi wa hae. Ba ile ba siya molaetsa wa hore ba tla mo bona bekeng e tlang. Ha ba fihla, ba ile ba fumana a se a eme ka bona mme ba ile ba qala thuto ka buka ya Seo Bibele e se Rutang.

Kaha moradi wa hae o ne a tlo nyalwa haufinyane, Susan o ile a ba kopa hore ba tle ka nako e nngwe. Ha Paul le Faith ba ya hape, ba ile ba fumana ho se na motho yaba ba siya molaetsa o nang le dinomoro tsa bona tsa founu. Susan o ile a ba romela molaetsa a ba hlalosetsa hore o ne a ntse a bua le moahisane wa hae jareteng, kahoo ha a ba utlwa. Esale ho tloha ka nako eo, Susan o ntse a ithuta Bibele hantle, ebile o kile a tjhakela dibokeng.

Paul le Faith ba rata ho siela batho melaetsa menyako ha ba sa ba fumana. Ba re: “Ba bang bao re ba sielang melaetsa ena ba a re araba. Kannete tsela ena e ya sebetsa!”

Ka August 2014, moraborona e mong wa naheng ya Hungary, o ile a kena sepetlele a tshwerwe ke lefu le etsang hore madi a se ke a fetela matshwafong. Ka maswabi, o ile a hlokahala. Mosadi wa morabo rona eo, o ile a bua tjena ka Tünde, e leng nese e neng e hlokomela monna wa hae:

“Ka 2015, nna le mora waka re ile ra ya Kopanong ya Setereke ya ‘Etsisang Jesu!’ Ka Sontaha ha kopano etswa, re ne re le phakeng ya dikoloi. Ha re ntse re eme moo, mosadi e mong o ile a lahlela mokotla fatshe, yaba o a nhaka mme a qalella ho lla. E ne e le nese ela, e neng e hlokomela monna wa ka sepetlele. O ile a mpollella hore tsatsi le leng le leng, nese e sebetsang ka ICU e ne e fuwa mokudi a le mong hore e mo hlokomele. O ne a dula a rapella hore ho hothwe a ilo hlokomela monna wa ka. Hangata, ho ne ho feela ho ba jwalo!

“Tünde o boletse hore, monna wa ka o ne a etsa dintho tse ntle mme a ena le tumelo e matla ya hore dintho di tla fetoha haufinyane. Dintho tsena, di ile tsa etsa hore Tünde a batle ho ithuta Bibele le Dipaki Tsa Jehova.

“Tünde o se a ithuta Bibele mme o re, o emetse nako eo ka yona, a tlang ho bona monna wa ka hape. O batla ho mo bolella hore boitshwaro le tumelo ya hae, di mo thusitse hore a tsebe Jehova le dintho tse monate tseo a di tshepisang.”

Ka lebaka la meferefere e neng e le teng mahareng a Greece le Bulgaria, bodara e pakeng tsa naha tseo tse pedi, e ne e ena le ho kwala. Seo se ne se etsa hore dikoloi di eme mela e metelele. Bahweletsi ba phutheho e  nngwe naheng ya Bulgaria e haufi le bodara, ba ne ba sebedisa monyetla oo ho fa bakganni dingolwa tsa Bibele. Barababo rona ba ne ba ya moo ka dingolwa tsa dipuo tse 12. Le hoja bakganni bao ba ne ba kgathala haholo, ba ne ba rata ho qoqa le batho. Barababorona ba ne ba ba mamela mme ba ba kgothatsa. Mokganni e mong o ile a re: “Le Dipaki Tsa Jehova le lona?” Kamora hore morabo rona a dumele o ile a re, “Ke tsebile, ke Dipaki Tsa Jehova feela tse buang le batho ka Bibele.” Monna e mong wa Austria o ile a bua a qabohile a re: “Ke hore lona le hohle mona! Empa le etsa mosebetsi o motle wa ho tshedisa batho. Pele ya pele!” E mong yena a re: “Ke ne ke sa rate ho bala dingolwa tsa lona. Empa jwale ke se ke tla di bala.” Mokganni e mong yena, o ile a lla ha morabo rona a ntse a mo bolella molaetsa wa Bibele. E ne e kile ya eba Paki dilemong tse ngata tse fetileng. Barababo rona ba ile ba mo kopa hore a kgutlele ka phuthehong.