Nahana ka sena: Karen ha a so qete le metsotso e leshome a le phathing, jwale o se a utlwa lentswe leo a le tsebang ka mora hae.

Ha Karen a hetla, o bona motswalle wa hae Jessica a tshwere dibotlolo tse pedi. Karen o wa hlokomela hore ke dibotlolo tsa jwala. Jessica o fa Karen botlolo e nngwe mme o re, “O se ke wa mpolella hore o sa le monyane hore o ka nwa jwala!”

Karen o batla ho hana, empa jwale o tshaba motswalle wa hae Jessica. Ebile ha a batle hore Jessica a nahane hore o wa bora. Ho feta moo Jessica ke e mong wa banana ba itshwereng hantle. Ka hoo, Karen a ka nna a batla ho nwa jwala hobane Jessica a bo nwa. Ebile a ka nna a ipehela mabaka a re, ‘Ho tshwana le ha motho a nwa drinki feela. Ha ho tshwane le ho sebedisa dithethefatsi.’

Haeba e ne e le wena, o ne o tla etsang?

E le hore o etse qeto e bohlale boemong bona, o lokela ho itseba. Ho itseba ho bolela ho tseba melao ya boitshwaro eo o e latelang le seo o se dumelang. Seo se tla o thusa hore o kgone ho iketsetsa diqeto ho e na le hore batho ba bang ba laole bophelo ba hao.—1 Bakorinthe 9:26, 27.

Empa o ka etsang hore o be le bokgoni boo? O ka thuswa ke ho araba dipotso tse latelang.

Ho tseba bokgoni ba hao le makgabane a hao ho tla o thusa hore o itshepe haholwanyane.

MOHLALA O KA BIBELENG: Moapostola Pauluse o ile a ngola a re: “Esita le haeba ke se kgeleke puong, ka sebele ha ke jwalo tsebong.” (2 Bakorinthe 11:6) Ka ha Pauluse o ne a utlwisisa Mangolo hantle, seo se ile sa mo thusa hore a dule a tiile le ha batho ba mo phoqa. Ha aa ka a dumella hore dintho tse mpe tseo ba neng ba di bua ka yena di mo nyahamise.—2 Bakorinthe 10:10; 11:5.

ITLHAHLOBE: Ngola talenta kapa bokgoni boo o nang le bona.

Hlalosa bokgabane boo o nang le bona. (Ka mohlala, na o motho ya kgathallang ba bang? ya fanang? ya ka tshepuwang? kapa ya tshwarang nako?)

Feela jwalo ka ha ketane e ka kgaoha ha bobebe moo e sa tiyang hantle, o tla fellwa ke matla haeba o dula o nahana ka mefokolo ya hao.

MOHLALA O KA BIBELENG: Pauluse o ne a tseba mefokolo ya hae. O ile a re: “Ka sebele ke thabela molao wa Modimo ho ya ka motho eo ke leng yena ka hare, empa dithong tsa ka ke bona molao o mong o lwanang kgahlanong le molao wa kelello ya ka le o nkisang ke holehilwe molaong wa sebe.”—Baroma 7:22, 23.

ITLHAHLOBE: Ke bofokodi bofe boo o lokelang ho bo lwantsha?

Na o ka palama tekesi, ebe o kopa mokganni hore a potapote sebakeng se le seng ho fihlela koloi e fellwa ke peterole? Seo e ka ba bowatla le tshenyo ya tjhelete!

O ithutang ho see? Ha o tseba hore na o batlang bophelong, O tla tseba hore na o phelelang.

MOHLALA O KA BIBELENG: Pauluse o ile a ngola a re: “Tsela eo ke mathang ka yona ha se ka ho se nepisise.” (1 Bakorinthe 9:26) Pauluse o ne a sa iphelele feela tjee, o ne a tseba dintho tseo a batlang ho di finyella mme o ile a phela ka tsela e ileng ya mo thusa hore a di finyelle.—Bafilipi 3:12-14.

ITLHAHLOBE: Ngola dintho tse tharo tseo o batlang ho di etsa selemong sena.

Haeba o sa tsebe seo o se dumelang, o ke ke wa kgona ho iketsetsa diqeto. Ho e na le hoo, o tla tshwana le lempetje mme o dule o batla ho etsa seo dithaka tsa hao di se etsang.

Empa haeba o etsa dintho o itshetlehile ka seo o se dumelang, o tla kgomarela melao ya boitshwaro ho sa tsotellehe hore na ba bang ba etsang.

MOHLALA O KA BIBELENG: Ha moprofeta Daniele e sa le motjha, o ile “a etsa qeto ka pelong ya hae” ya hore o tla mamela molao wa Modimo, le hoja a ne a le hole le lelapa labo. (Daniele 1:8) Ka ho etsa jwalo, o ile a tshepahalla qeto ya hae. Daniele o ile a phela ho ya ka seo a se dumelang.

ITLHAHLOBE: Ke dintho dife tseo o di dumelang? Ka mohlala: Na o dumela ho Modimo? Haeba ho jwalo, hobaneng? Keng e o kgodisang hore Modimo o teng?

Na o dumela hore melao ya Modimo e ka o tswela molemo? Haeba ho jwalo, ke hobaneng?

Qetellong, na o ka rata ho tshwana le lekgasi le fefolwang ke moya kapa le sefate se tiileng se sa sisinngweng ke meya e matla? Haeba o tseba seo o se dumelang, o tla tshwana le sefate seo. Ka hoo o tla kgona ho araba potso e reng, Na ke a itseba?