Modimo o mema batho ba ditjhaba tsohle hore ba atamele haufi le yena ka thapelo. (Pesaleme ya 65:2) Leha ho le jwalo, ha a mamele kapa hona ho amohela dithapelo tsohle. Ka mohlala, dithapelo tsa monna ya tshwarang mosadi wa hae hampe di ka sitiswa. (1 Petrose 3:7) Hape, ha Baiseraele ba ne ba tswela pele ho etsa dintho tse mpe, Modimo o ne a hana ho mamela dithapelo tsa bona. Ho hlakile hore thapelo ke ntho ya bohlokwa. Leha ho le jwalo, Modimo a ka mamela esita le dithapelo tsa baetsadibe ba feteletseng haeba ba baka.—Bala Esaia 1:15; 55:7.

Shebella video e reng Na Modimo o Mamela Dithapelo Tsohle?

Thapelo ke karolo ya borapedi ba rona, kahoo re lokela ho rapela Mmopi wa rona feela, e leng Jehova. (Matheu 4:10; 6:9) Hape, kaha ha rea phethahala, re lokela ho rapela ka lebitso la Jesu, hobane ke yena ya shwetseng dibe tsa rona. (Johanne 14:6) Jehova ha a batle hore re phetaphete dithapelo tseo re di tsebang ka hlooho kapa tseo re di ngotseng. O batla hore re mo bolelle se ka dipelong tsa rona.​—Bala Matheu 6:7; Bafilipi 4:6, 7.

Mmopi wa rona a ka utlwa le dithapelo tse etsetswang ka pelong. (1 Samuele 1:12, 13) O re kgothalletsa hore re rapele ka dinako tsohle, tse kang ha re tsoha, ha re il’o robala, nakong ya dijo le ha re na le mathata.—Bala Pesaleme ya 55:22; Matheu 15:36.

Ha ho bonolo hore re atamele haufi le Modimo hobane re phela le batho ba sa dumeleng ho Modimo le ba somang tshepiso  ya hae ya hore ho tla ba le kgotso lefatsheng. (2 Timothea 3:1, 4; 2 Petrose 3:3, 13) Kahoo re lokela ho tlwaelana le batho ba re kgothatsang, e leng badumedi mmoho le rona, mme le bona ba a re hloka.—Bala Baheberu 10:24, 25.

Ho tlwaelana le batho ba ratang Modimo, ho re thusa hore re atamele haufi le yena. Diboka tsa Dipaki Tsa Jehova di re fa monyetla wa hore re kgothatswe ke tumelo ya ba bang.—Bala Baroma 1:11, 12.

O ka atamela haufi le Jehova ka hore o nahanisise ka dintho tseo o ithutileng tsona Lentsweng la hae. Nahanisisa ka mesebetsi ya hae, ka ditaelo tsa hae le ka ditshepiso tsa hae. Ha o rapela o bile o nahanisisa ka dintho tsena, o tla ananela lerato la Modimo le bohlale ba hae ka pelo yohle.—Bala Joshua 1:8; Pesaleme ya 1:1-3.

O ka atamela haufi le Modimo ha feela o mo tshepa mme o dumela ho yena. Empa tumelo e tshwana le ntho e phelang e lokelang hore e fepuwe. O lokela ho dula o matlafatsa tumelo ya hao ka ho nahanisisa ka seo o se dumelang.—Bala Matheu 4:4; Baheberu 11:1, 6.

Jehova o hlokomela ba mo ratang. A ka ba sireletsa nthong leha e le efe e ka nnang ya beha tumelo le tshepo ya bona ya ho phela ka ho sa feleng kotsing. (Pesaleme ya 91:1, 2, 7-10) O re lemosa ka mekgwa e ka senyang bophelo ba rona le e ka re sitisang ho thaba. Jehova o re ruta ho phela ka tsela e molemo ka ho fetisisa.—Bala Pesaleme ya 73:27, 28; Jakobo 4:4, 8.