KAOFELA re ye re be le matshwenyeho, ho akarelletsa le bahlanka ba Modimo. Mopesaleme o ile a bua ka ‘menahano e mo hlokisang botsitso.’ (Pesaleme ya 94:19) Jesu o ile a re nakong ya bofelo “matshwenyeho a bophelo” a ne a tla etsa hore ho be thata ho sebeletsa Jehova. (Luka 21:34) Na le wena o na le matshwenyeho? Na o tshwenngwa ke mathata a ditjhelete, mathata a lelapa kapa ho kula? Jehova a ka o thusa jwang hore o sebetsane le ona?

Re ke ke ra sebetsana le matshwenyeho ka matla a rona. Moapostola Pauluse o ile a re: “Re peteditswe ka tsela e nngwe le e nngwe . . .  re tsielehile . . . ; re akgelwa fatshe.” Leha ho le jwalo, o ile a boela a re “ha re a patiswa hoo re ke keng ra sisinyeha,” “hase hore ho hang ha re na tsela ya ho tswa,” ebile “ha re timetswe.” Keng e re thusang ho mamella? Ke “matla a fetang se tlwaelehileng,” e leng matla ao re a fuwang ke Jehova Modimo wa rona ya matla ohle.​—2 Bakorinthe 4:7-9.

Nahana ka ditsela tseo ka tsona Modimo a ileng a o fa “matla a fetang se tlwaelehileng” nakong e fetileng. Na o hopola kamoo puo e kgothatsang e ileng ya matlafatsa kananelo ya hao ya kamoo Jehova a o ratang kateng? Na tumelo ya hao ditshepisong tsa Jehova e ne e matlafala ha o ruta ba bang ka tshepo ya Paradeise? Ha re e ya dibokeng, re arolelana le ba bang tumelo ya rona, re matlafalletswa ho mamella matshwenyeho a bophelo ebile re a imoloha e le hore re ka sebeletsa Jehova re thabile.

Ke nnete hore qalong o ka nna wa se ke wa tseba hore na o nke mohato ofe. Ka mohlala, Jehova o re kgothalletsa hore re batle Mmuso pele le hore re itlwaetse ho etsa dintho tse matlafatsang kamano ya rona le yena. (Matheu 6:33; Luka 13:24) Empa, o ka etsang haeba kganyetso, ho kula kapa mathata a lelapa a o sitisa ho etsa ho eketsehileng? Ho thweng haeba mosebetsi wa hao o o kgathatsa o bile o o hlokisa nako ya ho etsa dintho tse matlafatsang kamano ya hao le Modimo? Ho hlakile hore o ka tshwenyeha haeba ho e na le dintho tse ngata haholo tseo o lokelang ho di etsa, empa o se na nako le matla. Mohlomong o ye o ikutlwe eka Jehova o lebeletse ho hongata haholo ho wena.

Jehova o tseba bokgoni ba hao. Ha ho mohla a ka o fang mosebetsi oo a tsebang hore o ke ke wa o kgona. Hape o a tseba hore re hloka nako e le hore re hlaphohelwe haeba re ile ra ba le kgatello ya maikutlo kapa haeba kamano ya rona le yena e se e fokola.​—Pesaleme ya 103:13, 14.

Ka mohlala, ela hloko kamoo Jehova a ileng a hlokomela moprofeta Elia kateng. Ha Elia a ne a nyahame a bile a tshohile hoo a ileng a balehela lefeelleng, na Jehova o ile a mo omanya mme a mo laela hore a kgutlele kabelong ya hae? Tjhe. Ka  mosa, Jehova o ile a romela lengeloi ka makgetlo a mabedi hore le mo tsose le be le mo fe dijo. Leha ho le jwalo, matsatsi a 40 hamorao, Elia o ne a ntse a tshwenyehile a bile a tshohile. Jehova o ile a boela a etsang ho mo thusa? Ntho ya pele, Jehova o ile a mo bontsha hore a ka mo sireletsa. Ya bobedi, Jehova o ile a mo tshedisa ka “lentswe le bonolo, le tlase.” Qetellong, a mo bontsha hore ha a mong, empa ho na le bahlanka ba bang ba dikete ba tshepahalang. Nakwana ka mora moo, Elia o ile a tsoha molota mme ya e ba moprofeta ya tjhesehang. (1 Marena 19:1-19) Keng seo re ithutang sona? Ha Elia a ne a tshwenyehile, Jehova o ile a mo tshwara ka mamello le ka kutlwelo bohloko. Jehova ha a e so fetohe. Le rona o a re kgathalla.

E ka ba hantle hore o se ka wa fetelletsa dintho ha o nahana ka seo o ka se etsetsang Jehova. O se ke wa bapisa seo o kgonang ho se etsa hona jwale le seo o neng o se etsa pele. Ka mohlala: Semathi seo e leng kgale se sa ikwetlise, se ke ke sa lebella hore dintho di tla kgutlela setlwaeding hanghang. Empa, butlebutle se a ikwetlisa e le hore se boele se be matla. Bakreste ba tshwana le dimathi. Ba ikwetlisa ba habile moputso wa bohlokwa. (1 Bakorinthe 9:24-27) Qala ka ho leka ho etsa dintho tseo o bonang hore o ka kgona ho di finyella hona jwale. Ka mohlala, ikemisetse ho ba teng dibokeng. Kopa Jehova hore a o thuse ho etsa seo. Ha kamano ya hao le Modimo e boela e matlafala, o tla ‘bona hore Jehova o molemo.’ (Pesaleme ya 34:8) Hopola hore eng kapa eng eo ka lerato o e etsetsang Jehova, leha e le nyenyane​—o e nka e le ya bohlokwa.—Luka 21:1-4.

Jehova o ile a matlafatsa June jwang hore a kgutlele ho yena? O re: “Ke ne ke dula ke rapela Jehova, ke kopa hore a nthuse. Yaba ngwetsi ya ka e mpolella hore ho tla ba le kopano toropong eo ke dulang ho yona. Ke ile ka etsa qeto ya ho ya letsatsi le le leng feela. Ruri ho ne ho le monate ho boela ke e ba hara batho ba Jehova! Kopano eo e ile ya nkgothatsa haholo. Hona jwale ke boetse ke sebeletsa Jehova ke thabile. Ke a tseba hore na ke phelelang. Hape ke a tseba hore ke hloka bara le baradi beso ebile ke lokela ho amohela thuso ya bona. Ke leboha hore ebe ke fumane monyetla wa ho kgutlela ka phuthehong pele bofelo bo fihla.”