O KGA apole e hlabosang sefateng. O utlwa monko wa yona o monate pele o e tshela ka basketeng e ntseng e tlala. O se o qetile dihora tse ngata o ntse o sebetsa, empa o ntse o le mahlahahlaha hore o ka nna wa tswela pele. Mme wa hao o ntse a sebetsa sefateng se pela hao a thabile mme a ntse a qoqa le beng ka lona ba bang ba ntseng ba le thusa ho kotula. O bonahala a le motjha, jwaloka kamoo o neng o mo tseba kateng ha o sa le ngwana. Ho thata ho dumela hore o ile wa mo bona a tsofala ha le sa phela lefatsheng le seng le fetile. O ile wa mo bona ha a ntse a thefulwa ke bokudi, o ne o mo tshwere ka letsoho ha a hlokahala mme o ile wa lla ha a ne a epelwa mabitleng. Empa, ke enwa hammoho le ba bang ba bangata, ba a phela mme ba mafolofolo!

Rea tseba hore nako eo e ya tla. Re tseba seo hobane kamehla ditshepiso tsa Modimo dia phethahala. Karolong ena, re tla hlahloba kamoo tse ding tsa ditshepiso tsa Mmuso di tla phethahala kateng haufinyane, ha ntwa ya Armagedone e ntse e atamela. Re tla boela re bue le ka tse ding tsa ditshepiso tsa Mmuso tse thabisang tse tla phethahala ka mora moo. Re tla thaba hakaakang ha re bona Mmuso wa Modimo o busa lefatshe lohle, o etsa hore dintho tsohle di be ntjha!