1, 2. Keng seo batho ba bangata ba ipotsang sona?

LETSATSI le leng le le leng re utlwa dintho tse bohloko tse etsahalang lefatsheng. Kamehla ha re mametse kapa re shebelletse ditaba, re utlwa ho buuwa ka ditshisinyeho tsa lefatshe tse bakang tshenyo, dikebekwa tse bolayang batho ka sehloho le batswadi ba hlekefetsang bana ba bona ka thobalano.

² Batho ba bangata ba a ipotsa hore na ke hobaneng ha dintho tse jwalo di etsahala. Ke hobaneng ha re hlahelwa ke dintho tse bohloko hakaale? Na le wena o kile wa ipotsa potso eo?

3, 4. (a) Habakuke o ile a botsa dipotso dife? (b) Jehova o ile a mo araba jwang?

³ Ka Bibeleng ho na le bahlanka ba Modimo ba ileng ba ipotsa dipotso tse tshwanang. Ka mohlala, moprofeta Habakuke o ile a botsa Jehova dipotso tsena: “Ke hobaneng ha o etsa hore ke bone se kotsi, mme o ntse o tadima kgathatso feela? Ke hobaneng ha tlatlapo le pefo di le ka pela ka, hape ke hobaneng ha qabang e eba teng, mme ke hobaneng ha tsekisano e ntshetswa pele?”—Habakuke 1:3.

⁴ Lengolo la Habakuke 2:2, 3 le re Modimo o ile a araba Habakuke mme a tshepisa ho lokisa dintho. Jehova o rata batho haholo. Bibele e re: ‘O a re tsotella.’ (1 Petrose 5:7) Jwalo ka rona, Modimo ha a rate dintho tse bohloko tse hlahelang batho, ebile o di hloile ho re feta. (Esaia 55:8, 9) Ka hoo, a re ke re boneng hore ke  hobaneng ha ho na le mathata a mangata hakaana lefatsheng.

5. Baruti ba bangata ba reng ka dintho tse bohloko tse re hlahelang? Bibele yona e rutang?

⁵ Hangata baruti ba re ke thato ya Modimo hore ebe batho ba hlahelwa ke dintho tse bohloko. Batho ba bang ba re mathata a rona le dintho tse ding tse etsahalang bophelong, di ile tsa rerwa ke Modimo esale pele. Ba bang bona ba re batho ba shwa hobane Modimo a ba hloka lehodimong. Empa dintho tseo tsohle ha se nnete. Ha se Jehova ya re bakelang mathata. Bibele e re ha ho mohla Modimo a ka etsang bokgopo kapa a etsa se fosahetseng.—Jobo 34:10.

6. Ke hobaneng ha batho ba re ke Modimo ya re bakelang mathata?

⁶ Batho ba bangata ba re ke Modimo ya re bakelang mathata hobane ba nahana hore ke yena ya busang lefatshe. Empa Kgaolong ya 3 re ithutile hore mmusi wa lefatshe lena ke Satane Diabolose.

7, 8. Ke hobaneng ha ho na le mathata a mangata hakaana lefatsheng?

⁷ Bibele e re: “Lefatshe lohle le [buswa ke] ya kgopo.” (1 Johanne 5:19) Mmusi wa lefatshe lena e leng Satane o kgopo ebile o sehloho. O kgelosa “lefatshe lohle leo ho ahilweng ho lona.” (Tšenolo 12:9) Batho ba bangata ba itshwere jwalo ka yena. Ke ka lebaka leo ho tletseng batho ba buang mashano, ba hloyaneng le ba kgopo lefatsheng.

⁸ Lebaka le leng ke hore Adama le Eva ba ile ba etsa sebe, mme ba se fetisetsa ho bana ba bona. Ka lebaka la sebe seo, batho ba phedisana ha bohloko. Ba a lwana, ba a qhekella ebile ba batla ho phahamela batho ba  bang. (Moeklesia 4:1; 8:9) Ka dinako tse ding batho ba utlwa bohloko hobane “ba hlahelwa ke nako le ketsahalo e sa lebellwang.” (Moeklesia 9:11) Sena se bolela hore batho ba hlahelwa ke dintho tse bohloko tse kang dikotsi tsa koloi le mathata a mang, hobane ba le sebakeng se fosahetseng ka nako e fosahetseng.

9. Ke hobaneng ha re ka kgodiseha hore Jehova o na le lebaka le utlwahalang la ho dumella bobe ho etsahala lefatsheng?

⁹ Ha ho mohla Jehova a re bakelang mathata. Ha se yena ya bakang dintwa le bokebekwa. Ha se Modimo ya bakang ditshisinyeho tsa lefatshe le dikgohola. Empa o ka nna wa ipotsa: ‘Haeba Jehova e le Modimo ya matla ohle, ke hobaneng ha a dumella hore dintho tse mpe di etsahale?’ Ka ha Modimo o a re tsotella le ho re rata, e tlameha ebe o na le lebaka le utlwahalang la ho dumella dintho tse bohloko ho etsahala lefatsheng.—1 Johanne 4:8.

10. Satane o ile a qosa Jehova kang?

¹⁰ Diabolose o ile a kgelosa Adama le Eva tshimong ya Edene. O ile a boela a qosa Modimo ka hore ha a buse hantle. Satane o ile a re Modimo o tima Adama le Eva bolokolohi. O ne a batla ba dumele hore ha ba hloke Jehova le hore a ka ba busa betere ho feta Modimo.—Genese 3:2-5; sheba Ntlha ya 26 e hlahang qetellong ya buka.

11. Re lokela ho nahana ka potso efe?

¹¹ Adama le Eva ha ba a ka ba mamela Jehova. Ba ne ba batla ho itaola. Jwale potso eo re ka nahanang ka yona ke ena: Jehova o ne a tla etsang ho bontsha hore Adama le Eva ba ne ba fositse le hore o tseba se re loketseng?

12, 13. (a) Ke hobaneng ha Jehova a sa ka a fedisa Adama le Eva hanghang? (b) Ke hobaneng ha Jehova a dumelletse hore Satane e be mmusi wa lefatshe le hore batho ba ipuse?

 ¹² Jehova ha a ka a fedisa Adama le Eva hanghang. Ho e na le hoo, o ile a ba dumella hore ba be le bana. Jehova o ile a fa bana ba Adama le Eva bolokolohi ba ho ikgethela hore na ba batla ho buswa ke mang. Morero wa Jehova ke hore batho ba phethahetseng ba tlale lefatshe, mme ha ho seo Diabolose a ka se etsang ho o thibela.—Genese 1:28; Esaia 55:10, 11.

¹³ Satane o ile a qosa Jehova ka pela mangeloi a dimilione. (Jobo 38:7; Daniele 7:10) Ka hoo, Jehova o ile fa Satane nako ya hore a bontshe bonnete ba diqoso tsa hae. O boetse o file batho nako ya hore ba ipuse ka tlasa taolo ya Satane, ho ba thusa ho bona hore ba ka se atlehe ntle le ho buswa ke Jehova.

14. Nako e seng e fetile e bontshitseng ka diqoso tsa Satane?

¹⁴ E se e le dilemo tse dikete batho ba ntse ba leka ho ipusa empa ba ntse ba hloleha. Ho hlakile hore Satane o ne a le leshano. Batho ba hloka thuso ya Modimo. Moprofeta Jeremia o ne a nepile ha a re: “Ke tseba hantle, Jehova, hore tsela ya motho wa lefatshe ha e matleng a hae. Ha ho matleng a motho . . . hore a tsamaise mehato ya hae.”—Jeremia 10:23.

15, 16. (a) Ke hobaneng ha Jehova a dumelletse bokgopo ka nako e telele hakaale? (b) Ke hobaneng ha Jehova a so lokise mathata a bakilweng ke Satane?

¹⁵ Ke hobaneng ha Jehova a dumelletse bokgopo ka nako e telele hakaale? Ke hobaneng ha a sa fedise dintho tse mpe? Ho nkile nako e telele ho bontsha hore  puso ya Satane e hlolehile. Batho ba lekile mefuta yohle ya puso mme ba hloleha. Le hoja ba entse tswelo pele ditabeng tsa saense le theknoloji, bofutsana, bokebekwa le dintwa di ntse di ata ho ya pele. Ho hlakile hore re ke ke ra kgona ho ipusa empa re hloka ho buswa ke Modimo.

¹⁶ Le ha ho le jwalo, Jehova ha a so lokise mathata a bakilweng ke Satane. Ho ne ho tla bonahala eka Jehova o tshehetsa Satane haeba a ne a ka lokisa mathata a pusong ya hae. Batho le bona ba ne ba tla nahana hore ba kgona ho ipusa haeba ho ne ho se na mathata pusong ya bona. Monahano oo e ne e tla be e le leshano mme Jehova a ke ke a bua leshano.—Baheberu 6:18.

17, 18. Jehova o tla lokisa tshenyo e bakilweng ke Satane jwang?

¹⁷ Na Jehova a ka kgona ho lokisa tshenyo e bakilweng ke Satane le e bakilweng ke batho? E, ho jwalo. Modimo ha a hlolwe ke letho. Ka ha Jehova o tseba dintho tsohle, o tla fedisa puso ya Satane ka nako e loketseng. Ka mora moo, o tla etsa hore lefatshe le be letle jwalo ka ha a ne a rerile qalong. Bohle “ba mabitleng a kgopotso” ba tla tsoswa. (Johanne 5:28, 29) Batho ba ke ke ba hlola ba kula kapa ba shwa. Jesu o tla lokisa tshenyo e bakilweng ke Satane. Jehova o tla sebedisa Jesu “ho qhaqha mesebetsi ya Diabolose.” (1 Johanne 3:8) Nako ena e kgutshwane e setseng pele bofelo bo fihla, e re fa monyetla wa ho ithuta ka Jehova le ho mo bontsha hore re batla ho buswa ke yena. (Bala 2 Petrose 3:9, 10.) Jehova o boetse o re thusa ho mamella ha re tobana le mathata.—Johanne 4:23; bala 1 Bakorinthe 10:13.

¹⁸ Jehova ha a re qobelle hore re mo sebeletse. O file  batho bolokolohi ba ho ikgethela hore ba tla sebeletsa mang. Re lokela ho sebedisa bolokolohi boo jwang?

19. Jehova o re file mpho efe e babatsehang? Ke hobaneng ha re lokela ananela ee?

¹⁹ Jehova o re file mpho e babatsehang e leng bolokolohi ba ho ikgethela. Bolokolohi bona bo re kgetholla ho diphoofolo, hobane tsona di etsa dintho ho ya ka tlhaho, ha rona re kgona ho ikgethela kamoo re batlang ho phela kateng. Re boetse re na le bolokolohi ba ho kgetha hore na re batla ho thabisa Jehova kapa tjhe. (Liproverbia 30:24) Ha re tshwane le diroboto kapa metjhini e laolwang ke batho. Re na le bolokolohi ba ho ikgethela metswalle le kamoo re batlang ho phela kateng. Jehova o batla hore re natefelwe ke bophelo.

20, 21. Ke kgetho efe e bohlale eo o ka e etsang hona jwale?

²⁰ Jehova o batla hore re mo rate. (Matheu 22:37, 38) Motswadi o ne a ke ke a thaba haeba ngwana wa hae a ne a ka re o a mo rata hobane feela a qobelletswe ho tjho jwalo. Empa ho ba monate ho motswadi ha ngwana a bua jwalo ho tswa pelong. Jehova le yena o a thaba ha re kgetha ho mo rata. O batla re ikgethele hore re tla mo sebeletsa kapa tjhe. Satane, Adama, le Eva ba ile ba kgetha ho fetohela Jehova. Wena o tla kgetha ho etsang ka bolokolohi boo o bo filweng?

²¹ Kgetha ho sebeletsa Jehova. Ho thabisang ke hore ho se ho na le batho ba dimilione ba kgethileng ho thabisa Jehova le ho swabisa Satane. (Liproverbia 27:11) O lokela ho etsang hona jwale e le hore o phele lefatsheng le letjha leo Modimo a le tshepisitseng? Kgaolo e latelang e tla re fa karabo.