DULANG LE LEBETSE!
Selemo sa 2022 se Neng se Tletse Mathata—Bibele e Reng ka Sona?
Selemong sa 2022 ho bile le ditlaleho tsa ditaba tse bongata bo thibang letsatsi tse buang ka dintwa, mathata a ditjhelete le dikoduwa tsa tlhaho. Ke Bibele feela e hlalosang hore na diketsahalo tsena di bolelang.
Diketsahalo tsa selemo sa 2022 di bolelang
Diketsahalo tsa selemo se fetileng ke bopaki bo eketsehileng ba hore re phela nakong eo Bibele e e bitsang ‘mehla ya bofelo.’ (2 Timothea 3:1) Mehla eo e qadile ka 1914. Hlokomela hore na diketsahalo tsa moraorao di dumellana hakae le seo Bibele e se buileng ka mehla ya rona:
“Dintwa.”—Matheu 24:6.
“2022 e Bile Selemo Seo ka Sona Dintwa Tse Mahlomafubedu di Ileng Tsa Ipheta Europe.” a
Bala sehlooho se reng “Russia e Hlasela Ukraine.”
“Tlala.”—Matheu 24:7.
“Ka 2022 ho Bile le Tlala e Eso Bonwe.” b
Bala sehlooho se reng “Ntwa ya Ukraine e Etsa Hore Kgaello ya Dijo e Mpefale Lefatsheng Lohle.”
“Mafu a sewa.”—Luka 21:11.
“Lefu la polio le ile la kgutla hape, monkeypox le yona ya ata ka sekgahla ha ka nako e tshwanang COVID-19 e tswela pele ho baka mathata a mangata. Maemo ana a bontsha ka ho hlaka hore na mafu a tshwaetsanwang a kotsi hakae le hore na batho ba tlokotsing e kae.” c
Bala sehlooho se reng “Batho ba Dimilione Tse Tsheletseng ba Bolailwe ke Sewa sa COVID-19.”
“Dintho tse tshosang.”—Luka 21:11.
“Ho bile le motjheso o feteletseng, komello, mello ya tlhaho le dikgohola. Lehlabula la 2022 le tla dula le hopolwa ka lebaka la maemo a lehodimo a neng a fetofetoha ka tsela e feteletseng. Maemo ao a lehodimo a ile a baka tshenyo e tshabehang, a etsa hore batho ba diketekete ba shwe a ba a etsa hore batho ba dimilione lefatsheng lohle ba tlohe mahaeng a bona.” d
Bala sehlooho se reng “Bibele e Reng ka Motjheso o Ntseng o Hlwa Mekwalaba Lefatsheng Lohle.”
“Merusu [kapa “meferefere,” nal.].”—Luka 21:9.
“Ka 2022 matsholo a boipelaetso a ile a eketseha ka tsela e makatsang hobane batho ba ne ba tuka ke bohale ka lebaka la mathata a ditjhelete, haholoholo bothata ba ho nyoloha ha theko ya dintho.” e
Bala sehlooho se reng “Bibele e Reng ka ho Phahama ha Theko ya Dintho Lefatsheng Lohle.”
Selemo sa 2023 se re tlela ka dife?
Ha re tsebe hore na selemo sa 2023 se re tshwaretseng. Empa ntho eo re e tsebang ke hore haufinyane Mmuso wa Modimo o lehodimong o tlo fetola lefatshe. (Daniele 2:44) Mmuso oo o tlo fedisa dintho tsohle tse bakelang batho mathata le ho etsa bonnete ba hore thato ya Modimo e a etswa lefatsheng.—Matheu 6:9, 10.
Re o kgothaletsa hore o mamele keletso ya Jesu ha a re re ‘dule re fadimehile’ e le hore o bone hore na dintho tse etsahalang lefatsheng di phethahatsa boprofeta ba Bibele jwang. (Mareka 13:37) Re kopa o bue le rona e le hore o ithute haholwanyane ka hore na Bibele e ka o thusa jwang hona jwale le hore na e ka thusa wena le lelapa la hao jwang hore le be le tshepo ya hore le tla ba le bokamoso bo tjhabileng.
a AP News, “2022 Was Year the Horror of War Returned to Europe,” by Jill Lawless, December 8, 2022.
b World Food Programme, “A Global Food Crises.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” by Lawrence O. Gostin, JD, September 22, 2022.
d Earth.Org, “What’s Behind the Record-Breaking Extreme Weather Events of Summer 2022?” by Martina Igini, October 24, 2022.
e Carnegie Endowment for International Peace, “Economic Anger Dominated Global Protests in 2022,” by Thomas Carothers and Benjamin Feldman, December 8, 2022.