•   “China e re ke lekgetlo la boraro e tlaleha motjheso o ntshang kwena bodibeng le komello e matla.”—The Guardian, September 7, 2022.

•   “Dikarolo tse ding tsa Afrika di tla ba le komello ka dilemo tse hlano tse latellanang.”—UN News, August 26, 2022.

•   “Boholo ba dinaha tse Europe di kotsing ya ho ba le komello e mpe ka ho fetisisa.”—BBC News, August 23, 2022.

 Ditsebi tse ngata di hakanya hore komello e kang ena e tla tswela pele ho ba teng ebe e mpefale le ho feta. Na ho na le tshepo ya hore dintho di tla loka? Bibele e reng tabeng ee?

 Bibele e ile ya re ka mehla ya bofelo:

•   “Ho tla ba le . . . tlala . . . sebakeng se seng ka mora se seng.”—Luka 21:11.

 Hangata komello e baka kgaello ya dijo. Kgaello eo ya dijo e bakang mathata le lefu e phethahatsa boprofeta ba Bibele.—Tshenolo 6:6, 8.

 Bibele e fana ka lebaka la hore na ke hobaneng ha komello e ntse e mpefala. E re:

•   “Motho ha a kgone ho laola mehato ya hae.”—Jeremia 10:23.

 Sena se bolela hore batho ha ba na kgona ho ‘laola mehato ya bona’ kapa hona ho ipusa. Hangata diqeto tsa bona tse mpe di baka komello le kgaello ya metsi.

•   Borasaense ba bangata ba dumela hore dintho tseo batho ba di etsang di bakile ho fetoha ha maemo a lehodimo ho etsang hore ho be le komello lefatsheng lohle.

•   Maano ao batho ba a etsang ka lebaka la meharo le ho se shebele dintho pele a entse hore ho senngwe meru, lefatshe le silafale le tshebediso e fosahetseng ya dihlodilweng. Sena se ka etsa hore re lahlehelwe ke mehlodi ya metsi.

 Le ha ho le jwalo, Bibele e fana ka tshepo.

 Bibele e re tshepisa hore Modimo o tla lokisa mathata a kgaello ya metsi. Jwang?

1.  1. Modimo o tla ‘fedisa ba senyang lefatshe.’ (Tshenolo 11:18) O tla fedisa sesosa sa kgaello ya dijo e leng batho ba kgopo le ba meharo bao diketso tsa bona di senyang tikoloho.—2 Timothea 3:1, 2.

2.  2. “Sebaka se tjhesitsweng ke letsatsi e tla ba letamo le nang le lehlaka.” (Esaia 35:1, 6, 7) Modimo o tla etsolla tshenyo e bakilweng ke komello ebe o fetola lefatshe paradeise e noseditsweng hantle.

3.  3. “O hlokomela lefatshe, o etsa hore le behe dijalo tse ngata ebile o a le nontsha.” (Pesaleme ya 65:9) Modimo o tla hlohonolofatsa lefatshe e le hore le tlale ka dijo tse ngata le metsi a hlwekileng bakeng sa batho bohle.