Kgwedi e nngwe le e nngwe re lebella ka tjantjello ho shebella mananeo le divideo tse lokollwang ho JW Broadcasting. Empa barababo rona ba bangata ba Afrika ha ba kgone ho fumana mananeo ana ka Inthanete. Hobaneng?

 Dibakeng tse ngata Afrika ha ho na Inthanete, ebile hangata moo e leng teng ya sokodisa kapa e turu haholo. Mohlala, molebedi wa potoloho wa Madagascar o ile a ya moo ho rekiswang Inthanete. O ile a patala tjhelete e ka bang R246 ha a downloada broadcasting ba kgwedi e le nngwe feela. Tjhelete eo e feta eo batho ba bang ba e kgolang ka beke.

 Le hara mathata ana, batho ba bangata ba Afrika hona jwale ba se ba thabela ho shebella JW Broadcasting ba sa sebedise Inthanete. Ba kgona jwang?

 Ho tloha ka 2017, ho ile ha etswa hore batho ba dulang ka borwa ho Sahara ba kgone ho shebella JW Broadcasting dithelevisheneng ka sathelaete. Ke mahala ho e shebella ebile e fumaneha nako yohle ka dipuo tse 16.

 Bakeng sa hore tsena tsohle di kgonehe, Dipaki Tsa Jehova di ile tsa patala konteraka ya ho hasa mananeo ka sathalaete. Sathalaete eo e sebediswa dinaheng tse 35 tse ka borwa ho Sahara. Konteraka eo e patalwa tjhelete e fetang R184 564 ka kgwedi. Ka dinako tse ding, ho patalwa tjhelete e fetang eo ha ho haswa mananeo a itseng. Ka lebaka leo, batho ba bangata ba ka natefelwa ke dikopano kapa mananeo a kgethehileng a haswang ha ho etetswe lekala.

 Batho ba bangata esita le bao eseng Dipaki, ba shebella thelevishene ba sebedisa sathalaete ya JW ba ntse ba le malapeng. Ho ba nolofalletsa ho shebella, Diholong Tsa Mmuso tse fetang 3 670 ho kentswe thepa e kgonang ho hokela sathalaeteng e le hore bara le baradibabo rona ba ka kgona ho shebella JW Broadcasting ba le diholong. Haeba Holong ya Mmuso ho se ho ntse ho e na le thelevishene kapa projector, ditshenyehelo tsa thepa eo ho akarelletsa le ho e tlisa moo di ka etsa tjhelete e ka bang R1 080. Empa haeba holo e se na dintho tseo, thepa eo kaofela e ka rekwa ka tjheleteng e ka bang R8 185.

 Bara le baradibabo rona ba leboha haholo ka kgaso ena. Moholo e mong wa Cameroon o re: “Lelapeng la rona, kgaso ena e tshwana le manna a neng a le lefelleng.” Morawabo rona Odebode wa Nigeria o re: “Re shebella dintho tse hlahang moo re le lelapa hararo ka beke. Bana baka ba dula ba tatetse ho tla shebella. Ebile ka dinako tse ding ha re ntse re shebeletse mananeo a mang, ba kopa hore re tjhentjhe ebe re shebella dintho tse hlahang sathalaeteng ya JW.” Rose ya dulang Nigeria le yena o re: “Ke thabile haholo hobane hona tjena ha ke sa qeta nako e ngata ke shebeletse ditaba, empa ke se ke e qeta ke shebeletse dintho tse hlahang sathalaeteng ya JW. Ha ke shebelletse ditaba, ke ne ke utlwa bohloko hoo high blood yaka e neng e phahama. Kgaso ya JW yona ya nkgatholla ebile e mpha kgotso. Ke e rata hona hoo. Ke tlhohonolofatso e tswang ho Jehova.”

 Molebedi wa potoloho wa Mozambique o re potolohong eo a leng ho yona, Diholo Tsa Mmuso di kentswe thepa e kgonang ho hokela sathalaeteng. Bara le baradibabo rona ba diphuthehong tseo ba fihla hora pele diboka di qala e le hore ba ka shebella kgaso ya JW.

 Ka 2019, dibakeng tse robong, ho ile ha sebediswa sathalaete ho hasa dipuo tsa sehlooho tse ileng tsa fanwa ke setho sa Sehlopha se Busang kopanong ya matjhaba e neng e le Johannesburg, Afrika Borwa. Morawabo rona Sphumelele ya sebetsang lefapheng la Broadcasting lekaleng la Afrika Borwa o re: “Nakong e fetileng, dipuo tseo di ne di lokela ho haswa ka Inthanete. Empa ho ne ho hlokahala hore ebe moo Inthaneteng e sebetsang hantle mme jwale e ne e le turu. Empa ho hasa re sebedisa sathalaete ya JW ha ho bitse hakaalo ebile e sebetsa hantle.”

 Re leboha menehelo e ntshwang bakeng sa ho tshehetsa mosebetsi o etswang lefatsheng lohle hobane e thusa bara le baradibabo rona ho shebella kgaso ya JW ba sebedisa sathalaete. Re leboha menehelo eo le faneng ka yona le sebedisa mekgwa e fapaneng e hlahang ho donate.pr418.com.