1 Na ke Modimo ya re Bakelang Dintho Tse Bohloko?
Ke Hobaneng ha ho le Bohlokwa ho Tseba Karabo ya Potso ee?
Batho ba bangata kajeno ha ba batle ho sebeletsa Modimo hobane ba nahana hore ke yena ya re bakelang mathata.
Nahana ka Sena
Baetapele ba madumedi a mangata ba ruta hore ke Modimo ya re bakelang mathata. Ka mohlala, ba bang ba re:
-
Dikoduwa tsa tlhaho ke kotlo e tswang ho Modimo.
-
Bana ba shwa ka lebaka la hore Modimo o hloka mangeloi a mangata lehodimong.
-
Batho ba ba le mathata ka lebaka la hore Modimo o nka lehlakore dintweng mme o sirelletsa batho bao a ba ratang.
Empa na ho ka etsahala hore seo baetapele ba bodumedi ba se buang ka Modimo se fosahetse? Hona na re ka ba tshepa haeba Modimo a sa thabele dintho tseo ba di buang ka yena?
ITHUTE KA HO EKETSEHILENG
Shebella video ya Ke Hobaneng ha o Lokela ho Ithuta Bibele? ho jw.org/st-za.
Seo Bibele e se Rutang
Ha se Modimo ya re tlisetsang mathata.
Haeba batho ba re ke Modimo ya re tlisetsang mathata, seo se tla be se fapane hole le seo Bibele e re bolellang sona ka makgabane a hae. Ka mohlala:
“Ditsela tsohle tsa [Modimo] ke toka. . . . O lokile mme o kgabane.”—DEUTERONOMA 32:4.
“Ho ke ho be hole le Modimo wa nnete hore a sebetse bokgopo, le hore Ya Matla Ohle a sebetse ka mokgwa o hlokang toka!”—JOBO 34:10.
“Ya Matla Ohle ha a kgopamise kahlolo.”—JOBO 34:12.
Modimo ha a thabele madumedi a buang dintho tse mpe ka yena.
Sena se akarelletsa madumedi a tshehetsang dintwa le batho ba rutang hore Modimo ke yena ya re bakelang mathata.
“Baprofeta ba profeta leshano ka lebitso la ka. Ha ke a ka ka ba roma, le ha e le ho ba laela kapa ho bua le bona. Ba bua le lona ka tsela ya boprofeta ka pono ya bohata . . . ntho ya lefeela le ho qhekella ha dipelo tsa bona.”—JEREMIA 14:14.
Jesu o ne a hanyetsa bodumedi ba leshano.
“Ha se e mong le e mong ya reng ho nna, ‘Morena, Morena,’ ya tla kena mmusong wa mahodimo, empa ho tla kena ya etsang thato ya Ntate ya mahodimong. Letsatsing leo, ba bangata ba tla re ho nna ‘Morena, Morena, na ha re a ka ra profeta ka lebitso la hao, le ho leleka bademona ka lebitso la hao, le ho etsa mesebetsi e matla e mengata ka lebitso la hao?’ Le ha ho le jwalo ka nako eo ke tla ba bolella: ‘Ha ke a ka ka le tseba le ka mohla! Tlohang ho nna, lona ba etsang tlolo ya molao!’”—MATHEU 7:21-23.
O ka Nna wa Rata le Tsena
DIPOTSO TSA BIBELE DI A ARAJWA
Ke Hobaneng ha Modimo a ile a Dumella Polao e Sehloho ya Bajuda?
Batho ba bangata ba ipotsa hore na ke hobaneng ha Modimo ya lerato a ile a dumella hore batho ba utlwe bohloko. Bibele e fana ka dikarabo tse kgotsofatsang!
TORA YA HO LEBELA
Na Mathata—ke Pontsho ya Hore Modimo o a re Otla?
Na Modimo o sebedisa ho kula le dintho tse bohloko ho ahlola batho kajeno?
