Mmuso o Tla Fedisa Kgethollo
Batho ba dimillione ba ile ba sebedisa melaomotheo eo ho buuweng ka yona dihloohong tse fetileng mme seo se entse hore ba se ke ba hlola ba ba le kgethollo. Nnete ke hore re ke ke ra kgona ho tlosa kgethollo ka bo rona. Na ho ka etsahala hore kgethollo e se ke ya hlola e ba teng?
Mmuso wa Sebele
Mebuso ya batho ha e so kgone ho fedisa kgethollo. Empa na ho tla ke ho be le mmuso o ka kgonang ho fedisa kgethollo?
E le hore mmuso o kgone ho fedisa kgethollo o lokela ho etsa dintho tse latelang:
-
1. O kgothalletse batho hore ba fetole tsela eo ba nahanang le ho ikutlwa ka yona ka batho ba bang.
-
2. O fedise bohloko boo batho ba bang ba bo utlwileng ba hore ba kile ba kgethollwa.
-
3. O be le baetapele ba se nang kgethollo.
-
4. O etse hore batho ba mefuta yohle ba momahane.
Bibele e a re tiisetsa hore Modimo o entse hore ho be le mmuso o jwalo mme o bitswa “Mmuso wa Modimo.”—Luka 4:43.
A re boneng hore na Mmuso oo o tla etsang.
1. Boitshwaro bo Botle
“Baahi ba naha e behang ba tla ithuta ho loka.”—ESAIA 26:9.
“Mosebetsi wa ho loka ha nnete e tla ba kgotso; mme tshebeletso ya ho loka ha nnete, e be kgutso le tshireletseho ho isa nakong e sa lekanyetswang.”—ESAIA 32:17.
Seo se bolelang? Se bolela hore Mmuso wa Modimo o tla ruta batho hore na ke eng se nepahetseng. Haeba batho ba ithuta hore na ke eng se nepahetseng le se fosahetseng le hore na ho se be le kgethollo ho bolelang, tsela eo ba nahanang ka yona ka batho ba bang e tla fetoha. Kaofela ba tla hlokomela hore ntho e nepahetseng ke ho rata batho ba mefuta yohle.
2. O Tla Fedisa Kgethollo
Modimo “o tla hlakola meokgo yohle mahlong a bona, lefu ha le sa tla hlola le eba teng, mme ho siama [maswabi] kapa ho bokolla kapa bohloko ha di sa tla hlola di eba teng. Dintho tsa pele di fetile.”—TŠENOLO 21:4.
Seo se bolelang? Mmuso wa Modimo o tla fedisa bohloko bohle bo bakilweng ke ho ba le kgethollo. Batho ba ileng ba kgethollwa ha ba sa tla hlola ba ba le lehloyo.
3. Ho Tla ba le Moetapele ya Molemo
“A ke ke a ahlola ka se bonahalang mahlong a hae, kapa a kgalemela feela ho ya ka ntho e utlwilweng ke ditsebe tsa hae. O tla ahlola ba tlaase ka ho loka, mme o tla fana ka kgalemelo ka ho loka molemong wa ba bonolo ba lefatshe.”—ESAIA 11:3, 4.
Seo se bolelang? Jesu Kreste Morena wa Mmuso wa Modimo, o tla busa lefatshe lohle ka ho loka ebile a se na kgethollo. Jesu ha a rate batho ba mofuta o itseng ho feta o mong mme o tla etsa bonnete ba hore batho kaofela ba mamela melao ya hae.
4. Ho Tla ba le Bonngwe
Mmuso wa Modimo o ruta batho hore ba “kopane ka ho loketseng kelellong e tshwanang le mokgweng o tshwanang wa ho nahana.”—1 BAKORINTHE 1:10.
Seo se bolelang? Batho ba tla beng ba phela Mmusong wa Modimo, ha ho na thwe feela ba bonngweng empa ba tla be ba momahane e le ka nnete hobane ba tla be ba ratana.
