Banyalani ba atisa ho kopana le mathata ka mora hore bana ba bona ba hole mme ba tlohe lapeng. Ha ba sala ba le babedi feela, ba iphumana ba sa tsebe hore na ba nkeng ba e kopanye leng. M. Gary Neuman eo e leng setsibi sa tsa malapa, o re: “Ke thusitse banyalani ba bangata ba neng ba sa kgone ho ba ngatana nngwe ha bana ba bona se ba tlohile lapeng. Ka ha jwale ba babedi feela, ba fellwa ke moqoqo ka nako tse ding.” *

Na ho jwalo lenyalong la hao? Haeba ho jwalo, o se ke wa tshoha, o ntse o ka kgutlisetsa dintho madulong. Empa qala ka ho nahana ka dintho tseo e ka nnang yaba ke tsona tse butseng lekgalo pakeng tsa lona.

Bana e ile ya ba karolo ya lelapa ka dilemo. Batswadi ba bangata ba ile ba itlwaetsa ho beha ditlhoko tsa bana ba bona pele ho ditlhoko tsa lenyalo. Ka lebaka leo, ba phathahana ka ho bapala karolo ya ho ba Ntate le Mme ho ena le ho thabela kamano ya bona ya lenyalo jwalo ka Monna le Mosadi. Sena ke sona se etsang hore e re ha bana ba se ba tswile, jwale e ba mathata feela. Mme e mong ya dilemo di 59 o re: “Bonyane ha bana ba ka ba sa ntse ba le teng, re ne re etsa dintho mmoho. Empa eitse ha ba tloha lapeng, nna le monna wa ka ra qala ho etsa dintho tse sa tshwaneng.” Ka nako e nngwe o ile a ba a re ho monna wa hae: “Ke bona eka re a sitisana.”

Banyalani ba bang ha ba itokisetse maemo ana. Buka e nngwe e bitswang Empty Nesting e re: “Ho banyalani ba bang, ekare ke hona ba sa tswa nyalana.” Ba bang bona, ba iketsetsa dintho tsa bona ebe ha ba tsotellane hoo ba bang jwalo ka ha eka ke batho feela tjee ba dulang mmoho.

Empa ditaba tse monate ke hore, o ntse o ka nna wa qoba mathata ana mme wa thabela melemo e tliswang ke diphetoho tsena bophelong. Bibele e ka o thusa boemong bona. A re ke re boneng ho re na e ka o thusa jwang.

Ikemisetse ho amohela phetoho. Bibele ha e bua ka bana ba seng ba hodile e re: “Monna o tla tlohela ntatae le mmae.” (Genese 2:24. BIBELE E HALALELANG) Ha e le hantle, mosebetsi wa lona batswadi, o ne o fella ha bana ba ntse ba le tlasa tlhokomelo ya lona, nakong eo le neng le ba ruta hore ba be le makgabane ao ba tla a hloka ha ba se ba le baholo. Haeba le eba le pono e jwalo, le tla thaba hore ebe ba se ba tseba ho itlhokomela.​—Molaomotheo wa Bibele: Mareka 10:7.

Ke nnete hore le tla dula le le batswadi ho bana ba lona. Empa ka ha jwale ha ba sa ikarabella ho lona, sena se le fa monyetla wa hore le momahane jwalo ka monna le mosadi. Ha ka lehlakoreng le leng, le ntse le ipha nako ya ho buisana le bona.  *​—Molaomotheo wa Bibele: Matheu 19:6.

Buisanang ka se le tshwenyang. Buisana le molekane wa hao ka bolokolohi ka tsela eo o ikutlwang ka yona mme le yena o mo mamele ha a ntsha maikutlo a hae. Eba le mamello mme o utlwisise. Ho ka nna ha le nka nako hore le boele le momahane, empa ha le ikitlaetsa le ho feta le tla atleha.​—Molaomotheo wa Bibele: 1 Bakorinthe 13:4.

Shebang dintho tseo le ka di etsang hammoho. Buisanang ka dintho tseo le batlang ho di finyella hammoho le dintho tseo le tla thahasella ho ya ho tsona kapa ho di bona. Ha ntse le hodisa bana, le ile la fumana boiphihlelo dinthong tse ngata. Mohlomong le ka thusa batho ba bang.​—Molaomotheo wa Bibele: Jobo 12:12.

Ikgopotseng dikano tsa lona. Nahanang ka dintho tse ileng tsa etsa hore le ratane. Nahanang ka dintho tseo le ileng la feta ho tsona historing ya bophelo ba lona le lenyalong. Le tla hlokomela kamoo diphetoho tsena di leng molemo ho lona. Haeba le tshwarisana, le tla atleha boitekong ba lona ba ho boloka lerato la lona le tuka lenyalong.