SEO BATHO BA SE BUANG

Batho ba bang ba re Baiseraele ba ne ba rapela modimo ya nyoretsweng madi eo ba mo bitsang “modimo wa ntwa ya morabe.”

SEO BIBELE E SE BUANG

Ditjhaba tse ileng tsa hlolwa ke Baiseraele, di ne di tletse mabifi le boitshwaro bo hlephileng, bo akarelletsang ho etsa thobalano le diphoofolo kapa le e mong wa leloko, le ho etsa sehlabelo ka bana. Ka mora hore Modimo a ba fe dilemo hore ba fetole ditsela tsa bona, o ile a re: “Hobane ditjhaba tseo ke di tlosang ka pela lona di itshilafaditse ka dintho tsena tsohle.”—Levitike 18:21-25; Jeremia 7:31.

“Ke ka bokgopo ba ditjhaba tsena Jehova Modimo wa hao a di lelekang ka pela hao.”—Deuteronoma 9:5.

MOHLOMONG O HLOKOMETSE

Hore hangata ha ho na le dintwa pakeng tsa dinaha tse pedi, baetapele ba bodumedi dinaheng tseo, ba rapella hore Modimo a be ka lehlakoreng la bona. Buka e nngwe e bitswang The Causes of War e re: “Haesale bodumedi bo kenella dintweng.”

SEO BIBELE E SE BUANG

Bakreste ha ba a lokela ho lwantsha dira tsa bona. Moapostola Pauluse o ile a ngolla Bakrestemmoho le yena a re: “Haeba ho kgoneha, ho fihlela moo ho itshetlehileng ka lona, le be le kgotso le batho bohle. Le se ke la iphetetsa.”—Baroma 12:18, 19.

Ho ena le hore Jesu a kgothalletse balatedi ba hae ho ya ntweng, o ile a re ho bona: “Tswelang pele ho rata dira tsa lona le ho rapella ba le hlorisang; e le hore le ka ba bara ba Ntata lona ya leng mahodimong.” (Matheu 5:44, 45) Bakreste ha se “karolo ya lefatshe,” ka mantswe a mang, ha ba a lokela ho kenella dintweng, le haeba naha ya habo bona e ya ntweng. (Johanne 15:19) Haeba Modimo a batla hore batho bohle ba mo sebeletsang ba rate dira tsa bona le hore ba se ke ba kenakenana le dintwa, na re ka re ho na le dinaha tseo a di tshehetsang ha di ya ntweng?

“Mmuso wa ka hase karolo ya lefatshe lena. Hoja mmuso wa ka e ne e le karolo ya lefatshe lena, bahlanka ba ka ba ka be ba lwanne hore ho se ke ha nehelanwa ka nna ho Bajuda. Empa, jwale, mmuso wa ka ha o tswe mohloding ona.”—Johanne 18:36.

SEO BATHO BA SE BUANG

Batho ba dumela hore ntwa ke ntho e ke keng ya qojwa. Buka e bitswang War and Power in the 21st Century le yona e re: “Ha ho mohla dintwa di tla ke di fele. Lefatshe le tla dula le sena kgotso.”

EO BIBELE E SE BUANG

Dintwa di tla fela ka ha ha ho motho ya tla lakatsa ho lwana. Ka nako eo, Mmuso wa Modimo o busang o le lehodimong, o tla tlosa dibetsa tsohle tsa ntwa mona lefatsheng mme o re rute ho phela ka kgotso. Bibele e ya re tiisetsa hore Modimo o tla ‘lokisa ditaba ditjhabeng tse matla tse hole haholo. Ba tla lokela ho tea disabole tsa bona hore e be mehoma le marumo a bona hore e be dikere tse faolang dimela. Setjhaba se ke ke sa phahamisetsa setjhaba se seng sabole, ha ba sa tla hlola ba ithuta ntwa.’—Mikea 4:3.

Bibele e ruta hore ha Mmuso wa Modimo o se o busa, ho ke ke ha hlola ho ba le mebuso e itjhebileng bo yona feela, melao e susumetsang batho hore ba fetohele kapa ba hloye batho ba merabe e meng. Ka nako eo ntwa e tla be e fedile. Modimo o tshepisa hore esita le diphoofolo “di ke ke tsa ntsha kotsi le ha e le efe kapa tsa baka tshenyo; hobane ka sebele lefatshe le tla tlala tsebo ya Jehova jwalo ka ha metsi a kwahetse lewatle.” —Esaia 11:9.

“O fedisa dintwa ho isa pheletsong ya lefatshe. O roba seqha mme o robakanya lerumo; O tjhesa dikoloi mollong.”—Pesaleme ya 46:9.