1, 2. Ke ketsahalo efe e sa tlwaelehang e ileng ya etsahala ka letsatsi la Pentekonta ya 33?

E NE e le Sontaha hoseng ka selemo sa 33, ha barutuwa ba ka bang 120 ba bokane ha mmoho ntlong e Jerusalema kamoreng e ka hodimo. (Lik. 1:13-15; 2:1) Matsatsi a mmalwa pele ho moo, Jesu o ile a ba laela hore ba dule Jerusalema ka ha ba tlo fumana mpho e ikgethang. (Lik. 1:4, 5) Keng se ileng sa etsahala?

² “Ka tshohanyetso ho ba le lerata le tswang lehodimong le jwalo ka la moya o fokang ka sekgahla.” Modumo oo o ile wa tlala ntlo yohle. Ka mora moo, “maleme a kang a mollo” a ile a dula dihloohong tsa barutuwa yaba “ba tlala moya o halalelang.” (Lik. 2:2-4) Ka tsela ena e ikgethang Jehova o ile a fa sehlopha seo moya o halalelang. (Lik. 1:8) E ile ya eba batho ba pele ba ho tlotswa ka moya o halalelang * le ho ba le tshepo ya ho busa le Jesu lehodimong.

3. Ke hobaneng ha barutuwa ba neng ba bokane Jerusalema ka Pentekonta ba ne ba kgodisehile hore ba tlotsitswe ka moya o halalelang?

³ Haeba o ne o le e mong wa barutuwa ba neng ba bokane ka kamoreng e ka hodimo letsatsing leo, o ne o ke ke  wa lebala se ileng sa etsahala. Ntho e neng e bonahala eka ke leleme le kang la mollo e ile ya dula hloohong ya hao mme wa qala ho bua puo e nngwe. (Lik. 2:5-12) O ne o ke ke wa belaela hore o tlotsitswe ka moya o halalelang. Empa na Bakreste bohle ba tlotswang ka moya o halalelang ba kgethwa ka tsela e hlollang le ka nako e le nngwe? Tjhe. Re tseba jwang?

4. Na Bakreste bohle ba mehleng ya baapostola ba ile ba tlotswa ka nako e le nngwe? Hlalosa.

⁴ A re ke re hlahlobeng nako eo ba ileng ba tlotswa ka yona. Sehlopha seo sa Bakreste ba ka bang 120, ha se sona feela se ileng sa tlotswa ka moya o halalelang ka Pentekonta ya 33. Ha morao hona letsatsing leo, batho ba ka bang 3 000 ba ile ba fuwa moya o halalelang mme ba ile ba tlotswa ha ba kolobetswa. (Lik. 2:​37, 38, 41) Empa dilemong tse latelang, ha se Bakreste bohle ba tlotsitsweng ba ileng ba tlotswa ha ba kolobetswa. Ka mohlala, Basamaria e ile ya eba batlotsuwa nako e itseng ka mora hore a kolobetswe. (Lik. 8:14-17) Ha Korneliase le ba le lelapa la hae ba ile ba tlotswa pele ba kolobetswa, e leng ntho e neng e sa tlwaeleha.​—Lik. 10:44-48.

5. Ho ya ka 2 Bakorinthe 1:​21, 22, ho etsahalang ha motho e eba motlotsuwa?

⁵ A re hlahlobeng hore na ho etsahalang ha motho e eba motlotsuwa. Qalong ho ba thata ho batlotsuwa ba bang ho re ba dumele hore Jehova o ba kgethile. Ba ka nna ba ipotsa, ‘Hobaneng Modimo a kgethile nna?’ Empa ba bang ba ka nna ba se ke ba ikutlwa ka tsela eo. Ho sa tsotellehe sena, moapostola Pauluse o hlalosa se etsahallang batlotsuwa bohle ha a re: “Ka mora hore le dumele, le ile la tiiswa * ka moya o halalelang o tshepisitsweng, oo e leng pontsho esale pele ya lefa la rona.” (Baef. 1:13, 14) Ka hoo, Jehova o sebedisa moya o halalelang ho kgodisa Bakreste bana hore o  ba kgethile. Ka tsela eo, moya o halalelang ke “pontsho [kapa tshepiso]” e ba kgodisang hore nakong e tlang ba tla phela ka ho sa feleng lehodimong eseng lefatsheng.​—Bala 2 Bakorinthe 1:21, 22.

6. Motlotsuwa o lokela ho etsang e le hore a fumane moputso wa hae?

⁶ Ha Mokreste e eba motlotsuwa, na see se bolela hore o se a ntse a fumane moputso wa hae? Ha ho jwalo. Mokreste eo o kgodisehile hore o kgethetswe ho ya phela lehodimong. Le ha ho le jwalo, o tlameha ho hopola keletso ena e reng: “Barabeso, le etse haholwanyane sohle se matleng a lona ho itiisetsa ho bitswa le ho kgethwa ha lona; etswe haeba le tswela pele ho etsa dintho tsena ho hang le ke ke la hloleha le ka mohla.” (2 Pet. 1:10) Ka hoo, le hoja motlotsuwa a kgethetswe ho ilo phela lehodimong, o tla fumana moputso wa hae ha feela a dula a tshepahala.​—Bafil. 3:12-14; Baheb. 3:1; Tšen. 2:10.

7. Batlotsuwa ba tseba jwang hore ba ya lehodimong?

⁷ Empa motho o tseba jwang hore o ya lehodimong? Karabo re e fumana mantsweng ao Pauluse a ileng a a bua ho Bakreste ba Roma, “ba bitseditsweng ho ba bahalaledi.” O ile a re ho bona: “Le ile la amohela moya wa ho nkelwa ka lapeng le le bara, e leng moya oo ka ona re hweletsang: “Abba, Ntate!” Moya o paka le moya wa rona hore re bana ba Modimo.” (Bar. 1:7; 8:15, 16) Ka hoo, Jehova o sebedisa moya o halalelang ho kgodisa batlotsuwa hore ba ilo phela lehodimong.​—1 Bathes. 2:12.

8. 1 Johanne 2:20, 27 e bontsha jwang hore Bakreste ba tlotsitsweng ha ba hloke ho kgodiswa ke batho ba bang hore ke batlotsuwa?

⁸ Jehova o etsa bonnete ba hore batlotsuwa ha ba belaele hore o ba kgethile. (Bala 1 Johanne 2:20, 27.) Ke nnete hore Batlotsuwa ba hloka ho rutwa ke Jehova jwalo ka e mong le e mong wa rona. Empa ha ba hloke ho bolellwa ke motho e mong hore ba tlotsitswe, ka ha Jehova o sebedisitse moya wa hae o halalelang ho ba kgodisa hore o ba tlotsitse.

9. Ho ya ka Baefese 1:18, ke diphetoho dife tse etsahallang motho ha e eba motlotsuwa?

⁹ Ho ka nna ha eba thata ho bahlanka ba bangata ba Jehova ho utlwisisa se etsahalla motho ha a tlotswa. Sena se a utlwahala hobane ha e so be batlotsuwa. Hape Modimo o bopetse batho hore ba phele ka ho sa feleng lefatsheng eseng lehodimong. (Gen. 1:28; Pes. 37:29) Empa ho na le bao Jehova a ba kgethetseng ho phela lehodimong. Ka hoo ha a ba tlotsa, o fetola tshepo le tsela eo ba nahanang ka yona, e le hore ba batle ho phela lehodimong.​—Bala Baefese 1:18.

10. Ho ‘tswalwa hape’ ho bolelang? (Sheba naletsana)

¹⁰ Ha Bakreste ba tlotswa ka moya o halalelang ba ‘tswalwa hape.’ * Jesu o ile a bontsha hore ha ho kgonahale ho hlalosetsa motho ya sa tlotswang hore ho jwang ho ‘tswalwa hape.’​—Joh. 3:3-8.

11. Hlalosa tsela eo Mokreste a nahanang ka yona ha e eba motlotsuwa.

¹¹ Bakreste ba qala ho nahana jwang ha e eba batlotsuwa? Bakreste bana ba ne ba  ena le tshepo ya ho phela lefatsheng pele Jehova a ba tlotsa. Ba ne ba lebelletse nako eo ka yona Jehova a tla etsa lefatshe paradeise le ho fedisa batho ba kgopo. Mohlomong ba ne ba bona ba se ba amohela metswalle le ba lelapa ba hlokahetseng. Empa ka mora hore ebe batlotsuwa, ba ile ba qala ho nahana ka tsela e fapaneng. Hobaneng? Na ba ne ba se ba sa kgotsofalle ho phela ka ho sa feleng lefatsheng? Kapa na ba ile ba fetola maikutlo a bona hobane ba ne ba nyahame kapa ba imetswe ke mathata? Ha ho jwalo, empa Jehova ke yena ya sebedisitseng moya o halalelang ho fetola tshepo le tsela eo ba nahanang ka yona.

12. Ho ya ka 1 Petrose 1:3, 4, batlotsuwa ba ikutlwa jwang ka tshepo eo ba nang le yona?

¹² Motlotsuwa a ka nna a utlwa eka ha a tshwanelwe ke ho ya busa le Jesu lehodimong. Empa ha a belaele hore Jehova o mo kgethile. Ho ena le hoo, o ananela le ho thabela monyetla ona haholo.​—Bala 1 Petrose 1:3, 4.

13. Batlotsuwa ba ikutlwa jwang ka bophelo ba bona mona lefatsheng?

¹³ Na see se bolela hore batlotsuwa ba batla ho shwa? Moapostola Pauluse o araba potso ena. O bapisa mmele ya bona le tente mme o re: “Ha e le hantle, rona ba leng tenteng ena re a bobola, ka ha re imetswe; hobane ha re batle ho e hlobola, empa re batla ho apara e nngwe, e le hore se shwang se ka metswa ke bophelo.” (2 Bakor. 5:4) Ka hoo, Bakreste bana ba ntse ba thabela ho phela lefatsheng ebile ha ba batle ho shwa. Ka lehlakoreng le leng, ba thabela bophelo ebile ba batla ho sebedisa letsatsi le leng le le leng ho sebeletsa Jehova le ba lelapa le metswalle. Le ha ho le jwalo, ba dula ba hopola tshepo e babatsehang eo ba nang le yona ka bokamoso.​—1 Bakor. 15:53; 2 Pet. 1:4; 1 Joh. 3:2, 3; Tšen. 20:6.

14. Keng e bontshang hore motho ha se motlotsuwa?

¹⁴ Mohlomong o a ipotsa hore na ebe o motlotsuwa? Haeba ho jwalo, nahana ka dipotso tsena tsa bohlokwa: Na o utlwa o ena le takatso e matla ya ho etsa thato ya Modimo? Na o bona eka o etsa mosebetsi wa boboledi ka mafolofolo? Na o thabela ho bala Bibele le ho ithuta “dintho tse tebileng tsa Modimo”? (1 Bakor. 2:​10) Na o bona eka Jehova o hlohonolofaditse mosebetsing wa hao wa boboledi? Na o utlwa eka o na le boikarabelo ba ho thusa batho ba bang hore ba ithute ka Jehova? Na o na le bopaki ba hore Jehova o o thusitse ka ditsela tse ikgethang bophelong? Haeba karabo ya hao dipotsong tsena ke “Eya,” na see ke bopaki ba hore o motlotsuwa? Ha ho jwalo. Hobaneng? Hobane bahlanka bohle ba Jehova ba ka ikutlwa ka tsela ena, ho sa tsotellehe hore na ke batlotsuwa kapa tjhe. Hape Jehova a ka sebedisa moya wa hae o halalelang ho thusa bahlanka ba hae hore ba etse dintho tsena, ho sa tsotellehe hore na ba na le tshepo efe. Haeba o ntse o ipotsa hore na o motlotsuwa kapa tjhe, seo ke bopaki ba hore ha o yena. Bakreste bao Jehova a ba kgethileng, ha ba ipotse hore na ke batlotsuwa kapa tjhe empa ba a tseba.

15. Re tseba jwang hore ha se batho bohle ba ileng ba fumana moya o halalelang wa Modimo, ba kgethetsweng ho ya lehodimong?

¹⁵ Ka Bibeleng hona le mehlala ya batho ba nang le tumelo bao Jehova a  ileng a ba fa moya o halalelang. Empa ba ne ba sena tshepo ya ho phela lehodimong. Davida o ile a tataiswa ke moya o halalelang. (1 Sam. 16:13) O ile wa mo thusa hore a utlwisise dintho tse tebileng ka Jehova le ho mo tataisa ha a ntse a ngola dikarolo tse ding tsa Bibele. (Mar. 12:36) Le ha ho le jwalo, moapostola Petrose o ile a re Davida “ha a ka a nyolohela mahodimong.” (Lik. 2:34) Ka lehlakoreng le leng, Johanne Mokolobetsi o ile a “tlala moya o halalelang.” (Luka 1:13-16) Jesu o ile a re ha ho motho ya moholo ho feta Johanne le ha ho le jwalo, a re ha e na ba karolo ya ba tla phela lehodimong. (Mat. 11:10, 11) Jehova o ile a sebedisa moya wa hae o halalelang ho ba fa matla a ho etsa dintho tse makatsang, e seng ho ba kgethela ho ilo phela lehodimong. Na see se bolela hore ba ne ba sa tshepahale kapa ba sa tshwanelehe ho ya phela lehodimong? Ha ho jwalo. Empa Jehova o tla ba tsosetsa paradeiseng lefatsheng.​—Joh. 5:28, 29; Lik. 24:15.

16. Bahlanka ba bangata ba Jehova ba na le tshepo efe?

¹⁶ Bahlanka ba bangata ba Jehova kajeno, ha bana tshepo ya ho ya lehodimong. Jwalo ka Abrahama, Sara, Davida, Johanne Mokolobetsi le bahlanka ba bang ba hlahang ka Bibeleng, ba lebelletse ho phela ka ho sa feleng lefatsheng tlasa Mmuso wa Modimo.​—Baheb. 11:10.

17. Sehloohong se latelang re tlo hlahloba dipotso dife?

¹⁷ Re ka nna ra ipotsa dipotso tse itseng, ka ha ho ntse ho ena le batlotsuwa ba ntseng ba phela le kajeno. (Tšen. 12:17) Ka mohlala, batlotsuwa ba lokela ho itshwara jwang? Hape re lokela ho tshwara Mokreste ya jang bohobe le ho nwa veine jwang Sehopotsong? Hona na re lokela ho tshwenyeha ha re bona palo ya batho ba reng ke batlotsuwa e eketseha? Re tla araba dipotso tsena sehloohong se latelang.