MUSIAMONG wa Bible Lands o Jerusalema ho na le lejwe le nang le mongolo o ngotsweng pakeng tsa selemo sa 700 ho ya ho 600 pele ho mehla ya Kreste. Lejwe leo le ile la fumanwa lehaheng le neng le sebediswa jwalo ka lebitla le haufi le Hebrone Iseraele. Mongolo oo o ne o re: “Ho rohakwe Hagaf mora wa Hagav ho tswa ho Yahweh Sabaot.” Mongolo oo o dumellana le Bibele jwang? O bontsha hore lebitso la Jehova le neng le ngolwa ka YHWH mangolong a Seheberu, le ne le tsebahala ebile le sebediswa letsatsi le letsatsi mehleng eo. Ha e le hantle, mengolo e meng e ngotsweng dinthong tsa kgale, e bontsha hore batho ba neng ba sebedisa mahaha e le sebaka sa ho kopana le ho ipata ho sona, hangata ba ne ba ngola lebitso la Modimo maboteng ho akarelletsa le mabitso a mang a neng a emela lebitso la hae.

Ha Dr Rachel Nabulsi wa Yunivesithi ya Georgia a bua ka mengolo ena o ile a re: “Ho sebediswa hangata ha lebitso YHWH ke ha bohlokwa . . . Mengolo eo e bontsha ka moo lebitso YHWH le neng le le bohlokwa ka teng ho Baiseraele le Bajuda.” Sena se dumellana le Bibele moo lebitso la Modimo YHWH le hlahang ka makgetlo a mangata ka mangolong a Seheberu. Hangata mabitso a neng a ngolwa ka lehaheng a ne a akarelletsa lebitso la Modimo.

Mantswe “Yahweh Sabaot” a ngotsweng lejweng, a bolela “Jehova wa mabotho.” Ho bonahala hore ha se lebitso la Modimo feela le neng le sebediswa empa ho ne ho boetse ho sebediswa mantswe a kang “Jehova wa mabotho.” Sena se boetse se dumellana le mantswe a hlahang ka Bibeleng a reng, “Jehova wa mabotho” a hlahang ka makgetlo a fetang 250 ka Mangolong a Seheberu, haholoholo Bukeng ya Esaia, Jeremia le Zakaria.