1. Ho ya ka Matheu 24:9, ke hobaneng ha re sa lokela ho makala ha batho ba re hloile?

JEHOVA o re bopile hore re rate batho ba bang mme le rona re batle ho ratwa. Ka hoo ha motho e mong a re hloile seo se re utlwisa bohloko mme ka dinako tse ding re a tshoha. Ka mohlala, moradiwabo rona Georgina ya dulang Europe o re: “Ha ke ne ke le dilemo di 14 mme wa ka o ne a ntlhoile hobane ke ne ke sebeletsa Jehova. Ke ne ke utlwile bohloko haholo ebile ke ikutlwa ke le mong mme ke ile ka qala ho nahana hore mohlomong ke motho ya mobe.” * Morabo rona Danylo yena o re: “Ke ne ke ikutlwa ke tshohile ebile ke tlontlollotswe ha masole a ne a ntjhapa, a nthohaka ebile a re a tla nntsha kotsi hobane ke le e mong wa Dipaki Tsa Jehova.” Ke nnete hore re utlwa bohloko haholo ha batho ba re hloile empa seo ha se re makatse hobane Jesu o ile a re re tla hlouwa.​—Bala Matheu 24:9.

2, 3. Ke hobaneng ha balatedi ba Jesu ba hloilwe?

² Ke hobaneng ha batho ba hloile balatedi ba Jesu? Hobane jwalo ka Jesu ha re “karolo ya lefatshe.” (Joh. 15:17-19) Ka hoo le hoja re hlompha mebuso ya batho ha re kenelle dipolotiking kapa ho rapela ditshwantsho tse e emelang. Ke Jehova feela eo re mo rapelang. Re tshehetsa taba ya hore Modimo o na le tokelo ya ho busa batho empa Satane le “peo” ya hae bona ba kgahlanong le seo. (Gen. 3:1-5, 15) Re bolella batho hore Mmuso wa Modimo ke ona feela o tla rarolla mathata a batho le hore haufinyane o tla fedisa batho bohle ba kgahlanong le ona. (Dan. 2:44; Tšen. 19:19-21) Molaetsa oo ke ditaba tse monate ho batho ba  leng bonolo empa ha se ditaba tse monate ho batho ba kgopo.​—Pes. 37:10, 11.

³ Lebaka le leng leo batho ba re hloileng ka lona ke hobane re mamela melao ya Modimo. Seo Modimo a reng se nepahetse kapa se fosahetse se fapane hole le seo batho ba reng se nepahetse kapa se fosahetse. Ka mohlala, hona jwale batho ba bangata ba nahana hore ha ho phoso hore ba etse boitshwaro bo bobe ba thobalano bo tshwanang le boo batho ba Sodoma le Gomora ba neng ba bo etsa e leng se entseng hore Modimo a ba fedise. (Juda 7) Ka ha re mamela melao e hlahang ka Bibeleng e buang ka dintho tseo, batho ba bangata ba a re soma ebile ba re bitsa ka mabitso.​—1 Pet. 4:3, 4.

4. Ke makgabane afe a ka re thusang ha batho ba re hloile?

⁴ Ke eng e ka re thusang hore re mamelle ha batho ba re hloile ebile ba re rohaka? Re lokela ho ba le tumelo e matla ya hore Jehova o tla re thusa. Jwalo ka thebe, tumelo ya rona e tla “tima metsu yohle e tukang ya ya kgopo.” (Baef. 6:16) Le ha ho le jwalo ntle ho tumelo re boetse re hloka ho ba le lerato. Hobaneng? Hobane lerato “ha le halefe” hape le mamella dintho tsohle tse bohloko. (1 Bakor. 13:4-7, 13) Jwale a re boneng hore na ho rata Jehova, Bakrestemmoho esita le dira tsa rona ho ka re thusa jwang hore re mamelle ha batho ba bang ba re hloile.

5. Ka ha Jesu o ne a rata Ntate wa hae, seo se ile sa mo thusa hore a etseng?

⁵ Bosiung ba pele dira tsa Jesu di mo bolaya o ile a re ho balatedi ba hae ba tshepahalang: “Ke rata Ntate, esita le jwalo ka ha Ntate a mphile taelo hore ke etse, ke etsa jwalo.” (Joh. 14:31) Ka ha Jesu o ne a rata Jehova o ile a kgona ho mamella diteko tse boima. Ka tsela e tshwanang le rona ha re rata Jehova seo se ka re thusa hore re mamelle mathata.

6. Ho ya ka Baroma 5:3-5, bahlanka ba Jehova ba ikutlwa jwang ha batho ba bang ba ba hloile?

⁶ Ka ha bahlanka ba Jehova ba a mo rata seo se ba thusa hore ba dule ba mamella ha batho ba bang ba ba hlorisa. Ka mohlala, ha lekgotla le phahameng la Bajuda le ne le laela baapostola hore ba kgaotse ho bolela, lerato leo ba neng ba rata Modimo ka lona le ile la ba susumetsa hore ba ‘mamele Modimo e le Mmusi ho e na le batho.’ (Lik. 5:29; 1 Joh. 5:3) Barababo rona ba hloriswang ke mebuso e matla le e kgopo ba thuswa ke ho rata Modimo haholo hore ba dule ba tshepahala. Ho e na le hore re nyahame, re nka e le tlotla hore re mamelle ha batho ba bang ba re hloile.​—Lik. 5:41; bala Baroma 5:3-5.

7. Re lokela ho etsang ha ba lelapa ba re hanyetsa?

⁷ Ho ka ba thata hore re mamelle ha re hanyetswa ke ba lelapa. Ha ba bang ba lelapa ba hlokomela hore re batla ho ithuta ka Jehova ba ka nna ba nahana hore re kgelositswe. Ba bang ba ka nna ba nahana hore re lahlehetswe ke kelello. (Bapisa le Mareka 3:21.) Hape ba ka nna ba re lwantsha. Ha re a lokela ho makala ha seo se etsahala. Jesu o ile a re: “Dira tsa motho e tla ba batho ba ntlo ya hae.” (Mat. 10:36) Ke nnete hore ho sa tsotellehe hore ba malapa a rona ba re tshwara jwang, ha re ba nke e le dira tsa rona. Le ha ho le jwalo, ha re ntse re rata Jehova le ho feta seo se etsa hore re rate le batho ba bang. (Mat. 22:37-39) Empa re ke ke ra kgaotsa ho mamela melao le melaomotheo e ka Bibeleng hore feela re kgahlise batho ba bang.

8, 9. Ke eng e thusitseng moradiwabo rona e mong hore a tshepahale le ha a hanyetswa?

⁸ Moradiwabo rona Georgina eo re buileng ka yena qalong o ile a kgona ho dula a tshepahala le hoja mme wa hae a ne a mo hanyetsa. Georgina o re: “Nna le mme wa ka re ile ra qala ho ithuta Bibele le Dipaki. Empa dikgwedi tse tsheletseng ha morao ha ke ne ke batla ho ya dibokeng mme wa ka o ile a qala ho nkganyetsa. Ke ile ka hlokomela hore o ntse a buisana  le bakwenehi mme o ne a njwetsa mashano a bona. O ne a boetse a nthohaka, a nkgula ka moriri, a nkgama a bile a lahla dingolwa tsa ka. Ke ile ka kolobetswa ha ke le dilemo di 15. Mme wa ka o ile a leka ho etsa hore ke kgaotse ho sebeletsa Jehova ka hore a nkise lehaeng leo ho dulang batjha ba sokodisang ho lona mme ba bang ba bona ba ne ba tsuba dithethefatsi ebile ba etsa tlolo ya molao. Ho thata haholo ho mamella ha o hanyetswa ke motho ya lokelang ho o rata le ho o hlokomela.”

⁹ Georgina o thusitswe ke eng hore a mamelle? O re: “Letsatsing leo mme wa ka a ileng a mphetohela ka lona, ke leo ke neng ke se ke qetile ho bala Bibele kaofela ha yona. Ke ne ke se ke kgodisehile hore ke fumane nnete ebile ke ne ke ikutlwa ke le haufiufi le Jehova. Ke ne ke dula ke mo rapela mme o ne a utlwa dithapelo tsa ka. Ha ke ntse ke dula lehaeng leo la batjha ba sokodisang, moradiwabo rona e mong o ile a mmema hore ke tle ntlong ya hae e le hore re ka ithuta Bibele ha mmoho. Ka nako eo ke ne ke matlafatswa ke bara le baradibabo rona ha ke le dibokeng. Ba ile ba etsa ke ikutlwe ke le karolo ya malapa a bona. Ke ile ka bona ka ho hlaka hore Jehova o matla ho feta bahanyetsi ba rona ho sa tsotellehe hore na ke bo mang.”

10. Re ka kgodiseha ka hore Jehova Modimo o tla dula a etsang?

¹⁰ Moapostola Pauluse o ile a re ha ho letho le ka re ‘arohanyang le lerato la Modimo le leng ho Kreste Jesu Morena wa rona.’ (Bar. 8:38, 39) Le hoja re ka utlwa bohloko ka nakwana Jehova o tla dula a re tshedisa le ho re matlafatsa. Hape jwalo ka ha re bone ho se ileng sa etsahalla moradiwabo rona Georgina, Jehova o boetse o re thusa a sebedisa bara le baradibabo rona.

11. Lerato leo Jesu a buileng ka lona ho Johanne 15:12, 13 le ne le tla thusa barutuwa ba hae jwang? Fana ka mohlala.

¹¹ Jesu o ile a hopotsa barutuwa ba hae hore ba lokela ho ratana bosiu pele a shwa. (Bala Johanne 15:12, 13.) O ne a tseba hore haeba ba itela ebile ba ratana seo se tla ba thusa hore ba dule ba momahane mme ba mamelle ha batho ba bang ba ba hloile. Nahana ka mohlala wa phutheho ya Thesalonika. Haesale Bakreste ba phutheho eo ba hloriswa ho tloha ha e ne e thehwa. Le ha ho le jwalo ba ile ba ba mehlala e metle ya ho tshepahala le ho bontsha lerato. (1 Bathes. 1:3, 6, 7) Pauluse o ile a ba kgothalletsa hore ba tswele pele ba ratana haholo. (1 Bathes. 4:9, 10) Ho ratana ho ne ho tla ba susumelletsa  hore ba tshehetse ba tepelletseng maikutlo le ho tshehetsa ba fokolang. (1 Bathes. 5:14) Ba ile ba mamela ditaelo tsa Pauluse hobane selemo ha morao ha a ne a ngola lengolo la hae la bobedi o ile a re ho bona: “Lerato la e mong le e mong le la lona kaofela le a eketseha e mong ho e mong.” (2 Bathes. 1:3-5) Lerato leo ba neng ba na le lona le ile la ba thusa hore ba mamelle mathata le ho hloriswa.

12. Ha ho ne ho na le ntwa naheng e nngwe, bara le baradibabo rona ba ile ba bontshana lerato jwang?

¹² Nahana ka se ileng sa etsahalla Danylo eo re ileng ra bua ka yena qalong le mosadi wa hae. Ha ho ne ho na le ntwa toropong eo ba dulang ho yona ba ile ba dula ba ya dibokeng, ba bolela ditaba tse molemo ka hohle ka moo ba ka kgonang ka teng mme ba arolelana dijo le bara le baradibabo rona. Ka letsatsi le leng masole a tshwereng dithunya a ile a tla ho Danylo. O re: “Ba ile ba re ke tlohelle ho ba Paki. Ha ke hana ba ile ba ntjhapa mme ba etsa eka ba nthunya ka ho thunya ka hodima hlooho ya ka. Pele ba tsamaya ba ile ba ntshosa ka hore ba tlo kgutla ba bete mosadi wa ka. Empa barababo rona ba ile ba re potlakisetsa tereneng e le hore re ye toropong e nngwe. Nke ke ka lebala lerato leo bara bao babo rona ba ileng ba re bontsha lona. Ha re fihla toropong eo e ntjha barababo rona ba moo ba ile ba re fa dijo mme ba nthusa hore ke fumane mosebetsi le moo re ka dulang teng. Ka hoo re ile ra kgona ho dula le Dipaki tse ding tse neng di baleha ntwa.” Dipale tse kang tsena di etsa hore re bone hore ho ratana ho re thusa hore re mamelle ha batho ba bang ba re hloile.

13. Moya o halalelang o re thusa jwang hore re mamelle ha re ntse re sebeletsa Jehova esita le ha batho ba bang ba re hloile?

¹³ Jesu o ile a bolella balatedi ba hae hore ba rate dira tsa bona. (Mat. 5:44, 45) Na ho bonolo ho etsa jwalo? Tjhe ha ho bonolo empa re ka kgona ka thuso ya moya o halalelang wa Modimo. Ditholwana tsa moya wa Modimo di akarelletsa lerato, mamello, mosa, bonolo le boitshwaro. (Bagal. 5:22, 23) Makgabane ana a re thusa hore re mamelle ha re hloilwe. Batho ba bangata ba ile ba kgaotsa ho re hanyetsa hobane monna, mosadi, ngwana kapa moahisane wa bona a bontshitse makgabane ao. Hape ba bang ba bona e ile ya ba bara le baradibabo rona. Ka hoo haeba o thatafallwa ke ho rata batho ba o hloileng hobane feela o sebeletsa Jehova rapella moya o halalelang. (Luka 11:13) Hape kgodiseha hore ho mamela Modimo ka mehla ke ntho e molemo eo o ka e etsang.​—Liprov. 3:5-7.

14, 15. Baroma 12:17-21 e thusitse moradiwabo rona Yasmeen jwang hore a bontshe monna wa hae hore o a mo rata esita le ha a mo hlorisa?

 ¹⁴ Nahana ka mohlala wa moradiwabo rona Yasmeen. Ha e ne e ba e mong wa Dipaki Tsa Jehova monna wa hae o ne a nahana hore o thetsitswe mme o ile a leka ho etsa hore a kgaotse ho sebeletsa Modimo. O ile a mo rohaka mme a kgothalletsa ba lelapa ha mmoho le moruti le ntate e mong wa moloi hore ba mo tshose ka hore ba tla mo ntsha kotsi hape ba ile ba mo qosa ka hore o arohanya lelapa la hae. Monna wa hae o ile a ba a rohaka barababo rona diboka di ntse di kene. Moradiwabo rona Yasmeen o ne a dula a lla hobane o ne a tshwerwe hampe.

¹⁵ Bara le baradibabo rona ba ile ba tshedisa moradiwabo rona Yasmeen ba ba ba mo matlafatsa ha a ne a le dibokeng. Baholo ba ile ba mo kgothalletsa hore a sebedise keletso e ho Baroma 12:17-21. (E bale.) Moradiwabo rona Yasmeen o re: “Ho ne ho le thata empa ke ile ka kopa hore Jehova a nthuse mme ka etsa sohle seo nka se kgonang hore ke etse seo Bibele e se buang. Ha monna wa ka a ne a lahlela mobu fatshe ka kitjhineng hore feela a nkutlwise bohloko ke ne ke hlwekisa. Ha a ne a nthohaka ke ne ke mo araba ka bonolo mme ha a ne a kula ke ne ke mo hlokomela.”

16, 17. O ka ithutang mohlaleng wa moradiwabo rona Yasmeen?

¹⁶ Moradiwabo rona Yasmeen o ile a fumana moputso wa ho bontsha monna wa hae hore o a mo rata. O re: “Monna wa ka o ile a qala ho ntshepa haholwanyane hobane o ne a tseba hore ke dula ke bua nnete. O ile a qala ho mmamela ka tlhompho ha re bua ka taba tsa bodumedi mme o ile a dumela hore ho be le kgotso ka tlung. Hona jwale ha ke ya dibokeng o se a re ke di thabele mme nna le mohatsa wa ka re se re utlwana ebile re na le kgotso. Ke na le tshepo ya hore ka letsatsi le leng o tla amohela nnete mme re sebeletse Jehova ha mmoho.”

¹⁷ Mohlala wa moradiwabo rona Yasmeen o bontsha hore lerato le “jara dintho tsohle . . . le tshepa dintho tsohle, le mamella dintho tsohle.” (1 Bakor. 13:4, 7) Lerato le matla ho feta lehloyo ebile le etsa hore batho ba kgaotse ho re hanyetsa. Hape ha re dula re bontsha batho ba bang lerato seo se thabisa Jehova. Re ka dula re thabile esita le haeba bahanyetsi ba rona ba dula ba re hloile. Seo se ka etsahala jwang?

18. Ke hobaneng ha re ka thaba le ha re hloilwe?

¹⁸ Jesu o itse: “Ho thaba lona neng kapa neng  ha batho ba le hloya.” (Luka 6:22) Ha re ikgethele hore batho ba re hloye ebile ha re thabele ho hloriswa ka lebaka la tumelo ya rona. Ka hoo ke hobaneng ha re ka thaba le ha re hloilwe? Nahana ka mabaka ana a mararo. La pele, ha re mamella seo se thabisa Modimo. (1 Pet. 4:13, 14) La bobedi, tumelo ya rona e matlafala le ho feta. (1 Pet. 1:7) La boraro, re tla fumana moputso o moholo e leng bophelo bo sa feleng.​—Bar. 2:6, 7.

19. Ke hobaneng ha baapostola ba ne ba thabile ka mora ho shapuwa?

¹⁹ Nakwana ka mora hore Jesu a tsoswe, baapostola ba ile ba ba le thabo eo a ileng a bua ka yona. Ka mora hore ba shapuwe mme ba bolellwe hore ba kgaotse ho bolela ba ile ba thaba. Hobaneng? “Hobane ba ne ba nkilwe e le ba tshwanelwang ke ho hlomphollwa ka lebaka la lebitso la [Jesu.]” (Lik. 5:40-42) Ba ne ba rata Mosuwe wa bona hoo ba neng ba sa tshabe ho hlouwa ke dira tsa bona. Hape ba ile ba bontsha hore ba a mo rata ka hore ba bolele ditaba tse molemo “ba sa kgaotse.” Bara le baradibabo rona ba bangata kajeno ba ntse ba sebeletsa Jehova ka botshepehi le ha ba na le mathata. Ba a tseba hore Jehova a ke ke a lebala mosebetsi wa bona le lerato leo ba ileng ba le bontsha bakeng sa lebitso la hae.​—Baheb. 6:10.

20. Re tlo bua kang sehloohong se latelang?

²⁰ Ha feela re ntse re phela lefatsheng lena le buswang ke satane batho ba tla re hloya. (Joh. 15:19) Le ha ho le jwalo ha re a lokela ho tshoha. Jwalo ka ha re tla bona sehloohong se latelang Jehova “o tla tiisa le ho . . . boloka” ba tshepahalang ba hae. (2 Bathes. 3:3) Ka hoo a re tsweleng pele re rata Jehova, bara le baradibabo rona esita le dira tsa rona. Ha re mamela keletso ena re tla dula re momahane mme re na le tumelo e matla hape re tla tlotlisa Jehova mme re bontshe hore lerato le matla ho feta lehloyo.