1. Batho ba sebeletsang Jehova ba ikemiseditse ho etsang?

 HO NA LE batho ba sebeletsang Jehova ka kgotso le ka kutlwano mehleng ena ebile ba phathahane ka ho etsa dintho tse ngata tse ntle. Batho bana ba balwa ka dimilione mme ke karolo ya mokgatlo wa Jehova o nang le kgotso. Ba ikemiseditse hore le ka mohla ba ke ke ba tlohela ho sebeletsa Jehova ebile ba batla ho thusa batho ba bangata hore le bona e be metswalle ya Jehova.

2. Ho sebeletsa Jehova ho etsa hore re ikutlwe jwang?

² Jehova o thusa batho ba batlang ho dula ba ntse ba mo sebeletsa hore ba be le kgotso le kutlwano le hoja ba dula lefatsheng la Satane le kgopo le le kotsi, moo batho ba nang le lehloyo. (1 Joh. 5:19; Tshen. 12:12) Modimo o bona dintho tsohle tse utlwisang batho bohloko empa o etsa hore bahlanka ba hae ba ikutlwe ba sireletsehile e le hore ba ka tswela pele ba ntse ba mo sebeletsa ba thabile. Lentswe la hae le bontsha hore ha re mo sebeletsa re fumana “setshabelo” mme re tshwana le “serapa se nosetswang hantle.” (Esa. 4:6; 58:11) Batho ba sebeletsang Jehova ba dula ba thabile ebile ba ikutlwa ba sireletsehile matsatsing ana a ho qetela.—Esa. 54:14; 2 Tim. 3:1.

3. Boprofeta bo tlalehilweng ho Esaia kgaolo ya 65 bo phethahetse jwang mehleng ya kgale?

³ Jehova o ile a sebedisa moprofeta Esaia ho hlalosa hore na batho ba mo sebeletsang ba ne ba tla phela jwang. O ka fumana tlaleho eo ho Esaia kgaolo ya 65, e ileng ya phethahala ka lekgetlo  la pele ka selemo sa 537 pele ho mehla ya Jesu. Ka nako eo Bajuda ba ne ba lokolotswe botlamuweng Babilona mme ba ile ba kgutlela naheng ya bona. Jehova o ile a hlohonolofatsa batho ba hae mme a ba thusa hore ba lokise motse wa Jerusalema o neng o senyehile, ba o etse hore o boele o be motle le hore tempele e boele e be sebaka seo ho rapelwang Jehova ho sona Iseraele.—Esa. 51:11; Zak. 8:3.

4. Esaia kgaolo ya 65 e phethahala jwang mehleng ee?

⁴ Boprofeta ba Esaia bo ile ba phethahala ka lekgetlo la bobedi ka selemo sa 1919 ha bahlanka ba Jehova ba ne ba lopollwa Babilona e Moholo. Ho tloha ka nako eo bahlanka ba Jehova lefatsheng lohle ba ile ba qala ho mo sebeletsa ka tsela eo a e amohelang. Baboledi ba Mmuso ba tjhesehang ba ile ba theha diphutheho tse ngata mme ba qala ho ba le makgabane a Bokreste. Banna le basadi ba neng ba le mabifi mme ba itshwere hampe ba ile ba ‘apara botho bo botjha boo Modimo a bo entseng ho ya ka thato ya hae.’ (Baef. 4:24) Le hoja ditlhohonolofatso tse ngata tseo Esaia a buang ka tsona di tla phethahala lefatsheng le letjha, le hona jwale re ntse re thabela tse ding tsa tsona hobane re sebeletsa Jehova. A re boneng hore na ho sebeletsa Jehova ho re tswela molemo jwang le hore na ke hobaneng ha re sa lokela ho kgaotsa ho mo sebeletsa.

BATHO BA SEBELETSANG JEHOVA BA IKUTLWA JWANG?

5. Esaia 65:13 e re batho ba sebeletsang Jehova ba thabela dintho dife?

⁵ Ba phetse hantle ebile ba kgatholohile. Boprofeta ba Esaia bo bontsha phapang e teng pakeng tsa batho ba sebeletsang Jehova le ba sa mo sebeletseng. (Bala Esaia 65:13.) Jehova o fa bahlanka ba hae ntho e nngwe le e nngwe eo ba e hlokang e le hore ba dule ba ena le tumelo e matla. O re fa moya wa hae o halalelang, Lentswe la hae Bibele, dingolwa le divideo e le hore re ka ‘ja, ra nwa mme ra thaba.’ (Bapisa le Tshenolo 22:17.) Empa batho ba sa sebeletseng Jehova bona ba a ‘lapa, ba a nyorwa ebile ba a swaba.’ Ha ba na kamano e ntle le Modimo.—Amose 8:11.

6. Joele 2:​21-24 e bontsha hore ke dimpho dife tseo Jehova a re fang tsona, hona di ka re tswela molemo jwang?

⁶ Joele o sebedisitse dintho tsa bohlokwa boprofeteng ba hae tse kang dijo, veine le oli ya mohlwaare ho bontsha hore Jehova o fa batho ba hae dintho tseo ba di hlokang e le hore ba ka dula ba ena le tumelo e matla. Dintho tsena di akareletsa ditaelo tse tswang ka Bibeleng. (Joele 2:​21-24) O sebedisa Bibele le dingolwa tsa rona, websaete ya rona, diboka, dikopano tse nyenyane le tse kgolo. Ha re sebedisa dintho tsena ka mehla, re tla phela hantle re be re kgatholohe le ho feta.

7. Ke eng e etsang hore ‘dipelo tsa rona di thabe’? (Esaia 65:14)

⁷ Ba thabile hape ba kgotsofetse. Bahlanka ba Modimo ba ka “hweletsa ba thabile” hobane ba bontsha kananelo ho Jehova. (Bala Esaia 65:14.) Dithuto tse matlafatsang tumelo le ditshepiso tse ka Lentsweng la Modimo ha mmoho le tshepo eo re nang le yona ka bokamoso ka lebaka la sehlabelo sa Kreste di etsa hore ‘dipelo tsa rona di thabe.’ Ha re bua ka dintho tsena le bara le baradi ba bo rona re thaba e le ka nnete.—Pes. 34:8; 133:​1-3.

8. Ke dintho dife tse pedi tsa bohlokwa tse kgethollang batho ba sebeletsang Jehova?

⁸ Lerato le kutlwano ke dintho tse pedi tsa bohlokwa tse kgethollang batho ba sebeletsang Jehova. Taba ya hore re a ‘utlwana’ e re thusa hore re bone hore na bophelo bo tla ba jwang lefatsheng le letjha moo bahlanka ba Jehova ba tla thabela ho bontshana lerato le ho utlwana ho feta mehleng ena. (Bakol. 3:14)  Moradi e mong wa bo rona o hlalosa hore na ke eng eo a ileng a e bona ha a ne a qala ho kopana le batho ba Jehova. O re: “Ke ne ke se motho ya thabileng, ke ne ke sa kgone ho thaba le ka lelapeng la ka. Ke ile ka bona batho ba ratanang e le ka nnete ka lekgetlo la pele ha ke ne ke kopana le Dipaki Tsa Jehova.” Motho e mong le e mong ya batlang ho dula a thabile o lokela ho sebeletsa Jehova. Ho sa tsotellehe hore na batho ba bang ba nahanang ka bahlanka ba Jehova, ba na le kamano e ntle le Modimo le Bakrestemmoho le bona.—Esa. 65:15.

9. Esaia 65:​16, 17 e re tshepisa hore ho tla etsahalang ka mathata ao re nang le ona?

⁹ Ba kgobile matshwafo. Esaia 65:14 e re batho ba kgethang ho tlohela ho sebeletsa Jehova ba a ‘lla ka lebaka la dipelo tse bohloko ebile ba a bokolla hobane ba wele moya.’ Ho tla etsahalang ka dintho tse utlwisang bahlanka ba Modimo bohloko le mathata a ba hlahelang? Dintho tseo di tla be di “lebetswe [mme di] tla tloswa ka pela mahlo a [Modimo].” (Bala Esaia 65:​16, 17.) Jehova o tla fedisa mathata a rona mme o tla etsa hore re lebale dintho tse re utlwisang bohloko ka ho feletseng.

10. Ke hobaneng ha o ananela ho ba le Bakrestemmoho le wena? (Sheba setshwantsho.)

¹⁰ Re ikutlwa re kgatholohile ha re le dibokeng hobane ho ba dibokeng ho re thusa hore re se ke ra nahana ka dintho tse re tshwenyang tse etsahalang lefatsheng lena le kgopo. Hape re thusa bara le baradi ba bo rona hore ba dule ba kgobile matshwafo ka hore re be le lerato, thabo, kgotso, mosa le bonolo e leng ditholwana tse behwang ke moya o halalelang. (Bagal. 5:​22, 23) Ke tlhohonolofatso e kgolo hore ebe re karolo ya mokgatlo wa Modimo. Batho bohle ba tswelang pele ho sebeletsa Jehova ba tla bona ha tshepiso ya Modimo ya hore ho tla ba le “mahodimo a matjha le lefatshe le letjha” e phethahala.

11. Ho ya ka Esaia 65:​18, 19, ho ba ka mokgatlong wa Jehova ho etsa hore re ikutlwe jwang?

¹¹ Ba na le kananelo ebile ba thabile. Esaia o tswela pele ho fana ka lebaka la hore na ke hobaneng ha re ‘thabile ebile re nyakalletse’ ka hare ho mokgatlo wa Jehova. Mokgatlo ona o thehilwe ke Jehova. (Bala Esaia 65:​18, 19.) Ke ka hoo a sebedisang rona ho thusa batho hore ba tswe mekgatlong ya lefatshe lena e sa ruteng nnete ka yena le ho ba thusa hore ba tle ka mokgatlong wa hae. Re a thaba ka lebaka la ditlhohonolofatso tseo re di fumanang hobane re le ka mokgatlong wa Jehova ebile re ikemiseditse ho bolella batho ba bang ka tsona.—Jer. 31:12.

12. Ditshepiso tse lengolong la Esaia 65:​20-24 di etsa hore o ikutlwe jwang, hona hobaneng?

 ¹² Re boetse re ananela le ho thabiswa ke tshepo eo re nang le yona ka lebaka la kamano eo re nang le yona le Jehova. Nahana ka dintho tseo re tla di bona le ho di etsa lefatsheng le letjha leo Modimo a re tshepisitseng lona. Bibele e re: “Ha ho sa tla hlola ho eba le lesea le phelang matsatsi a seng makae feela, kapa motho ya hodileng ya tla phela nako e kgutshwanyane.” Re tla ‘haha matlo mme re dule ho ona ebile re tla lema dirapa tsa morara mme re je ditholwana tsa tsona.’ Re ‘ke ke ra sebeletsa lefeela hobane re tla ba “ba hlohonolofaditsweng ke Jehova.” Modimo o re tshepisa hore re tla dula re sireletsehile mme re thabele bophelo. ‘Le pele re hweletsa,’ o tla tseba hore na re hloka eng ebile o tla “kgotsofatsa dintho tsohle tse phelang.”—Esa. 65:​20-24; Pes. 145:16.

13. Lengolo la Esaia 65:25 le hlalosa diphetoho tseo batho ba di entseng bophelong ba bona e le hore ba sebeletse Jehova jwang?

¹³ Ba na le kgotso ebile ba sireletsehile. Ka thuso ya moya o halalelang wa Modimo, batho ba bangata ba neng ba tlwaetse ho etsa dintho tse mpe ba entse diphetoho tse kgolo bophelong ba bona. (Bala Esaia 65:25.) Ba sebeditse ka thata hore ba tlohele ho etsa dintho tse mpe tseo ba neng ba tlwaetse ho di etsa. (Bar. 12:2; Baef. 4:​22-24) Ka ha re baetsadibe, re tla dula re ntse re etsa diphoso. Le ha ho le jwalo, Jehova o entse hore “batho ba mefuta yohle” ba momahane ka hore ba bontshane lerato le hore ba phele ka kgotso. (Tite 2:11) Ke Modimo ya matla ohle feela ya ka etsang ntho ena.

14. Mantswe a ho Esaia 65:25 a ile a phethahala jwang ho morabo rona e mong?

¹⁴ Na motho a ka kgona ho fetola botho ba hae? Nahana ka mohlala ona. Mohlankana e mong ya neng a kena a tswa teronkong le pele a eba dilemo di 20, o ne a itshwere hampe a bile a rata ntwa. O ile a tshwarwa hobane a ne a utswitse koloi, a utsweditse batho matlung a bona ebile a tlotse molao ka ditsela tse ding. E ne e le ntwa dumela. Ha a ne a qala ho utlwa nnete e tswang ka Bibeleng mme a qala ho ya dibokeng tsa Dipaki Tsa Jehova, o ne a kgodisehile hore o fumane morero wa bophelo e leng ho sebeletsa Jehova. Ka mora hore a kolobetswe, o ne a dula a nahana ka hore Esaia 65:25 e bua ka yena. O ne a tshwana le tau hobane o ne a le mabifi empa o ile a fetoha mme a tshwana le konyana hobane o ne a se a le bonolo.

15. Ke hobaneng ha re batla ho mema batho ba bang hore le bona e be karolo ya mokgatlo wa Jehova, hona re ka etsa seo jwang?

¹⁵ Lengolo la Esaia 65:13 le qala ka mantswe a reng: “Jehova Mmusi wa Dintho Tsohle o re.” Temana ya 25 e qetella ka mantswe a reng “ke Jehova ya tjhong.” Mantswe ana a re tiisetsa hore ditshepiso tsa Jehova di dula di phethahala. (Esa. 55:​10, 11) Hona jwale re se re ntse re phela ka kgotso le ka kutlwano le Bakreste mmoho le rona. Jehova o entse lelapa le ikgethang la bara le baradi ba bo rona. Ka lebaka la hore re karolo ya lelapa lena le leholo, re na le kgotso hona jwale ebile re ikutlwa re sireletsehile le hoja re phela lefatsheng le kgopo. (Pes. 72:7) Ka lebaka lena, re batla ho thusa batho ba bangata ka moo ho ka kgonehang ka teng hore le bona e be karolo ya lelapa la Jehova. Re ka kgona ho etsa jwalo ha re tswela pele re etsa mosebetsi wa ho etsa batho barutuwa.—Mat. 28:​19, 20.

THUSA BATHO BA BANG HORE E BE KAROLO YA MOKGATLO WA JEHOVA

16. Keng e ka thusang batho ba bang hore ba batle ho ba karolo ya mokgatlo wa Jehova?

¹⁶ Kaofela ha rona re na le boikarabelo ba ho thusa batho ba bang hore e be karolo ya  mokgatlo wa Jehova. Re ka kgona ho etsa sena ka hore re etsise Jehova. Jehova ha a qobelle batho hore e be karolo ya mokgatlo wa hae empa o ba “hulela” ho yena ka tsela e bonolo. (Joh. 6:44; Jer. 31:3) Ha batho ba lokileng ba ithuta ka Jehova le ka makgabane a hae, ho ba bonolo hore ba atamele ho yena. Botho ba rona le tsela eo re itshwarang ka yona e ka thusa batho ba bang jwang hore e be karolo ya mokgatlo wa Jehova?

17. Re ka etsang hore batho ba bang ba batle ho ba karolo ya mokgatlo wa Jehova?

¹⁷ Tsela e nngwe eo re ka etsang hore batho ba bang ba batle ho ba karolo ya mokgatlo wa Jehova ke ka hore re bontshe Bakrestemmoho le rona lerato mme re ba tshware ka mosa. Ha motho a qala ho tla dibokeng, re batla hore a ikutlwe ka tsela e tshwanang le eo batho ba neng ba ile dibokeng mehleng ya Bakreste ba Korinthe ba neng ba ikutlwa ka yona. Ba ile ba re: “Ka nnete Modimo o na le lona.” (1 Bakor. 14:​24, 25; Zak. 8:23) Ka hoo, re lokela ho tswela pele re mamela keletso e reng “le phedisane ka kgotso.”—1 Bathes. 5:13.

18. Ke eng e ka etsang hore batho ba batle ho tla ka mokgatlong wa Jehova?

¹⁸ Re lokela ho leka ho ba le boikutlo boo Jehova a nang le bona ka Bakrestemmoho le rona. Re ka thuswa ke hore re se ke ra sheba diphoso tsa bona empa re shebe dintho tse ntle tseo ba di etsang. Re ka leka ho lokisa ditaba pakeng tsa rona ka tsela e lerato ka hore re ‘bontshane mosa, re be le qenehelo re be re tshwarelane ka bolokolohi.’ (Baef. 4:32) Ha re etsa jwalo, batho ba bang ba tla batla ho ba karolo ya mokgatlo wa Jehova hobane ba batla ho bontshwa lerato le ho tshwarwa ka mosa. a

 DULA O LE KAROLO YA MOKGATLO WA JEHOVA

19. (a) Jwalo ka ha ho bontshitswe lebokoseng le reng “ Ba ne ba Tswile ka Phuthehong Mme ba Kgutlile,” keng eo batho ba bang ba ileng ba e bua ka mora hore ba kgutlele ka phuthehong? (b) Re lokela ho ikemisetsa ho etsang? (Sheba setshwantsho.)

¹⁹ Re ananela haholo hore ebe re karolo ya mokgatlo wa Jehova. Ho a thabisa hore ebe mokgatlo wa Jehova o na le batho ba bangata ba mo sebeletsang ho feta nakong e fetileng. Re tla dula re ananela hore Jehova o entse hore re be karolo ya mokgatlo wa hae. Motho e mong le e mong ya batlang ho dula a kgatholohile, a thabile a bile a ikutlwa a sireletsehile, o lokela ho dula e le karolo ya mokgatlo wa Jehova. Empa re lokela ho ba sedi hobane Satane o etsa sohle seo a ka se kgonang hore a re ntshe ka hare ho mokgatlo wa Jehova. (1 Pet. 5:8; Tshen. 12:9) Ha re a lokela ho mo dumella hore a atlehe. A re sebetseng ka thata e le hore re sireletse kgotso eo re nang le yona ka hare ho mokgatlo wa Jehova.