1. Ke hobaneng ha re ka re Jehova o ikokobeditse?

NA RE ka re Jehova o ikokobeditse? Ho jwalo. Mongodi e mong wa Pesaleme e leng Davida o ile a re: “O tla mpha thebe ya hao ya poloko, ke boikokobetso ba hao bo nketsang hore ke be moholo.” (2 Sam. 22:36; Pes. 18:35) E ka nna yaba ha Davida a ne a ngola mantswe ana o ne a hopotse nakong eo ka yona Samuele a ileng a ya habo a tlo kgetha morena ya latelang wa Iseraele. Le hoja Davida e ne e le e monyane ho bashemane ba robedi, Jehova o ile a mo kgetha hore ebe yena ya neng a tla nkela Morena Saule sebaka.​—1 Sam. 16:1, 10-13.

2. Ke eng seo re tlo ithutang sona sehloohong see?

² Davida o ne a ka dumellana le mongodi wa Pesaleme ya 113 ya ileng a re ka Jehova: “O itheola boemong hore a tadime lehodimong le lefatsheng, o phahamisa ya tlaase leroleng, o phahamisa ya futsanehileng . . . ho mo dudisa le bahlomphehi.” (Pes. 113:6-8) Sehloohong sena re tlo qala pele ka ho ithuta hore na Jehova o ile a bontsha boikokobetso jwang le hore na re ka mo etsisa jwang. Hape re tla boela re ithute ka boikokobetso mohlaleng wa Morena Saule, moprofeta Daniele le Jesu.

3. Jehova o tshwara bahlanka ba hae jwang, hona see se bontshang ka yena?

³ Jehova o bontsha hore o ikokobeditse tseleng eo a tshwarang bahlanka ba hae ka yona. O amohela borapedi ba rona ebile o re nka re le metswalle ya hae. (Pes. 25:14) Jehova o ile  a fana ka Mora hae hore e be sehlabelo bakeng sa dibe tsa rona e le hore re ka ba le kamano e ntle le yena. Ho a thabisa ho bona hore Jehova o na le qenehelo.

4. Ke eng seo Jehova a re fileng sona, hona hobaneng?

⁴ Hlokomela tsela e nngwe eo Jehova a bontshang ka yona hore o ikokobeditse. Ka ha ke yena ya re bopileng, a ka be a ile a etsa hore re se ke ra ba le bolokolohi ba ho ikgethela hore na re etseng ka bophelo ba rona. Empa ha a a ka a etsa jwalo. O re entse ka setshwantsho sa hae le ho re fa bolokolohi ba ho ikgethela seo re batlang ho se etsa ka bophelo ba rona. Diqeto tseo re di etsang ke tsa bohlokwa ho Jehova le hoja re le banyane ebile re fokola ha re bapiswa le yena. O batla re mo sebeletse hobane re mo rata ebile re hlokomela hore ho mo mamela ho tla re tswela molemo. (Deut. 10:12; Esa. 48:17, 18) Ka hoo ho tseba hore Jehova o ikokobeditse ho a re thabisa.

5. Ke jwang Jehova a re rutang hore re be batho ba ikokobeditseng? (Sheba setshwantsho se ka ntle.)

⁵ Tsela eo Jehova a re tshwarang ka yona e re ruta ho ba batho ba ikokobeditseng. Jehova ke Motho ya bohlale ka ho fetisisa lehodimong le lefatsheng. Le hoja a sa hloke keletso ya mang kapa mang, empa o ikemiseditse ho mamela maikutlo a batho ba bang. Ka mohlala, Jehova o ile a dumella hore Mora wa hae a mo thuse ho bopa dintho tsohle. (Liprov. 8:27-30; Bakol. 1:15, 16) Hape le hoja Jehova a le matla ohle, o fa batho ba bang mesebetsi e itseng. Ka mohlala, o kgethile Jesu hore e be Morena wa Mmuso wa hae, hape o tla fana ka bolaodi bo itseng ho batho ba 144 000 ba tla busa le Jesu. (Luka 12:32) Ke nnete hore Jehova o kwetlisitse Jesu hore ebe Morena le Moprista ya Phahameng. (Baheb. 5:8, 9) O boetse o kwetlisa batho ba tla busa le Jesu hore ba phethe mosebetsi wa bona. Empa ha  a leke ho laola tsela eo ba o etsang ka yona. Ho e na le hoo, o a tshepa hore ba tla etsa thato ya hae.​—Tšen. 5:10.

6, 7. Ke eng seo re ithutang sona ho Ntate wa rona ya lehodimong mabapi le ho fa ba bang mosebetsi?

⁶ Haeba Ntate wa rona ya lehodimong a sa hloke thuso le ha e le efe, empa a kgona ho fa batho bolaodi bo itseng, hothweng ka rona? Ka mohlala, na o hlooho ya lelapa kapa o moholo ka phuthehong? Latela mohlala wa Jehova ka hore ofe ba bang mosebetsi mme o se ke wa leka ho laola tsela eo ba tla o etsa ka yona. Haeba o etsisa Jehova, o tla qeta mosebetsi, o kwetlise ba bang hape o ba thuse hore ba se ke ba tshaba ho etsa mosebetsi. (Esa. 41:10) Ke eng seo hape batho ba nang le boikarabelo ba ka ithutang sona ho Jehova?

⁷ Bibele e bontsha hore Jehova o thabela ho utlwa maikutlo a mangeloi a hae. (1 Mar. 22:19-22) Batswadi, le ka etsisa mohlala wa Jehova jwang? Ka dinako tse ding botsa bana ba hao hore na ntho e itseng e ka etswa jwang mme ha ho kgoneha o sebedise ditlhahiso tsa bona.

8. Jehova o ile a bontsha Abrahama le Sara mamello jwang?

⁸ Tsela e nngwe eo Jehova a bontshang ka yona hore o ikokobeditse ke ho ba le mamello. Ka mohlala, Jehova o bontsha mamello haeba ka tlhompho bahlanka ba hae ba botsa dipotso ka diqeto tseo a di entseng. Jehova o ile a mamela ha Abrahama a mo bolella hore ke ntho e sa lokang hore ebe o batla ho timetsa Sodoma le Gomora. (Gen. 18:22-33) Hopola ka moo Jehova a ileng a tshwara Sara e leng mosadi wa Abrahama ka teng. Jehova ha a a ka a halefa ha Sara a tsheha tshepiso ya hae ya hore o tla ima le hoja a se a tsofetse. (Gen. 18:10-14) Ho e na le hoo o ile a tshwara Sara ka tlhompho.

9. Ke eng seo batswadi le baholo ba ka ithutang sona mohlaleng wa Jehova?

⁹ Ke eng seo baholo le batswadi ba ka ithutang sona mohlaleng wa Jehova? O etsang haeba bana ba hao kapa batho ba bang ka phuthehong ba sa dumellane le diqeto tsa hao? Na o potlakela ho ba bolella hore ba fositse? Kapa o leka ho utlwisisa maikutlo a bona? Haeba ba nang le boikarabelo ba etsisa Jehova, seo se tla tswela phutheho le lelapa molemo. Ho fihlela hakana re se re ithutile ka moo re ka etsisang mohlala wa Jehova wa ho bontsha boikokobetso. Hona jwale re tlo bona hore na ke jwang re ka ithutang ho ba le boikokobetso mehlaleng e hlahang ka Bibeleng.

10. Ke jwang Jehova a sebedisang mehlala ya batho ba bang ho re ruta?

¹⁰ Ka ha Jehova ke “Morupedi . . . e Moholo” o re file mehlala e ka re rutang ka Lentsweng la hae. (Esa. 30:20, 21) Ka Bibeleng re ithuta ka bahlanka ba neng ba na le makgabane a neng a thabisa Modimo a akarelletsang boikokobetso. Re boetse re ithuta ka mehlala ya batho ba ileng ba hloleha ho bontsha makgabane ao.​—Pes. 37:37; 1 Bakor. 10:11.

11. Ke eng seo re ithutang sona mohlaleng o mobe wa Saule?

¹¹ Nahana ka se ileng sa etsahalla Morena Saule. Qalong e ne e le motho ya ikokobeditseng. O ne a tseba dintho tseo a kgonang ho di etsa ebile ho ne ho se bonolo hore a amohele boikarabelo bo eketsehileng. (1 Sam. 9:21; 10:20-22) Empa ha nako e ntse e ya Saule o ile a qala ho ikgohomosa mme a etsa dintho tseo a neng a se na tokelo ya ho di etsa. O ile a etsa dintho tsena ka mora hore ebe morena. Ka letsatsi le leng, o ile a fellwa ke mamello ha a ntse a emetse moprofeta Samuele. Ho e na le hore ka boikokobetso a tshepe hore Jehova  o tla thusa setjhaba sa hae, o ile a fana ka sehlabelo le hoja a ne a se na tokelo ya ho etsa jwalo. Ka lebaka leo Jehova o ile a mo lahla. (1 Sam. 13:8-14) Ka hoo re tla be re etsa hantle haeba re ithuta mohlaleng ona mme re qoba ho etsa dintho tseo re se nang tokelo ya ho di etsa.

12. Daniele o ile a bontsha boikokobetso jwang?

¹² Ho fapana le mohlala o mobe wa Saule, hlokomela mohlala o motle wa moprofeta Daniele. Bophelo bohle ba hae esale e le motho ya ikokobeditseng le ya dulang a kopa tataiso ho Jehova. Ka mohlala, ha Jehova a ne a mo sebedisetsa ho hlalosetsa Nebukadnezare toro ya hae, Daniele ha a a ka a etsa e ka ke ka bokgoni ba hae a ileng a e hlalosa. Ho e na le hoo ka boikokobetso o ile a isa thoriso yohle ho Jehova. (Dan. 2:26-28) Re ithutang ho see? Haeba Bakrestemmoho ba rata tsela eo re fanang ka dipuo ka yona kapa re atleha tshimong, re lokela ho hopola ho isa thoriso yohle ho Jehova. Re lokela ho hlokomela hore re kgona ho etsa dintho tsena ka thuso ya Jehova. (Bafil. 4:13) Haeba re etsa jwalo re tla be re etsisa mohlala wa Jesu. Re tla be re o etsisa jwang?

13. Ke eng seo re ithutang sona ka Jesu ho Johanne 5:19, 30?

¹³ Jesu e ne e le motho ya phethahetseng le ha ho le jwalo o ne a tshepile Jehova. (Bala Johanne 5:19, 30.) Ha a a ka a leka ho nka matla a Ntate wa hae ya lehodimong. Bafilipi 2:6 e re Jesu ha a a ka “a nahana ho inkela ka mahahapa, e leng, hore o lokela ho lekana le Modimo.” Ka hoo Jesu o ne a tseba moo matla a hae a fellang teng ebile a hlompha bolaodi ba Ntate wa hae.

14. Ke eng seo Jesu a ileng a se etsa ha ba mo kopa hore a etse ntho eo a neng a se na tokelo ya ho e etsa?

¹⁴ Nahana ka seo Jesu a ileng a se etsa ha Jakobo, Johanne le Mme wa bona ba mo kopa hore a etse ntho eo a neng a se na matla a ho e etsa. Hanghang Jesu o ile a ba bolella hore ke Ntate wa hae ya lehodimong feela ya nang le tokelo ya ho kgetha hore na ka mang ya tla dula ka letsohong la hae le letona kapa le letshehadi Mmusong. (Mat. 20:20-23) Jesu o ne a tseba moo matla a hae a fellang teng ka hoo o ne a ikokobeditse. O ne a sa etse dintho tseo Jehova a sa reng a di etse. (Joh. 12:49) Jwale ke jwang re ka etsisang mohlala o motle wa Jesu?

15, 16. Re ka sebedisa keletso e ho 1 Bakorinthe 4:6 jwang?

 ¹⁵ Re tla be re etsisa mohlala wa Jesu wa boikokobetso haeba re mamela keletso e ho 1 Bakorinthe 4:6. Yona e re: “Le se ke la fetela ka nqane ho dintho tse ngodilweng.” Ka hoo ha batho ba re kopa keletso ha re a lokela ho ba qobella hore ba amohele maikutlo a rona kapa ra bua pele re nahanisisa ka taba. Ho e na le hoo, re lokela ho ba fa keletso e tswang ka Bibeleng le dingolweng. Ha re etsa jwalo re tla be re bontsha hore re tseba moo matla a rona a fellang teng le hore re a utlwisisa hore keletso ya Jehova e molemo ho feta ya rona.​—Tšen. 15:3, 4.

¹⁶ Ntle le moo, re na le mabaka a hore re be batho ba ikokobeditseng. Haeba re le batho ba ikokobeditseng, seo se tla re thusa jwang hore re thabe re be re utlwane le batho ba bang? Re tlo bua ka sena serapeng se latelang.

17. Ke hobaneng ha batho ba ikokobeditseng ba thabile?

¹⁷ Ha re le batho ba ikokobeditseng re ka thaba. Ke hobaneng ha re tjho jwalo? Hobane ha re hlokomela hore ho na le dintho tseo re sa kgoneng ho di etsa re tla ananela thuso ya batho ba bang. Ka mohlala, nahana ka nako eo Jesu a neng a fodisa balepera ba leshome. Ke monna ya le mong feela ya ileng a kgutla mme a leboha Jesu hore e be o ile a mo fodisa. Monna enwa ya ikokobeditseng o ne a tseba hore a ke ke a fola ka ntle ho thuso ya Jesu, ke ka hoo a ileng a mo leboha ka hore e be o ile a mo thusa mme a isa thoriso ho Modimo.​—Luka 17:11-19.

18. (Baroma 12:10) Boikokobetso bo re thusa jwang hore re utlwane le batho ba bang?

¹⁸ Hangata batho ba ikokobeditseng ba utlwana le batho ba bang mme ba na le metswalle. Hobaneng? Hobane ba a hlokomela  hore batho ba bang ba na le makgabane a matle mme ba a ba tshepa. Batho ba ikokobeditseng ba a thaba ha batho ba bang ba atleha mesebetsing eo ba e fuweng mme ba a ba babatsa.​—Bala Baroma 12:10.

19. Re na le mabaka afe a ho qoba ho ikgohomosa?

¹⁹ Ho fapana le hoo, ho batho ba ikgohomosang ho thata hore ba babatse batho ba bang empa ba batla hore e be bona feela ba babatswang. Hangata ba ipapisa le batho ba bang ebile ba leka ho hlahella e ka ba molemo ho ba feta. Ho e na le hore ba rute batho ba bang ho tseba mosebetsi, hangata ba re: “Haeba o batla hore ntho e etswe hantle, o lokela ho iketsetsa yona.” Hape motho ya ikgohomosang o batla ho hlahella e le motho wa bohlokwa ho feta batho ba bang ebile o ba mona haeba ba tseba dintho ho mo feta. (Bagal. 5:26) Hangata batho ba jwalo ha ba utlwane le batho ba bang. Haeba re hlokomela hore re na le bothata ba ho ikgohomosa, re lokela ho rapela Jehova hore a re thuse hore re ‘fetole dikelello tsa rona’ e le hore re se ke ra tsebahala re le batho ba ikgohomosang.​—Bar. 12:2.

20. Ke hobaneng ha re lokela ho ikokobetsa?

²⁰ Re ananela mohlala o motle oo Jehova a re behetseng ona. Re bona ka moo a ikokobeditseng ka teng tseleng eo a tshwarang bahlanka ba hae ka yona mme re batla ho mo etsisa. Ho feta moo, re batla ho etsisa mehlala ya bahlanka ba Modimo ba hlahang ka Bibeleng ba neng ba sebeletsa Jehova ba ikokobeditse. E se e ka re ka fa Jehova tlhompho le thoriso e mo tshwanelang. (Tšen. 4:11) Ka hoo haeba re etsa dintho tsena tsohle, re tla ba metswalle ya Jehova ka ho sa feleng ka ha o rata batho ba ikokobeditseng.