1. Josefa o ile a hlahelwa ke teko efe, hona o ile a etsang?

 JOSEFA e leng mora wa Jakobo o ile a hlahelwa ke teko e boima. Mosadi e mong o ile a re a ‘robale le yena.’ Mosadi eo e ne e le wa mongahae e leng Potifaro. Josefa o ile a hana ho robala le yena. Motho e mong a ka nna a ipotsa hore na ke hobaneng ha Josefa a ile a hana ho etsa jwalo hobane Potifaro o ne a le siyo. Hape Josefa e ne e le lekgoba ntlong eo mme haeba a ne a ka hana ho robala le mosadi eo o ne a ka mo sulafaletsa bophelo. Ho ntse ho le jwalo, Josefa o ile a nna a hana ho robala le mosadi eo le hoja a ne a mo phehella. Hobaneng? O ile a re: “Nka etsa bobe bona bo boholo jwang mme ka sitelwa Modimo?”​—Gen. 39:7-12.

2. Josefa o ne a tseba jwang hore Modimo o nka ho etsa bofebe e le sebe?

² Josefa o ne a tseba jwang hore Modimo o nka bofebe e le ho etsa ‘bobe bo boholo’? Baiseraele ba ile ba fumana Molao wa Moshe o neng o re “o se ke wa feba” dilemo tse 200 ha morao. (Ex. 20:14) Ho ntse ho le jwalo, Josefa o ne a tseba Jehova hantle le hore na o ikutlwa jwang ha batho ba etsa bofebe. Ka mohlala, Josefa o ne a tseba hore Jehova o thehile lenyalo pakeng tsa monna a le mong le mosadi a le mong. Ho ka etsahala hore ebe o ile a utlwa ka moo Jehova a ileng a sireletsa nkgono wa hae Sara ka makgetlo a mabedi ha a ne a le kotsing ya hore banna ba bang ba batle ho etsa thobalano le yena. Modimo o ile a sireletsa mosadi wa Isaka e leng Rebeka ka tsela e tshwanang. (Gen. 2:24; 12:14-20; 20:2-7; 26:6-11) Ha Josefa a nahana ka maemo ao, o ile a bona hore na keng seo Modimo a se nkang se nepahetse le seo a se nkang se fosahetse. Ka ha Josefa o ne a rata Jehova, o ne a boetse a rata le melao ya hae ebile a ikemiseditse ho e mamela.

3. Re tlo bua ka eng sehloohong see?

 ³ Na o rata ho loka? Ha ho pelaelo hore ho jwalo. Kaofela ha rona ha re a phethahala, ka hoo haeba re sa hlokomele re ka susumetswa ke tsela eo batho ba ikutlwang ka yona ka ho loka. (Esa. 5:20; Bar. 12:2) Ka hoo, re tlo bua ka hore na ho loka ho bolelang le hore na ho rata ho loka ho ka re tswela molemo jwang. Re tla boela re bue ka dintho tse tharo tseo re ka di etsang e le hore re rate melao ya Jehova haholwanyane.

4. Ke maikutlo afe a fosahetseng ao batho ba bang ba nang le ona ka ho loka?

⁴ Ha batho ba nahana ka motho eo ho thweng o lokile, hangata ba nahana ka motho ya ikgohomosang, ya tshwayatshwayang batho ba bang diphoso le ya nahanang hore o ba phahametse. Empa Modimo ha a rate batho ba jwalo ho hang. Ha Jesu a ne a le lefatsheng, o ile a kgalemela ka matla baetapele ba bodumedi ba mehleng ya hae ba neng ba ipehela melao ya hore na se lokileng ke sefe. (Moek. 7:16; Luka 16:15) Ka hoo, ho loka ha ho bolele hore motho o inka a phahametse batho ba bang.

5. Bibele e re ho loka ho bolelang? Fana ka mehlala.

⁵ Ho loka ke ntho e ntle. Ho bolela ho etsa dintho tseo Jehova Modimo a reng di nepahetse. Ka Bibeleng mantswe a fetoletsweng e le “ho loka” a bolela ho mamela melao e phahameng ya Jehova. Ka mohlala, Jehova o ile a bolella batho ba rekisang hore ba lokela ho sebedisa “boima bo nepahetseng.” (Deut. 25:15) Lentswe la Seheberu le fetoletsweng e le “nepahetseng” le ka boela la fetolelwa e le “ho loka.” Ka hoo, Mokreste ya batlang ho etsa dintho tseo Modimo a reng di lokile o tla tshepahala dinthong tsohle tse amanang le kgwebo. Motho ya ratang ho loka o boetse o rata toka ebile ha a batle ho bona motho e mong a tshwarwa hampe. E le hore motho ya lokileng a “kgahlise [Jehova] ka botlalo,” o nahana ka hore na Jehova o tla ikutlwa jwang ka diqeto tseo a di etsang.​—Bakol. 1:10.

6. Ke hobaneng ha re lokela ho tshepa melao ya Jehova ya se nepahetseng le se fosahetseng? (Esaia 55:8, 9)

⁶ Bibele e re ho loka ho tswa ho Jehova. Ke ka hoo a bitswang “sebaka sa bodulo sa ho loka.” (Jer. 50:7) Ka ha Jehova ke Mmopi, ke yena feela ya ka behang melao ya se nepahetseng le se fosahetseng. Ka ha re baetsadibe ebile ha re a phethahala, hangata ha re tsebe hore na dintho tse nepahetseng le tse fosahetseng ke dife. Le ha ho le jwalo, Jehova yena o phethahetse mme o tseba hantle hore na dintho tse nepahetseng le tse fosahetseng ke dife. (Liprov. 14:12; bala Esaia 55:8, 9.) Le ha ho le jwalo, ka ha re bopilwe ka setshwantsho sa Modimo, re ka kgona ho etsa dintho tseo a reng di nepahetse. (Gen. 1:27) Re rata ho mamela melao ya Jehova. Ka ha re rata Ntate wa rona, re batla ho mo etsisa ka hohle ka moo re ka kgonang.​—Baef. 5:1.

7. Hlalosa hore na ke hobaneng ha re hloka melao.

⁷ Ho mamela melao ya Jehova ya se nepahetseng le se fosahetseng ho re tswela molemo. Na o hlokomela lebaka? A ko nahane feela hore na ho ne ho tla etsahalang haeba banka e nngwe le e nngwe e ne e ka ipehela melao mabapi le ho fumana boleng ba tjhelete kapa haeba kontraka e nngwe le e nngwe ya kaho e ne e ka latela dipehelo tsa yona tsa ho metha. Seo se ne se ka baka moferefere. Hape haeba dingaka le baoki ba ne ba sa latele melao e tshwanang ha ba phekola, batho ba bang ba ne ba ka shwa. Sena se a bontsha hore melao e behilweng e a re sireletsa. Ka tsela e tshwanang, melao ya Modimo ya se nepahetseng le se fosahetseng e a re sireletsa.

8. Batho ba lokileng ba tla fumana eng?

 ⁸ Jehova o hlohonolofatsa batho ba lekang ho mamela melao ya hae. O tshepisa hore “ba lokileng ba tla rua lefatshe, ba tla dula ho lona ka ho sa feleng.” (Pes. 37:29) A ko nahane hore na batho e tla ba ba momahaneng, ba nang le kgotso le ba thabileng hakae ha kaofela ha rona re mamela melao ya Jehova. Jehova o batla hore o be teng ka nako eo. Kaofela ha rona re na le mabaka a utlwahalang a hore re rate seo Jehova a reng se nepahetse. Re ka etsang e le hore re rate ho loka le ho feta? A re bueng ka dintho tse tharo tseo re ka di etsang.

9. Ke eng e tla re thusa hore re rate ho loka?

⁹ Ntlha ya pele: Rata Modimo e leng yena ya behang melao. E le hore re rate ho loka, re lokela ho rata Jehova haholwanyane e leng yena ya re behelang melao ya se nepahetseng le se fosahetseng. Ha re rata Jehova le ho feta, re tla batla ho mamela melao ya hae e lokileng. Ka mohlala, haeba Adama le Eva ba ne ba rata Jehova, ba ne ba ke ke ba tlola molao wa hae.​—Gen. 3:1-6, 16-19.

10. Abrahama o ile a etsang e le hore a utlwisise hore na Jehova o nahana jwang?

¹⁰ Ha re batle ho etsa phoso e tshwanang le ya Adama le Eva. Re ka qoba ho etsa phoso e tshwanang ka hore re dule re ithuta ka Jehova, re ananele makgabane a hae ebile re leke ho utlwisisa tsela eo a nahanang ka yona. Ha re etsa jwalo, re tla rata Jehova le ho feta. Nahana ka Abrahama. O ne a rata Jehova haholo mme a dula a mo mamela le hoja a ne a sa utlwisise diqeto tseo Jehova a neng a di etsa. Hape o ile a leka ho tseba Jehova haholwanyane. Ka mohlala, ha Abrahama a utlwa hore Jehova o entse qeto ya ho fedisa Sodoma le Gomora, o ile a tshoha hore “Moahlodi wa lefatshe lohle” o ne a tlo fedisa batho ba lokileng ha mmoho le ba kgopo. O ne a nahana hore ntho eo Jehova a neng a tlo e etsa e ne e sa utlwahale, ka hoo ka boikokobetso o ile a botsa Jehova dipotso tse ngata. Jehova o ile a mo bontsha mamello mme a araba dipotso tsa hae. Qetellong Abrahama o ile a hlokomela hore Jehova ke yena ya hlahlobang dipelo mme ha ho mohla a ahlolang ba se nang molato ha mmoho le ba nang le molato.​—Gen. 18:20-32.

11. Abrahama o ile a bontsha jwang hore o rata Jehova ebile o a mo tshepa?

¹¹ Puisano eo Abrahama le Jehova ba bileng le yona ka motse wa Sodoma le Gomora e ile ya mo ama haholo. E ile ya etsa hore a rate le ho hlompha Ntate wa hae le ho feta. Dilemo ha morao, Abrahama o ile a ba boemong bo ileng ba etsa hore ho be thata hore a tshepe Jehova. Jehova o ile a kopa hore a etse sehlabelo ka mora wa hae eo a mo ratang, e leng Isaka. Empa ka nako eo Abrahama o ne a se a tseba Modimo hantle, ka hoo ha a ka a mo botsa dipotso. Abrahama o ile a fela a etsa seo Jehova a ileng a mo kopa sona. O ka inahanela feela hore na ho ne ho le boima hakae ha a ntse a itokisetsa ho yo etsa sehlabelo seo. E tlameha ebe Abrahama o ile a nahanisisa ka dintho tseo a ithutileng tsona ka Jehova. O ne a tseba hore Jehova o ne a ke ke a etsa ntho le ha e le efe e sa lokang kapa e sa bontsheng lerato. Moapostola Pauluse o ile a bontsha hore Abrahama o ne a dumela hore Jehova o ne a tla tsosa mora wa hae ya ratwang Isaka. (Baheb. 11:17-19) Jehova o ne a tshepisitse hore Isaka e ne e tla ba ntate wa setjhaba empa ka nako eo Isaka o ne a se na bana. Abrahama o ne a rata Jehova, ka hoo o ne a tshepa hore Ntate wa hae o tla dula a etsa se nepahetseng. Le hoja ho ne ho le thata, tumelo  eo a neng a ena le yona e ile ya mo thusa hore a mamele.​—Gen. 22:1-12.

12. Re ka etsisa Abrahama jwang? (Pesaleme ya 73:28)

¹² Re ka etsisa Abrahama jwang? Re lokela ho dula re ithuta ka Jehova jwalo ka Abrahama. Ha re etsa jwalo, re tla ba metswalle ya hae mme re tla mo rata le ho feta. (Bala Pesaleme ya 73:28.) Letswalo la rona le tla kwetliseha e le hore re kgone ho nahana jwalo ka Modimo. (Baheb. 5:14) Ka hoo, re tla kgona ho hana haeba motho e mong a batla hore re etse ntho e itseng e fosahetseng. Re tla qoba ho nahana le ho etsa ntho le ha e le efe e ka utlwisang Ntate wa rona bohloko le ho senya kamano ya rona le yena. Re ka bontsha jwang hape hore re rata ho loka?

13. Ke jwang re ka phehellang ho loka? (Liproverbia 15:9)

¹³ Ntlha ya bobedi: Lwanela ho rata ho etsa dintho tse lokileng letsatsi le letsatsi. Re lokela ho ikwetlisa letsatsi le letsatsi haeba re batla hore re dule re le matla. Ka ho tshwanang, re lokela ho sebetsa ka thata e le hore re rate dintho tseo Jehova a reng di lokile. Re ka kgona ho etsa sena letsatsi le letsatsi. Jehova o a re nahanela mme ha a lebella hore re etse dintho tse fetang matla a rona. (Pes. 103:14) O a re kgodisa hore “o rata ya phehellang ho loka.” (Bala Liproverbia 15:9.) Haeba ho na le ntho eo re batlang ho e finyella ha re ntse re sebeletsa Jehova, re sebetsa ka thata hore re e finyelle. Ka hoo, re lokela ho etsa se tshwanang haeba re batla ho phehella ho loka. Ha nako e ntse e ya ka mamello Jehova o tla re thusa hore re atlehe ho etsa jwalo.​—Pes. 84:5, 7.

14. “Tshireletso ya sefuba ya ho loka” ke eng, hona ke hobaneng ha re e hloka?

¹⁴ Jehova o a re hopotsa hore ho etsa dintho tse nepahetseng ho ke ke ha re imela. (1 Joh. 5:3) Ho ena le hoo, ho re sireletsa letsatsi le letsatsi. Hopola dihlomo tsa moya tseo moapostola Pauluse a buileng ka tsona. (Baef. 6:14-18) Ke karolo efe e neng e sireletsa pelo ya lesole? Ke “tshireletso ya sefuba ya ho loka” e emelang melao ya Jehova e lokileng. Melao ya Jehova e lokileng e ka sireletsa pelo ya hao ya tshwantshetso, e leng motho eo o leng yena ka  hare feela jwalo ka ha tshireletso ya sefuba e sireletsa pelo ya lesole. Ke ka hoo e leng ha bohlokwa hore o etse bonnete ba hore dihlomo tsa hao tsa moya di akareletsa tshireletso ya sefuba ya ho loka.​—Liprov. 4:23.

15. O ka apara tshireletso ya sefuba ya ho loka jwang?

¹⁵ O ka apara tshireletso ya sefuba ya ho loka jwang? O ka etsa jwalo ka hore letsatsi le letsatsi o nahane ka melao ya Modimo pele o etsa diqeto. Pele o nka qeto ya hore na o tla bua kang, o tla mamela mmino ofe, o tla shebella boithabiso bofe kapa hore na o tla bala buka efe, ipotse: ‘Ke eng eo ke e kenyang ka pelong ya ka? Na Jehova a ka thabiswa ke dintho tsee? Na di kgothaletsa hore re etse boitshwaro bo bobe, re rate ntwa, re be meharo le ho etsa hore re itjhebe borona, e leng dintho tseo Jehova a reng ha di a loka?’ (Bafil. 4:8) Haeba diqeto tseo o di etsang di dumellana le thato ya Jehova, o tla be o dumella melao ya hae e lokileng hore e sireletse pelo ya hao.

16, 17. Esaia 48:18 e re kgodisa jwang hore re ka kgona ho mamela melao ya Jehova?

¹⁶ Na o kile wa ipotsa hore na o tla kgona ho tswela pele o mamela melao ya Jehova e lokileng letsatsi le letsatsi? Nahana ka papiso eo Jehova a ileng a bua ka yona ho Esaia 48:18. (E bale.) Jehova o tshepisa hore ho loka ha rona ho ka tshwana le “maqhubu a lewatle.” A ko nahane o dutse lebopong la lewatle mme o shebile maqhubu a lewatle a ntse a ya hodimo le tlase. Ha o ntse o thabetse ho sheba maqhubu ao, na o ne o ka ipotsa hore na a tla ke a emise? Ho hang! O a tseba hore haesale maqhubu ao a le teng lewatleng leo ka dilemo tse ngata mme a ke ke a emisa le ka mohla.

¹⁷ Ho loka ha hao ho ka tshwana le maqhubu a lewatle. Seo se ka etsahala jwang? Ha ho ena le qeto eo o batlang ho e etsa, nahana pele ka hore na Jehova o batla o etseng ebe o etsa jwalo. Ntate wa hao ya lerato o tla dula a o fa matla ebile a o thusa hore o etse se nepahetseng ho sa tsotellehe hore na qeto eo o lokelang ho e etsa e thata hakae.​—Esa. 40:29-31.

18. Ke hobaneng ha re lokela ho qoba ho ahlola batho ba bang ho ya ka seo rona re nahanang hore se nepahetse?

¹⁸ Ntlha ya boraro: Dumella Jehova hore e be yena ya ahlolang. Ha re ntse re leka ka hohle ho mamela melao ya Jehova e lokileng, re lokela ho qoba ho ahlola batho ba bang le ho inka re ba phahametse. Ho ena le hore re kgelle batho ba bang fatshe mme re ba ahlole ho latela seo rona re nahanang hore se nepahetse, re lokela ho hopola hore Jehova ke “Moahlodi wa lefatshe lohle.” (Gen. 18:25) Jehova ha a re fa tokelo ya ho ahlola batho ba bang. Ha e le hantle, Jesu o ile a fana ka taelo ena e reng: “Kgaotsang ho ahlola e le hore le se ke la ahlolwa.”​—Mat. 7:1. b

19. Josefa o ile a bontsha jwang hore o tshepa kahlolo ya Jehova?

¹⁹ A re ke re boele re bue ka mohlala wa monna ya neng a lokile e leng Josefa. O ne a qoba ho ahlola batho ba bang esita le ba neng ba mo tshwara hampe. Bara babo ba ne ba mo lwantsha, ba ile ba mo rekisa hore e yo ba lekgoba mme ba ile ba re ho ntate wa bona o shwele. Dilemo ha morao, Josefa o ile a ba le lelapa labo hape. Ka nako eo Josefa e ne e se e le molaodi ya matla mme a ka be a ile a ahlola bara babo ka sehloho le ho batla ho iphetetsa. Bara babo Josefa ba ne ba tshohile hore o ne a ka etsa jwalo, le hoja ba ne ba ikwahlaela dintho tseo ba neng ba di entse. Empa Josefa  o ile a re ho bona: “Le se ke la tshoha, etswe na ke sebakeng sa Modimo?” (Gen. 37:18-20, 27, 28, 31-35; 50:15-21) Josefa o ne a tseba hore ke Jehova feela ya nang le tokelo ya ho ahlola bara babo.

20, 21. Ke jwang re ka qobang ho inka re phahametse batho ba bang?

²⁰ Le rona re lokela ho dumella Jehova hore e be yena ya ahlolang jwalo ka Josefa. Ka mohlala, ha re a lokela ho nahana hore re a tseba hore na ke eng e etsang hore Bakrestemmoho ba etse dintho ka tsela eo ba di etsang ka yona. Re ke ke ra kgona ho bona se ka pelong ya motho ka ha ke Jehova feela ya hlahlobang dipelo. (Liprov. 16:2) O rata batho ba mefuta yohle ba tswang dibakeng le ditsong tse sa tshwaneng. Hape Jehova o re kgothaletsa hore re “atolohe.” (2 Bakor. 6:13) Re batla ho rata bara le baradibabo rona bohle eseng re ba ahlole.

²¹ Taba ena e boetse e bolela hore ha re a lokela ho ahlola batho ba sa sebeletseng Jehova. (1 Tim. 2:3, 4) Na o ka ahlola wa lelapa eo e seng Paki mme wa re ‘motho enwa e ke ke ya eba Paki ya Jehova le ka mohla’? Tjhe, ho etsa jwalo e tla be e le ho iketeletsa pele le ho nahana hore re phahametse batho ba bang. Jehova o ntse a fa “moloko [wohle] wa batho” monyetla wa hore o bake. (Lik. 17:30) Re lokela ho dula re hopola hore Jehova o nka batho ba nahanang hore ba phahametse batho ba bang e le ba sa lokang.

22. Ke hobaneng ha o ikemiseditse hore o rate toka?

²² E se eka lerato leo re ratang melao ya Jehova e lokileng ka lona le ka etsa hore re dule re thabile mme la re thusa hore re be mehlala e metle ho batho ba bang e le hore e be metswalle ya rona le ya Modimo wa rona. Hape e se eka re ke ke ra kgaotsa ho ‘lapela le ho nyorelwa ho loka.’ (Mat. 5:6) Kgodiseha hore Jehova o hlokomela boiteko boo o bo etsang le hore o thabiswa ke ho bona hore o leka ka hohle hore o etse se nepahetseng. Le hoja batho ba lefatshe lena ba ntse ba tswela pele ba sa bontshe toka, dula o kgothetse o hopole hore “Jehova o rata ba lokileng.”​—Pes. 146:8.