Dipotso Tse Tswang ho Babadi
Sehlooho se reng “Lebitso la Hao le ke le Halaletswe” se ho Tora ya ho Lebela ya June 2020 se ile sa ntlafatsa tsela eo re utlwisisang taba ya lebitso la Jehova le bobusi ba hae jwang?
Sehloohong seo re ithutile hore taba ya bohlokwa e amang batho bohle le mangeloi ke ho halaletswa ha lebitso la Jehova. Taba ya hore Jehova o busa ka tsela e molemo e amana le ho halaletswa ha lebitso la hae. Hape taba ya hore batho ba lokela ho tshepahalla Jehova le yona e amana le ho halaletswa ha lebitso la hae.
A re bueng ka mabaka a mararo a etsang hore hona jwale re utlwisise hore taba ya bohlokwa ke lebitso la Jehova le hore le halaletswe.
Haesale Satane a ntse a senya Modimo lebitso ho tloha serapeng sa Edene ho fihlela hona jwale
Lebaka la pele ke hore Satane o ile a senya Jehova lebitso serapeng sa Edene. Satane o ile a botsa Eva potso e neng e fana ka maikutlo a hore Jehova o a timana le hore ditaelo tsa hae ha di utlwahale. Ha morao Satane o ile a fetola mantswe a Jehova mme a fana ka maikutlo a hore Modimo o leshano. Satane o ile a bitswa “Diabolose,” e bolelang “moetselletsi” hobane o ile a senya Jehova lebitso. (Joh. 8:44) Ka lebaka la hore Eva o ile a kgolwa mashano a Satane, ha a ka a mamela Modimo mme o ile a fetohela bobusi ba Jehova. (Gen. 3:1-6) Le kajeno Satane o ntse a senya Modimo lebitso ka hore a phatlalatse mashano ka yena. Batho ba dumelang mashano ao a Satane hangata ha ba mamele Jehova. Batho ba Modimo ba nka hore ho senya Jehova lebitso ke ho hloka toka. Taba ya hore ebe Satane o senya Jehova lebitso, ke lebaka le ka sehloohong leo ho etsahalang dintho tse bohloko lefatsheng.
Lebaka la bobedi ke molemong wa dintho tsohle tseo Jehova a di bopileng. Jehova o ikemiseditse ho halaletsa lebitso la hae. Ke yona ntho ya bohlokwa ka ho fetisisa ho Jehova. Ke ka lebaka leo a reng: “Ke tla halaletsa lebitso la ka le leholo.” (Ezek. 36:23) Jesu o ile a hlakisa hore na ntho ya bohlokwa ka ho fetisisa eo bahlanka ba Jehova ba lokelang ho e rapella ke efe ha a ne a re: “Lebitso la hao le halaletswe.” (Mat. 6:9) Hangata Bibele e bontsha hore ke ha bohlokwa hore lebitso la Jehova le tlotliswe. Hlokomela mehlala e latelang: “Rorisang Jehova hobane lebitso la hae le tshwanelwa ke thoriso.” (1 Dikron. 16:29; Pes. 96:8) “Binelang lebitso la hae le kganyang dipina tsa thoriso.” (Pes. 66:2) “Ke tla tlotlisa lebitso la hao ka ho sa feleng.” (Pes. 86:12) Le leng la makgetlo ao lentswe la Jehova le ileng la utlwahala ka ona e ne e le tempeleng e Jerusalema ha Jesu a ne a re: “Ntate, tlotlisa lebitso la hao.” Jehova o ile a mo araba ka ho re: “Ke le tlotlisitse mme ke tla boela ke le tlotlise.”—Joh. 12:28. a
Lebaka la boraro ke hore morero wa Jehova o tla dula o ama lebitso la hae kapa botumo ba hae. Na lebitso la Jehova e tla nne e be la bohlokwa ka mora teko ya ho qetela qetellong ya Puso ya Kreste ya Dilemo Tse Sekete? Mangeloi le batho ba tla ikutlwa jwang ka lebitso la Jehova ka nako eo? E le hore re fumane dikarabo tsa dipotso tsena, a re ke re bueng ka dintho tse pedi e leng ho tshepahala ha batho le bobusi ba Jehova. Ka nako eo ho tla be ho sa hlokahale hore batho ba bontshe hore ba a tshepahala. Ba tla be ba se na sebe mme ba lekilwe ka ditsela tsohle. Ba tla fumana bophelo bo sa feleng. Ka nako eo re ke ke ra hloka bopaki ba hore puso ya Jehova ke yona feela e molemo. Mangeloi le batho bohle ba tla dumela ho buswa ke Jehova. Empa na lebitso la Jehova e tla nne e be la bohlokwa ho batho ba hae?
Ka nako eo batho bohle ba tla be ba tseba nnete ka Jehova mme Jehova o tla be a halaleditse lebitso la hae. Empa lebitso la Jehova le tla dula e le la bohlokwa ho bahlanka ba hae kaofela lehodimong le lefatsheng. Lebaka ke hobane Jehova o tla dula a etsa dintho tse molemo. Jesu o tla kgutlisetsa puso ho Jehova mme “Modimo o tla busa batho bohle.” (1 Bakor. 15:28) Ka mora moo, batho ba tla thabela “tokoloho jwalo ka bana ba Modimo.” (Bar. 8:21) Jehova o tla etsa hore morero wa hae wa hore mangeloi le batho e be lelapa le le leng o phethahale.—Baef. 1:10.
Ka mora hore dintho tsena kaofela di etsahale, lelapa la Jehova le lehodimong le lefatsheng le tla ikutlwa jwang? Re tla nne re batle ho rorisa lebitso la Jehova. Mopesaleme Davida o ile a re: “Ho ke ho roriswe Jehova Modimo . . . Lebitso la hae le kganyang le ke le roriswe ka ho sa feleng.” (Pes. 72:18, 19) Re tla nne re be le mabaka a mangata a ho rorisa lebitso la Jehova ka ho sa feleng.
Lebitso la Jehova le emela ntho e nngwe le e nngwe ka yena. Ka ho kgetheha lebitso la hae le re hopotsa tsela eo a re ratang ka yona. (1 Joh. 4:8) Re tla dula re hopola hore Jehova o re bopile hobane a re rata le hore o ile a fana ka mora wa hae hore a re shwele hobane a re rata. Hape re tla dula re hopola hore o busa ka toka le lerato. Re tla tswela pele re bona ka moo Jehova a re ratang ka teng. Re tla dula re batla ho ba metswalle ya Ntate wa rona le ho rorisa lebitso la hae ka mehla.—Pes. 73:28.
