• “Ke ne ke ikutlwa jwalo ka ha eka monna wa ka o entse bofebe hangata.”

• “Ke ile ka utlwa ke tlotlolotswe, ke sa ratehe ebile ke se na thuso.”

• “Ke ne ke sa kgone ho bua le mang kapa mang ka yona. Ke ne ke utlwile bohloko haholo empa ke se na motho ya ka ntshedisang.”

• “Ke ne ke utlwa eka Jehova ha a ntsotelle.”

Mantswe ana a ka hodimo a bontsha ka moo mosadi a utlwang bohloko ka teng ha monna wa hae a shebella pornography. Jwale haeba a nkile dikgwedi kapa dilemo a ntse a e shebella lekunutung, mosadi a ka nna a utlwa eka a ke ke a kgona ho mo tshepa hape. Mosadi e mong o ile a re: “Ke utlwa eka ha ke tsebe monna wa ka ho hang. Ebe ho na le dintho tse ding hape tseo a mpatetseng tsona?”

Sehlooho sena se ngoletswe mosadi eo monna wa hae a shebellang pornography. a Se na le melaomotheo ya Bibele e tla mo tshedisa le e tla mo kgodisa hore Jehova o a mo rata ebile o tla mo thusa. Hape se tla mo thusa hore a be le kgotso le hore a dule a ena le kamano e ntle le Jehova. b

Le hoja o ke ke wa laola ntho e nngwe le e nngwe eo monna wa hao a e etsang, ho na le dintho tseo o ka di etsang e le hore o se ke wa tshwenyeha haholo le hore o be le kgotso. Leka ho etsa dintho tse latelang.

O se ke wa ipeha molato. Mosadi a ka nna a utlwa eka ke molato wa hae hore ebe monna wa hae o shebella pornography. Alice c o ne a utlwa eka ho na le ntho eo monna wa hae a nkang e haella ho yena jwalo ka mosadi. O ne a ipotsa hore na ke hobaneng ha monna wa hae a ne a batla ho sheba basadi ba bang eseng yena. Basadi ba bang ba ipeha molato ka diketso tsa banna ba bona mme ba nahana hore ke bona ba etsang hore dintho di senyehe le ho feta. Danielle o re: “Ke ne ke bona eka ke nna ya qhalang lenyalo la rona hobane jwale ke ne ke halefile haholo.”

Haeba le wena o ikutlwa jwalo, tseba hore Jehova ha a nke o ikarabella ka diketso tsa monna wa hao.  Jakobo 1:​14 e re: “E mong le e mong o lekwa ke ho hohelwa ke ditakatso tsa hae.” (Bar. 14:​12; Bafil. 2:​12) Jehova ha a o nke o le molato. Ho ena le hoo, o o nka o le motho wa bohlokwa hobane o a mo tshepahalla.​—2 Dikron. 16:9.

Ntho e nngwe ya bohlokwa eo mosadi a lokelang ho e utlwisisa ke hore taba ya hore ebe monna wa hae o shebella pornography ha e bolele hore ho na le ntho e itseng e haellang ho yena jwalo ka mosadi. Ditsebi di bontsha hore ha monna a shebella pornography, o ba le ditakatso tsa thobalano tseo ho seng mosadi ya ka kgonang ho di kgotsofatsa.

O se ke wa tshwenyeha haholo. Catherine o re ntho feela eo a neng a dula a nahana ka yona e ne e le hore monna wa hae o shebella pornography. Frances o re: “Ke a tshwenyeha ha ke sa tsebe hore na monna wa ka o hokae. Ke dula ke tshwenyehile haholo letsatsi lohle.” Basadi ba bang ba ikutlwa ba hlajwa ke dihlong ha ba ena le bara le baradi ba bo rona ba tsebang hore banna ba bona ba shebella pornography. Ba bang ba re ba ikutlwa e le metwaitwai hobane ba nahana hore ha ho na motho ya utlwisisang boemo ba bona.

Ke ha tlhaho ho ikutlwa jwalo. Empa haeba o dula o nahana ka dintho tsena, o tla tshwenyeha le ho feta. Ho ena le hoo, leka ho nahana haholo ka kamano ya hao le Jehova. Ho etsa jwalo ho tla o thusa hore o kgone ho mamella.​—Pes. 62:2; Baef. 6:10.

Ho bala le ho nahanisisa ka mehlala e tswang ka Bibeleng ya basadi ba neng ba ena le mathata ba ileng ba tshediswa ke ho rapela Jehova ho ka o thusa. E ne e se ka mehla a tlosang mathata a bona empa o ne a ba fa kgotso. Ka mohlala, Anna o ne a “utlwile bohloko haholo” ka lebaka la boemo ba hae. Empa ka mora ho “rapela ka nako e telele ka pela Jehova,” o ile a ba le kgotso le hoja a ne a sa tsebe hore na ho tla etsahalang.​—1 Sam. 1:​10, 12, 18; 2 Bakor. 1:​3, 4.

Kopa baholo hore ba o thuse. Ba ka ba jwalo ka “sebaka sa ho ipatela moya le setshabelo sa ho ipatela pula e nang ka sefefo.” (Esa. 32:​2, nal.) Mohlomong ba ka ba ba etsa tlhahiso ya hore o bue le moradi wa bo rona ya itseng ya tla o tshedisa.​—Diprov. 17:17.

Na o ka kgona ho thusa monna wa hao hore a tlohele ho shebella pornography? Mohlomong. Bibele e re “ba babedi ba molemo ho feta a le mong” ha ho lwantshwa sera se matla. (Moek. 4:​9-12)  Ditsebi di bontsha hore ha banyalani ba sebetsa ha mmoho, ho ka ba bonolo hore monna a tlohele ho shebella pornography le hore mosadi wa hae a ithute ho mo tshepa hape.

Ke nnete hore ho itshetlehile haholo ka hore na molekane wa hao o ikemiseditse hakae ho sebetsa ka thata e le hore a tlohele ho shebella pornography. Na o kopile Jehova ka tiyo hore a mo fe matla a ba a kopa thuso ya baholo? (2 Bakor. 4:7; Jak. 5:​14, 15) Na o se a tlile ka leano le tla mo thusa ho tlohela ho shebella pornography? Ka mohlala, na o ipehetse meedi ha a sebedisa sesebediswa sa hae sa elektronike, hona na o qoba maemo a ka etsang hore a shebe pornography? (Diprov. 27:​12) Na o ikemiseditse ho amohela hore o mo thuse, hona na o o bolella nnete ka mehla? Haeba ho jwalo, o ka nna wa kgona ho mo thusa.

O ka mo thusa jwang? Nahana ka mohlala ona. Felicia o ile a nyalana le Ethan ya neng a tlwaetse ho shebella pornography ho tloha ha a sa le monyenyane. Felicia o mo nolofaletsa hore a bue le yena ha a utlwa a batla ho shebella pornography. Ethan o re: “Ke bolella mosadi wa ka ntho e nngwe le e nngwe. O nthusa hore ke qobe ho ipeha tekong ya ho shebella pornography hape o mpotsa hangata hore na ke ntse ke ya jwang. Ebile o a nthusa hore ke se ke ka sebedisa Inthanete haholo.” Felicia o utlwiswa bohloko ke taba ya Ethan ya ho shebella pornography. O re: “Empa ho halefa le ho utlwa bohloko ha ho thuse Ethan ho tlohela mokgwa ona o mobe. Ha re qeta ho buisana ka mathata a hae, le nna o kgona ho nthusa hore bohloko ba ka bo kokobele.”

Ho buisana ka tsela ena ho ka thusa monna hore a tlohele ho shebella pornography, hape ho ka thusa mosadi hore a boele a mo tshepe. Ha monna a ikemiseditse ho bua ka bofokodi ba hae, hore na o hokae le hore na o ntse a etsang, mosadi o kgona ho mo tshepa hobane ha a sa mo patela letho.

Na o nahana hore o ka kgona ho thusa monna wa hao ka tsela eo? Haeba ho jwalo, mohlomong le ka bala sehlooho sena ha mmoho mme la buisana ka sona. Sepheo sa hae e tla be e le ho kgaotsa ho shebella pornography le ho etsa hore o mo tshepe. Monna wa hao o lokela ho utlwisisa hore na bothata bona bo etsa hore o ikutlwe jwang ho ena le hore a halefe hobane o batla ho bua ka bona. O lokela ho mo tshehetsa ha a etsa boiteko ba ho tlohela mokgwa ona o be o mo fe monyetla wa hore a o bontshe hore o ka mo tshepa hape. Bobedi ba lona le lokela ho ithuta hore na ke eng e etsang hore motho a batle ho shebella pornography le hore na bothata boo bo ka hlolwa jwang. d

Haeba le tshaba hore le ke ke la kgona ho buisana le kgobile matshwafo, ka nakwana le ka kopa  moholo eo bobedi ba lona le tla phutholoha ha a le teng hore a be teng ha le buisana ka bothata bona. Elellwa hore le haeba molekane wa hao a se a kgaoditse ho shebella pornography ka ho feletseng, ho ka nka nako e telele hore o boele o mo tshepe. O se ke wa tela. Sheba dintho tse nyenyane tse bontshang hore kamano ya lona e ntse e ntlafala. O se ke wa lahla tshepo ya hore ka mora nako lenyalo la lona le tla ba matla hape haeba le mamella.​—Moek. 7:8; 1 Bakor. 13:4.

Haeba monna wa hao a shebella pornography hape ka mora nako e itseng a se a sa e shebe, na see se bolela hore ha a baka le hore a ke ke a hlola a tlohela mokgwa oo? Ha se ka mehla ho leng jwalo. Haeba a se a tlwaetse ho shebella pornography, a ka nna a tlameha ho lwantsha mokgwa ona bophelo bohle ba hae. A ka nna a shebella pornography hape esita le ka mora dilemo tse ngata a tlohetse ho e sheba. E le hore seo se se ke sa etsahala, o tla lokela ho ipehela meedi e eketsehileng a be a itshware ka thata esita le ha ho se ho fetile nako ho bonahala eka o hlotse bothata boo. (Diprov. 28:​14; Mat. 5:​29; 1 Bakor. 10:​12) O tla lokela ho sebetsa ka thata ho ‘ntjhafatsa tsela eo a nahanang ka yona’ le ho ithuta ho ‘hloya dintho tse mpe’ tse akareletsang pornography le mekgwa e meng e sa hlwekang e kang ho ipholla ditho tsa botona kapa tsa botshehadi. (Baef. 4:​23; Pes. 97:​10; Bar. 12:9) Na o ikemiseditse ho etsa jwalo? Haeba ho jwalo, a ka nna a qetella a hlotse mokgwa ona ka ho feletseng. e

Empa o ka etsang haeba molekane wa hao a sa batle ho lwantsha bothata ba hae? Ke taba e utlwahalang hore hangata o ka nna wa ikutlwa o halefile, o phoqehile o bile o swetsehile. Siya dintho matsohong a Jehova e le hore o be le kgotso. (1 Pet. 5:7) Tswela pele o atamela haufi le Jehova ka hore o ithute, o rapele o be o nahanisise. Kgodiseha hore le yena o tla atamela ho wena. Esaia 57:​15 e re o dula le “ba nyahameng le ba weleng moya” mme o ba thusa ho thaba hape. Leka sohle seo o ka se kgonang hore o be Mokreste ya molemo. Kopa thuso ya baholo. Dula o ena le tshepo ya hore ho na le nako eo monna wa hao a tla fetoha.​—Bar. 2:4; 2 Pet. 3:9.