1. Ho latela Baheberu 12:​1, ke eng eo re lokelang ho e etsa e le hore re fihle qetellong ya peiso ya bophelo?

 BIBELE e tshwantsha bophelo ba Bakreste le peiso. Dimathi tse fihlang qetellong ya peiso di tla fumana bophelo bo sa feleng. (2 Tim. 4:​7, 8) Re lokela ho sebetsa ka thata hore re nne re mathe peisong ena hobane re se re le haufi le ho e qeta. Moapostola Pauluse o ile a qeta ho matha peiso ya hae ya bophelo mme o ile a bua ka dintho tse ka re thusang hore re hlole peisong. O ile a re kgothaletsa hore ‘re lahle dintho tsohle tse ka re imelang mme . . . re mathe ka mamello peisong e ka pela rona.’​—Bala Baheberu 12:1.

2. Ho ‘lahla dintho tsohle tse re imelang’ ho bolelang?

² Ha Pauluse a ne a re re lokela ho ‘lahla dintho tsohle tse ka re imelang,’ na o ne a bolela hore ha ho na dintho tseo Mokreste a lokelang ho di etsa? Tjhe empa o ne a bolela hore re lokela ho tlohela ho etsa dintho tse ka re imelang ho sa hlokahale. Dintho tsena di ka re sitisa mme tsa etsa hore re kgathale. E le hore re mamelle, re lokela ho sheba hore na ho na le dintho tseo re ikimetsang ka tsona ho sa hlokahale ebe re tlohela ho di etsa. Le ha ho le jwalo, ha re batle ho lebala dintho tseo re lokelang ho di etsa, ho seng jwalo re ke ke ra fihla qetellong ya peiso ena. (2 Tim. 2:5) Ke dintho dife tseo re lokelang ho di etsa?

3. (a) Ho latela Bagalata 6:​5, ke eng eo re lokelang ho e etsa? (b) Re tlo ithutang sehloohong see, hona hobaneng?

 ³ Bala Bagalata 6:5. Pauluse o ile a bua ka ntho eo re lokelang ho e etsa. O ile a re “e mong le e mong o tla ikarabella ka dintho tseo a di etsang.” Pauluse mona o ne a bua ka dintho tseo Modimo a di lebeletseng ho rona e leng dintho tseo batho ba bang ba ke keng ba re etsetsa tsona. Sehloohong sena re tlo ithuta hore na ke dintho dife tseo re lokelang ho iketsetsa tsona le hore na re ka di etsa jwang. Re tla boela re tsebe dintho tseo re lokelang ho kgaotsa ho di etsa le hore na re ka etsa seo jwang. Ho etsa dintho tseo Jehova a di lebeletseng ho rona le ho kgaotsa ho etsa tseo a sa lebellang hore re di etse ho tla re thusa hore re mathe peisong ena ya bophelo re be re e qete.

4. Ke hobaneng ha ho se thata ho phethahatsa tshepiso eo re e entseng ya hore re tla dula re sebeletsa Jehova? (Sheba setshwantsho.)

⁴ Tshepiso ya ho sebeletsa Jehova. Ha re ne re tshepisa hore re tla sebeletsa Jehova, re ile ra ikana ka hore re tla mo rapela re be re etse  thato ya hae. Re lokela ho phethahatsa tshepiso eo. Ho etsa seo re se tshepisitseng ke boikarabelo bo boholo empa ha se ntho e thata ho e etsa. Jehova o re bopetse hore re etse thato ya hae. (Tshen. 4:​11) Ka ha o re bopile ka setshwantsho sa hae, re batla ho mo tseba le ho mo rapela. Ka hoo, re kgona ho ba metswalle ya hae ebile re a thaba ha re etsa thato ya hae. (Pes. 40:8) Hape ha re etsa thato ya Modimo mme re latela Mora wa hae re “tla kgatholoha.”​—Mat. 11:​28-30.

5. Keng e ka o thusang hore o phethe tshepiso eo o e entseng? (1 Johanne 5:3)

⁵ O ka phetha tshepiso ya hao jwang? Ho na le dintho tse pedi tse ka o thusang. Ya pele ke hore o etse dintho tse o thusang hore o dule o rata Jehova. O ka etsa jwalo ka hore o nahanisise ka dintho tsohle tseo Jehova a o etseditseng tsona le ka ditlhohonolofatso tseo a tlo o fa tsona. Ha o ntse o tswela pele o rata Jehova, ho tla ba bonolo hore o mo mamele. (Bala 1 Johanne 5:3.) Ya bobedi ke hore o etsise Jesu. O ile a kgona ho etsa thato ya Modimo hobane o ne a kopa thuso ho Jehova ka thapelo ebile a dula a nahana ka ditlhohonolofatso tseo a tlo di fumana. (Baheb. 5:7; 12:2) Re ka etsisa Jesu ka hore re kope Jehova ka thapelo hore a re fe matla le ka ho dula re nahana ka tshepiso ya bophelo bo sa feleng. Ha o ntse o rata Modimo le ho feta le ho etsisa Mora wa hae, o tla kgona ho phethahatsa tshepiso eo o e entseng.

6. Ke hobaneng ha re lokela ho phetha boikarabelo ba rona ka lapeng? (Sheba setshwantsho.)

⁶ Boikarabelo boo re nang le bona ka lapeng. Ha re ntse re matha peisong ya bophelo, re lokela ho rata Jehova le Jesu ho feta ba malapa a rona. (Mat. 10:​37) Empa sena ha se bolele hore re ha re a lokela ho hlokomela ba malapa a rona hobane e le hore re amohelwe ke Modimo le Kreste, re tlameha ho phetha boikarabelo ba rona ka lapeng. (1 Tim. 5:​4, 8) Ha re etsa jwalo re tla thaba. Jehova o a tseba hore lelapa le tla thaba haeba monna le mosadi ba ratana ebile ba hlomphana, ha batswadi ba rata bana ba bona ebile ba ba ruta le ha bana ba mamela batswadi ba bona.​—Baef. 5:​33; 6:​1, 4.

7. O ka phetha boikarabelo ba hao jwang ka lapeng?

⁷ O ka phetha boikarabelo ba hao jwang ka lapeng? Sebedisa keletso eo Bibele e fanang ka yona ho sa tsotellehe boikarabelo boo o nang le bona ka lapeng. O se ke wa etsa dintho ho latela maikutlo a hao, ho latela seo ditsebi di se buang kapa ho ya ka tlwaelo ya sebaka seo o dulang ho sona. (Diprov. 24:​3, 4) Bala dingolwa tsa rona tse thehilweng Bibeleng. Dingolwa tsena di na le dikeletso tse tswang ka Bibeleng tse ka o thusang. Ka mohlala, websaete ya rona ya jw.org e na le dintlha tse etseditsweng ho thusa banyalani, batswadi le batjha ka mathata a bona. b Ikemisetse ho sebedisa dikeletso tse tswang Bibeleng le haeba ditho tse ding tsa lelapa di sa etse jwalo. Ha o etsa jwalo, lelapa le tla thaba ebile Jehova o tla o hlohonolofatsa.​—1 Pet. 3:​1, 2.

8. Diqeto tseo re di etsang di ka re ama jwang?

⁸ Re a ikarabella ka diqeto tseo re di etsang. Jehova o re dumella hore re iketsetse diqeto ebile o batla hore re thabe ha re etsa diqeto tse nepahetseng. Empa ha a thibele hore re se ke ra hlahelwa ke ditlamorao tsa diqeto tse mpe tseo re di entseng. (Bagal. 6:​7, 8) Ka hoo, re a ikarabella ka diqeto tse mpe tseo re di etsang, dintho tse fosahetseng tseo re di buang le dintho tse mpe tseo re di etsang. Letswalo la rona le ka nna la re tshwenya ka lebaka la ntho  e itseng eo re e entseng empa ha re tseba hore re a ikarabella ka diqeto tseo re di entseng, seo se ka etsa hore re bolele dibe tsa rona, re lokise diphoso tseo re di entseng mme re qobe ho di pheta. Ho etsa jwalo ho ka re thusa hore re dule re le peisong ya bophelo.

9. O ka etsang haeba o entse qeto e fosahetseng? (Sheba setshwantsho.)

⁹ O ka bontsha jwang hore o ikarabella ka diqeto tseo o di entseng? O ka etsang haeba o sa kgone ho fetola qeto e mpe eo o e entseng? Amohela hore o ke ke wa fetola dintho tseo o di entseng nakong e fetileng. O se ke wa ikimetsa ka ho ipeha molato le ho beha batho ba bang molato ka qeto eo o e entseng kapa wa ipehela mabaka a hore na ke hobaneng ha o e entse. Amohela diphoso tseo o di entseng mme o leke ho etsa dintho ka tsela e nepahetseng hona jwale. Haeba o ikutlwa o le molato ka ntho e mpe eo o e entseng, rapela Jehova, o dumele hore o entse phoso mme o mo kope hore a o tshwarele. (Pes. 25:​11; 51:​3, 4) Kopa tshwarelo ho batho bao o ba utlwisitseng bohloko mme haeba ho hlokahala, bua le baholo o kope hore ba o thuse. (Jak. 5:​14, 15) Ithute diphosong tseo o di entseng mme o leke hore o se ke wa di pheta. Haeba o etsa jwalo o ka kgodiseha hore Jehova o tla o hauhela a be a o thuse.​—Pes. 103:​8-13.

10. Ke hobaneng ha ho se kgotsofalle dintho tseo re kgonang ho di etsa ho ka etsa hore re imelwe? (Bagalata 6:4)

¹⁰ Ho se kgotsofalle dintho tseo o kgonang ho di etsa. Re ka nna ra ikimetsa ka ho ipapisa le batho ba bang. (Bala Bagalata 6:4.) Ha re dula re ipapisa le batho ba bang, re ka ba mona mme ra batla ho hlodisana le bona. (Bagal. 5:​26) Haeba re leka ho etsa dintho tseo batho ba bang ba di etsang le hoja re tseba hore re ke ke ra kgona ho di etsa, re tla be re ikutlwisa bohloko. Bibele e re: “Ha ntho eo motho a e lebeletseng e dieha ho phethahala, e kudisa pelo.” (Diprov. 13:​12) Ka hoo, re ka inahanela hore na re ka nyahama hakae haeba re batla ho etsa dintho tseo re ke keng ra kgona ho di etsa. Re ka kgathala mme ra fellwa ke matla a ho matha peisong ena ya bophelo.​—Diprov. 24:10.

11. Ke eng e ka o thusang hore o se ke wa batla ho etsa dintho tseo o ke keng wa kgona ho di etsa?

¹¹ O ka etsang ha o sa kgotsofalle dintho tseo o kgonang ho di etsa? O se ke wa batla ho etsa dintho tse fetang tseo Jehova a lebeletseng hore o di etse. Jehova ha a lebella hore o mo etsetse dintho tseo o ke keng wa kgona ho di etsa. (2 Bakor. 8:​12) Ha a bapise dintho tseo o mo etsetsang tsona le tseo batho ba bang ba di etsang. (Mat. 25:​20-23) O ananela tsela eo o mo sebeletsang ka yona ka pelo yohle, o tshepahalang ka yona le eo o mameletseng ka yona. Ka hoo, o lokela ho ikokobetsa ka hore o amohele hore o ka nna wa se ke wa kgona ho etsa dintho tsohle tseo o batlang ho di etsa hona jwale hobane o se o hodile, o kula kapa ka lebaka la maemo a mang. Etsisa Barzilai ka hore o se ke wa amohela mesebetsi e itseng ka phuthehong haeba o ke ke wa kgona ho e etsa ka lebaka la ho hola kapa ho kula. (2 Sam. 19:​35, 36) Etsisa Moshe ka hore o dumelle batho ba bang hore ba o thuse ka mesebetsi e meng haeba ho hlokahala. (Ex. 18:​21, 22) Ha o ikokobeditse, o ke ke wa batla ho etsa dintho tseo o ke keng wa kgona ho di etsa tse ka etsang hore o kgathale ha o ntse o matha peisong ena ya bophelo.

12. Ke hobaneng ha re sa ikarabelle ka diqeto tse fosahetseng tseo batho ba bang ba di etsang?

¹² Ho ikutlwa o le molato ka lebaka la diqeto tse fosahetseng tseo batho ba bang ba di etsang. Re ke ke ra etsetsa batho ba bang diqeto kapa ho ba sireletsa hore ba se ke ba hlahelwa ke ditlamorao tsa diqeto tse fosahetseng  tseo ba di entseng. Ka mohlala, ngwana a ka etsa qeto ya hore a tlohele ho sebeletsa Jehova. Qeto eo e ka utlwisa batswadi ba hae bohloko haholo. Le ha ho le jwalo, batswadi ha ba a lokela ho ikutlwa ba le molato ka lebaka la qeto e fosahetseng eo ngwana wa bona a e entseng hobane ha ba etsa jwalo ba tla be ba itjarisa mojaro o boima oo Jehova a sa lebellang hore ba o jare.​—Bar. 14:12.

13. Motswadi a ka etsang haeba ngwana wa hae a entse qeto e fosahetseng?

¹³ O ka etsang e le hore o se ke wa ikutlwa o le molato ka lebaka la diqeto tsa ba bang? Jehova ha a re qobelle ho mo sebeletsa. O dumeletse batho bohle hore ba iketsetse diqeto. Taba ena e akareletsa le hore na o tla mo sebeletsa kapa tjhe. Jehova o a tseba hore batswadi ha ba a phethahala. O batla hore o mo sebeletse ka matla ao o nang le ona. Ngwana wa hao ke yena ya ikarabellang ka diqeto tseo a di etsang eseng wena. (Diprov. 20:​11) Ho ntse ho le jwalo, o ka nna wa tshwenyeha ka diphoso tseo o ileng wa di etsa. Haeba ho le jwalo, bolella Jehova hore na o ikutlwa jwang mme o kope hore a o tshwarele. O a tseba hore o ke ke wa kgona ho fetola dintho tseo o di entseng nakong e fetileng. Le ha ho le jwalo, ha a lebella hore o sireletse ngwana wa hao e le hore a se ke a fumana ditlamorao tsa dintho tseo a di entseng. Hopola hore haeba ngwana wa hao a kgutlela ho Jehova, Jehova o tla mo amohela.​—Luka 15:​18-20.

14. Ke hobaneng ha re sa lokela ho dula re ikutlwa re le molato?

¹⁴ Ha o dula o ikutlwa o le molato. Ho a utlwahala hore re ikutlwe re le molato ha re entse sebe. Le ha ho le jwalo, Jehova ha a batle hore re dule re ikutlwa re le molato. Re lokela ho lahla boima bona. Re ka tseba jwang haeba re ena le bothata ba ho ikutlwa re le molato? Haeba re ile ra bolela sebe sa rona, ra baka yaba re leka ka ditsela tsohle ho qoba ho pheta sebe seo, re ka tshepa hore Jehova o re tshwaretse. (Dik. 3:​19) Ka mora hore re etse dintho tsena, Jehova ha a batle hore re ikutlwe re le molato. O a tseba hore ho dula re ikutlwa re le molato  ho ka re utlwisa bohloko. (Pes. 31:​10) Ha re dula re utlwile bohloko, re ka nna ra tlohela ho matha peisong ya bophelo.​—2 Bakor. 2:7.

15. O ka thuswa keng ha o ikutlwa o le molato? (1 Johanne 3:​19, 20) (Sheba setshwantsho.)

¹⁵ O ka etsang haeba o dula o ikutlwa o le molato? Ha o ikutlwa o le molato, hopola hore Modimo “o tshwarela e le ka nnete.” (Pes. 130:4) Ha Jehova a tshwarela batho ba baketseng dibe tsa bona, o tshepisa hore ‘ha a sa tla hlola a hopola dibe tsa bona.’ (Jer. 31:​34) Ka mantswe a mang Jehova a ke ke a nahana ka dibe tsa hao hobane o o tshwaretse. Ka hoo, o se ke wa nahana hore ha o hlahelwa ke mathata ka lebaka la dibe tseo o di entseng, Jehova ha a o tshwarela. Ha o a lokela ho ikutlwisa bohloko ka lebaka la diphoso tseo o ileng wa di etsa hobane o se o sa kgone ho mo sebeletsa jwalo ka pele. Jehova ha a dule a nahana ka dibe tseo o di entseng, le wena ha o a lokela hore o dule o nahana ka tsona.​—Bala 1 Johanne 3:​19, 20.

16. Ke dintho dife tseo re lokelang ho di hopola ha re ntse re matha peisong ya bophelo?

¹⁶ Ha re matha peisong ena ya bophelo, re lokela hore re ‘mathe ka tsela e tla etsa hore re hlole.’ (1 Bakor. 9:​24) Re ka etsa sena ka hore re tsebe phapang pakeng tsa dintho tseo re lokelang ho di etsa le tseo re sa lokelang ho di etsa. Sehloohong sena re buile ka dintho tseo re lokelang ho di etsa le tseo re sa lokelang hore re di etse. Empa ho ntse ho ena le dintho tse ding. Jesu o ile a re re ka “imelwa ke ho ja ho tlola, ho nwa haholo le mathata a bophelo.” (Luka 21:​34) Mangolo ana le a mang a ka o thusa hore o tsebe hore ke hokae moo o lokelang ho ntlafatsa teng ha o ntse o matha peisong ena ya bophelo.

17. Re ka kgodiseha kang ha re ntse re matha peisong ya bophelo?

¹⁷ Re ka kgodiseha hore re tla hlola peisong ena ya bophelo hobane Jehova o tla re fa matla ao re a hlokang. (Esa. 40:​29-31) O se ke wa nyahama ha o ntse o matha peisong ena. Etsisa moapostola Pauluse ya ileng a sebetsa ka thata hore a fumane moputso oo a neng a o tshepisitswe. (Bafil. 3:​13, 14) Ha ho na motho ya ka o mathelang peiso ena empa Jehova o tla o thusa hore o atlehe. Jehova a ka o thusa hore o etse dintho tseo o lokelang ho di etsa le hore o se ke wa etsa dintho tse sa hlokahaleng. (Pes. 68:​19) Jehova o tla o thusa hore o mamelle ha o ntse o matha peisong ena le hore o hlole.