1, 2. (a) Jehova o ikutlwa jwang ka batho ba etsang dibe ka boomo ba bile ba sa bake? (b) Jehova o lakatsa hore baetsadibe ba etse eng?

 JEHOVA a ke ke a re tlohela feela ha re etsa dintho tse fosahetseng. O hloile sebe. (Pes. 5:​4-6) Ka hoo, o lebeletse hore re mamele melao ya hae e ka Bibeleng. Empa ha se hore o lebeletse hore re be batho ba phethahetseng. (Pes. 130:​3, 4) Ka nako e tshwanang, ‘batho ba sa mo rateng, ba fetolang mosa wa hae lebaka la ho ikemela ka boitshwaro ba bona bo bobe boo ba bo etsang ba sa swabe,’ bona o tla ba nkela bohato. (Juda 4) Ha se feela Bibele e reng “ho tla timetswa batho ba sa rateng Modimo” ntweng ya Armagedone.—2 Pet. 3:7; Tshen. 16:16.

² Le ha ho le jwalo, Jehova ha a lakatse hore mang kapa mang a timetswe. Ha re ntse re theoha ka dihlooho tse hlahang makasineng ena, re ithutile hore Jehova “o lakatsa hore bohle ba bake.” (2 Pet. 3:9) Baholo ba leka ho etsisa Jehova ka hore ka mamello ba thuse baetsadibe hore ba fetole ditsela tsa bona mme ba kgutlele ho Jehova. Le ha ho le jwalo, baetsadibe ba bang ba ka nna ba se ke ba baka. (Esa. 6:9) Ho sa tsotellehe hore na baholo ba leka ka matla hakae ho ba thusa, ba bang ba ka nna ba tswela pele ba ntse ba etsa dintho tse fosahetseng. Boemong boo, baholo ba lokela ho etsang?

 “TLOSANG MOETSADIBE”

 3. (a) Bibele e re baholo ba lokela ho etsa eng ha moetsadibe a sa bake? (b) Ke hobaneng ha re ka re moetsadibe ya sa batleng ho baka o ikgethetse ho tloswa ka phuthehong?

³ Ha moetsadibe a sa bake, baholo ba lokela ho latela keletso e fumanwang ho 1 Bakorinthe 5:13 e reng: “Tlosang moetsadibe eo hara lona.” Moetsadibe o a tseba hore haeba a sa bake o tla tloswa ka phuthehong. Ka hoo, ho tshwana le ha a ikgethetse hore a tloswe ka phuthehong. Ka tsela eo o kotula seo a se jetseng. (Bagal. 6:7) Ke hobaneng ha re tjho jwalo? Hobane o hanne ho amohela thuso le hoja baholo ba lekile ka makgetlo ho mo thusa hore a bake. (2 Mar. 17:​12-15) Diketso tsa hae di bontshitse ka ho hlaka hore ha a sa batla ho mamela Jehova.—Deut. 30:​19, 20.

 4. Ke hobaneng ha ho etswa tsebiso ha moetsadibe ya sa bakeng a tloswa ka phuthehong?

⁴ Haeba moetsadibe ya sa bakeng a tloswa ka phuthehong, ho etswa tsebiso ya hore ha e sa le e mong wa Dipaki Tsa Jehova. a Tsebiso ena ha e etswe ka morero wa ho mo hlabisa dihlong. Ho ena le hoo, e etswa ka sepheo sa hore phutheho e mamele taelo ya Mangolo e reng ‘re kgaotse ho itswakanya’ le motho eo, ‘le ho ja re se ke ra ja’ le yena. (1 Bakor. 5:​9-11) Tataiso ena e fanwa ka lebaka le utlwahalang. Moapostola Pauluse o ile a re: “Tomoso e nyenyane e bedisa hlama kaofela.” (1 Bakor. 5:6) Sena se bolela hore baetsadibe ba sa bakeng ba ka thefula boikemisetso ba batho ba lekang ho phela ka melao ya Jehova e lokileng.—Diprov. 13:20; 1 Bakor. 15:33.

 5. Re lokela ho ikutlwa jwang ka motho ya tlositsweng ka phuthehong, hona hobaneng?

⁵ Re lokela ho ikutlwa jwang ka motho ya tlositsweng ka phuthehong? Le hoja re ke ke ra itswakanya le yena, re lokela ho hopola hore o tshwana le nku e lahlehileng, eseng hore ha ho sa na tshepo ka yena. Nku e lahlehileng, e ntse e ka kgona ho kgutlela mohlapeng. Re se ke ra lebala hore motho eo ya lahlehileng o ile a inehela ho Jehova. Empa ka maswabi, hona jwale ha a sa phelela boinehelo ba hae, e leng se mo behang kotsing. (Ezek. 18:31) Le ha ho le jwalo, re na le tshepo ya hore ha feela Jehova a sa ntse a fane ka monyetla wa hore batho ba bake, motho eo le yena a ka fetola ditsela tsa hae mme a baka. Jwale baholo ba ka thusa motho ya tlositsweng ka phuthehong jwang?

BAHOLO BA KA THUSA MOTHO YA TLOSITSWENG KA PHUTHEHONG JWANG?

 6. Ke dintho dife tseo baholo ba lokelang ho di etsa e le hore ba thuse motho ya tlositsweng ka phuthehong?

⁶ Na motho ya tlositsweng ka phuthehong o se a lahlilwe kgerehlwa, ke hore o se a tla ipona hore na o kgutlela jwang ho Jehova? Le letho. Ha komiti ya baholo e tsebisa motho eo hore o a tloswa ka phuthehong, e tla mo hlalosetsa hore na o lokela ho nka mehato efe e le hore phutheho e boele e mo amohele. Empa ba ke ke ba fella moo. Maemong a mangata, ba tla mo tsebisa hore ba ka thabela ho kopana le yena hape ka mora dikgwedi tse seng kae ho bona hore na o bakile ebile o tlohetse ditsela tsa hae. Haeba ka mora dikgwedi tseo tse mmalwa a dumela ho kopana le baholo hape, ba tla mo kgothaletsa hore a bake mme a kgutlele ka phuthehong. Le haeba ka nako eo a eso ka a baka, baholo ba tla ikitlaelletsa ho kopana le yena hape nakong e tlang e le ho mo kgothaletsa hore a bake.

 7. Baholo ba bontsha jwang hore ba na le kutlwelobohloko e tshwanang le ya Jehova ha ba sebetsana le motho ya tlositsweng ka phuthehong? (Jeremia 3:12)

⁷ Baholo ba bontsha kutlwelobohloko e  tshwanang le ya Jehova ha ba sebedisana le motho ya tlositsweng ka phuthehong. Ka mohlala, nakong e fetileng Jehova ha a ka a emela batho ba hae hore e be bona ba tlang ho yena ho lokisa ditaba. Ho ena le hoo, e ile ya eba yena ya nkang bohato ba pele ba ho ba thusa le pele bona ba ka bontsha matshwao a ho baka. Sehlooho sa bobedi sa makasine ena se ile sa hlalosa hore Jehova o ile a bolella moprofeta Hosea hore a tshwarele mosadi wa hae le hore a dule le yena hape, le hoja mosadi eo a ne a ntse a etsa sebe se tebileng. Ka tsela eo, Jehova o ne a bontsha batho ba hae ka moo a nang le kutlwelobohloko ka teng. (Hos. 3:1; Mal. 3:7) Ka ha baholo ba etsisa Jehova, ba thabela ho bona ha motho ya entseng sebe se tebileng a baka a bile a kgutlela ka phuthehong mme ba mo thusa ka tsela e ke keng ya mo thatafalletsa hore a kgutle.—Bala Jeremia 3:12.

 8. Papiso ya Jesu ya mora ya lahlehileng, e re thusa jwang ho utlwisisa hore Jehova o na le kutlwelobohloko ebile o mohau? (Luka 15:7)

⁸ Hopola papiso eo Jesu a ileng a e etsa ya mora ya lahlehileng, eo ho builweng ka yona sehloohong sa bobedi sa makasine ena. Eitse ha ntate wa hae a mo bona a kgutlela hae, o ile “a matha a ya ho yena a mo haka yaba o a mo suna.” (Luka 15:20) Hlokomela hore ntate ha a ka a emela hore mora wa hae a kope tshwarelo. Ho ena le hoo, ke yena ya ileng a mathela ho mora wa hae hobane a mo rata. Ena ke tsela eo Jehova a ikutlwang ka yona ka batho ba mo lahlileng mme baholo ba etsa sohle seo ba ka se kgonang ho etsisa Jehova. Ba batla hore nku e lahlehileng e “kgutlele hae.” (Luka 15:​22-24, 32) Ha moetsadibe a baka, Jehova, Jesu, mangeloi le phutheho kaofela ba a thaba.—Bala Luka 15:7.

 9. Jehova o kgothaletsa baetsadibe hore ba etse eng?

⁹ Ho fihlela hakana, re se re ithutile hore Jehova ha a dumelle baetsadibe ba sa bakeng hore ba dule ka phuthehong. Le ha ho le jwalo, seo ha se bolele hore o ba qhalla matsoho. O batla hore ba kgutlele ho yena. Tsela eo Jehova a ikutlwang ka yona ka baetsadibe ba bakileng e hlalositswe ho Hosea 14:​4, e reng: “Ke tla ba fodisa mme ba tla tshepahala. Ke tla ba rata ka pelo yohle hobane ha ke sa ba halefetse.” Maikutlo ana a Jehova a susumelletsa baholo ho potlakela ho thusa motho ya bontshang matshwao a ho baka, le ha e ka ba ke a manyenyane feela. A boetse a thusa le ba tlohetseng Jehova hore ba kgutle kapele.

10, 11. Baholo ba ka leka ho thusa motho eo e leng kgale a tlositswe ka phuthehong jwang?

¹⁰ Ho thweng ka batho ba nang le dilemo tse ngata ba tlositswe ka phuthehong? Ho ka etsahala hore e se e le nako e telele ba kgaoditse ho etsa sebe seo ba ileng ba tloswa ka lebaka la sona. Maemong a mang, e ka nna yaba ha ba sa tseba le hore na ba tlositswe ka mabaka afe. Ho sa tsotellehe hore na boemo ke bofe, baholo ba tla leka ho ba fumana le ho ba etela. Ha baholo ba etetse motho ya tlositsweng, ba tla kopa ho rapela le yena le ho mo kopa ka lerato hore a kgutlele ka phuthehong. Ho hlakile hore haeba motho a qetile dilemo tse ngata haholo a tlositswe ka phuthehong, o fokola haholo tumelong. Ka hoo, haeba a batla ho kgutlela ka phuthehong, baholo ba tla hlophisa hore motho e mong a mo kgannele thuto ya Bibele, esita le pele a ka kgutlisetswa ka phuthehong. Baholo ke bona ba lokelang ho etsa ditlhophiso tseo tsa thuto ya Bibele.

¹¹ Baholo ba leka ho etsisa tsela eo Jehova a utlwelang batho bohloko ka yona, ka hoo bara bana ba bo rona ba tla batla batho bohle ba tlohetseng Jehova mme ba ba kgothaletse ho kgutlela ho yena. Hang ha motho ya entseng sebe se tebileng a bontsha hore o bakile ebile  o fetotse le boitshwaro ba hae, a ka kgutlisetswa ka phuthehong ntle ho tshenyo ya nako.—2 Bakor. 2:​6-8.

12. (a) Ke maemong afe ao ho ona baholo ba lokelang ho ba hlokolosi haholo? (b) Ke hobaneng ha re sa lokela ho nahana hore ho hang Jehova a ke ke a hauhela batho ba entseng dibe tsa mofuta o itseng? (Sheba naletsana.)

¹² Maemong a mang, baholo ba lokela ho ba hlokolosi pele ba kgutlisetsa motho ka phuthehong. Ka mohlala, haeba motho a le molato wa ho hlekefetsa bana ka thobalano, e le mokwenehi kapa a entse morero o bolotsana wa ho qhala lenyalo, baholo ba lokela ho kgodiseha hore motho eo o bakile e le ka nnete. (Mal. 2:14; 2 Tim. 3:6) Ba lokela ho sireletsa mohlape. Ka nako e tshwanang, re lokela ho hlokomela hore Jehova o tla amohela motho le ha e le ofe ya bakileng e le ka nnete mme a  fetotse boitshwaro ba hae. Le hoja baholo ba le hlokolosi ha ba sebetsana le motho ya sebeditseng ba bang ka bolotsana, ha ba a lokela ho ya boholeng ba hore ba re motho ya entseng dibe tsa mofuta o itseng, ho hang Jehova a ke ke a mo hauhela. b—1 Pet. 2:10.

SEO PHUTHEHO E KA SE ETSANG

13. Phapang ke efe pakeng tsa tsela eo re tshwarang motho ya kgalemetsweng ke baholo le tsela eo re tshwarang motho ya tlositsweng ka phuthehong?

¹³ Jwalo ka ha re ithutile sehloohong se fetileng, ka dinako tse ding ho ka etswa tsebiso ya hore motho ya itseng o kgalemetswe. Boemong bona, re ka tswela pele ho sebedisana le yena hobane o bakile ebile o fetotse boitshwaro ba hae. (1 Tim. 5:20) E sa ntse e le karolo ya phutheho mme o ntse a hloka dikgothatso tse tswang ho badumedimmoho le yena. (Baheb. 10:​24, 25) Empa boemo bo fapane ho motho ya tlositsweng ka phuthehong. Re ‘kgaotsa ho itswakanya’ le motho ya jwalo, esita ‘le ho ja ha re je’ le yena.—1 Bakor. 5:11.

14. Mokreste a ka sebedisa letswalo la hae le kwetlisitsweng ka Bibele jwang ha a sebedisana le motho ya tlositsweng ka phuthehong? (Sheba setshwantsho.)

¹⁴ Na dintlha tseo re buileng ka tsona di bolela hore re lokela ho qoba ka ho feletseng motho ya tlositsweng ka phuthehong? Ha ho jwalo. Ke nnete hore re ke ke ra itswakanya le yena. Empa Bakreste ba tla sebedisa matswalo a bona a kwetlisitsweng ka Bibele ha ba kgetha hore na ba tla mo memela dibokeng. E ka nna yaba ke motho eo ba amanang le yena kapa eo e neng e le motswalle wa bona nakong e fetileng. Haeba motho eo a tla dibokeng re lokela ho mo tshwara jwang? Ke nnete hore nakong e fetileng, motho ya jwalo re ne re ke ke ra mo dumedisa empa hona jwale ba bang ba ka kgetha ho mo dumedisa le ho mo amohela dibokeng. Le ha ho le jwalo, Mokreste e mong le e mong o lokela ho sebedisa letswalo la hae le kwetlisitsweng ka Bibele. Empa ha re a lokela ho qoqa le yena nako e telele kapa ra qeta nako re etsa dintho tse ding le yena.

15. Ke baetsadibe ba mofuta ofe ba hlaloswang ho 2 Johanne 9-11? (Sheba lebokose le reng “ Na Johanne le Pauluse ba ne ba Bua ka Sebe sa Mofuta o Tshwanang?”)

¹⁵ Batho ba bang ba ka nna ba ipotsa, ‘Na Bibele ha e re Mokreste ya dumedisang motho  ya jwalo o tshehetsa mesebetsi ya hae e mebe?’ (Bala 2 Johanne 9-11.) Dintlha tse potolohileng lengolo lena di bontsha ka ho hlaka hore tataiso ena e bua ka bakwenehi le batho ba tswelang pele ho kgothaletsa ba bang ho etsa dintho tseo Bibele e reng di fosahetse. (Tshen. 2:20) Haeba motho a kgothaletsa dithuto tsa bokwenehi kapa a kgothaletsa ba bang ho etsa dintho tse mpe, baholo ba ke ke ba etsa ditlhophiso tsa hore a etelwe. Le ha ho le jwalo, ho ntse ho ena le monyetla wa hore motho ya jwalo a ka baka. Empa ha feela seo se eso ka se etsahala, re ke ke ra dumedisa kapa ra memela motho ya jwalo dibokeng.

EBA LE KUTLWELOBOHLOKO LE MOHAU JWALO KA JEHOVA

16, 17. (a) Jehova o batla hore baetsadibe ba etse eng? (Ezekiele 18:32) (b) Baholo ba ka bontsha jwang hore ke basebetsimmoho le Jehova ha ba leka ho thusa batho ba entseng dibe?

¹⁶ Re ithutileng dihloohong tse hlano tsa makasine ee? Jehova ha a batle hore motho le ha e le ofe a fediswe. (Bala Ezekiele 18:32.) O batla hore baetsadibe ba boelane le yena. (2 Bakor. 5:20) Ke ka lebaka leo esale Jehova a kgothaletsa batho ba hae ba neng ba mo lahlile hore ba bake mme ba kgutlele ho yena. Baholo ba na le tokelo ya ho ba basebetsimmoho le Jehova ka hore ba etse sohle se matleng a bona ho thusa batho ba entseng dibe hore ba bake.—Bar. 2:4; 1 Bakor. 3:9.

¹⁷ Nahana ka thabo e bang teng lehodimong ha moetsadibe a baka. Ntate wa rona ya lehodimong Jehova, le yena o a thaba ka mehla ha nku e neng e lahlehile e kgutlela ka phuthehong. Re rata Jehova le ho feta ha re nahanisisa ka kutlwelobohloko, mohau le mosa wa hae.—Luka 1:78.