1. Jehova o batlela batho bohle eng?

 JEHOVA o re bopile re ena le bolokolohi ba ho iketsetsa diqeto. Re etsa diqeto letsatsi le letsatsi. Qeto ya bohlokwa ka ho fetisisa eo motho a ka e etsang ke ho inehela ho Jehova mme e be karolo ya lelapa la hae. Jehova o batla hore re mo rapele re ena le Bakrestemmoho. Hobaneng? Hobane o rata batho ebile o ba batlela se molemo. O batla hore ba thabele ho ba metswalle ya hae le hore ba phele ka ho sa feleng.—Deut. 30:​19, 20; Bagal. 6:​7, 8.

2. Jehova o ikutlwa jwang ka motho ya entseng sebe se tebileng mme a eso bake? (1 Johanne 2:1)

² Jehova ha a qobelle mang kapa mang hore a mo sebeletse. O dumella motho e mong le e mong ho etsa qeto ya hore na o batla ho etsang. Empa ho tla etsahalang haeba Mokreste ya kolobeditsweng a tlola molao wa Modimo mme a etsa sebe se tebileng? Haeba a sa bake, o lokela ho tloswa ka hara phutheho. (1 Bakor. 5:13) Le ha ho le jwalo, Jehova o batla hore motho eo a bake mme a kgutlele ho yena. Ha e le hantle, lebaka le ka sehloohong le entseng hore Jehova a fane ka Mora wa hae e le tefo ya topollo ke hore o batla ho tshwarela baetsadibe ba bakileng. (Bala 1 Johanne 2:1.) Jehova ke Modimo ya lerato haholo  mme o kopa bohle ba entseng dibe tse tebileng hore ba bake.—Zak. 1:3; Bar. 2:4; Jak. 4:8.

3. Re tlo ithutang sehloohong see?

³ Jehova o batla hore re be le maikutlo a tshwanang le a hae ka sebe le ka batho ba etsang dibe tse tebileng. Sehlooho sena se tlo re thusa ho bona hore na re ka mo etsisa jwang. Sehloohong sena re tlo ithuta hore na (1) Pauluse o ile a bolella phutheho ya Korinthe hore na e etseng ha morabo rona a entse sebe se tebileng, (2) hore na e etseng ka mora hore a bake le (3) hore na Jehova o ikutlwa jwang ka Bakreste ba etsang dibe tse tebileng.

PHUTHEHO YA KORINTHE E ILE YA ETSANG HA MOTHO A ENTSE SEBE SE TEBILENG?

4. Ho ile ha hlaha bothata bofe phuthehong ya Korinthe? (1 Bakorinthe 5:​1, 2)

⁴ Bala 1 Bakorinthe 5:​1, 2. Ha Pauluse a le leetong la hae la boraro la borumuwa, o ile a utlwa ditaba tse hlohlontshang ditsebe tse neng di etsahala phuthehong e sa tswa thehwa ya Korinthe. Morabo rona e mong phuthehong eo o ne a etsa boitshwaro bo bobe bo amanang le thobalano le mosadi wa ntate wa hae. Le batho bao e seng badumedi ba ne ba sa etse boitshwaro bo bobe jwalo! Ho makatsang le ho feta ke hore phutheho e ne e nka hore ho ne ho se na bothata ha morabo rona ya etsang boitshwaro bo jwalo a sa tloswe ka phuthehong. Mohlomong ba bang ka phuthehong ba ne ba nahana hore ba bontsha motho eo mosa jwalo ka Jehova. Empa Jehova ha a amohele boitshwaro bo jwalo. Ha e le hantle, monna eo o ne a senya botumo bo botle ba phutheho. Hape e ka nna yaba Bakreste ba bang ba neng ba mo tlwaetse ba ne ba se ba ntse ba mo etsisa. Ka hoo, Pauluse o ile a re phutheho e etseng ka mora moo?

5. Pauluse o ile a bolella phutheho hore e etseng ha moetsadibe a sa bake, hona seo se ne se bolelang? (1 Bakorinthe 5:13) (Sheba setshwantsho.)

⁵ Bala 1 Bakorinthe 5:13. Jehova o ile a susumeletsa Pauluse hore a ngolle phutheho lengolo le neng le hlalosa hore moetsadibe ya sa bakeng a tloswe ka phuthehong. Bakreste ba tshepahalang ba ne ba lokela ho tshwara motho ya jwalo jwang? Pauluse o ile a ba bolella a re: “Le kgaotse ho itswakanya” le motho eo. Seo se ne se bolelang? Pauluse o ile a hlalosa hore taelo eo e ne e akareletsa le hore ‘ba se ke ba ja le motho ya jwalo.’ (1 Bakor. 5:11) Ha batho ba le dijong, ba qeta nako mmoho ba ntse ba qoqa mme ba ka qetella e se e le metswalle. Ka hoo, ho hlakile hore Pauluse o ne a bolella phutheho hore ha e a lokela ho  qeta nako le monna eo. Ho etsa jwalo ho ne ho tla sireletsa phutheho hore e se ke ya susumetswa ke mekgwa e mebe ya monna eo. (1 Bakor. 5:​5-7) Ho ekeletsa moo, ho qoba ho qeta nako le yena ho ne ho ka mo thusa ho hlokomela hore o utlwisitse Jehova bohloko ebe o a baka.

6. Phutheho e ile ya etsang ka mora hore e fumane lengolo le tswang ho Pauluse, hona motho ya entseng sebe o ile a etsang?

⁶ Ka mora hore Pauluse a ngolle Bakreste ba Korinthe lengolo, o ile a qala ho ipotsa hore na ebe phutheho e tla amohela lengolo la hae kapa tjhe. Ka mora nako e itseng, Tite o ile a tlisetsa Pauluse ditaba tse monate. Phutheho e ile ya latela tataiso ya Pauluse mme ya tlosa moetsadibe eo ka phuthehong. (2 Bakor. 7:​6, 7) Ho thabisang le ho feta ke hore ka mora hore phutheho e sebedise keletso e hlahang lengolong leo, monna eo o ile a baka. O ile a fetola boitshwaro ba hae mme a qala ho phela ka melao ya Jehova e lokileng. (2 Bakor. 7:​8-11)  Pauluse o ile a re phutheho e tshware monna eo ya bakileng jwang?

PHUTHEHO E NE E LOKELA HO TSHWARA MOTHO YA BAKILENG JWANG?

7. Ho tloswa ha monna ya entseng sebe ka phuthehong ho ile ha mo thusa jwang? (2 Bakorinthe 2:​5-8)

⁷ Bala 2 Bakorinthe 2:​5-8. Pauluse o ile a re: “Le mo kgalemetse ho lekane.” Ka mantswe a mang, ka mora hore monna eo a tloswe ka phuthehong, o ile a hlokomela hore o lokela ho baka mme ka ha o ile a baka, ho ne ho se ho sa hlokahale hore a nne a kgalemelwe.—Baheb. 12:11.

8. Pauluse o ile a re baholo ba etseng?

⁸ Ka ha monna eo o ne a se a bakile, Pauluse o ile a bolella baholo ba phutheho hore ba kgutlisetse monna eo ka phuthehong. O ile a boela a ba bolella hore ‘ba mo tshwarele ho tswa pelong ba be ba mo tshedise . . . ba mo kgodise hore ba a mo rata.’ Pauluse o ne a batla hore ba kgodise monna eo ya bakileng hore ka nnete ba mo tshwaretse ebile ba a mo rata, ka mantswe le ka diketso. Morabo rona eo o ne a tla bona hore ba thabetse hore ebe o kgutletse ka phuthehong.

9. Ke hobaneng ha ho ne ho ka ba thata hore batho ba bang ka phuthehong ba amohele motho ya bakileng?

⁹ Ke nnete hore tlaleho ena ha e a bua ka hore na Bakreste ba ile ba ikutlwa jwang empa ho ka etsahala hore ba bang ba ne ba sa thabele hore ebe monna eo o kgutletse ka phuthehong. Hobaneng ha re tjho jwalo? Ho ka etsahala hore o ne a utlwisitse batho ba bangata bohloko ebile a ba swabisitse. Ka ha ba bang ba ne ba sebeditse ka thata ho dula ba tshepahalla Jehova, mohlomong ba ne ba utlwa eka ha se ntho e utlwahalang hore monna eo a amohelwe ka mofuthu e le morabo rona hape ka mora hore a etse sebe seo se tebileng. (Bapisa le Luka 15:​28-30.) Empa ke hobaneng ha ho ne ho le bohlokwa hore phutheho e bontshe morabo rona ya bakileng lerato?

10, 11. Ho ne ho ka etsahalang haeba baholo ba ne ba ka hana ho tshwarela motho ya bakileng?

¹⁰ Nahana hore na ho ne ho ka etsahalang ka morabo rona ya bakileng haeba baholo ba ne ba ka hana ho mo dumella hore a kgutlele ka phuthehong kapa ka mora hore a kgutlisetswe ka phuthehong ebe phutheho ha e mo bontshe lerato. O ne a ka “utlwa bohloko haholo ebe o a nyahama.” O ne a ka utlwa eka a ke ke a hlola a tshwaneleha ho sebeletsa Jehova. Hape o ne a ka nahana hore Jehova a ke ke a mo tshwarela le hore ha ho sa na lebaka la hore a lokise kamano ya hae le Modimo.

¹¹ Ho hobe le ho feta ke hore haeba batho ba bang ka phuthehong ba ne ba sa tshwarele monna eo ya bakileng, ba ne ba ka beha setswalle sa bona le Jehova kotsing. Hobaneng? Hobane ba ne ba tla be ba le kgopo ebile ba se na mohau jwalo ka Satane ho ena le hore ba etsise Jehova ka ho tshwarela batho ba bakileng. Ha e le hantle, ba ne ba tla be ba dumella Satane hore a ba sebedise ho sitisa motho eo hore a sebeletse Jehova.—2 Bakor. 2:​10, 11; Baef. 4:27.

12. Ke jwang phutheho ya Korinthe e neng e ka etsisa Jehova?

¹² Ke jwang phutheho ya Korinthe e neng e ka etsisa Jehova eseng Satane? Ka hore ba latele mohlala wa Jehova wa ho tshwarela moetsadibe ya bakileng. Hlokomela hore na bangodi ba bang ba Bibele ba itseng ka Jehova. Davida o ile a re: “Jehova, o molemo ebile o ikemiseditse ho tshwarela.” (Pes. 86:5) Mikea yena o ile a re: “Na o teng Modimo ya tshwanang le wena, ya tshwarelang diphoso le ya lebalang melato?” (Mik. 7:18) Esaia yena o ile a re: “Motho ya kgopo a tlohele tsela ya hae, a tlohele ho nahana bokgopo. A ke a kgutlele ho Jehova, ya tla mo hauhela, a kgutlele ho  Modimo wa rona hobane o tla mo tshwarela ka pelo yohle.”—Esa. 55:7.

13. Ke hobaneng ha ho ne ho loketse hore baholo ba kgutlisetse monna eo ya bakileng ka phuthehong? (Sheba lebokose le reng  “Monna wa Korinthe o Ile a Kgutlisetswa ka Phuthehong ka Mora Nako e Kae?”)

¹³ E le hore Bakreste ba phutheho ya Korinthe ba etsise Jehova, ba ne ba lokela ho amohela monna eo ya bakileng ka thabo ba be ba mo kgodise hore ba a mo rata. Pauluse o ile a re haeba ba ne ba ka amohela monna eo ya bakileng, ba ne ba tla be ba bontsha hore ke “batho ba mamelang.” (2 Bakor. 2:9) Ke nnete hore ho ne ho se ho fetile dikgwedi tse mmalwa feela monna eo a tlositswe ka phuthehong empa kgalemelo eo e ile ya mo thusa hore a bake. Ka hoo, ho ne ho sa hlokahale hore baholo ba diehe ho mo kgutlisetsa ka phuthehong.

BONTSHA HORE O NA LE TOKA LE MOHAU JWALO KA JEHOVA

14, 15. Re ithutang tlalehong ya se ileng sa etsahala phuthehong ya Korinthe? (2 Petrose 3:9) (Sheba setshwantsho.)

¹⁴ Tlaleho ena e ka Bibeleng e bontshang ka moo moetsadibe a neng a tshwarwa ka teng phuthehong ya Korinthe, e ngoletswe “ho re ruta.” (Bar. 15:4) Re ithuta hore Jehova ha a dumelle moetsadibe ya sa bakeng hore a dule a le ka phuthehong. Ba bang ba ne ba ka nahana hore ka ha Jehova o “mohau,” o ne a ka dumella motho eo ya sa bakeng hore a dule a le ka phuthehong. Empa eo ha se tsela eo Jehova a  bontshang mohau ka yona. Le hoja Jehova e le Modimo ya mohau, a ke ke a re tlohela feela ha re etsa dintho tse fosahetseng ebile ha a nyehlise melao ya hae ya se lokileng le se fosahetseng. (Juda 4) Haeba Jehova a ne a ka dumella moetsadibe ya sa bakeng hore a dule a le ka phuthehong, o ne a tla be a sa bontshe mohau hobane phutheho e ne e ka ba kotsing ya hore e tshwaetswe ke moetsadibe eo.—Diprov. 13:20; 1 Bakor. 15:33.

¹⁵ Le ha ho le jwalo, re ithuta hore Jehova ha a batle hore mang kapa mang a timetswe. O batla ho pholosa batho bohle. O hauhela batho ba batlang ho mo sebeletsa, ba fetolang tsela eo ba nahanang ka yona le ba itshwarang hantle. (Ezek. 33:11; bala 2 Petrose 3:9.) Ke ka hoo ha monna elwa ya phuthehong ya Korinthe a ne a baka mme a fetola tsela eo a neng a etsa dintho ka yona, Jehova a ileng a sebedisa Pauluse ho hlalosetsa phutheho hore e lokela ho mo tshwarela le ho mo amohela ka mofuthu.

16. O ikutlwa jwang ka tsela eo Jehova a ileng a sebetsa taba ya monna wa Korinthe ka yona?

¹⁶ Ho hlahloba ka moo taba ya moetsadibe e neng e sebetswa ka teng phuthehong ya Korinthe, ho re thusitse ho bona makgabane a Jehova a kang lerato, toka ha mmoho le ho loka. (Pes. 33:5) Na taba ee ha e etse hore o batle ho rorisa Jehova le ho feta? Etswe kaofela ha rona re baetsadibe mme re hloka hore a re tshwarele. E mong le e mong wa rona o na le lebaka la ho leboha Jehova hobane o fane ka Mora wa hae e le tefo ya topollo e le hore a re tshwarele. Ho ama maikutlo ho tseba hore Jehova o rata batho ba hae e le ka nnete ebile o ba batlela se molemo.

17. Re tlo bua kang dihloohong tse latelang?

¹⁷ Haeba motho a etsa sebe se tebileng mehleng ee, baholo ba ka bontsha lerato jwang jwalo ka Jehova mme ba thusa motho eo hore a bake? Haeba baholo ba etsa qeto ya ho tlosa motho eo ka phuthehong kapa ho mo kgutlisetsa, phutheho e lokela ho etsang ho tshehetsa qeto eo ya baholo? Re tla hlahloba dikarabo tsa dipotso tsena dihloohong tse latelang.