Ha Jehova a ne a laela batho hore ba ‘tlale lefatshe mme ba le buse,’ o ile a bontsha hore lefatshe le tla qetella e le paradeise. (Gen. 1:​28) Batho ba tla phela ka ho sa feleng ba tla lokela ho mamela taelo eo. Lefatshe e ke ke ya eba paradeise qalong hobane serapa sa Edene ha se sa le yo hona jwale. Ka mora Armagedone, ho tla ba le mosebetsi o mongata o tla etswa e le hore ho hlwekiswe dikarolo tse itseng tsa lefatshe tse senyehileng. Oo e tla be e le mosebetsi o mongata haholo.

Mosebetsi ona o re hopotsa oo Baiseraele ba ileng ba o etsa ha ba ne ba tswa Babilona. Ka dilemo tse 70 ho ne ho se na batho ba dulang naheng ya habo bona. Esaia o ile a re Jehova o ne a tla ba thusa hore ba etse hore naha eo e be ntle hape. Boprofeta boo bo ile ba re: “O tla etsa hore lefeella la yona le be jwalo ka Edene le lehwatata la yona le be jwalo ka serapa sa Jehova.” (Esa. 51:3) Jehova o ile a thusa Baiseraele hore ba etse naha ya bona hore e be ntle. Ka  tsela e tshwanang, ka thuso ya Jehova batho ba tla rua lefatshe ba tla kgona ho le etsa hore e be paradeise e ntle. Ho na le dintho tse ngata tseo o ka di etsang hona jwale ho bontsha hore o batla ho etsa mosebetsi oo nakong e tlang.

Tsela e nngwe ke ka hore o etse sohle seo o ka se kgonang hore o hlwekise moo o dulang e le hore ho ka dula ho hlwekile. O ka etsa jwalo le haeba baahisani ba hao ba le bohlaswa. O ka boela wa thusa ka hore o hlwekise le ho lokisa Holo ya Mmuso le Holo ya Kopano. Ha maemo a hao a o dumella, o ka etsa kopo ya hore o be moithaopi ya ka thusang ha ho hlaha dikoduwa. Seo se tla bontsha hore o ikemiseditse ho thusa bara le baradibabo rona. O ka ithuta dintho tse itseng tseo o ka di sebedisang haeba Jehova a o dumella hore o phele lefatsheng ka ho sa feleng.

Jesu o ile a re moradi wa Jairuse a fuwe dijo hanghang ka mora hore a tsoswe. (Mar. 5:​42, 43) E ka nna yaba ho ne ho le bonolo ho thusa ngwanana eo ya dilemo di 12. Le ha ho le jwalo, o ka inahanela hore na e tla ba mosebetsi o mongata hakae o tla etswa ha Jesu a phethahatsa tshepiso ya hae ya hore ‘bohle ba mabitleng ba utlwe lentswe la hae ebe ba a tswa.’ (Joh. 5:​28, 29) Le hoja Bibele e sa fane ka dintlha kaofela, ho ka etsahala hore batho ba tsositsweng ba tla hloka dijo, bodulo le diaparo. O ka bontsha hona jwale hore o ikemiseditse ho thusa. Ho na le dintho tse mmalwa tseo o ka di etsang.

Na o ithaopela ho memela molebedi wa potoloho dijong ha ho etswa tsebiso ya hore o tlo etela phutheho ya habo lona? Ha mora kapa moradiwabo rona ya neng a sebeletsa Bethele a iswa tshimong kapa molebedi wa potoloho a tlohela mosebetsi wa ho potoloha, na o ka ba thusa ka hore o ba batlele bodulo? Haeba ho tlo ba le kopano ya setereke kapa e kgethehileng sebakeng seo o dulang ho sona, na o ka ithaopela ho amohela baeti pele ho kopano kapa ka mora yona?

Diketso 24:​15 e re batho ba dibilione ba tla tsoswa. Ba bangata ba bona ha ba a ka ba fumana monyetla wa ho ithuta ka Jehova pele ba hlokahala. Ba tla fumana monyetla ka mora hore ba tsoswe. a Bahlanka ba Modimo ba tshepahalang le ba nang le boiphihlelo ba tla ruta batho ba tsositsweng. (Esa. 11:9) Charlotte eo esale a bolela ditaba tse monate Europe, Amerika Borwa le Afrika o lebeletse ho bona seo se etsahala. O ile a bua sena a thabile a re: “Ke tatetse ho bona ke ruta batho ba tsositsweng. Ha ke bala ka motho e mong ya ileng a phela nakong e fetileng, hangata ke nahana ka taba ena: ‘Haeba motho eo a ne a ile a tseba Jehova, bophelo ba hae bo ka be bo fapane.’ Ke shebile pele moo ke tla kgona ho ruta batho ba tsositsweng ka Jehova le ho ba thusa ho bona hore bophelo ba bona bo tla ba betere ha ba sebeletsa Jehova.”

Bahlanka ba Jehova ba tshepahalang ba ileng ba phela pele Jesu a tla lefatsheng, le bona ba tla lokela ho ithuta dintho tse ngata. A ko nahane hore na re tla thaba hakae ebile e tla ba tlotla e kaakang ho hlalosetsa Daniele ka moo boprofeta boo a ileng a bo ngola ebile a sa bo utlwisise bo ileng ba phethahala ka teng. (Dan. 12:⁠8) Hape nahana hore na ho tla thabisa hakae ho thusa Ruthe le Naomi ho ithuta hore lelapa la bona le ne le akareletsa Mesia. Re tla boela re thabele ho ruta batho lefatsheng lohle ho se na tshitiso kapa mathata a teng kajeno lefatsheng lena le kgopo.

Keng eo o ka e etsang hona jwale e le hore o itokisetse ho ruta batho ba tsositsweng? Tsela e nngwe eo re ka etsang sena ka yona ke ka hore re lwanele ho ntlafatsa tsela eo re rutang ka yona le hore re dule re ruta batho Bibele. (Mat. 24:​14) O ka bontsha hore o batla ho ruta batho ba tsositsweng ka hore o etse sohle seo o ka se kgonang ho ruta batho Bibele hona jwale le haeba o sa kgone ho ruta batho ka tsela eo o batlang ka yona ka lebaka la botsofadi kapa mabaka a mang a itseng.

Ke ha bohlokwa hore re nahane ka dipotso tsena tsa bohlokwa: Na o se o itokiseditse ho rua lefatshe? Na o se o itokiseditse ho hlokomela lefatshe, ho amohela le ho ruta batho ba tla tsoswa? O ka bontsha hore o itokiseditse ho phela ka ho sa feleng lefatsheng ka hore hona jwale o etse mesebetsi e tshwanang le eo o tla e etsa ha o rua lefatshe.