Ke hlahetse toropong e nyenyane e pela motse wa Chicago o profinseng ya Illinois e U.S.A ka selemo sa 1927. Heso re bahlano, ke Jetha, Don, nna, Karl le Joy. Kaofela ha rona re ne re ikemiseditse ho sebeletsa Jehova ka moya wohle. Ausi wa ka Jetha o ile a ya tlelaseng ya bobedi ya Sekolo sa Gileade ka 1943. Don o ile a ya Bethele e Brooklyn, New York ka 1944. Karl yena o ile a ya ka 1947 mme Joy a ya ka 1951. Mohlala wa bona le wa batswadi ba ka o ile wa ntshusumeletsa hore ke batle ho sebeletsa Jehova haholwanyane.

Batswadi ba ka ba ne ba rata ho bala Bibele ba bile ba rata Modimo mme ba ile ba re ruta ho rata Modimo. Le ha ho le jwalo, ntate wa ka o ne a se a sa tshepe dikereke ka mora hore e be lesole Europe Ntweng ya Pele ya Lefatshe. Mme wa ka o ne a thabile ha ntate wa ka a kgutlile ntweng a phela. Ka hoo, a re ho yena: “Mohatsaka, a re ye kerekeng jwalo ka ha re ne re tlwaetse.” Ntate wa ka a re: “Nka o felehetsa empa nna nke ke ka kena ka kerekeng.” Mme wa ka a mo botsa a re: “Hobaneng?” A re: “Nakong ya ntwa, baruti ba bodumedi bo tshwanang ba ile ba rapella masole ka mahlakoreng a lwantshanang hore a hlole. Na Modimo o ile a tshehetsa masole ao a neng a lwantshana?”

Letsatsing leo, ha mme wa ka a ntse a le kerekeng, Dipaki Tsa Jehova tse pedi tsa fihla lapeng. Di ile tsa fa ntate wa ka dibuka tse pedi tse bitswang Light, tse neng di bua ka lengolo la Tshenolo. Ntate wa ka o ile a di rata yaba o a di nka. Mme wa ka o ile a bala dibuka tseo hang ha a di bona. Ka letsatsi le leng ha a ntse a bala koranta, a bona tsebiso e neng e memela batho ho ithuta Bibele ba sebedisa dibuka tsa Light. O ile a kgetha ho ya. Eitse ha a fihla a kokota, ha hlaha mme e mong e moholo. Mme wa ka a bua a tshwere e nngwe ya dibuka tseo, a re: “Na ke hona moo moo ho ithutwang Bibele ho sebediswa buka ee?” Mme eo a re: “Ho jwalo moratuwa, kena.” Bekeng e latelang mme wa ka a tsamaya le rona kaofela, ntate wa ka yena a sala. Ka mora moo yaba re se re ya beke le beke.

Ka le leng ha ke le dibokeng, morabo rona ya tsamaisang diboka a re ke bale Pesaleme ya 144:15 e reng ho thaba batho ba sebeletsang Jehova. Ke ile ka rata temana eo haholo ha mmoho le ya 1 Timothea 1:11 e reng Jehova ke “Modimo ya thabileng” le  ya Baefese 5:1 e re kgothaletsang hore re “etsise Modimo.” Ke ile ka hlokomela hore ke lokela ho thabela ho sebeletsa Mmopi le ho mo leboha ka tlotla ena ya ho mo sebeletsa. Esale ke etsa dintho tsena tse pedi bophelo bohle ba ka.

Phutheho e haufi e ne e le e Chicago e bohole ba dikhilomithara tse 32. Le ha ho ne ho le hole jwalo, re ne re ya mme tsebo ya ka ya Bibele e ile ya eketseha. Ke hopola ka letsatsi le leng morabo rona ya tsamaisang diboka a kgetha Jetha hore a arabe. Eitse ha ke ntse ke mo mametse, ka re: ‘Ke ne ke tseba karabo ena, nka be ke phahamisitse letsoho ka arabela.’ Yaba ke qala ho lokisetsa le ho arabela. Ha bohlokwa le ho feta ke hore nna le bana beso re ile ra hola moyeng. Ke ile ka kolobetswa ka 1941.

Ha ke lebale kopano e neng e le Cleveland, Ohio ka 1942. Bara le baradi ba bo rona ba ditoropong tse fetang 50 tsa United States, ba ne ba mametse lenaneo leo ka thelefono. Lelapa leso le malapa a mang a bara le baradi ba bo rona a ne a robala ditenteng tse pela moo ho neng ho tshwaretswe kopano teng. Ntwa ya Bobedi ya Lefatshe e ne e ntse e tswela pele mme Dipaki Tsa Jehova di ne di ntse di hanyetswa. Ha e ba mantsiboya, ke ile ka bona bara ba bo rona ba paka dikoloi ba di shebisa ka ntle di furaletse sebaka seo re neng re robala ho sona. Ho ne ho dumellanwe hore ho be le motho a le mong ka hara koloi e nngwe le e nngwe ya lebetseng bosiu kaofela. Ha ho ne ho utlwahala eka ho na le bothata, bara ba bo rona ba ne ba tla laeta mabone, ba letse dihuthara ebe ba bang ba mathela ho ya thusa. Ke ile ka re: ‘Ka nnete batho ba Jehova ba dula ba itokiseditse boemo le ha e le bofe bo ka hlahang.’ Ka ha ha ho na ntho e mpe e ileng ya etsahalala, ke ile ka robala jwalo ka lesea.

Dilemo ha morao ha ke nahana ka kopano eo, ke ile ka hlokomela hore mme wa ka o ne a sa tshwenyeha kapa ho tshoha le ha e le hanyenyane. O ne a tshepile Jehova le mokgatlo wa hae ka ho feletseng. Nke ke ka lebala mohlala wa hae o motle.

Nakwana pele ho kopano eo ya setereke, mme wa ka e ile ya eba pulamadiboho ya ka mehla. Ka hoo, o ile a mamela ka hloko dipuo tse neng di bua ka tshebeletso ya nako e tletseng. Ha re le tseleng e yang hae a re: “Nka thabela ho tswela pele ke le pulamadiboho empa nke ke ka kgona ho etsa jwalo ke be ke etse le mesebetsi ya ka tlung.” O ile a re kopa hore re mo thuse yaba re a dumela. Ka hoo, a re e mong le e mong a hlwekise kamore e le nngwe kapa tse pedi pele re ja dijo tsa hoseng. Ha re qeta ho ya sekolong, o ne a sheba hore na ntlo e hlwekile ebe ke hona a yang tshimong. O ne a phathahane haholo empa ha ho mohla a neng a re hlokela nako. Re ne re dula re fumana a le teng ha re tlile dijong tsa motshehare le ha re tswa sekolong. Ka matsatsi a mang ha re tswa sekolong re ne re ya le yena tshimong, e leng ntho e ileng ya re thusa ho utlwisisa hore na ho jwang ho ba pulamadiboho.

Ke qadile ho ba pulamadiboho ha ke le dilemo di 16. Le hoja ntate wa ka e ne e eso be Paki, o ne a batla ho tseba hore na ke ntse ke sebetsa jwang tshimong. Mantsiboyeng a mang, ke ile ka mo bolella hore ha ke eso fumane motho eo ke ithutang Bibele le yena le hoja ke lekile ka thata ho mo fumana. Ke ile ka thola hanyenyane yaba ke re: “Na o ka thabela ho ithuta Bibele le nna?” O ile a inahana hakgutshwanyane yaba o re: “Ha ke utlwe eka nka ba le bothata.”  Ntate wa ka e bile motho wa pele eo ke ithutang Bibele le yena. Ka nnete eo e bile tlotla e kgolo!

Re ile ra ithuta buka ya “Nnete e Tla le Lokolla.” Ka mora nako, ka hlokomela hore ntate wa ka o nthusa ho ntlafatsa tsela eo ke ithutang Bibele ka yona le tsela ya ho e ruta batho. Ka mohlala, mantsiboyeng a mang ha re qeta ho bala serapa, o ile a re: “Ke a bona hore na buka e reng empa o tseba jwang hore dintho tse ka bukeng ee di nepahetse?” Ke ne ke sa itokisetsa ho araba potso eo, ka hoo ka re: “Nke ke ka kgona ho o hlalosetsa hona jwale empa ke tla o hlalosetsa nakong e tlang ha re ithuta.” Ka mora ho fumana ditemana tse neng di tshehetsa taba eo re neng re bua ka yona, ka fela ka mo hlalosetsa. Yaba ke ntlafatsa tsela eo ke lokisetsang thuto ka yona ka hore ke etse dipatlisiso. Ho etsa jwalo ho nthusitse ho ba seithuti se hlwahlwa sa Bibele mme ha thusa ntate wa ka hore a be le tsebo e eketsehileng ka Bibele. O ile a sebedisa seo a ithutang sona yaba o kolobetswa ka selemo sa 1952.

Ke tlohile lapeng ha ke le dilemo di 17. Ka yona nako eo, Jetha a e ile ya eba moromuwa le Don a ya Bethele. Ka bobedi ba ne ba rata dikabelo tsa bona mme ntho eo ya nkgothatsa haholo. Ka hoo, ka kenya kopo ya ho ya Bethele le ya ho ya Sekolong sa Gileade. Ka mora moo ka tlohela dintho matsohong a Jehova. Qetellong ka memelwa ho ya sebeletsa Bethele ka 1946.

Ha nako e ntse e ya, ke ile ka fuwa mesebetsi e fapaneng Bethele. Ka lebaka leo, ka ithuta dintho tse ngata tse ntjha. Dilemo tse 75 tseo ke di qetileng ke le Bethele, ke ithutile hore na dibuka di etswa jwang ebile ke ne ke sebetsa ka ditjhelete. Ka boela ka ithuta ho reka dintho tse neng di hlokahala Bethele le ho romela dintho tsa bohlokwa dibakeng tse fapaneng. Ka hodimo ho tsohle, ke thabela thuto ya Bibele eo re e fumanang borapeding ba hoseng le dipuong tse ding tse fanwang mona Bethele.

Ke boetse ke ithutile dintho tse ding ho ngwaneso Karl, ya ileng a tla Bethele ka 1947. E ne e le seithuti se hlwahlwa sa Bibele a bile a kgona ho e ruta ba bang. Ka le leng, ke ile ka mo kopa hore a nthuse ka puo eo ke neng ke tlo fana ka yona. Ke ile ka mo hlalosetsa hore ke fumane dintlha tse ngata haholo ha ke ntse ke lokisetsa empa ha ke tsebe hore na ke di sebedisa jwang. A mpha tharollo ka ho mpotsa potso e le nngwe feela, a re: “Joel, ntlha ya sehlooho ya puo ya hao ke efe?” Ka utlwisisa ka pele hore na o reng. Ke ne ke lokela ho nka dintlha tse neng di tla nthusa ho hlalosa ntlha ya sehlooho, tsena tse ding ke di tlohele. Ha ke e lebale keletso eo.

E le hore re thabe Bethele, re lokela ho etsa sohle seo re ka se kgonang ho ya tshimong. Ho etsa jwalo ho ka re kgothatsa haholo. Ke hopola hantle  se ileng sa etsahala Bronx, New York City, mantsiboyeng a mang. Nna le morabo rona e mong re ile ra etela mme e mong ya neng a ile a amohela Molula-Qhooa le Tsoha! Ha re fihla ho yena ra re: “Mantsiboyeng ana re ntse re thusa batho ho ithuta dintho tse kgothatsang tse hlahang ka Bibeleng.” Yaba o re: “Haeba le tlo bua ka Bibele, kenang.” Re ile ra bala ra ba ra buisana ka mangolo a buang ka lefatshe le letjha le tlang. Mangolo ao a ile a mo ama pelo hobane bekeng e latelang o ile a mema e meng ya metswalle ya hae hore e be teng ha re ithuta. Ha morao yena le monna wa hae e ile ya eba bahlanka ba Jehova.

Ke ne ke batla ho nyala empa ha feta dilemo tse leshome pele nka fumana molekane. Keng e nthusitseng hore ke fumane molekane ya nepahetseng? Ke ile ka rapela Jehova ka ba ka nahana ka hore na ke batla ho etsang le molekane wa ka ka mora hore re nyalane.

Ka mora kopano ya setereke ya 1953 e neng e tshwaretswe Yankee Stadium, ka kopana le moradi wa bo rona ya bitswang Mary Aniol. Yena le ausi wa ka Jetha ba ne ba le tlelaseng ya bobedi ya Gileade. Ka bobedi ba bona e ile ya eba baromuwa sebakeng se tshwanang. Mary a nqoqela a thabile ka dikabelo tsa boromuwa tseo a ileng a ba le tsona Caribbean le dithuto tseo a ileng a di kganna ka dilemo tseo. Ha re ntse re tsebana, ra hlokomela hore re na le dipakane tse tshwanang. Ha lerato la rona le ntse le hola, ra qetella re nyalane ka April 1955. Mary o ile a bontsha ka ditsela tse ngata hore ke mpho e tswang ho Jehova mme a mpehela mohlala o motle. O ne a dula a thabile ho sa tsotellehe hore na o fuwa kabelo efe. O ne a sebetsa ka thata, a tsotella batho ba bang e le ka nnete ebile a etsa hore dintho tse amanang le Mmuso wa Modimo di tle pele bophelong ba hae. (Mat. 6:33) Re ile ra etsa mosebetsi wa potoloho ka dilemo tse tharo yaba ka 1958 re memelwa ho ya sebeletsa Bethele.

Ke ithutile dintho tse ngata ho mohatsaka Mary. Ka mohlala, ha re qeta ho nyalana, re ile ra etsa qeto ya ho bala Bibele ha mmoho. Re ne re bala ditemana tse 15 ka letsatsi. Ka mora hore e mong a bale karolo e itseng, re ne re bua ka yona le ka hore na re ka e sebedisa jwang bophelong ba rona. Hangata Mary o ne a mpolella dintho tseo a ithutileng tsona Gileade le mosebetsing wa hae wa boromuwa. Dintho tseo ke ithutileng tsona ho yena, di ile tsa nthusa hore ke ntlafatse dipuo tseo ke fanang ka tsona le ho tseba hore na nka kgothatsa baradi ba bo rona jwang. —Diprov. 25:11.

Mohatsaka ya ratehang Mary o ile a hlokahala ka 2013. Ke tatetse ho mo bona lefatsheng le letjha. Ha ke ntse ke emetse nako eo, ke ikemiseditse ho tswela pele ke ithuta le ho tshepa Jehova ka pelo yohle ya ka. (Diprov. 3:​5, 6) Ke a kgothala ebile ke a thaba ha ke nahana ka hore na batho ba Jehova ba tlo etsang lefatsheng le letjha. Taba ena e akarelletsa dintho tse ntjha tseo re tla ithuta tsona ka Morupedi wa rona e Moholo. Ka nnete ha ke na mantswe a lekaneng a ho mo leboha ka dintho tsohle tseo a nthutileng tsona ho fihlela hona jwale le mosa oo a mpontshitseng ona.