SEHLOOHO SE ITHUTWANG SA 8
Hlola Mohono ka Hore o Phehelle Kgotso
“A re phehelleng dintho tse tlisang kgotso le dintho tseo re ka hahanang ka tsona.”—BAR. 14:19.
PINA YA 113 Re na le Kgotso
SEO RE TLO ITHUTA SONA *
1. Mohono o ile wa ama lelapa labo Josefa jwang?
JAKOBO o ne a rata bana bohle ba hae, empa o ne a rata Josefa ya dilemo di 17 haholo. Jwale bana babo Josefa ba ile ba ikutlwa jwang? Ba ile ba mo honohela mme seo se ile sa etsa hore ba mo hloye. Empa Josefa o ne a sa ba etsa letho le neng le ka etsa hore ba mo hloye. Ho ntse ho le jwalo, ba ile ba rekisa Josefa hore e ilo ba lekgoba mme ba thetsa ntate wa bona ba re o bolailwe ke phoofolo ya naheng. Ka ha ba ne ba le mohono, ba ile ba etsa hore lelapa labo bona le se ke la eba le kgotso mme ba bakela ntate wa bona bohloko bo boholo.—Gen. 37:3, 4, 27-34.
2. Ho ya ka Bagalata 5:19-21, ke hobaneng ha mohono o le kotsi?
2 Ka Bibeleng mohono * ke e nngwe ya “mesebetsi ya nama” e ka etsang hore motho a se ke a kena Mmusong wa Modimo. (Bala Bagalata 5:19-21.) Hangata mohono o etsa hore motho a be le lehloyo, a qabane le ba bang mme a halefe.
3. Re tlo tshohlang sehloohong sena?
3 Mohlala wa bana babo Josefa, o bontsha ka moo mohono o ka senyang kgotso ya lelapa ka teng. Le hoja re ke ke ra etsa seo bana babo Josefa ba se entseng, empa kaofela re na le dipelo tse sa phethahalang le tse bolotsana. (Jer. 17:9) Ke ka hoo ka dinako tse ding re honohelang batho ba bang. A re hlahlobeng mehlala e meng e ka Bibeleng, e re bontshang hore na mohono o ka bakwa keng. Re tla boela re hlahlobe hore na ke jwang re ka lwantshang mohono mme re phehelle kgotso.
MOHONO O BAKWA KENG?
4. Ke hobaneng ha Bafilista ba ne ba honohela Isaka?
4 Ha motho e le morui. Isaka e ne e le motho ya ruileng mme Bafilista ba ne ba mo honohela. (Gen. 26:12-14) Ba ile ba bontsha sena ka hore ba tlatse mobu ka didibeng tseo a neng a di sebedisetsa ho fa diphoofolo tsa hae metsi. (Gen. 26:15, 16, 27) Jwalo ka Bafilista, batho ba bangata kajeno ba honohela batho ba ruileng ho ba feta. Ba batla dintho tseo batho ba bang ba nang le tsona ebile ba batla hore batho bao ba lahlehelwe ke tsona.
5. Ke hobaneng ha baetapele ba bodumedi ba ne ba honohela Jesu?
5 Ha batho ba rata motho e mong. Baetapele ba bodumedi ba Bajuda, ba ne ba honohela Jesu hobane batho ba bangata ba ne ba mo rata. (Mat. 7:28, 29) Jesu e ne e le moemedi wa Modimo mme o ne a ruta batho nnete. Ho ntse ho le jwalo, baetapele bana ba bodumedi ba ile ba bua mashano ka Jesu e le hore ba senye lebitso la hae. (Mar. 15:10; Joh. 11:47, 48; 12:12, 13, 19) Keng seo re ka ithutang sona tlalehong ena? Re ithuta hore ha re a lokela ho honohela batho ba bang hobane feela ba ratwa ke bara le baradibabo rona ka lebaka la makgabane ao ba nang le ona. Ho ena le hoo, re lokela ho leka ho etsisa makgabane a bona.—1 Bakor. 11:1; 3 Joh. 11.
6. Diotrefe o ile a bontsha jwang hore o na le mohono?
6 Ha motho e mong a fuwe boikarabelo ka phuthehong. Mehleng ya baapostola, Diotrefe o ile a honohela batho ba neng ba etella pele ka phuthehong ya Bokreste. O ne a batla “ho ba le sebaka sa pele” ka phuthehong. Ka hoo o ile a bua hampe ka moapostola Johanne le ba bang ba etellang pele, e le hore phutheho e se ke ya ba hlompha. (3 Joh. 9, 10) Le hoja re ke ke ra etsa seo Diotrefe a se entseng, empa le rona re ka qala ho honohela Bakrestemmoho ha ba fuwa boikarabelo ka phuthehong, haholoholo haeba re nahana hore re na le bokgoni bo tshwanang le ba bona.
Dipelo tsa rona di tshwana le mobu mme makgabane a matle a jwalo ka malomo. Empa mohono o jwalo ka setlamatlama se tjhefu. Mohono o ka etsa hore motho a se ke a ba le makgabane a kang, lerato, mamello le mosa (Sheba serapa sa 7)
7. Mohono o ka etsa hore re be batho ba jwang?
7 Mohono o tshwana le ditlamatlama tse nang le tjhefu. Hang ha peo ya mohono e ka mela ka dipelong tsa rona, ho ka ba thata ho e ntsha. Dintho tse ka etsang hore motho a be mohono le ho feta ke mona, boikgohomoso le ho itjheba boyena. Mohono o ka etsa hore motho a se ke a ba le makgabane a kang lerato, mamello le mosa. Ka hoo ha re qala re utlwa eka re ba le mohono, re lokela ho o lwantsha. Empa re ka o lwantsha jwang?
IKOKOBETSE MME O KGOTSOFALE
Re ka lwantsha mohono jwang? Ka thuso ya moya o halalelang re ka hlola mohono mme ra ba batho ba ikokobeditseng le ba kgotsofalang (Sheba serapa sa 8 le 9)
8. Ke makgabane afe a ka re thusang hore re lwantshe mohono?
8 Re ka lwantsha mohono ka hore re be batho ba ikokobeditseng le ba kgotsofalang. Makgabane ana a ka re thusa hore re se ke ra ba mohono. Boikokobetso bo tla re thusa hore re se ke ra inahana ho tlola. Motho ya ikokobeditseng ha a nahane hore o bohlokwa ho feta batho ba bang. (Bagal. 6:3, 4) Hape motho ya kgotsofallang seo a nang le sona ha a ipapise le batho ba bang. (1 Tim. 6:7, 8) Ka hoo motho ya ikokobeditseng le ya kgotsofalang, o thaba le batho ba bang ha ba fumana dintho tse molemo.
9. Ho ya ka Bagalata 5:16 le Bafilipi 2:3, 4, moya o halalelang o tla re thusa hore re etseng?
9 Re hloka moya o halalelang ho re thusa hore re se ke ra ba mohono empa re be batho ba ikokobeditseng le ba kgotsofalang. (Bala Bagalata 5:16; Bafilipi 2:3, 4.) Moya o halalelang wa Jehova o tla re thusa hore re hlahlobe maikutlo le sepheo sa rona. Ka hoo, Modimo a ka re thusa hore re be le maikutlo a nepahetseng. (Pes. 26:2; 51:10) Nahana ka mohlala wa Moshe le Pauluse ba ileng ba atleha ho lwantsha mohono.
Motjha e mong wa Moiseraele o ya ho Moshe le Arone ho ba bolella ka banna ba babedi ba neng ba profeta. Joshua o kopa Moshe hore a thibe banna bao empa o a hana. Ho ena le hoo, o bolella Joshua hore o thabetse ha Jehova a file banna bao moya wa hae (Sheba serapa sa 10)
10. Ke boemo bofe bo neng bo ka leka Moshe? (Sheba setshwantsho se ka ntle.)
10 Jehova o ile a fa Moshe matla a hore a laole Baiseraele empa Moshe ha a ka a thibela batho ba bang hore ba be le matla ana. Ka mohlala, ka letsatsi le leng Jehova o ile a nka o mong wa moya o halalelang ho Moshe mme a o fa baholo ba Iseraele ba neng ba eme pela tente ya pokano. Nakwana ka mora moo, Moshe o ile a utlwela hore baholo ba babedi ba neng ba sa ya tenteng ya pokano le bona ba fumane moya o halalelang mme baa profeta. Ebe o ile a etsang ha Joshua a mo kopa hore a thibe baholo bana ba babedi? Moshe ha a ka a honohela banna bana hobane feela Jehova a ba kgethile. Ho e na le hoo, ka boikokobetso o ile a thabela hore le bona ba a profeta. (Num. 11:24-29) Re ka ithutang mohlaleng wa Moshe?
Ke jwang baholo ba ka ikokobetsang jwalo ka Moshe? (Sheba serapa sa 11 le 12) *
11. Baholo ba ka etsisa Moshe jwang?
11 Haeba o moholo, na o kile wa kopuwa hore o rute morabo rona e mong mosebetsi o o ratang haholo ka phuthehong? Ka mohlala, mohlomong o rata kabelo ya ho kganna Tora ya ho Lebela beke le beke. Empa haeba o ikokobeditse jwalo ka Moshe o ke ke wa ikutlwa o se motho wa bohlokwa hobane feela o kopuwe hore o kwetlise morabo rona e mong hore le yena ha nako e ntse e ya a kgone ho etsa mosebetsi ona. Ho e na le hoo, o tla thabela ho mo thusa.
12. Ke jwang Bakreste ba bangata kajeno ba bontshang boikokobetso le ho kgotsofala?
12 Nahana ka maemo a mang ao barababo rona ba bangata ba hodileng ba kopanang le ona. Ka dilemo tse ngata, ba ile ba sebeletsa e le bahokahanyi ba dihlopha tsa baholo. Empa ha ba eba dilemo di 80, ba ithaopela ho tlohela dikabelo tsa bona. Ha balebedi ba potoloho ba eba dilemo di 70, ka boikokobetso ba tlohela kabelo eo ya bona mme ba amohela e nngwe. Morao tjena, ditho tse ngata tsa lelapa la Bethele di ile tsa amohela kabelo ya ho ya tshimong. Ka hoo bara le baradibabo rona bana ba tshepahalang, ha ba kwatele ba seng ba etsa mesebetsi eo ba neng ba e etsa.
13. Keng e neng e ka etsa hore Pauluse a honohele baapostola ba 12?
13 Moapostola Pauluse ke e mong wa batho ba re behelang mohlala o motle wa ho ba le boikokobetso le ho kgotsofala. Pauluse ha a ka a itumella hore a be le mohono. Le hoja a ne a sebetsa ka thata tshebeletsong, ka boikokobetso o ile a re: “Ke e monyenyane ho baapostola, mme ha ke tshwanelehe ho bitswa moapostola.” (1 Bakor. 15:9, 10) Baapostola ba 12 e ne e le balatedi ba Jesu ha a ntse a le lefatsheng empa Pauluse e ile ya eba Mokreste ka mora hore Jesu a tsoswe. Le hoja a ile a kgethwa hore e be “moapostola ho ditjhaba,” Pauluse ha a ka a ba e mong wa baapostola ba 12. (Bar. 11:13; Lik. 1:21-26) Ho e na le hore a honohele banna bao ba 12 le setswalle seo ba neng ba ena le sona le Jesu, o ile a dula a kgotsofetse.
14. Keng eo re tla e etsa haeba re le batho ba ikokobeditseng le ba kgotsofalang?
14 Haeba re ikokobeditse ebile re kgotsofala, re tla tshwana le Pauluse ka hore re hlomphe batho bao Jehova a ba fileng bolaodi. (Lik. 21:20-26) O entse bonnete ba hore ho na le banna ba etellang phutheho pele. Le hoja ba sa phethahala, Jehova o ba nka e le “dimpho [tseo e leng] banna.” (Baef. 4:8, 11) Haeba ka boikokobetso re hlompha le ho mamela ditaelo tsa banna bana, re tla dula re le metswalle ya Jehova le ho ba le kgotso ka phuthehong.
‘PHEHELLA DINTHO TSE TLISANG KGOTSO’
15. Keng seo re lokelang ho se etsa?
15 Haeba re honohela batho ba bang mme le bona ba re honohela re ke ke ra eba le kgotso. Ka hoo, re lokela ho lwantsha mohono mme re se ke ra etsa hore batho ba bang ba re honohele. Re tlameha ho etsa dintho tsena tsa bohlokwa e le hore re mamele taelo ya Jehova ya hore re ‘phehelle dintho tse tlisang kgotso le dintho tseo re ka hahanang ka tsona.’ (Bar. 14:19) Keng seo ka ho toba re ka se etsang ho thusa batho ba bang hore ba lwantshe mohono, hona re ka phehella kgotso jwang?
16. Re ka thusa batho ba bang jwang hore ba lwantshe mohono?
16 Tsela eo re itshwarang le ho etsa dintho ka yona e ka ama batho ba bang. Lefatshe le batla hore re etse “pontsho ya mponeng” ka dintho tseo re nang le tsona. (1 Joh. 2:16) Empa seo se etsa hore batho ba be mohono. Re lokela ho qoba ho etsa hore batho ba bang ba re honohele ka hore re se ke ra bua haholo ka dintho tseo re nang le tsona le tseo re rerang ho di reka. Tsela e nngwe eo re ka qobang hore batho ba bang ba re honohele ka yona, ke ka hore re be batho ba ikokobeditseng ha re ena le boikarabelo ka phuthehong. Ha re dula re bua ka dintho tseo re kgonang ho di etsa sena se ka etsa hore batho ba re honohele. Ka lehlakoreng le leng, ha re thabela dintho tseo batho ba bang ba kgonang ho di etsa, sena se ka ba thusa hore ba kgotsofale mme ho ba le bonngwe ka phuthehong.
17. Keng seo bana babo Josefa ba ileng ba kgona ho se etsa hona hobaneng?
17 Re ka kgona ho hlola mohono. Nahana hape ka mohlala wa bana babo Josefa. Dilemo ka mora hore ba tshware Josefa hampe, ba ile ba kopana le yena Egepeta. Pele Josefa a bolella bana babo hore na ke mang o ile a batla ho bona hore na ba fetohile. O ile a etsa sena ka hore a ba memele dijong mme a fa Benjamine dijo tse ngata ho feta tsa bona. (Gen. 43:33, 34) Empa bana ba bo ha ba a ka ba honohela Benjamine. Ho e na le hoo, ba ile ba bontsha hore ba amehile ka Benjamine le ntate wa bona Jakobo. (Gen. 44:30-34) Ka ha bana babo Josefa ba ile ba hlola ho ba mohono, sena se ile sa etsa hore lelapa labo le boele le be le kgotso. (Gen. 45:4, 15) Ka tsela e tshwanang, haeba re lwantsha mohono sena se tla etsa hore re dule re ena le kgotso ka phuthehong le malapeng a rona.
18. Ho ya ka Jakobo 3:17, 18, ho tla etsahalang haeba re phehella kgotso?
18 Jehova o batla hore re lwantshe mohono mme re phehelle kgotso. Re tlameha ho sebetsa ka thata e le hore re etse dintho tsena tse pedi. Jwalo ka ha re se re bone, ho tlwaelehile hore re honohele batho ba bang. (Jak. 4:5) Hape re potolohilwe ke batho ba kgothalletsang mohono. Empa haeba re le batho ba ikokobeditseng, ba ananelang le ba kgotsofalang, re ke ke ra eba mohono. Ho ena le hoo re tla etsa hore ho be le kgotso, e leng se tla etsa hore re be le makgabane a matle.—Bala Jakobo 3:17, 18.
PINA YA 130 Tshwarelanang
^ par. 5 Mokgatlo wa Jehova o na le kgotso. Empa haeba re honohela batho ba bang, sena se ka etsa hore ho se ke haeba le kgotso. Sehloohong sena re tla hlahloba hore na keng e etsang hore motho a be mohono. Re tla boela re hlahlobe hore na ke jwang re ka hlolang mohono le hore re phehelle kgotso.
^ par. 2 TLHALOSO YA LENTSWE: Jwalo ka ha Bibele e bontsha, motho ya mohono o batla dintho tseo batho ba bang ba nang le tsona ebile o batla hore ba lahlehelwe ke tsona.
^ par. 61 SETSHWANTSHO SE A HLALOSWA: Nakong ya seboka sa sehlopha sa baholo, morabo rona ya seng a hodile dilemong ya kgannang Tora ya ho Lebela, o kopuwa hore a kwetlise moholo ya motjha dilemong hore a tsebe ho etsa mosebetsi oo. Le hoja mora enwa wabo rona ya seng a hodile a rata mosebetsi wa hae, empa o thabela ho sebedisana le baholo ka hore a kwetlise mora enwa wabo rona ya motjha.
