SEHLOOHO SE ITHUTWANG SA 8
PINA YA 130 Tshwarelanang
O ka Etsisa Jehova Jwang Tabeng ya ho Tshwarela Batho ba Bang?
“Le tshwarele batho ba bang ka pelo yohle feela jwalo ka ha Jehova le yena a le tshwarela.”—BAKOL. 3:13.
NTLHAKGOLO
Sehloohong sena, re tlo bua ka dintho tseo re ka di etsang e le hore re tshwarele motho ya re utlwisitseng bohloko.
1, 2. (a) Ke maemo afe a ka etsang hore ho be thata ho tshwarela motho e mong? (b) Moradi wa bo rona Denise o ile a bontsha jwang hore o a tshwarela?
NA O thatafallwa ke ho tshwarela batho ba bang? Haeba ho jwalo, ha o mong. Boholo ba rona re utlwa bohloko haeba motho a buile kapa a entse ntho e re utlwisitseng bohloko haholo. Le ha ho le jwalo, re ka kgona ho tshwarela batho ba bang ho sa tsotellehe hore na ba re utlwisitse bohloko hakae. Ka mohlala, nahana ka se etsahalletseng Moradi wa bo rona Denise, a ya ileng a tshwarela ho tloha botebong ba pelo. Ka 2017, yena le lelapa la hae ba ile ba etela Ntlokgolo e ntjha ya Dipaki Tsa Jehova e neng e sa tswa bulwa. Ha ba le tseleng e kgutlelang hae, monna e mong o ile a hloleha ho laola koloi ya hae yaba o thula koloi eo lelapa la Denise le neng le tsamaya ka yona. Denise o ile a idibana kotsing eo ya koloi. Ha a hlaphohelwa o ile a bolellwa hore bana ba hae ba lemetse haholo le hore monna wa hae Brian o hlokahetse. Ha Denise a hopola ketsahalo eo, o re: “Ke ile ka ikutlwa ke nyahame ebile ke ferekane.” Ha morao o ile a utlwa hore monna ya bakileng kotsi o ne a sa nwa, a sa sebedisa dithethefatsi ebile a sa tobetse fono. O ile a rapela Jehova hore a mo fe kgotso.
2 Monna ya bakileng kotsi eo o ile a qosetswa polao. Ha lekgotla le ne le ka etsa qeto ya hore o molato, o ne a tla ya teronkong. Lekgotla le ile la bolella Moradi wa bo rona Denise hore dintho tseo a tla di bua nyeweng eo, ke tsona tse tla etsa hore monna eo a ye teronkong kapa a se ke a ya. Moradi wa bo rona Denise o re: “Ke ile ka utlwa eka maqeba a ka a neng a se a fola, a bulwa botjha ebe a tshelwa letswai hobane jwale ke ile ka tlameha ho bua ka dintho tse bohloko tse nketsahalletseng.” Dibeke tse seng kae ha morao, Moradi wa bo rona Denise o ile a tlameha ho ya lekgotleng la dinyewe ho ya fana ka bopaki kgahlanong le monna eo ya utlwisitseng lelapa la hae bohloko. O ile a beha ditaba tsa hae jwang? Moradi wa bo rona Denise o ile a kopa moahlodi hore a hauhele monna eo. b Ha a qeta ho bua, moahlodi o ile a lla. O ile a re: “Ke na le dilemo tse 25 ke le moahlodi empa ke qala ho utlwa ntho e tjena ka lekgotleng. Le ka mohla ha ke eso utlwe lelapa le foseditsweng le kopela moqosuwa hore a tshwarelwe. Ke qala ho utlwa mantswe a bontshang lerato le tshwarelo ka tsela ena.”
3. Ke eng e thusitseng Moradi wa bo rona Denise hore e be motho ya tshwarelang?
3 Ke eng e thusitseng Moradi wa bo rona Denise hore e be motho ya tshwarelang? O ile a nahanisisa ka moo Jehova a tshwarelang ka teng. (Mik. 7:18) Ha re ananela tsela eo Jehova a tshwarelang ka yona, re tla susumelletseha hore le rona re tshwarele batho ba bang.
4. Jehova o batla hore re etseng? (Baefese 4:32)
4 Jehova o batla hore re tshwarele batho ba bang ka bolokolohi feela jwalo ka ha le yena a re tshwarela ka bolokolohi. (Bala Baefese 4:32.) O lebelletse hore re ikemisetse ho tshwarela batho ba re utlwisang bohloko. (Pes. 86:5; Luka 17:4) Sehloohong sena, re tlo bua ka dintlha tse tharo tse tla re thusa hore re ikemisetse ho tshwarela.
AMOHELA HORE O UTLWILE BOHLOKO
5. Ho ya ka Diproverbia 12:18, re ka nna ra ikutlwa jwang haeba motho e mong a re foseditse?
5 Re ka utlwa bohloko haholo haeba motho e mong a ka bua kapa a re etsa ntho e itseng e bohloko, haholoholo haeba e le motho eo re mo tlwaetseng kapa e mong wa lelapa. (Pes. 55:12-14) Ka dinako tse ding, bohloko boo re bo utlwang bo ka ba jwalo ka ha eka re hlabilwe ka ntho e itseng. (Bala Diproverbia 12:18.) Maemong a mang re ka leka ho etsa eka ha re a utlwa bohloko empa ho etsa jwalo ho ka ba jwalo ka ha eka motho o o hlabile ka thipa ebe ha o ntshe thipa eo leqebeng la hao. Ka tsela e tshwanang, haeba re iphapanyetsa taba ya hore re utlwile bohloko, re ke ke ra lebella hore bohloko boo bo fole.
6. Re ka nna ra etsang ha motho e mong a re foseditse?
6 Haeba motho e mong a re fosetsa, boikutlo bo tlang pele e ka ba ho halefa. Le Bibele e a bontsha hore re ka halefa. Le ha ho le jwalo, e a re lemosa hore re se ke ra dula re halefile. (Pes. 4:4; Baef. 4:26) Hobaneng? Hobane tsela eo re ikutlwang ka yona e re susumelletsa hore re etse dintho ka tsela e itseng. Hape ha motho a halefile, ha se hangata a etsang diqeto tse nepahetseng. (Jak. 1:20) Hopola hore ho halefa ke ntho ya tlhaho empa hore na re tla dula re halefile kapa tjhe, eo ke kgetho ya rona.
Ho halefa ke ntho ya tlhaho empa hore na re tla dula re halefile kapa tjhe, eo ke kgetho ya rona
7. Ke boikutlo bofe boo re ka bang le bona ha re utlwisitswe bohloko?
7 Ha re tshwarwa hampe, re ka utlwa bohloko ka ditsela tse ding tse fapaneng. Ka mohlala, Moradi wa bo rona Ann o re: “Ha ke sa le ngwana, ntate wa ka o ile a siya mme wa ka yaba o nyala mme ya neng a sebetsa lapeng a ntlhokomela. Ke ile ka utlwa eka ke lahlilwe. Ha ntate a eba le bana le mme eo, ke ile ka utlwa eka bana ba hae ba tsotellwa ho mpheta. Ke hotse ke utlwa eka ha ke ratwe.” Moradi wa bo rona Georgette o hlalosa hore na o ne a ikutlwa jwang ha monna wa hae a ne a sa mo tshepahalle. O re: “Haesale re le metswalle ho tloha re sa le bana ebile re ne re le bopulamadiboho mmoho. Ke ne ke utlwile bohloko haholo.” Moradi wa bo rona Naomi yena o re: “Ke ne ke sa nahane hore monna wa ka a ka nkutlwisa bohloko. Ha a ne a mpolella hore o ntse a shebella pornography ka lekunutu, ke ile ka ikutlwa ke phoqilwe.”
8. (a) Ke mabaka afe a mang a etsang hore re tshwarele batho ba bang? (b) Re rua molemo ofe ha re tshwarela batho ba bang? (Sheba lebokose le reng “ Re ka Etsang Haeba Motho e Mong a re Utlwisitse Bohloko Haholo?”)
8 Re ke ke ra laola dintho tseo batho ba di buang ho rona kapa tseo ba re etsang tsona empa re ka leka ho laola tsela eo re itshwarang ka yona. Hangata tsela e molemo ka ho fetisisa ke ho tshwarela motho ya re foseditseng. Hobaneng? Hobane re rata Jehova, e leng yena ya batlang hore re tshwarele batho ba bang. Haeba re dula re halefile mme re sa batle ho tshwarela batho ba bang, re ka etsa dintho tse se nang kelello ra ba ra kula. (Diprov. 14:17, 29, 30) Nahana ka mohlala wa Moradi wa bo rona Christine. O re: “Ha ke halefile kapa ke utlwile bohloko, ha se hangata ke bososelang. Ke ja dijo tse se nang phepo hape ha ke robale dihora tse lekaneng. Ke thatafallwa ke ho laola tsela eo ke ikutlwang ka yona mme sena se ama tsela eo ke tshwarang molekane wa ka le batho ba bang ka yona.”
9. Ke hobaneng ha re lokela ho kgaotsa ho halefa?
9 Le haeba motho ya re utlwisitseng bohloko a sa kope tshwarelo, re ntse re ka kgona ho fokotsa bohloko boo re bo utlwileng. Jwang? Moradi wa bo rona Georgette eo re sa tswa bua ka yena o re: “Ka mora hore re hlalane le monna wa ka, ho nkile nako hore ke mo tshwarele ke be ke tlohele ho mo jara ka pelo. Ka mora hore ke mo tshwarele ke ile ka utlwa ke imolohile ebile ke ena le kgotso.” Haeba re kgaotsa ho kwata, seo se etsa hore re qobe ho tshwara batho ba bang hampe. Hape re itswela molemo hobane re tla kgona ho tswela pele ka bophelo mme re boele re thabe. (Diprov. 11:17) O ka etsang haeba le ka mora hore o amohele hore o utlwile bohloko ebe o ntse o thatafallwa ke ho tshwarela?
BATLA DITSELA TSA HO SEBETSANA LE MAIKUTLO A HAO
10. Ke hobaneng ha re lokela ho ipha nako ya ho fola maikutlong? (Sheba ditshwantsho.)
10 O ka etsang hore o kgaotse ho utlwa bohloko? Tsela e nngwe ke hore o iphe nako ya ho fola maikutlong. Re ka bapisa taba ena le motho ya lemetseng. Ho ka hlokahala hore ho fete nako e itseng e le hore a fole. Ka tsela e tshwanang, ho ka nka nako pele re ikemisetsa ho tshwarela motho ya re utlwisitseng bohloko.—Moek. 3:3; 1 Pet. 1:22.
Ha motho a lemetse, ho hlokahala hore a itlhokomele hantle ho be ho fete nako e itseng e le hore a fole. Ho hlokahala se tshwanang le ha re utlwile bohloko (Sheba serapa sa 10)
11. Thapelo e ka o thusa jwang hore o be motho ya tshwarelang?
11 Rapela Jehova hore a o thuse hore o be motho ya tshwarelang. c Moradi wa bo rona Ann eo re buileng ka yena pejana, o hlalositse ka moo thapelo e mo thusitseng ka teng. O re: “Ke ile ka rapela Jehova ka mo kopa hore a tshwarele e mong le e mong wa rona ka lapeng ka lebaka la diphoso kapa dintho tseo re di buileng tse seng hantle. Ke ile ka ngolla ntate wa ka le mosadi wa hae e motjha lengolo mme ka ba bolella hore ke ba tshwaretse.” Ann o re ho ne ho se bonolo ho etsa jwalo empa o tswela pele ho re: “Ke tshepa hore ha e le mona ke leka ho etsisa tsela eo Jehova a tshwarelang ka yona, ntate wa ka le mosadi wa hae ba tla susumelletseha ho ithuta haholwanyane ka Jehova.”
12. Ke hobaneng ha re lokela ho tshepa Jehova eseng maikutlo a rona? (Diproverbia 3:5, 6)
12 Tshepa Jehova eseng maikutlo a hao. (Bala Diproverbia 3:5, 6.) Ka mehla Jehova o a tseba hore na ke eng e molemo bakeng sa rona. (Esa. 55:8, 9) Le ka mohla a ke ke a re re etse ntho e tla re utlwisa bohloko. Ka hoo, ha a re kgothalletsa hore re be batho ba tshwarelang, re ka kgodiseha hore ho etsa jwalo ho tla re tswela molemo. (Pes. 40:4; Esa. 48:17, 18) Haeba re ka tshepa maikutlo a rona, re ka thatafallwa ke ho tshwarela batho ba bang. (Diprov. 14:12; Jer. 17:9) Moradi wa bo rona Naomi eo re buileng ka yena pejana, o re: “Qalong ke ne ke nahana hore ho lokile ha ke sa tshwarele monna wa ka ka lebaka la ho shebella pornography. Ke ne ke tshohile hore o tla nkutlwisa bohloko hape kapa a lebale hore na o nkutlwisitse bohloko hakae. Hape ke ile ka ipehela lebaka la hore Jehova o a utlwisisa hore na ke ikutlwa jwang. Empa ke ile ka hlokomela hore taba ya hore Jehova o utlwisisa tsela eo ke ikutlwang ka yona ha e bolele hore o dumellana le maikutlo a ka. O a tseba hore na ke ikutlwa jwang le hore ho nka nako hore motho a fole empa o boetse o batla hore ke be motho ya tshwarelang.” d
ETSA DINTHO TSE TLA O THUSA HO THABA HAPE
13. Ho latela Baroma 12:18-21, re lokela ho etsang?
13 Ho tshwarela motho ya re utlwisitseng bohloko haholo, ha se taba feela ya hore ha o batle ho bua ka se etsahetseng. Haeba motho ya re utlwisitseng bohloko e le Mokrestemmoho le rona, ntho eo re lokelang ho ameha ka yona ke ho bopa kgotso. (Mat. 5:23, 24) Ho ena le ho mo halefela, re mo hauhele. Hape ho ena le ho dula re mo kwatetse, re mo tshwarele. (Bala Baroma 12:18-21; 1 Pet. 3:9) Keng e tla re thusa?
14. Re lokela ho ikemisetsa ho etsang, hona hobaneng?
14 Jehova o kgetha ho sheba makgabane a batho. Le rona re lokela ho sheba makgabane a motho ya re utlwisitseng bohloko. (2 Dikron. 16:9; Pes. 130:3) Hangata haeba re batlana le dintho tse ntle tseo motho a di etsang re tla di fumana, le teng haeba re batlana le tse mpe le tsona re tla di fumana. Ha re sheba dintho tse ntle tseo motho a di etsang, re tla nolofallwa ke ho mo tshwarela. Ka mohlala, Morabo rona Jarrod o re: “Ke nolofallwa ke ho tshwarela Mokrestemmoho le nna haeba ke bapisa phoso eo a e entseng le dintho tse ngata tseo ke di ratang ka yena.”
15. Ke hobaneng ha ho le bohlokwa ho bolella motho hore o mo tshwaretse?
15 Ntho e nngwe ya bohlokwa eo re lokelang ho e etsa ke ho bolella motho ya re utlwisitseng bohloko hore re mo tshwaretse. Hobaneng? Moradi wa bo rona Naomi eo re buileng ka yena pejana o re: “Monna wa ka o ile a mpotsa hore na ke mo tshwaretse. Ha ke ne ke batla ho re: ‘Ke o tshwaretse,’ ke ne ke sa kgone. Ke ile ka hlokomela hore ha ke eso mo tshwarele ka pelo yohle. Empa ha nako e ntse e ya, ke ile ka kgona ho bua mantswe ao a mararo a bohlokwa a reng: ‘Ke o tshwaretse.’ Ha ke bua mantswe ao, o ile a tlala dikeledi ka mahlong. Ke ne ke maketse ha ke bona ka moo a neng a imolohile ka teng ka mora hore ke mo tshwarele. Ka mora moo, le nna ke ile ka utlwa ke imolohile ebile ke ena le kgotso. Ho tloha ka nako eo, ke ile ka boela ka mo tshepa mme hona jwale re se re le metswalle ya hlooho ya kgomo hape.”
16. Ke dintho dife tse tharo tseo o ithutileng tsona tse ka o thusang ho tshwarela?
16 Jehova o batla hore re be batho ba tshwarelang. (Bakol. 3:13) Le ha ho le jwalo, ho ka ba thata ho etsa seo. Empa ntho e ka re thusang ke ho amohela hore re utlwile bohloko, hape re batle ditsela tsa ho sebetsana le maikutlo a rona. Ka mora moo, re ka etsa dintho tse tla re thusa hore re thabe hape.—Sheba lebokose le reng “ Dintlha Tse Tharo Tse ka Thusang ho Tshwarela.”
NAHANA KA MELEMO E TLISWANG KE HO TSHWARELA
17. Ho tshwarela ho re tswela molemo jwang?
17 Re na le mabaka a mangata a hore re be batho ba tshwarelang. A mang a ona ke ana a latelang. La pele, re etsisa Ntate wa rona ya mohau e leng Jehova ebile re a mo kgahlisa. (Luka 6:36) La bobedi, re a bontsha hore re ananela tsela eo Jehova a re tshwaretseng ka yona. (Mat. 6:12) La boraro, re thabela bophelo bo botle mme re boloka setswalle sa rona le batho ba bang se le matla.
18, 19. Ho ka etsahalang ha re tshwarela batho ba bang?
18 Ha re tshwarela batho ba bang, ho ka etsahala dintho tse ntle tseo re sa di lebellang. Ka mohlala, hlokomela se ileng sa etsahalla Moradi wa bo rona Denise, eo re buileng ka yena pejana. Le hoja Moradi wa bo rona Denise a ne a sa tsebe ka nako eo, monna ya neng a ba baketse kotsi ya koloi o ne a rerile ho ipolaya ka mora nyewe ya hae. Le ha ho le jwalo, o ile a angwa pelo ke tsela eo Moradi wa bo rona Denise a ileng a mo tshwarela ka yona hoo a ileng a qala ho ithuta Bibele le Dipaki Tsa Jehova.
19 Re ka utlwa ho tshwarela motho e mong e le ntho e thata ka ho fetisisa eo re lokelang ho e etsa. Empa e ka boela ya eba ntho e re tswelang molemo ka ho fetisisa. (Mat. 5:7) Ka hoo, e se eka kaofela ha rona re ka etsa sohle seo re ka se kgonang ho etsisa Jehova ka ho tshwarela batho ba bang.
PINA YA 125 “Ho Thaba ba Mohau!”
a Mabitso a mang a fetotswe.
b Boemong bo kang bona, Mokreste e mong le e mong o lokela ho ikgethela hore na o tla etsa qeto efe.
c Kena ho jw.org/st-za mme o shebelle divideo tsa dipina tsa Broadcasting tse kang ya “Nthuse ke Tshwarele” le “Re Tla ba Metswalle Hape.”
d Le hoja ho shebella pornography e le sebe ebile ho utlwisa molekane ya se nang molato bohloko, ha ho fe molekane ya se nang molato mabaka a mangolo a ho hlala.
