NA O kile wa hlokomela hore batho ba bangata mehleng ee, ba batla maemo a phahameng le ho tshwarwa ka tsela e kgethehileng e etsang eka ba betere ho feta batho ba bang? Le ha ba ka tshwarwa ka tsela e kgethehileng ba ntse ba nahana hore ba lokela ho tshwarwa ka tsela kgethehileng le ho feta. Tsela eo ba nahanang ka yona e bontsha hore ba itjheba bo bona ebile ha ba ananele dintho tseo ba nang le tsona. Ke yona tsela eo Bibele e ileng ya re batho ba tla itshwara ka yona mehleng ena ya bofelo.—2 Tim. 3:2.

Ha se ntho e ntjha hore batho ba itjhebe bobona. Ka mohlala, Adama le Eva ba ne ba batla ho ikgethela hore na ke eng e nepahetseng le e fosahetseng mme kaofela re hlahelwa ke mathata ka lebaka la qeto ya bona. Mohlala o mong ke wa Morena Uzia wa Juda, o ne a nahana hore o na le tokelo ya ho tjhesa dibano ka tempeleng empa ho hang o ne a sa lokela ho etsa jwalo. (2 Dikron. 26:​18, 19) Ka tsela e tshwanang, Bafarisi le Basaduse ba ne ba nahana hore Modimo o lokela ho ba tshwara ka tsela e betere ho feta batho ba bang hobane feela ba hlaha lelokong la Abrahama.—Mat. 3:9.

Re phela hara batho ba itjhebileng bobona le ba ikgohomosang mme moya oo o ka re hahlamela. (Bagal. 5:26) Re ka nna ra nahana hore re lokela ho fuwa ditokelo tse itseng kapa ho tshwarwa ka tsela e itseng e kgethehileng. Re ka thuswa ke eng ho qoba ho nahana ka tsela ee? Re lokela ho qala pele ka ho utlwisisa hore na Jehova o ikutlwa jwang ka ho nahana jwalo. Re tlo thuswa ke melaomotheo e latelang ya Bibele e mmedi.

 Jehova ke yena ya etsang qeto ya hore na re tshwanelwa ke eng. Nahana ka mehlala e latelang.

• Jehova o batla hore monna a ikutlwe a hlomphuwa ke mosadi wa hae. Hape o batla hore mosadi a ikutlwe a ratwa ke monna wa hae. (Baef. 5:33) Banyalani ba lokela ho bontsha lerato le mofuthu ho balekane ba bona feela. (1 Bakor. 7:3) Hape, batswadi ba lebelletse hore bana ba bona ba ba mamele. Bana le bona ba lebelletse hore batswadi ba ba rate le ho ba hlokomela.—2 Bakor. 12:14; Baef. 6:2.

• Jehova o batla hore re hlomphe baholo ka lebaka la mosebetsi o boima oo ba o etsang ho hlokomela phutheho. (1 Bathes. 5:12) Le ha ho le jwalo, ha ba na tokelo ya ho hatella badumedimmoho le bona.—1 Pet. 5:​2, 3.

• Modimo o file balaodi tokelo ya hore ba batle lekgetho ba be ba hlomphuwe ke batho ba ka tlasa bolaodi ba bona.—Bar. 13:​1, 6, 7.

Jehova o re fa dintho tse sa re tshwanelang ka lerato. Ka hobane re futsitse sebe ho Adama, ntho feela e re tshwanelang ke lefu. (Bar. 6:23) Ho ntse ho le jwalo, Jehova o re hlohonolofatsa ka ditsela tse ngata hobane a re rata. (Pes. 103:​10, 11) Le hoja ditlhohonolofatso kapa ditokelo tsena di sa re tshwanele, o re fa tsona hobane a re rata ebile a le mosa haholo.—Bar. 12:​6-8; Baef. 2:8.

Eba hlokolosi hore o se ke wa nahana jwalo ka batho ba lefatshe lena la Satane. Re ka nna ra nahana hore re tshwanelwa ke dintho tse betere ho feta batho ba bang re sa hlokomele. Jesu o ile a etsa papiso ya basebetsi ba patalwang ka denari ho bontsha hore ho ka ba bonolo hore re ikutlwe eka re betere ho feta batho ba bang. Basebetsi ba bang ba ile ba fihla hoseng, ba sebetsa letshehare kaofela ho tjhesa, ha ba bang bona ba qadile ho sebetsa hora feela pele mosebetsi o fela. Basebetsi ba fihlileng pele ba ile ba nahana hore ba lokela ho patalwa ho feta ba bang ka lebaka la mosebetsi oo ba o entseng. (Mat. 20:​1-16) Ka ho sebedisa papiso ena, Jesu o ne a bontsha hore balatedi ba hae ba lokela ho kgotsofalla seo Modimo a ba fang sona ka lerato.

Eba motho ya lebohang eseng ya dulang a lebelletse ho fuwa. (1 Bathes. 5:18) Etsisa Moapostola Pauluse ya sa kang a kopa dintho tseo a neng a di hloka ho badumedimmoho le yena ba Korinthe le hoja a ne a ena le tokelo ya ho etsa  jwalo. (1 Bakor. 9:​11-14) Re lokela ho ananela dintho tseo batho ba re fang tsona empa re se ke ra lebella hore ba tlameha ho re fa tsona.

Ikokobetse. Ha motho a inahana ho tlola, hangata o utlwa a tshwanelwa ke dintho tse ngata ho feta tseo a nang le tsona. Boikokobetso bo tla re thusa hore re se ke ra nahana ka tsela eo e kotsi.

Moprofeta Daniele o re behetse mohlala o motle wa ho bontsha boikokobetso. Ka ha o ne a tswa lelapeng le hlahelletseng, a le motle, a hlalefile a bile a ena le bokgoni ba ho etsa mesebetsi e mengata, o ne a ka nna a nahana hore ho tshwarwa ka tsela e kgethehileng le ditokelo tseo a neng a di fumana di ne di mo tshwanela. (Dan. 1:​3, 4, 19, 20) Le ha ho le jwalo, Daniele o ile a dula a ikokobeditse mme boikokobetso ba hae ke bona bo entseng hore Jehova a mo rate haholo.—Dan. 2:30; 10:​11, 12.

A re qobeng ho ba jwalo ka batho ba lefatshe lena, ba inkang ba le bohlokwa ho feta batho ba bang ba bile ba itjheba bobona feela. Ho ena le hoo, a re tsweleng pele ho thabela ditlhohonolofatso tseo Jehova a dulang a re fa tsona ka lebaka la mosa wa hae.