SEHLOOHO SE ITHUTWANG SA 7
PINA YA 15 Rorisang Letsibolo la Jehova!
Re Rua Molemo Ofe ha Jehova a re Tshwarela?
“O tshwarela e le ka nnete.”—PES. 130:4.
NTLHAKGOLO
Re tlo ithuta ka dipapiso tseo Bibele e di sebedisang ho re thusa ho ananela hore ebe Jehova o re tshwarela ka pelo yohle re le batho ka bomong.
1. Ke hobaneng ha ho le thata ho tseba hore na motho o bolelang ha a re o o tshwaretse?
“KE O TSHWARETSE.” Na ha ho thabise ho utlwa mantswe aa ka mora hore o utlwise motho e mong bohloko? Empa ha e le hantle motho o bolelang ha a re: “Ke o tshwaretse”? Na o bolela hore le ka ba metswalle hape, kapa o mpa feela a re ha a sa batla ho bua ka taba eo? Ho ka ba thata ho tseba hore na motho o bolelang ha a re o o tshwaretse.
2. Mangolo a reng ha a bua ka tsela eo Jehova a tshwarelang ka yona? (Sheba naletsana.)
2 Tsela eo Jehova a re tshwarelang ka yona re le batho ba sa phethahalang, e fapane hole le tsela eo re tshwarelanang ka yona. Ha ho na motho ya ka tshwarelang jwalo ka Jehova. Mopesaleme o ile a re ka Jehova: “O tshwarela e le ka nnete e le hore batho ba o hlomphe.” a (Pes. 130:4) Jehova o “tshwarela e le ka nnete.” Ke mohlala o motle wa ka moo re lokelang ho tshwarelana ka teng. Ditemaneng tse ding tsa mangolo a Seheberu, bangodi ba bang ba Bibele ba sebedisa lentswe le sebediswang feela ha ho buuwa ka tsela eo Jehova a tshwarelang ka yona.
3. Tsela eo Jehova a tshwarelang ka yona e fapane jwang le eo batho ba tshwarelanang ka yona? (Esaia 55:6, 7)
3 Ha Jehova a re tshwarela, o hlakola dibe tsa rona ka ho felletseng. Re ka boela ra ba metswalle e haufiufi le yena. Ka nnete re a thaba hore ebe Jehova o re tshwarela ka pelo yohle le ha re ntse re mo sitelwa hangata.—Bala Esaia 55:6, 7.
4. Jehova o re thusa jwang hore re utlwisise tsela eo a re tshwarelang ka yona?
4 Haeba tsela eo Jehova a re tshwarelang ka yona e fapane le eo re tshwarelang ba bang ka yona, re ka thuswa ke eng ho utlwisisa tsela eo a re tshwarelang ka yona? Sehloohong sena, re tlo ithuta ka dipapiso tseo Jehova a di sebedisang ho tshwantshetsa tsela eo a re tshwarelang ka yona. Di tla re thusa ho bona ka moo Jehova a hlakolang dibe tsa rona ka teng le ho etsa hore re boele re be metswalle ya hae. Ha re ntse re hlahloba dipapiso tsena, re tla rata Ntate wa rona le ho feta, ya re bontshang mosa le mohau ka ho re tshwarela ka ditsela tse ngata.
JEHOVA O TLOSA DIBE TSA RONA
5. Ho etsahalang ha Jehova a re tshwarela?
5 Hangata ka Bibeleng, dibe di tshwantshwa le mojaro o boima. Ha Morena Davida a bua ka dibe tsa hae o ile a re: “Diphoso tsa ka di bokellane ka hodima hlooho ya ka. Di nkimetse jwalo ka mojaro o boima haholo.” (Pes. 38:4) Jehova o tshwarela baetsadibe ba bakileng. (Pes. 25:18; 32:5) Lentswe la Seheberu le sebedisitsweng bakeng sa “ho tshwarela” le bolela “ho imolla” kapa “ho tlosa.” Ha Jehova a re tshwarela dibe, ho jwalo ka ha eka o tlosa mojaro o boima mahetleng a rona mme o a re imolla.
“O tshwarela dibe” (Pes. 32:5)
6. Jehova o suthisetsa dibe tsa rona hole hakae?
6 Mohlala o mong o re thusang ho bona hore na Jehova o suthisetsa dibe tsa rona hole hakae le rona o hlaha ho Pesaleme ya 103:12, e reng: “Feela jwalo ka ha botjhabela bo le hole le bophirimela, ka ho tshwanang o suthiseditse diphoso tsa rona hole le rona.” Botjhabela bo hole le bophirimela mme ha ho mohla dibaka tseo tse pedi di ka kopanang. Ka mantswe a mang, Jehova o suthisetsa dibe tsa rona hole le rona. Re kgodisehile hore Jehova o re tshwarela ka pelo yohle.
“Feela jwalo ka ha botjhabela bo le hole le bophirimela” (Pes. 103:12)
7. Mikea 7:18, 19 e re Jehova o etsang ka dibe tsa rona?
7 Le hoja ka tsela ya tshwantshetso Jehova a suthisetsa dibe tsa rona hole le rona, na o tla dula a di hopola? Tjhe. Ha Morena Ezekiase a bua ka Jehova o ile a re: “O lahletse dibe tsohle tsa ka ka mora hao,” kapa jwalo ka ha naletsana e re: “O tlositse dibe tsohle tsa ka mahlong a hao.” (Esa. 38:9, 17; nal.) Mantswe ana a ka boela a fetolelwa tjena: “O entse eka ha ke a ka ka etsa sebe ho hang.” Sena se bolela hore Jehova o lahlela dibe tsa batho ba bakileng hole moo a ke keng a hlola a di bona. Bibele e sebedisa papiso e nngwe ho re thusa hore re utlwisise taba ena hantle, papiso eo e hlaha ho Mikea 7:18, 19. (E bale.) Ditemana tsena di bontsha hore Jehova o lahlela dibe tsa rona botebong ba lewatle. Mehleng ya kgale, ho ne ho ke ke ha kgoneha ho fumana ntho e neng e wetse botebong ba lewatle.
“O lahletse dibe tsohle tsa ka ka mora hao” (Esa. 38:17)
“O tla lahlela dibe tsohle tsa bona botebong ba lewatle” (Mik. 7:19)
8. Re se re ithutile eng ho fihlela ha jwale?
8 Dipapisong tsena, re ithutile hore ha Jehova a re tshwarela o re imolla ka ho felletseng e le hore re se ke ra hlola re ikutlwa re le molato. Nnete ya taba ena e ile ya hatiswa ke Davida ha a re: “Ho thaba bao diketso tsa bona tse sa yeng ka molao di tshwaretsweng le bao dibe tsa bona di kwahetsweng. Ho thaba motho eo Jehova a ke keng a hopola sebe sa hae ho hang.” (Bar. 4:6-8) Jehova o tshwarela e le ka nnete.
JEHOVA O HLAKOLA DIBE TSA RONA
9. Jehova o sebedisa papiso efe ho bontsha hore na o re tshwarela haholo hakae?
9 Jehova o sebedisa papiso e nngwe ho re thusa ho ananela ka moo a sebedisang sehlabelo sa Jesu ka teng ho hlakola dibe tsa batho ba bakileng. Bibele e re Jehova o hlatswa le ho tlosa dibe e le hore moetsadibe a ka hlweka. (Pes. 51:7; Esa. 4:4; Jer. 33:8) Jehova o re: “Le hoja dibe tsa lona di le kgubedu, di tla ba tshweu jwalo ka lehlwa. Le hoja di le kgubedu tlere! di tla ba tshweu jwalo ka boya.” (Esa. 1:18) Le hoja ho le thata ho tlosa letheba le lekgubedu leseleng le lesweu, Jehova yena o sebedisa papiso ena ho re kgodisa hore a ka tlosa dibe tsa rona, a di hlatswa ka ho felletseng ha eba jwalo ka ha eka ha re a ka ra di etsa.
“Le hoja dibe tsa lona di le kgubedu, di tla ba tshweu jwalo ka lehlwa” (Esa. 1:18)
10. Bibele e sebedisa papiso efe ho re thusa ho bona ka moo Jehova a re tshwarelang ka bolokolohi ka teng?
10 Sehloohong se fetileng, re ithutile hore Bibele e tshwantsha sebe le “sekoloto.” (Mat. 18:32-35) Ka hoo, nako le nako ha re sitelwa Jehova, ho tshwana le ha re ntse re ikenya sekolotong le ho feta. Re mo kolota haholo! Empa ha Jehova a re tshwarela ho tshwana le ha eka o hlakola sekoloto seo. Le ka mohla Jehova a ke ke a batla hore re patale sekoloto seo a se hlakotseng. Ka nnete re ikutlwa re imolohile ha Jehova a re tshwarela.
“O re tshwarele diphoso tsa rona” (Mat. 6:12)
11. Bibele e bolelang ha e re dibe tsa rona di ‘hlakotswe’? (Diketso 3:19)
11 Ha Jehova a hlakola dikoloto tsa rona kapa dibe tsa rona, o di hlakola ka ho felletseng. (Bala Diketso 3:19.) Ha re bua ka ho hlakolwa ha sekoloto, re ka nahana ka motho ya nang le buka eo a ngolang mabitso a batho ba mo kolotang ho yona. Ha motho a mo patala, o hlakola lebitso la hae le sekoloto seo ka pene. Le ha ho le jwalo, re ntse re ka bona lebitso le sekoloto seo. Empa e le hore re utlwisise tsela eo Jehova a hlakolang dibe tsa rona ka yona, re ka nahana ka enke e neng e sebediswa mehleng ya pele e neng e ka hlakolwa ka sepontjhe se metsi. Ka hoo, ha sekoloto se ne se ‘hlakolwa,’ re ne re ke ke ra kgona ho bona se neng se ngotswe. Re ananela haholo hore ebe ha Jehova a re tshwarela, o hlakola dibe tsa rona ka ho felletseng jwalo ka ha eka ha re eso di etse.—Pes. 51:9.
“Dibe tsa lona di tle di hlakolwe” (Dik. 3:19)
12. Re ithutang papisong ya leru le leholo?
12 Jehova o sebedisa papiso enngwe ho hlalosa tsela eo a kwahelang dibe ka yona. O re: “Ke tla kwahela diphoso tsa hao jwalo ka ha eka di kwahetswe ka leru le dibe tsa hao jwalo ka ha eka di kwahetswe ka leru le leholo.” (Esa. 44:22) Ha Jehova a re tshwarela, ho jwalo ka ha eka o kwahela diphoso tsa rona ka leru le leholo e le hore a se ke a hlola a di bona mme le rona re se ke ra hlola re di bona.
“Ke tla kwahela diphoso tsa hao jwalo ka ha eka di kwahetswe ka leru” (Esa. 44:22)
13. Re ikutlwa jwang ha Jehova a re tshwarela?
13 Re ithutang dipapisong tsee? Ha Jehova a se a re tshwaretse, ha re a lokela ho ikutlwa eka re tla jara molato oo bophelo bohle ba rona. Sehlabelo sa Jesu Kreste se entse hore dibe tsa rona di tshwarelwe ka ho felletseng. Ha Jehova a re tshwarela, ho ba feela jwalo ka ha eka ha re eso etse dibe tseo ho hang. Ena ke tsela eo Jehova a re tshwarelang ka yona haeba re baka e le ka nnete.
JEHOVA O RE ETSA METSWALLE YA HAE E HAUFI HAPE
Tsela eo Ntate wa rona ya lehodimong a re tshwarelang ka yona e re fa monyetla wa hore re be le kamano e ntle le yena (Sheba serapa sa 14)
14. Ke hobaneng ha re ka kgodiseha hore Jehova o re tshwarela e le ka nnete? (Sheba ditshwantsho.)
14 Re ka ba metswalle ya Jehova hape hobane o re tshwarela ka pelo yohle mme sena se re thusa hore re se ke ra dula re ikutlwa re le molato. Re ka kgodiseha hore Jehova ha a re jare ka pelo ebile ha a batle menyetla ya hore a re fe kotlo. Ho hang sena se ke ke sa etsahala. Ke hobaneng ha re ka kgodiseha hore Jehova o a re tshwarela? Hobane o ile a re ho moprofeta Jeremia: “Ke tla tshwarela diphoso tsa bona mme ha ke sa tla hlola ke hopola dibe tsa bona.” (Jer. 31:34) Moapostola Pauluse o ne a qotsa mantswe ao ha a re: “Ha ke sa tla hlola ke hopola dibe tsa bona.” (Baheb. 8:12) Mantswe aa a bolelang?
“Ha ke sa tla hlola ke hopola dibe tsa bona” (Jer. 31:34)
15. Jehova o bolelang ha a re a ke ke a hlola a hopola dibe tsa rona?
15 Ka Bibeleng, ha se ka dinako tsohle polelwana “ho hopola” e sebediswang ha ho buuwa ka motho ya nahanang ka ntho e nngwe e etsahetseng kgale. Ho ena le hoo, e ka boela ya sebediswa ha ho buuwa ka hore motho a etse ketso e itseng. Monna wa setlokotsebe ya neng a kgokgothetswe pela Jesu o ile a re ho yena: “Jesu, o nkgopole ha o kena Mmusong wa hao.” (Luka 23:42, 43) O ne a sa re feela Jesu a tle a mo nahane ha a kena Mmusong wa hae. Tsela eo Jesu a ileng a mo araba ka yona, e bontsha hore o ne a sa tlo nahana ka yena feela empa o ne a tlo mo etsetsa ntho e nngwe ho bontsha hore o a mo hopola, e leng ho mo tsosa bafung. Ka hoo, ha Jehova a re a ke ke a hlola a hopola dibe tsa rona, o bolela hore o se a ntse a re tshwaretse mme ha ho le ka mohla a tla re ahlola ka lebaka la tsona.
16. Bibele e sebedisa papiso efe ho hlalosa hore na motho o ikutlwa a lokolohile hakae ha a tshwaretswe e le ka nnete?
16 Bibele e sebedisa papiso e nngwe ho re thusa ho utlwisisa hore na motho o ikutlwa a lokolohile hakae ha a tshwaretswe e le ka nnete. E re ka ha ha re a phethahala, re “makgoba a sebe.” Empa re leboha Jehova hore ebe o a re tshwarela, ka ha seo se etsa hore re be makgoba a ‘lokolotsweng sebeng.’ (Bar. 6:17, 18; Tshen. 1:5) Ka nnete ho tseba hore Jehova o a re tshwarela, ho etsa hore re ikutlwe re thabile haholo jwalo ka ha eka re lokollotswe bokgobeng.
“Le ile la lokollwa sebeng” (Bar. 6:18)
17. Ke jwang re ikutlwang eka re fodile ha Jehova a re tshwarela? (Esaia 53:5)
17 Bala Esaia 53:5. Papiso ya ho qetela eo re tlo bua ka yona e bontsha hore re tshwana le motho ya nang le bolwetse bo bolayang. Ka ha Jehova o fane ka Mora wa hae e le sehlabelo, ho jwalo ka ha eka o re fodisitse. (1 Pet. 2:24) Ha re etsa sebe, re senya setswalle sa rona le Jehova. Le ha ho le jwalo, Jehova a ka re tshwarela ra boela ra ba metswalle ya hae ka lebaka la sehlabelo sa Jesu. Feela jwalo ka ha motho ya neng a kula hampe a thaba haholo ha ngaka e mo fodisa, le rona re thaba haholo ha Jehova a re amohela mme re boela re eba metswalle ya hae hobane a re tshwaretse.
“Re fodisitswe ka lebaka la maqeba a hae” (Esa. 53:5)
TSELA EO JEHOVA A RE TSHWARELANG KA YONA E RE AMA JWANG?
18. Re ithutile eng dipapisong tse fapaneng tse hlahang ka Bibeleng, tse buang ka tsela eo Jehova a re tshwarelang ka yona? (Sheba lebokose le reng “Tsela eo Jehova a re Tshwarelang ka Yona.”)
18 Re ithutileng dipapisong tse ka Bibeleng tse buang ka tsela eo Jehova a re tshwarelang ka yona? Ha Jehova a re tshwarela dibe, ho jwalo ka ha eka ha re eso di etse ho hang hape re ka kgodiseha hore a ke ke a re ahlola ka lebaka la tsona nakong e tlang. Taba ena e etsa hore re be le setswalle se matla le Ntate wa rona ya lehodimong. Le ha ho le jwalo, re a tseba hore taba ya hore Jehova o a re tshwarela ke mpho eo a re fang yona hobane a re rata a bile a le mosa, eseng hobane a tlamehile ho re fa yona.—Bar. 3:24.
19. (a) Re thabiswa ke eng? (Baroma 4:8) (b) Re tlo bua ka eng sehloohong se latelang?
19 Bala Baroma 4:8. Ka nnete re a thaba hore ebe Jehova ke Modimo ‘ya tshwarelang e le ka nnete.’ (Pes. 130:4) Empa ho na le ntho ya bohlokwa eo re lokelang ho e etsa haeba re batla hore Jehova a re tshwarele. Jesu o ile a re: “Haeba le sa tshwarele batho diphoso tsa bona, Ntate wa lona le yena a ke ke a le tshwarela.” (Mat. 6:14, 15) Ka hoo, ho hlakile hore ke ha bohlokwa hore re etsise Jehova ka hore re tshwarele batho ba bang. Empa re ka etsa seo jwang? Re tlo bua ka taba ena sehloohong se latelang.
PINA YA 46 Re a o Leboha, Jehova
a Ka Seheberu, polelwana e sebedisitsweng lengolong lena e buang ka “ho tshwarela” e bolela ho tshwarela e le ka nnete mme tsela ena eo Jehova a tshwarelang ka yona e fapane le eo batho ba tshwarelanang ka yona. Dibibele tse ngata ha di bontshe phapang ena empa Phetolelo ya Lefatshe le Letjha ya Mangolo a Halalelang e bontsha hore ho tshwarela ho hlahang ho Pesaleme ya 130:4, ho a ikgetha.
