MORADIWABO rona wa pulamadiboho ya bitswang Sylviana, ya dilemo tse ka bang 25, o re: “Ke ile ka kgala ha ke utlwa metswalle ya ka e sebeletsang tlhokahalong, e bua kamoo ho leng monate kateng dikabelong tsa yona. Le ha ho le jwalo, ke ne ke utlwa eka ho sebeletsa tlhokahalong ho ka hodima matla a ka.”

Na le wena o ikutlwa jwalo ka Sylviana? Na le wena o lakatsa ho ya sebeletsa moo ho nang le tlhokahalo ya bahweletsi, empa ha o tshepe hore o ka kgona? Haeba ho jwalo, o se ke wa nyahama. Ka thuso ya Jehova, bara le baradibabo rona ba dikete ba ile ba kgona ho hlola mathata a neng a ba thibela ho ya tlhokahalong. Ebe Jehova o ile a thusa ba bang ba bona jwang? Ho fumana karabo, a re ke re eteleng Madagascar, e leng sehlekehleke sa bone ho tse kgolo ka ho fetisisa lefatsheng.

Dilemong tse 10 tse fetileng, bahweletsi ba tjhesehang ba ka hodimo ho 70 ba ile ba tla ho tla sebeletsa tshimong ena ya Africa e behang ditholwana, ba tswa dinaheng tse 11 tse fapaneng. * Ntle le moo, bahweletsi ba bangata ba Madagascar ba ile ba ithaopela ho ya dibakeng tse ding tse nang le tlhokahalo sehlekehlekeng seo se seholo. A re ke re buisane le ba bang ba bona.

Louis le Perrine, e leng banyalani ba dilemo tse ka bang 30, ba ile ba fallela Madagascar ba tswa naheng ya France. E ne e se e le dilemo ba lakatsa ho eketsa tshebeletso ya bona ka ho ya sebeletsa naheng e nngwe, empa Perrine o ne a tshaba ho falla. O re: “Ke ne ke tshaba ho ya moo ke sa tsebeng. Ho ne ho se bonolo ho siya ba lelapa, phutheho, ntlo ya rona le bophelo boo re neng re se re bo tlwaetse. Ho tshwenyeha ka dintho tsena e ne e le bona bothata ba ka.” Ka 2012, Perrine o ile a iteta sebete mme yena le Louis ba falla. Ebe Perrine o ikutlwa jwang ka mora hore ba etse qeto eo? O re: “Ha ke hetla morao, nka re tumelo ya ka e ile ya tiya ha ke bona kamoo Jehova a ileng a re thusa kateng tshebeletsong ya rona.” Louis o phaella ka ho re: “Nahana feela, Sehopotsong sa rona sa pele Madagascar, batho ba 10 bao re ithutang Bibele le bona ba ile ba tla!”

Keng e ileng ya matlafatsa banyalani baa hore ba tswela pele ka kabelo ya bona le ha ba kopana le  mathata? Ba ile ba rapela Jehova ka tiyo ho mo kopa hore a ba fe matla a ho mamella. (Bafil. 4:13) Louis o re: “Ka sebele Jehova o ile a araba dithapelo tsa rona mme ra fumana ‘kgotso e tswang ho Modimo.’ Re ile ra tsepamisa kelello dinthong tse ntle tseo re neng re di thabela tshebeletsong ya rona. Hape, metswalle ya rona kwana lapeng e ile ya re romella mangolo le melaetsa ya email ho re kgothatsa.”—Bafil. 4:6, 7; 2 Bakor. 4:7.

Jehova o ile a hlohonolofatsa Louis le Perrine ka ho enneng ka lebaka la mamello eo ba ileng ba e bontsha. Louis o re: “Ka October 2014, re ile ra ya Sekolong sa Bibele sa Banyalani ba Bakreste * se neng se tshwaretswe France. Sekolo seo e bile mpho eo re ke keng ra e lebala e tswang ho Jehova.” Ha ba tswa sekolong seo, banyalani bana ba ile ba thaba haholo ha ba ne ba abelwa ho kgutlela Madagascar.

Ha banyalani ba bang ba tswang France e leng Didier le Nadine, ba fallela Madagascar ka 2010, ba ne ba le dilemo tse ka hodimo ho 50. Didier o re: “Ha re sa le batjha re ile ra ba bopulamadiboho, ka mora moo ra ba le bana ba bararo. Ha bana ba se ba hodile, re ile ra nahana ka ho ya sebeletsa naheng e nngwe.” Nadine o re: “Ke ne ke tshaba ho ba hole le bana ba ka, empa ba ile ba re ho rona: ‘Haeba le ka ya tlhokahalong, re tla ba motlotlo ka lona!’ Mantswe a bona a ile a re kgothatsa yaba re a falla. Le hoja re se re le hole le bona, re thabela hore re ntse re kgona ho bua le bona kamehla.”

Ho ne ho se bonolo hore Didier le Nadine ba ithute puo ya Semalagasy. Nadine o re: “Re se re hodile.” Jwale ba ile ba thuswa keng? Ba ile ba qala ka ho kopanela phuthehong ya Sefrench. Hamorao ha ba se ba utlwa eka ba ka kgona ho ithuta Semalagasy, ba ile ba ya phuthehong ya puo eo. Nadine o re: “Batho ba bangata bao re kopanang le bona tshimong ba rata ho ithuta Bibele. Hangata ba a re leboha ha re ba etetse. Ke ne ke qala ho ba tshimong e monate hakaalo! Ruri ke rata tshimo ya mona. Ke tsoha ke labalabela ho ya tshimong hoseng ho hong le ho hong!”

Didier o a qaboha ha a hopola nako eo a neng a ntse a ithuta Semalagasy ka yona. O re: “Ke hopola mohla ke neng ke tshwere seboka sa phutheho empa ke sa utlwe letho ha bara le baradibabo rona ba araba. Ka mora karabo ka nngwe, ke ne ke re feela: ‘Re a leboha.’ Ka mora hore ke lebohe karabo ya moradiwabo rona e mong, ba neng ba dutse ka mora hae ba ile ba leka ho mpontsha hore karabo ya hae ha e ya nepahala. Kapelepele ke ile ka supa morabo rona e mong hore a arabe, mme ke nahana hore o ile a fana ka karabo e nepahetseng.”

Kopanong ya Setereke ka 2005, Thierry le mosadi wa hae Nadia, ba ile ba shebella drama e neng e na le sehlooho se reng “Hahamalla Mesebetsi e Tlotlisang Modimo.” Drama eo ya Bibele e neng e bua ka Timothea, e ile ya ba ama mme ya etsa hore ba lakatse ho ya sebeletsa tlhokahalong. Thierry o re: “Ha drama eo e fela, ke ile ka sebela mosadi wa ka ha batho ba  ntse ba opa matsoho, ka re: ‘Re ya tlhokahalong akere?’ Mosadi wa ka o ile a re le yena o ne a re o tjho jwalo ho nna.” Kapele ka mora moo, ba ile ba qalella ho nka mehato e neng e tla ba thusa hore ba ye tlhokahalong. Nadia o re: “Hanyane hanyane, re ile ra bebofatsa bophelo ba rona ka hore re fokotse dintho tseo re nang le tsona. Re ile ra etsa sena ho fihlela re setse feela ka dintho tse fellang ka hara disutikeisi tsa rona tse nne!”

Ba fihlile Madagascar ka 2006 mme esale ba natefelwa ke tshimo ya teng. Nadia o re: “Ho monate haholo ho buisana le batho ba mona.”

Le ha ho le jwalo, banyalani bana ba ile ba tobana le bothata ka mora dilemo tse 6 ba le moo. Mme wa Nadia ya dulang France e leng Marie-Madeleine, o ile a wa mme a robeha letsoho a ba a lemala hloohong. Ka mora hore banyalani bana ba buisane le ngaka e neng e thusa mme wa bona, ba ile ba kopa Marie-Madeleine ho tla dula le bona Madagascar. Le hoja a ne a le dilemo di 80 ka nako eo, o ile a dumela ho tsamaya le bona. Marie-Madeleine o ikutlwa jwang ka ho phela naheng e nngwe? O re: “Ho na le dintho tse ding tsa sebakeng sena tseo ho ntseng ho le thata hore ke di tlwaele haholoholo hobane ke se ke itsofalletse. Le ha ho le jwalo, ke thabela ho ba sebakeng sena hobane ke utlwa eka ho na le seo le nna ke se etsang ka phuthehong ya rona. Ho nthabisang le ho feta ke hore tokisetso ena e thusitse moradi wa ka le mokgwenyana ho tswela pele ka kabelo ya bona.”

Riana ke morabo rona ya dilemo tse ka bang 20. O holetse sebakeng se mobu o motle se bitswang Alaotra Mangoro, se karolong e ka leboya ya Madagascar. O ne a pasa hantle sekolong mme a batla ho ya yunivesithi. Empa maikutlo a hae a ile a fetoha ka mora hore a ithute Bibele. Riana o re: “Ke ile ka ikitlaetsa hore ke qete sekolo kapele mme ka re ho Jehova thapelong: ‘Ha nka pasa metriki, ke a o tshepisa hore ke tla ba pulamadiboho.’” Le jwale Riana o ile a phelela tshepiso ya hae. Ha a qeta sekolo, o ile a dula le morabo rona e mong wa pulamadiboho, a fumana mosebetsi wa matsatsi, mme a qala ho bula madiboho. O re: “Ena ke qeto e molemo ka ho fetisisa eo nkileng ka e etsa bophelong.”

Le ha ho le jwalo, ba lelapa la habo Riana ba ne ba sa utlwisise hore na ke hobaneng ha a sa ye yunivesithi. O re: “Ntate, rangwane le nkgono ba ne ba nkgothalletsa hore ke ye sekolong. Empa ke ne ke sa batle ho tlohela bopulamadiboho.” Ka mora nakwana, Riana o ile a lakatsa ho ya sebeletsa tlhokahalong. O ne a susumetswa keng? O re: “Ditsotsi di ile tsa thuba moo re dulang mme tsa nka dintho tsa ka tse ngata. Ketsahalo ena e ile ya nkgopotsa mantswe a Jesu a reng re ‘ipolokele matlotlo lehodimong.’ Kahoo, ke ile ka etsa qeto ya ho hahamalla dintho tse matlafatsang kamano ya ka le Jehova.” (Mat. 6:19, 20) O ile a fallela sebakeng se nang le komello karolong e ka borwa ya naha, se dikhilomitara tse 1 300 ho tloha moo a neng a dula teng. Karolong eo ho dula batho ba buang Setandroy. Ke hobaneng ha a ile a ya sebakeng seo?

Kgwedi pele dintho tsa Riana di utsuwa, o ne a se a qadile ho ithuta Bibele le banna ba babedi ba buang Setandroy. O ile a ithuta mantswe a mmalwa a puo ya bona mme seo se ile sa etsa hore a nahane ka batho ba bangata ba buang puo eo, ba so kang ba utlwa molaetsa wa Bibele. Riana o re: “Ke ile ka kopa Jehova hore a nthuse ho ya sebakeng seo ho sona ho nang le batho ba bangata ba buang Setandroy.”

Riana o ile a falla, empa ha a fihla sebakeng seo, o ile a tobana le bothata. Ho ne ho le thata hore a fumane mosebetsi. Monna e mong o ile a re ho yena: “Ke hobaneng ha o tlile mo? Batho ba tloha mona ba ya motseng wa heno ho ya batla mosebetsi.” Ka mora dibeke tse pedi, Riana o ile a ya kopanong ya setereke a se na tjhelete, a sa tsebe hore na a nke eng a e kopanye le eng. Ka letsatsi la ho qetela la kopano, morabo rona e mong o ile a kenya ho itseng ka pokothong ya baki ya Riana. E ne e le tjhelete mme e ile ya thusa Riana hore a kgone ho iqalla kgwebo ya ho rekisa yogurt. Riana o re: “Ke ile ka bona hore ke Jehova ya nthusang. Ka lebaka la tjhelete eo, ke ile ka kgona ho tswela pele ka mosebetsi wa ho ruta batho ka Jehova.” Ho ne ho boetse ho na le mosebetsi o mongata ka phuthehong. Riana o re: “Ke ne ke abelwa hore ke fane ka dipuo tsa phatlalatsa nako le nako. E ne  e le tsela ya Jehova ya ho nkwetlisa, a sebedisa mokgatlo wa hae.” Kajeno, Riana o ntse a thusa batho ba buang Setandroy ba batlang ho ithuta ka Jehova.

Jehova o re tshepisa hore o tla hlohonolofatsa bohle ba ikitlaetsang mosebetsing wa hae. (Esa. 65:16) Ka sebele, Jehova o a re hlohonolofatsa ha re sebetsa ka thata hore re hlole mathata a re thibelang ho eketsa tshebeletso ya rona. Nahana ka mohlala wa Sylviana, eo re buileng ka yena qalong ya sehlooho sena. Hopola hore o ne a tshaba ho ya tlhokahalong hobane a nahana hore ke ntho e ka hodima matla a hae. Ke hobaneng ha a ne a nahana jwalo? O re: “Maoto a ka ha a lekane. Kaha le leng le le kgutshwane ho feta le leng, ke a qhiletsa ha ke tsamaya mme ke kgathala kapele.”

Le ha ho le jwalo, ka 2014 Sylviana o ile a ikopanya le Sylvie Ann, e leng moradiwabo rona wa pulamadiboho ya motjha dilemong wa phutheho ya habo, mme ba ile ba fallela motseng o dikhilomitara tse 85 ho tloha moo ba dulang. Ho sa tsotellehe mathata ao Sylviana a neng a tobane le ona, o ile a kgona ho eketsa tshebeletso ya hae mme hona jwale o thabile e le kannete. O re: “Ka mora selemo feela ke fihlile tlhokahalong, mosadi eo ke neng ke ithuta Bibele le yena ya bitswang Doratine, o ile a kolobetswa kopanong ya rona ya potoloho.”

Re ithutang ho bara le baradi bana babo rona ba sebeletsang tlhokahalong? Haeba re ikitlaetsa tshebeletsong ya Modimo, re tla bona ha Jehova a phethahatsa tshepiso ena ho rona: “Ke tla o matlafatsa. Ka sebele ke tla o thusa.” (Esa. 41:10) Kamano ya rona le Jehova e tla matlafala. Ho feta moo, ho itlhahisa ka ho rata naheng e nngwe kapa moo re dulang, ho tla re thusa ho itokiselletsa mesebetsi e meng e larileng kapele lefatsheng le letjha. Didier eo re buileng ka yena pejana, o opile kgomo lenaka ha a re: “Ho sebeletsa moo ho nang le tlhokahalo ho re kwetlisetsa bokamoso!” E se eka bahweletsi ba eketsehileng ba ka qalella hona jwale ho fumana kwetliso ena!