E, KA dinako tse ding ba ne ba etsa jwalo. Nahana ka mohlala ona. Deuteronoma 24:14, 15 e re: “O se ke wa etsa bolotsana ho mosebetsi ya hirilweng ya kgathatsong le ya futsanehileng, ebang ke wa barabeno kapa wa bajaki ba leng naheng ya heno . . . e le hore a se ke a hweletsa ho Jehova kgahlanong le wena, mme ya eba sebe ho wena.”

Ho fumanwe tlaleho ya kgale pela motse wa Ashdode wa boholoholo, e ngotsweng hoo e ka bang dilemo tse 700 pele Jesu a tswalwa. Tlaleho eo e ngotswe ke motho ya hirilweng, ya neng a na le nyewe kgahlanong le mohiri wa hae mme a kopa thuso ho mmusi kapa moahlodi. Ho bonahala eka motho eo o ne a sebetsa masimong mme ho ka etsahala hore o ne a hlolehile ho fana ka lenane la dijothollo le neng le batlwa ke mohiri wa hae. Tokomaneng eo, motho eo o ngotse tjena: “Ha nna, mohlanka wa hao, ke qeta ho bokella dijothollo tse kotutsweng matsatsing a mmalwa a fetileng, Hoshayahu mora wa Shobaye o ile a tla mme a nkamoha seaparo sa ka. . . . Metswalle ya ka e neng e sebetsa le nna letsatsing leo le tjhesang e ka paka . . . hore seo ke se buang ke nnete. Ha ke na molato. . . . Ke kopa hore wena mmusi o qenehele mohlanka wa hao mme o mo thuse hore a boele a fumane seaparo sa hae! Ha o a lokela ho kgutsa le ho tlohela mohlanka wa hao a se na seaparo sa hae.”

Rahistori e mong ya bitswang Simon Schama a re kopo ena ya motho ya neng a hirilwe, “ha e re bolelle feela kamoo a neng a labalabela kateng hore seaparo sa hae se kgutliswe. Empa e boetse e re bolella hore ho ka etsahala hore motho eo o ne a tseba melao ya Bibele, haholoholo ditaelo tse hlahang ho Levitike le ho Deuteronoma tse kgahlanong le ho tshwara bafutsana hampe.”