1-2. (a) Mantswe a ngotsweng lengolong la Esaia 41:10 a ile a ama moradiwabo rona e mong ya bitswang Yoshiko jwang? (b) Hona mantswe ao a ka boela a thusa bomang?

KA LE LENG moradiwabo rona ya tshepahalang ya bitswang Yoshiko o ile a fumana ditaba tse bohloko. Ngaka ya hae e ne e ile ya mo bolella hore o saletswe ke dikgwedi tse seng kae feela a phela. Ebe o ile a ikutlwa jwang? O ile a hopola temana ya Bibele eo a e ratang haholo ya Esaia 41:10 (E bale.) Yaba o bolella ngaka ya hae hore ha a a tshoha, ka ha o a tseba hore Jehova o mo tshwere ka letsoho. * Mantswe ana a kgothatsang a ngotsweng lengolong lena, a ile a thusa moradi enwa wabo rona ya ratehang hore a tshepe Jehova ka ho felletseng. Le rona temana ena e ka re thoba maikutlo ha re tobane le diteko tse boima. E le hore re utlwisise hore na ke jwang temana ena e ka re thusang ka teng, a re qaleng ka ho hlahloba hore na ke hobaneng ha Modimo a ile a ngola mantswe ana.

² Qalong, Jehova o ile a re Esaia a ngole mantswe ana ho kgothatsa Bajuda bao ha morao e neng e tla ba makgoba Babylona. Le ha ho le jwalo, Jehova ha a a ka a ngola mantswe ana molemong wa Bajuda bao feela, empa le molemong wa bahlanka bohle ba hae. (Esa. 40:8; Bar. 15:4) Kajeno re phela maemong a boima ao ho leng thata ho sebetsana le ona, ke ka hona ho feta le ha e le neng pele, re hlokang kgothatso ena.—2 Tim. 3:1.

3. (a) Ke ditshepiso dife tseo re di fumanang temaneng ya selemo ya 2019 e thehilweng lengolong la Esaia 41:10? (b) Hona ke hobaneng ha re di hloka?

³ Sehloohong sena, re tlo tsepamisa maikutlo lengolong la Esaia 41:10 mme re bone ditshepiso tse tharo tseo Jehova a re fang tsona tse ka re thusang hore re be le tumelo e matla. (1) Jehova o re  tshepisa hore o tla ba le rona. (2) O re tshepisa hore e tla ba Modimo wa rona. (3) O re tshepisa hore o tla re thusa. Ka sebele re hloka ditshepiso * tsena, hobane jwalo ka Yoshiko, le rona re tobana le diteko bophelong. Re boetse hape re ba le mathata ka lebaka la dintho tse mpe tse etsahalang lefatsheng. Ebile ba bang ba rona re mamelletse mahloriso tlasa mebuso e hatellang. Jwale, a re ke re tshohleng ditshepiso tsena.

4. (a) Re tlo tshohla tshepiso efe ya pele? (Sheba le mongolo o botlaseng ba leqephe.) (b) Jehova o re bontsha ka ditsela dife hore na o ikutlwa jwang ka rona? (c) Hona mantswe a hae a o ama jwang?

⁴ Jehova o re fa tshepiso ena ya pele: “O se ke wa tshoha, ka ha ke na le wena.” * Jehova o re bontsha hore o na le rona ka ho re ela hloko le ka lerato la hae le mofuthu. Hlokomela ka moo a re bontshang mosa le lerato ka teng. O re: “O bile bohlokwa mahlong a ka, o tadimilwe o hlompheha, mme ke o ratile.” (Esa. 43:4) Ha ho letho le ka etsang hore Jehova a kgaotse ho rata batho ba mo sebeletsang. Ebile le botshepehi ba hae bo ke ke ba sisinngwa. (Esa. 54:10) Lerato leo a re ratang ka lona le botswalle ba hae, di etsa hore re be sebete. O tla re sirelletsa feela jwalo ka ha a ile a sirelletsa motswalle wa hae Abrame eo ha morao a ileng a bitswa Abrahama. Etswe o ile a re ho yena: “Abrame, o se ke wa tshaba. Ke nna thebe ya hao.”—Gen. 15:1.

5, 6. (a) Re tseba jwang hore Jehova o ikemiseditse ho re thusa ha re tobana le diteko? (b) Re ka ithutang mohlaleng wa Yoshiko?

⁵ Re kgodisehile hore Jehova o ikemiseditse ho re thusa ha re tobana le diteko ka ha o re fa tshepiso ena: “Haeba o ka feta metsing, ke tla ba le wena; le dinokeng, di ke ke tsa o hohola. Haeba o ka tsamaya mollong, o ke ke wa tlaboha, kapa hona hore lelakabe le o tlabole.” (Esa. 43:2) Ebe mantswe ana a bolelang?

⁶ Ke nnete hore Jehova ha a re tshepise hore o tla tlosa diphephetso tse etsang hore bophelo bo be thata. Empa a ke ke a  dumella hore re qwele ka hara “dinoka” tsa mathata kapa hona hore a re tlohelle re tjheswe ke “lelakabe” la diteko ka ho sa feleng. O re tiisetsa hore o tla ba le rona, a re thuse ho “feta” mathata ana. Ebe o tla etsa seo jwang? O tla re thusa hore re se ke ra tshoha haholo, e le hore re mo tshepahalle le ha re tjamelane le lefu. (Esa. 41:13) Yoshiko eo re buileng ka yena pejana, o ile a bona bonnete ba taba ena. Moradi wa hae o re: “Re ne re tsota tsela eo Mama a neng a bonahala a sa tshoha ka yona. Ka nnete ho ne ho hlakile hore Jehova o ne a mo file kgotso ya sebele. Ho fihlela letsatsing leo a ithwaballetseng ka lona, Mama o ne a bolella manese le bakodi ba bang ka Jehova le ditshepiso tsa hae.” Jwale re ithutang mohlaleng ona wa Yoshiko? Ha re tshepa tshepiso ena ya Modimo e reng “ke tla ba le wena,” le rona re tla ba sebete mme re be matla ha re tjamelane le diteko.

7-8. (a) Re tlo tshohla tshepiso efe ya bobedi, hona e bolelang? (b) Ke hobaneng ha Jehova a ile a re ho Bajuda ba neng ba le Babylona: “O se ke wa tadima kwana le kwana”? (c) Ke mantswe afe a ho Esaia 46:3, 4 a ileng a thusa bahlanka ba Modimo hore ba se ke ba tshoha?

⁷ Hlokomela tshepiso ya bobedi eo Esaia a ileng a bua ka yona: “O se ke wa tadima kwana le kwana, etswe ke nna Modimo wa hao.” Polelwana ena, o se ka wa tadima kwana le kwana, e bolelang? Temaneng ena, polelwana “tadima kwana le kwana,” ka Seheberu e fetisa moelelo wa hore motho o dula a “ntse a hetla morao a tshoha hore ntho kapa motho ya itseng o tloha a mo ntsha kotsi.”

⁸ Ebe ke hobaneng ha Jehova a ile a bolella Bajuda ba neng ba le Babylona hore ba se ke ba “tadima kwana le kwana”? Ke hobane o ne a tseba hore baahi ba Babylona ba ne ba tla tshoha. Ba ne ba tla tshoswa keng? Ho elella qetellong ya dilemo tse 70 Bajuda ba le bokgobeng Babylona, Bababylona ba ne ba tla hlaselwa ke mabotho a matla a sesole sa Medo-Persia. Jehova o ne a tla sebedisa lebotho lena ho lokolla bahlanka ba hae Babylona. (Esa. 41:2-4) Eitse ha Bababylona le batho ba dulang haufi le bona ba utlwela hore ba direng ba tseleng ho tla ba hlasela, ba nna ba kgothatsana ba re: “Eba matla.” Ba ba ba eketsa le medimo ya bona ya ditshwantsho ka tshepo ya hore e ne e tla ba sirelletsa. (Esa. 41:5-7) Jehova yena, ke ha a thoba Bajuda dipelo ka ho re: “Wena Iseraele, o mohlanka wa ka [ho fapana le baahelane ba hao] . . . O se ke wa tadima kwana le kwana, etswe ke nna Modimo wa hao.” (Esa. 41:8-10) Ela hloko hore Jehova o ile a re: “Ke nna Modimo wa hao.” Ka mantswe ana, Jehova o ne a kgodisa bahlanka ba hae ba tshepahalang hore ba se ke ba kgathatseha. O ne a sa ba lebala, e ne e ntse e le Modimo wa bona mme bona e ntse e le bahlanka ba hae. O ile a ba bolella hore o tla ba hlokomela a be a ba sirelletse. Ntle le ho hlatha kwana le kwana, e tlameha ebe mantswe ana a ile a matlafatsa Bajuda bana haholo feela.—Bala Esaia 46:3, 4.

9-10. Ke hobaneng ha ho sa hlokahale hore re tshohe? Bontsha.

⁹ Hona jwale ho feta le ha e le neng pele, batho ba tshwenyehile ka lebaka la maemo a ntseng a fetella a lefatshe lena le sa tsitsang. Bonneteng le rona re a ameha. Empa ha re na lebaka la ho tshoha. Etswe Jehova o re: “Ke nna Modimo wa hao.” Ebe ke hobaneng ha mantswe ao e le lebaka le matla la hore re dule re kgobile matshwafo?

¹⁰ Nka ka mohlala papiso ena e latelang: Bapalami ba babedi e leng Jim le Ben, ba ka sefofaneng se tsokotswang ke difefo tse matla tsa moya. Ha sefofane se ntse se ya hodimo le tlase ka baka la moya, mofofisi o re ho bapalami: “Fasang mabanta a lona a pholoso,  le hle le a tiise. Re tlo ba le maemo a tjena ka nako e seng kae feela.” Jim o a tshwenyeha. Empa mofofisi o phaella ka hore: “Le se ke la tshwenyeha. Ke nna ya buang.” Jim a tsitsinya hlooho mme a re: “Aekhona hee ho a tshwana.” Empa Jim o hlokomela hore Ben o bonahala yena a se na mathata. Jwale o botsa Ben o re: “Hao monna, keng wena o bonahala eka o kgodisehile hakaale?” Ke ha Ben a mo otla ka pososelo feela mme a re: “Hobane mofofisi enwa, ke mo tseba hantle. Ke Ntate wa ka.” Ben a tswela pele a re: “E re ke o bolelle ho se hokae ka Ntate enwa wa ka. Ke kgodisehile hore ha o ka inwesa ka nkgo mme wa hlokomela bokgoni boo a nang le bona ba ho fofisa sefofane, ho tla be hore kokololo.”

11. Re ka ithutang papisong ena ya bapalami ba babedi?

¹¹ Re ka ithutang papisong ena ya bapalami ba babedi? Jwalo ka Ben, re kgodisehile hobane re tseba Ntate wa rona ya mahodimong Jehova hantle. Re tseba hantle hore o tla re tataisa hore re pholohe difefo tsa mathata ao re thulanang le ona matsatsing ana a ho qetela. (Esa. 35:4) Ho fapana le batho ba bangata, rona ha re tshohe letho hobane re tshepile Jehova. (Esa. 30:15) Re boetse hape re etsisa Ben ka ho bolella baahisane ba rona mabaka a ho tshepa Modimo. Jwale le bona ba tla kgodiseha hore Jehova o tla ba tshehetsa ho sa tsotellehe mathata ao ba kopanang le ona.

12. (a) Re tlo tshohla tshepiso efe ya boraro? (b) Keng eo re e hopolang ha re utlwa ho buuwa ka “letsoho” la Jehova?

¹² Ela hloko tshepiso ya boraro eo Esaia a buileng ka yona: “Ke tla o matlafatsa. Ka sebele ke tla o thusa.” Esaia o ne a se a hlalositse hore na Jehova o tla matlafatsa kapa ho tiisa bahlanka ba hae jwang. O ile a re: “Jehova o tla tla jwalo ka ya matla, mme letsoho la hae le tla busa bakeng sa hae.” (Esa. 40:10) Hangata Bibele e sebedisa “letsoho” ho tshwantshetsa matla. Ka  hona, ha re utlwa ho buuwa ka hore “letsoho la [Jehova] le tla busa,” taba ena e re hopotsa hore Jehova ke Morena ya matla. O ile a sebedisa matla a hae a ke keng a lekanngwa ho tshehetsa bahlanka ba hae nakong e fetileng. Mme esita le kajeno, o ntse a matlafatsa le ho sirelletsa ba mo tshepang.—Deut. 1:30, 31; Esa. 43:10.

13. (a) Jehova o re matlafatsa haholoholo maemong afe? (b) Ke tshepiso efe e re fang matla le kgodiseho?

¹³ Jehova o re matlafatsa haholoholo ha dira tsa rona di re tsohela matla. Dikarolong tse ding tsa lefatshe kajeno, dira tsa rona di leka ka matla ho emisa mosebetsi wa rona wa ho bolela molaetsa wa Bibele kapa hona hore di leke ho thibela mokgatlo wa rona. Ho sa tsotellehe seo, ha ho na le moo ho reng teke ho rona mona. Hobane Jehova o re tiiseditse hore o tla re matlafatsa a be a re fe le tshepo. O re tshepisa ho re: “Sebetsa le ha e le sefe se tla etswa kgahlanong le [rona] se ke ke sa atleha.” (Esa. 54:17) Mantswe ana a re hopotsa dintlha tsa bohlokwa tse tharo.

14. Ke hobaneng ha re sa makatswe ke hore ebe dira tsa Modimo di a re hlasela?

¹⁴ Ntlha ya pele, ka ha re balatedi ba Kreste, re lebelletse hore batho ba tla re hloya. (Mat. 10:22) Etswe Jesu le yena o ile a hlakisa hore barutuwa ba hae, ba ne ba tla hloriswa hampempe matsatsing ana a ho qetela. (Mat. 24:9; Joh. 15:20) Ntlha ya bobedi, boprofeta ba Esaia bo ile ba bolela esale pele hore dira tsa rona di ke ke tsa re hloya feela, empa di tla sebedisa dibetsa tse sa tshwaneng ho leka ho re hlasela. Dibetsa tseo di akarelletsa mashano a potelletseng le a fetelletseng a buuwang ka rona, esita le ho hloriswa ka sehloho. (Mat. 5:11) Feela re se ke ra lebella hore Jehova o tla thibela dira tsena tsa rona hore di re hlasele ka dibetsa tse kang tsena. (Baef. 6:12; Tšen. 12:17) Empa ha re na lebaka la ho tshoha. Hobaneng?

15, 16. (a) Re lokela ho hopola ntlha efe ya boraro, hona Esaia 25:4, 5 e e tshehetsa jwang? (b) Esaia 41:11, 12 e re ho tla etsahalang ka batho ba re lwantshang?

¹⁵ Ntlha ya boraro eo re lokelang ho e  hopola ke ena. Jehova o itse “sebetsa le ha e le sefe” se tla sebediswa kgahlanong le rona, “se ke ke sa atleha.” Feela jwalo ka lerako le re sirelletsang puleng e nang ka difefong, Jehova le yena o a re sirelletsa nthong efe kapa efe e ka re lematsang. (Bala Esaia 25:4, 5.) Dira tsa rona di ke ke tsa o besa wa tuka.—Esa. 65:17.

¹⁶ Jehova o boetse hape o a re matlafatsa e le hore re mo tshepe. O etsa sena ka ho re hlalosetsa ka botlalo hore na o tla etsang ka batho ba re “halefelang.” (Bala Esaia 41:11, 12.) Ho sa tsotellehe hore na ba direng ba lwana ka matla hakae kapa hore ntwa ke e mahlo a mafubedi ho le hokae, ditlamorao di a tshwana: Dira tsohle tsa batho ba Modimo, di “tla fetoha lefeela mme [di] tla timela.”

17-18. (a) Ho bala Bibele ho ka etsa hore re tshepe Modimo le ho feta jwang? Fana ka mohlala. (b) Ho nahanisisa ka temana ya selemo ya 2019 ho tla re thusa jwang?

¹⁷ Ha re ntse re tseba Jehova le ho feta, tshepo ya rona ho yena e tla tiya le ho feta. Ka hoo, tsela feela eo re ka mo tsebang ka yona, ke ka ho bala le ho ithuta Bibele ka hloko mme re je masapo a hlooho ka seo re se badileng. Bibele e na le tlaleho e ka tsheptjwang ya ka moo Jehova a ileng a sirelletsa batho ba hae ka teng nakong e fetileng. Tlaleho e jwalo e etsa hore re kgodisehe hore le rona o tla re sirelletsa.

¹⁸ Ela hloko papiso e ntle eo Esaia a e sebedisang ho bontsha ka moo Jehova a re sirelletsang ka teng. O re Jehova ke modisa, ha bahlanka ba hae bona e le dikonyana. O re ka Jehova: “O tla bokella dikonyana ka letsoho la hae; o tla di beha sefubeng.” (Esa. 40:11) Ha Jehova a re sikile, re utlwa le ha re bitswa ebile re ikutlwa re sireletsehile. E le hore re se ke ra kgathallwa ke pere le ha re na le mathata, lekgoba le tshepahalang le le masene, le kgethile Esaia 41:10 e le temana ya selemo ya 2019, e reng “O seke wa tadima kwana le kwana, etswe ke nna Modimo wa hao.” Nahanisisa ka mantswe ana. A tla o matlafatsa mohla monene, ha mathata a hlwa manolo hodimo.