Setho se Setjha sa Sehlopha Se Busang
HOSENG ha Laboraro la 24 January 2018, ditho tsa lelapa la Bethele e United States le e Canada, di ile tsa tsebiswa hore: Morabo Kenneth Cook, Jr e se e le setho sa Sehlopha se Busang sa Dipaki Tsa Jehova.
Morabo rona Cook o hlahetse le ho holela Pennsylvania, U.S.A. O ile a ithuta nnete ho moithutimmoho le yena nakwana pele a qeta high school mme a kolobetswa ka la 7 June 1980. Yaba ka la 1 September 1982 e ba pulamadiboho ya ka mehla. Ka mora hore a phayone ka dilemo tse pedi, o ile a memelwa hore a lo sebeletsa Bethele e Wallkill, New York ka la 12 October 1984.
Dilemong tse 25 ho tloha ka nako eo, o ile a sebeletsa dikabelong tse sa tshwaneng jwalo ka Printareng le Bethel Office. Ka 1996, o ile a nyala Jamie mme ba tswela pele ho sebeletsa Bethele e Wallkill ha mmoho. Yaba ka December 2009, Mora le Moradiwabo rona Cook ba iswa Watchtower Educational Center e Patterson, New York, e leng moo Morabo rona Cook a ileng a abelwa ho sebeletsa Lefapheng la Bongodi le Arabang Dipotso. Ka April 2016, ba ile ba kgutlisetswa Wallkill moo ba sa kang ba nka nako e kaalo yaba ba se ba iswa Brooklyn, New York. Dikgwedi tse hlano ka mora moo, ba ile ba iswa ntlhokgolo e Warwick, New York. Morabo rona Cook, o ile a kgethwa ho ba mothusi Komiting ya Bongodi ya Sehlopha se Busang ka January 2017.