1. O ka hlalosa lelapa labo Jakobo jwang?

JAKOBO ngwanabo Jesu, o holetse lelapeng le neng le ena le kamano e ntle le Jehova. * Batswadi ba hae e leng Josefa le Maria ba ne ba rata Jehova haholo ebile ba etsa sohle seo ba ka se kgonang ho mo sebeletsa. Ntho e nngwe e neng e thabisa haholo ke hore abuti wa hae e ne e tla ba Mesia. Ka nnete ena e ne e le tlotla e babatsehang hore ebe Jakobo ke karolo ya lelapa lena.

2. Ke mabaka afe ao Jakobo a neng a ena le ona a neng a ka etsa hore a hlomphe abuti wa hae?

² Jakobo o ne a ena le mabaka a mangata a neng a ka etsa hore a batle ho etsisa abuti wa hae. (Mat. 13:55) Ka mohlala, ha Jesu a le dilemo di 12 o ne a tseba Mangolo hantle hoo a ileng a makatsa banna ba rutehileng ba baholo ba Jerusalema. (Luka 2:46, 47) E ka nna yaba Jakobo o ile a sebetsa le Jesu ho etsa mosebetsi wa mapolanka. Ka lebaka leo, ha ba ntse ba sebetsa o ne a tla tseba abuti wa hae haholwanyane. Hangata Morabo rona Nathan H. Knorr o ne a re: “O ka tseba motho haholwanyane haeba o sebetsa le yena.” * E ka nna yaba Jakobo o ne a bona ha ‘Jesu a ntse a hatela pele bohlaleng le kgolong ya mmele mme a amoheleha ho Modimo le ho batho.’ (Luka 2:52) Ka hoo, re ka nna ra nahana hore Jakobo e ne e tla ba yena morutuwa wa pele wa Jesu empa ha ho a ka ha eba jwalo.

3. Jakobo o ile a etsang ha Jesu a ne a qala tshebeletso ya hae?

³ Ha Jesu a ntse a etsa tshebeletso ya hae mona lefatsheng,  Jakobo ha ya ka ya eba morutuwa wa hae. (Joh. 7:3-5) Ha e le hantle, e ka nna yaba Jakobo e ne e le e mong wa leloko ya neng a nahana hore Jesu “o lahlehetswe ke kelello.” (Mar. 3:21) Hape ha ho na bopaki bo bontshang hore Jakobo o ne a ena le mme wa hae Maria ha Jesu a ne a le thupeng ya tlhokofatso.​—Joh. 19:25-27.

4. Re tlo bua ka eng sehloohong see?

⁴ Ha morao Jakobo o ile a ba le tumelo ho Jesu mme ya eba e mong wa baholo ba hlomphehang ba phutheho ya Bokreste. Sehloohong sena, re tla bua ka dintho tse pedi tseo re ka ithutang tsona ho Jakobo: (1) ke hobaneng ha re lokela ho dula re ikokobeditse? le (2) ke jwang re ka bang matitjhere a hlwahlwa?

5. Jakobo o ile a etsang ha Jesu a bonahala ho yena ka mora ho tsoswa?

⁵ Jakobo e ile ya eba molatedi wa Jesu ya tshepahalang neng? Ka mora hore Jesu a tsoswe bafung, o ile “a bonahala ho Jakobo, ya ntano ba ho baapostola bohle.” (1 Bakor. 15:7) Ka mora hore ba kopane, Jakobo e ile ya eba morutuwa wa hae. O ne a le teng ha baapostola ba emetse moya o halalelang kamoreng e ka hodimo Jerusalema. (Lik. 1:13, 14) Ha morao Jakobo o ile a thabela ho sebeletsa e le e mong wa sehlopha se busang mehleng ya baapostola. (Lik. 15:6, 13-22; Bagal. 2:9) Hape pele ho selemo sa 62 mehleng ya baapostola, o ile a susumetswa hore a ngolle Bakreste ba tlotsitsweng lengolo. Lengolo leo le re tswela molemo le kajeno, ebang re na le tshepo ya ho phela lehodimong kapa lefatsheng. (Jak. 1:1) Rahistori wa mehleng ya baapostola Josephus, o ile a re Moprista ya Phahameng wa Mojuda e leng Ananiase mora wa Anase ke yena ya ileng a laela hore Jakobo a bolawe. Jakobo o ile a dula a tshepahalla Jehova ho fihlela a qeta tshebeletso ya hae mona lefatsheng ha a ne a hlokahala.

6. Ke ka tsela efe Jakobo a neng a fapane le baetapele ba bodumedi ba mehleng ya hae?

⁶Jakobo o ne a ikokobeditse. Ke hobaneng ha re ka tjho jwalo? Hlokomela phapang e teng tseleng eo Jakobo le baetapele ba bodumedi ba ileng ba itshwara ka yona. Ha Jakobo a bona bopaki bo hlakileng ba hore Jesu ke Mora wa Modimo, ka boikokobetso o ile a dumela seo. Empa baprista ba ka sehloohong ba Jerusalema bona ha ba a ka ba dumela. Ka mohlala, ba ne ba ke ke ba kgona ho hana hore Jesu o tsositse Lazaro bafung. Ho ena le hore ba dumele hore Jesu o ne a ronngwe ke  Jehova, ba ile ba leka ho mo bolaya le Lazaro. (Joh. 11:53; 12:9-11) Ha morao ha Jesu a ne a tsositswe bafung, ba ile ba leka ho patela batho taba eo. (Mat. 28:11-15) Ka ha baetapele bao ba bodumedi ba ne ba ikgohomosa, ha ba a ka ba dumela hore Jesu ke Mesia.

7. Ke hobaneng ha re lokela ho qoba ho ikgohomosa?

⁷Re ithutang? Qoba ho ikgohomosa mme o ikemisetse ho rutwa ke Jehova. Jwalo ka ha bolwetse bo ka etsa hore pelo ya motho e se ke ya sebetsa hantle, boikgohomoso bo ka etsa hore ho be thata hore motho a mamele ditaelo tsa Jehova. Bafarisi ba ne ba ikgohomosa hoo ba ileng ba hloleha ho bona bopaki bo hlakileng ba hore Jesu ke Mora wa Modimo le hore o na le moya wa Hae. (Joh. 12:37-40) Eo e ne e le taba e kotsi hobane e ile ya ba sitisa hore ba be le tshepo ya bophelo bo sa feleng. (Mat. 23:13, 33) Ke ha bohlokwa hore re tswele pele ho dumella Lentswe la Modimo le moya wa hae ho fetola tsela eo re nahanang le ho etsa dintho ka yona. (Jak. 3:17) Ka ha Jakobo o ne a ikokobeditse, o ile a dumella hore Jehova a mo rute. Jwalo ka ha re tla bona, Jakobo e ile ya eba titjhere e atlehileng hobane a ne a ikokobeditse.

8. Ke eng e ka re thusang hore re be matitjhere a hlwahlwa?

⁸ Jakobo o ne a sa ruteha haholo. Ha ho pelaelo hore baetapele ba bodumedi ba mehleng ya hae, ba ne ba mo nka e le motho ya ‘sa rutehang le ya tlwaelehileng’ jwalo ka moapostola Petrose le Johanne. (Lik. 4:13) Empa Jakobo o ile a ithuta ho ba titjhere e hlwahlwa. Re bona sena ha re bala lengolo le ileng la bitswa ka lebitso la hae. Le rona jwalo ka Jakobo ho ka etsahala hore ebe ha re a ruteha haholo. Le ha ho le jwalo, Jehova o re thusa ka moya wa hae le ka mokgatlo wa hae hore re be matitjhere a hlwahlwa. A re boneng hore na re ka ithutang mohlaleng wa Jakobo eo e neng e le titjhere e hlwahlwa.

9. O ka hlalosa tsela eo Jakobo a neng a ruta ka yona jwang?

⁹Jakobo ha a ka a bua mantswe a thata kapa a hlalosa dintho ka tsela e thata. Ka hoo, batho ba ne ba tseba hore na ke dintho dife tseo ba lokelang ho di etsa le hore na ba ka di etsa jwang. Ka mohlala, nahana ka tsela e bonolo eo Jakobo a ileng a ruta Bakreste hore ba lokela  ho ikemisetsa ho tshwarwa hampe ntle le hore ba halefe. O ile a re: “Re phatlalatsa hore ba mameletseng ba thabile. Le utlwile ka mamello ya Jobo mme le bone phello eo Jehova a ileng a fana ka yona, hore Jehova o na le lerato le mofuthu haholo mme o mohau.” (Jak. 5:11) Hlokomela hore Jakobo o ne a ruta dintho tse tswang ka Mangolong. O ile a sebedisa Lentswe la Modimo ho thusa batho ho bona hore Jehova o dula a hlohonolofatsa batho ba mo tshepahallang jwalo ka Jobo. Jakobo o ne a ba ruta dintho tsena a sebedisa mantswe a bonolo le a utlwahalang. Ka tsela eo, o ne a etsa hore batho ba rorise Jehova eseng yena.

10. Ke ka tsela efe re ka etsisang Jakobo ha re ruta?

¹⁰Re ithutang? Ruta ka tsela e bonolo mme o sebedise Lentswe la Modimo. Ha re ruta batho ha re a lokela ho ba bontsha hore na re tseba hakae empa re lokela ho ba bontsha hore na Jehova o tseba hakae le hore o a ba tsotella. (Bar. 11:33) Re ka kgona ho etsa seo haeba ka mehla re sebedisa Bibele ha re ruta. Ka mohlala, ho ena le ho bolella batho bao re ithutang Bibele le bona hore na re ne re ka etsang haeba re ne re le boemong ba bona, re lokela ho ba thusa hore ba nahane ka mehlala e ka Bibeleng le hore na Jehova o nahana le ho ikutlwa jwang. Ka hoo, ba tla batla ho etsa dintho tseo ba ithutileng tsona hobane ba batla ho thabisa Jehova eseng rona.

11. Ke mathata afe ao ba bang ba Bakreste ba mehleng ya Jakobo ba neng ba ena le ona, hona o ile a ba fa keletso efe? (Jakobo 5:13-15)

¹¹Jakobo e ne e le motho ya utlwisisang. Lengolong la hae o ile a bontsha hore o ne a utlwisisa mathata ao Bakrestemmoho le yena ba neng ba ena le ona mme o ile a ba fa tataiso e hlakileng ya hore na ba ka hlola mathata a bona jwang. Ka mohlala, ba bang ba Bakreste bao ba ne ba dieha ho mamela keletso eo ba e fuweng. (Jak. 1:22) Ba bang ba ne ba tshwara batho ba ruileng hantle ho feta ba futsanehileng. (Jak. 2:1-3) Ha ba bang bona ba ne ba hloleha ho laola tsela eo ba buang ka yona. (Jak. 3:8-10) Bakreste bao ba ne ba ena le bothata bo boholo empa Jakobo ha a ka a kgaotsa ho ba thusa. O ile a fana ka keletso ka tsela e mosa le e tobileng, a ba a kgothaletsa ba bang ba hlokang thuso hore ba ye ho baholo e le hore ba ba thuse hore ba etse diphetoho.​—Bala Jakobo 5:13-15.

12. Ke jwang re ka dulang re ena le mamello ha re thusa batho bao re ithutang Bibele le bona?

¹²Re ithutang? Eba motho ya utlwisisang le ya mamellang batho ba bang. Ho ka nna ha eba thata hore batho ba bangata ba ithutang Bibele ba mamele keletso ya yona. (Jak. 4:1-4) Ho ka nna ha nka nako hore ba tlohele dintho tse mpe tseo ba di etsang mme ba be le makgabane ao Bakreste ba lokelang ho ba le ona. Jwalo ka Jakobo, re lokela ho ba le sebete sa hore re bolelle batho bao re ithutang Bibele le bona hore na ke hokae moo ba lokelang ho ntlafatsa. Re boetse re lokela ho ba le mamello le ho tshepa hore Jehova o tla hulela batho ba ikokobeditseng ho yena le ho ba fa matla ao ba a hlokang e le hore ba etse diphetoho bophelong ba bona.​—Jak. 4:10.

13. Jwalo ka ha Jakobo 3:2 e bontsha, keng eo Jakobo a ileng a e hlokomela?

¹³Jakobo o ne a ikokobeditse. Jakobo o ne a sa nke hore ke motho wa bohlokwa kapa o phahametse Bakrestemmoho ka lebaka la lelapa leo a tswang ho lona kapa mesebetsi eo a neng a e etsa ka phuthehong. O ile a bitsa Bakrestemmoho le yena “barabeso ba ratwang.” (Jak. 1:16, 19; 2:5) Ha a ka a etsa hore batho ba nahane hore yena ha a etse diphoso. Ho ena le hoo, o ile a ikenyelletsa ha a ne a re: “Kaofela re kgoptjwa hangata.”​—Bala Jakobo 3:2.

14. Ke hobaneng ha re lokela ho dumela hore re etsa diphoso?

 ¹⁴Re ithutang? Hopola hore kaofela ha rona re etsa diphoso. Ha re a lokela ho nahana hore ka tsela e itseng re phahametse batho bao re ithutang Bibele le bona. Hobaneng? Hobane haeba re etsa hore ba nahane eka rona ha re etse diphoso, ntho eo e tla etsa ba nahane hore ba ke ke ba kgona ho etsa dintho tseo Jehova a reng ba di etse. Empa haeba re ba bolella hore ka dinako tse ding ho ne ho se bonolo hore re mamele dikeletso tsa Bibele le hore Jehova o ile a re thusa hore re mamelle mathata, ho ka ba thusa hore ba bone hore le bona ba ka kgona ho sebeletsa Jehova.

15. O ka hlalosa dipapiso tseo Jakobo a ileng a di etsa jwang? (Jakobo 3:2-6, 10-12)

¹⁵Jakobo o ne a sebedisa dipapiso tse amang maikutlo. Ha ho pelaelo hore o ile a thuswa ke moya o halalelang hape e ka nna yaba o ile a ithuta ka moo abuti wa hae Jesu a neng a sebedisa dipapiso ka teng. Dipapiso tseo Jakobo a ileng a di sebedisa lengolong la hae di ne di le bonolo ebile thuto ya tsona e hlakile.​—Bala Jakobo 3:2-6, 10-12.

16. Ke hobaneng ha re lokela ho sebedisa dipapiso tseo batho ba di utlwisisang?

¹⁶Re ithutang? Sebedisa dipapiso tseo batho ba tla di utlwisisa. Ha o sebedisa dipapiso tseo batho ba tla di utlwisisa, o ba thusa hore ba nahane ka ntho eo o ba rutang yona le hore ba ithute dintlha tsa bohlokwa ho yona. Dipapiso tseo di ka thusa batho bao re ithutang le bona hore ba hopole dintlha tsa bohlokwa tse hlahang ka Bibeleng. Jesu o ne a ipabola ka hore a sebedise dipapiso tseo batho ba kgonang ho di utlwisisa mme Jakobo o ile a etsisa mohlala wa hae. A re bueng ka e nngwe ya dipapiso tseo Jakobo a ileng a di etsa mme re bone hore na ke hobaneng ha e ntse e atleha.

17. Ke hobaneng ha papiso e hlahang ho Jakobo 1:22-25 e atleha?

¹⁷ Bala Jakobo 1:22-25. Ho na le mabaka a etsang hore papiso ya Jakobo ya seipone e be e atlehang. O ile a ruta thuto ya bohlokwa ya hore re lokela ho dula re bala Lentswe la Modimo le ho sebedisa seo re ithutang sona ho lona, e le hore le re tswele molemo. Jakobo o ile a sebedisa papiso eo batho ba neng ba ka e utlwisisa ha bonolo, e leng ya motho ya itjhebileng ka seiponeng. O ne a ruta hore e tla be e le bowatla ha motho a itjheba ka seiponeng mme a hlokomela hore ho na le ntho e seng hantle ho yena ebe ha a e lokise. Ka tsela e tshwanang,  e tla be e le bowatla hore ha re bala Lentswe la Modimo mme re hlokomela hore re lokela ho fetola botho ba rona ebe ha re etse jwalo.

18. Ke dintho dife tse tharo tseo re lokelang ho di etsa ha re etsa dipapiso?

¹⁸ Ha o etsa papiso o ka etsisa Jakobo ka hore o etse dintho tsena tse tharo: (1) Etsa bonnete ba hore papiso eo o e etsang e thusa motho eo o ithutang le yena hore a utlwisise ntlha eo le buisanang ka yona. (2) Sebedisa papiso eo batho ba ka e utlwisisang ha bonolo. (3) Hlakisa hore na papiso eo o e etsang e bolelang. Haeba o thatafallwa ke ho etsa dipapiso tseo batho ba ka di utlwisisang, o ka kena ho Watch Tower Publications Index. Tlasa sehlooho se reng “Illustrations,” o ka fumana mehlala e mengata eo o ka e sebedisang. Hopola hore dipapiso tseo o di etsang di ka tshwana le sebuelahole, ka ha di ka thusa motho eo o ithutang le yena hore a utlwisise dintlha tseo o mo rutang tsona hantle. Ka hoo, o lokela ho etsa bonnete ba hore o sebedisa dipapiso haholoholo ha o ruta dintlha tsa bohlokwa. Ke nnete hore lebaka la bohlokwa la hore re ntlafatse tsela eo re rutang ka yona, ke hobane re batla ho thusa batho ba bangata ka moo re ka kgonang hore e be karolo ya lelapa le thabileng la Jehova, eseng hobane re ipatlela thoriso.

19. Re ka bontsha jwang hore re rata bara le baradibabo rona?

¹⁹ Ke nnete hore rona ha re na abuti ya phethahetseng jwalo ka Jakobo empa ntho e thabisang ke hore re sebeletsa Jehova le lelapa le leholo la bara le baradibabo rona. Re bontsha hore re a ba rata ha re qeta nako le bona, re ithuta dintho tse itseng ho bona le ho sebetsa le bona ha re etsa mosebetsi wa boboledi. Ha re ikemisetsa ho etsisa mohlala wa Jakobo tseleng eo re itshwarang le ho ruta ka yona re tla thabisa Jehova mme re tla thusa batho ba batlang ho mo tseba hore e be metswalle ya hae.