1, 2. Bahlanka ba Jehova ba ka hlahelwa ke mathata afe?

 MATHATA a ka fetola bophelo ba rona ka ho panya ha leihlo. Ka mohlala, morabo rona e mong ya bitswang Luis a o ile a tshwarwa ke mofuta o sa tlwaelehang wa kankere. Ngaka e ile ya mo bolella hore ka mora dikgwedi tse seng kae feela o tlo shwa. Moradi wa bo rona Monika le mohatsa wa hae ba ne ba phathahane ka ho sebeletsa Jehova. Yaba ka le leng Moradi wa bo rona Monika o fumana hore e se e le dilemo monna wa hae eo e leng moholo a etsa dibe tse tebileng ka lekunutu. Moradi wa bo rona Olivia wa lesoha o ile a tlameha ho baleha ha hae ka lebaka la sefefo se matla kapa lehodiotswana le kotsi le neng le tla. Ha a kgutla o ile a fumana hore lehodiotswana leo le sentse ntlo ya hae. Bophelo ba batho bana bo ile ba fetoha haholo ka nako le motsotso. Na le wena o kile wa hlahelwa ke bothata bo ileng ba fetola bophelo ba hao o sa lebella?

² Le hoja re le bahlanka ba Jehova, re hlahelwa ke mathata ebile re a kula jwalo ka motho e mong le e mong. Hape re ka hanyetswa kapa ra hloriswa ke batho ba hloileng bahlanka ba Modimo. Le hoja Jehova a sa etse hore mathata ana a re pote ka thoko, o tshepisa hore o tla re thusa. (Esa. 41:10) A ka re thusa hore re dule re thabile, re etse diqeto tse nepahetseng le hore re dule re mo tshepahalla le ha re hlahelwa ke mathata a boima ka ho fetisisa. Sehloohong sena re tlo hlahloba ditsela tse nne tseo ka tsona Jehova a re thusang ha re imetswe. Re tla boela re ithute hore na re lokela ho etsang e le hore re fumane thuso ya hae.

 JEHOVA O TLA O LEBELA

3. Ha re hlahetswe ke ntho e bohloko, ke eng eo re ka utlwang ho le thata ho e etsa?

³ Bothata. Ha re hlahetswe ke ntho e bohloko, re ka utlwa ho le thata ho nahana hantle le ho etsa diqeto. Hobaneng? Hobane e ka nna yaba dipelo tsa rona di utlwile bohloko haholo. Hape re ka utlwa re imetswe haholo kelellong ka lebaka la ho tshwenyeha. Re ka utlwa re sa tsebe hore na re nka eng re e kopanya le eng. Hlokomela hore na baradi ba bo rona ba babedi bao ho buuweng ka bona serapeng sa pele ba ile ba ikutlwa jwang ha ba ne ba ena le mathata. Moradi wa bo rona Olivia o re: “Ka mora hore lehodiotswana le senye ntlo ya ka, ke ile ka utlwa ke ferekane ebile ke imetswe haholo.” Ha Moradi wa bo rona Monika a bua ka bolotsana ba monna wa hae o re: “Ke ile ka utlwa ke nyahame ho feta lentswe ho nyahama. Ke ile ka utlwa bohloko bo hlabang pelong. Ke ne ke utlwa ke sitwa ho etsa letho. Ke ne ke sa nahana ho hang hore ntho e jwalo e ka nketsahalla.” Jehova o tshepisa hore o tla re thusa jwang ha re utlwa re imetswe?

4. Ho Bafilipi 4:​6, 7 Jehova o re tshepisa eng?

⁴ Jehova o re thusa jwang? O tshepisa hore o tla re fa “kgotso.” (Bala Bafilipi 4:​6, 7.) Ha re ena le kgotso eo, re kgona ho kgoba matshwafo ka lebaka la kamano e ntle eo re nang le yona le yena. Kgotso ena ke “eo batho ba ke keng ba e utlwisisa.” Ke e hlollang ho feta ka moo re ka nahanang ka teng. Na o kile wa rapela Jehova ka matla yaba ka mora moo o utlwa o tlelwa ke kgotso eo o sa tsebeng hore na e tswa kae? Ke yona kgotso eo Modimo a re fang yona.

5. Kgotso eo Modimo a re fang yona e lebela dipelo le menahano ya rona jwang?

⁵ Bafilipi 4:7 e boetse e re kgotso eo Modimo a re fang yona e tla “lebela,” kapa e sireletse ‘dipelo tsa rona le menahano ya rona.’ Ka Segerike, lentswe “lebela” e ne e le lentswe le sebediswang ditabeng tsa sesole ha ho ne ho buuwa ka masole a neng a lebela motse e le hore o se ke wa hlaselwa. Baahi ba motse o neng o ena le masole a katileng motse ba ne ba robala ka kgotso jwalo ka masea hobane ba tseba hore masole a ba sireleditse. Ka tsela e tshwanang, ha kgotso eo Modimo a re fang yona e lebela dipelo le menahano ya rona, re kgoba matshwafo hobane re tseba hore re sireletsehile. (Pes. 4:8) Jwalo ka Anna, re ka ikutlwa re ena le kgotso le haeba maemo a rona a sa fetohe hanghang. (1 Sam. 1:​16-18) Ha re kgobile matshwafo, hangata ho ba bonolo hore re nahane hantle le ho etsa diqeto tse nepahetseng.

6. Re lokela ho etsang e le hore Modimo a re fe kgotso? (Sheba setshwantsho.)

⁶ Re lokela ho etsang? Ha o ena le mathata,  balehela ho molebedi wa rona. Jwang? Ka hore o rapele ho fihlela o utlwa Modimo a o fa kgotso. (Luka 11:9; 1 Bathes. 5:17) Morabo rona Luis eo ho builweng ka yena serapeng sa pele, o a hlalosa hore na keng e thusitseng yena le mosadi wa hae, Ana, hore ba mamelle ka mora hore ba tsebe hore o tlo shwa ka mora dikgwedi tse seng kae feela. O re: “Boemong bo tjena ho thata haholo ho etsa diqeto tse amanang le ditaba tsa phekolo le dintho tse ding. Empa ho rapela ho ile ha re thusa ho ba le kgotso nakong eo e boima.” Morabo rona Luis le mosadi wa hae ba re ba ile ba rapela Jehova ka matla le ka makgetlo ba mo kopa hore a ba fe kgotso, a ba thuse ho kgoba matshwafo le ho ba fa bohlale ba ho etsa diqeto tse nepahetseng. Ba ile ba utlwa hore Jehova o a ba thusa. Ha o ena le bothata, o se ke wa kgaotsa ho rapela mme o tla utlwa ha Jehova a o fa kgotso e tla lebela pelo le kelello ya hao.—Bar. 12:12.

JEHOVA O TLA ETSA HORE O TSITSE

7. Re ka ikutlwa jwang ha re ena le bothata bo boima?

⁷ Bothata. Ha re ena le bothata bo boima, re ka ikutlwa kapa ra nahana le ho itshwara ka tsela e sa tlwaelehang. Feela jwalo ka ha sekepe se ka tsukutlwa kapa sa sisinngwa ke maqhubu a lewatle nakong ya sefefo, le rona re ka tsukutlwa ke maikutlo a matla a fapaneng. Moradi wa bo rona Ana eo re sa tswa bua ka yena, o ile a re o ne a tlelwa ke maikutlo a mangata a fapaneng ka mora hore Luis a hlokahale. O ile a re: “Ka dinako tse ding ke ne ke nyahama ebe ke ipona ke le sono. Hape ke ne ke halefiswa ke hore ebe Luis o ntshiile.” Ho feta moo, Moradi wa bo rona Ana o ne a bona eka ha ho sa tla ba le motho ya mo thusang hape o ne a ikutlwa a ferekane hobane a tlameha ho etsa diqeto tse neng di etswa ke Luis. Ka dinako tse ding o ne a utlwa eka o ka hara sekepe se lewatleng le befileng le nang le sefefo se matla. Jehova o re thusa jwang ha re imetswe ke maikutlo a tjee?

8. Esaia 33:6 e re Jehova o re tshepisa eng?

⁸ Jehova o re thusa jwang? O tshepisa hore o tla re thusa hore re dule re tsitsitse le ha re ena le mathata. (Bala Esaia 33:6.) Ha lewatle le befile ka lebaka la sefefo se matla, sekepe se ka tsukutleha yaba se beha bophelo ba batho kotsing. Dikepe tse ngata di na le dintho ka mahlakoreng karolong e ka tlase ya sekepe tse di thusang hore di tsitse boemong bo jwalo. Dintho tsena tse tsitsisang sekepe di se thusa hore se se ke sa tsukutleha haholo. Ha se sa tsukutlehe haholo, batho ba se palameng ba ka kgona ho mamella boemo bona ebile ba tla bolokeha. Le ha ho le jwalo, dintho tsena tse thusang sekepe hore se tsitse di sebetsa hantle haholo ha sekepe se ntse se tsamaya. Ka tsela e  tshwanang, Jehova o tla re thusa hore re dule re tsitsitse haeba re tswela pele ho mo sebeletsa ka botshepehi le dinakong tse thata.

9. Re ka sebedisa dintho tse re thusang ho etsa dipatlisiso jwang hore re dule re tsitsitse le ha re ena le mathata? (Sheba setshwantsho.)

⁹ Re lokela ho etsang? Ha o ferekane maikutlong, etsa bonnete ba hore o tswela pele o rapela, o ya dibokeng le tshimong. Ke nnete hore o ka nna wa se ke wa kgona ho etsa dintho jwalo ka pele empa hopola hore Jehova o a utlwisisa. (Bapisa le Luka 21:​1-4.) Hape o lokela ho ipha nako ya ho ithuta o le mong le ho nahanisisa ka seo o ithutileng sona. Hobaneng? Jehova o sebedisa mokgatlo wa hae ho re fa dingolwa le divideo tse ka re thusang hore re laole maikutlo a rona dinakong tse thata. O ka sebedisa dintho tsa ho etsa dipatlisiso tse teng ka puo ya hao tse kang JW Library^® app, Watch Tower Publications Index le Tataiso ea ho Etsa Lipatlisiso ea Lipaki Tsa Jehova. Monika eo re buileng ka yena pejana, o re o ne a sebedisa dintho tsena ho batla dikeletso ha a ne a utlwa eka o tla ferekana maikutlong. Ka mohlala, ha a ne a etsa dipatlisiso o ne a batla lentswe “bohale.” Ka dinako tse ding, o ne a batla polelwana “ho eka” kapa lentswe “botshepehi.” Ka mora moo, o ne a bala ho fihlela a ikutlwa a le hantle. O re: “Ha ke ne ke etsa dipatlisiso, ke ne ke qala ke imetswe haholo maikutlong. Empa ha ke ntse ke tswela pele ke bala, ke ne ke utlwa eka Jehova o a nhaka. Ha ke ntse ke bala, ke ile ka hlokomela hore Jehova o ne a utlwisisa maikutlo a fapaneng ao ke neng ke eba le ona mme o ne a nthusa.” Ha Jehova a o thusa ka tsela eo, o tla kgona ho laola maikutlo a hao ho fihlela o eba le kgotso.—Pes. 119:​143, 144.

JEHOVA O TLA O THUSA

10. Re ka nna ra ikutlwa jwang ka mora ho hlahelwa ke ntho e bohloko haholo?

¹⁰ Bothata. Ka mora hore re hlahelwe ke ntho e bohloko haholo, ho na le dinako tseo re ka ikutlwang re se na matla re bile re imetswe maikutlong. Re ka nna ra ikutlwa jwalo ka semathi se lemetseng se neng se tlwaetse ho matha ka lebelo empa jwale se se se tsamaya se hlotsa. Re ka nna ra sokola ho etsa dintho tseo pele re neng re di etsa ha bonolo feela, kapa ra utlwa re se re sa thahaselle ho etsa dintho tseo re neng re rata ho di etsa pele. Re ka utlwa re thatafallwa ke ho tsoha, re batla ho robala feela jwalo ka Elia. (1 Mar. 19:​5-7) Jehova o tshepisa ho re thusa jwang ha re ikutlwa re fokola?

11. Tsela e nngwe eo Jehova a re thusang ka yona ke efe? (Pesaleme ya 94:18)

 ¹¹ Jehova o re thusa jwang? O tshepisa ho re tshehetsa. (Bala Pesaleme ya 94:18.) Feela jwalo ka ha semathi se lemetseng se hloka ho tshehetswa e le hore se nne se tsamaye, le rona re hloka thuso e le hore re dule re sebeletsa Jehova. Dinakong tse jwalo, Jehova o re: “Nna, Jehova Modimo wa hao, ke o tshwara ka letsoho la hao le letona, ke nna ya reng ho wena, ‘O se ke wa tshoha. Ke tla o thusa.’” (Esa. 41:13) Jehova o ile a thusa Morena Davida. Ha a ne a tobane le dira tsa hae le diteko, o ile a re ho Jehova: “Letsoho la hao le letona le a ntshehetsa.” (Pes. 18:35) Empa Jehova o re tshehetsa jwang?

12. Jehova a ka sebedisa bomang ho re thusa ha re nyahame?

¹² Hangata Jehova o re tshehetsa ka ho susumeletsa batho ba bang hore ba re thuse. Ka mohlala, ka lekgetlo le leng ha Davida a ne a nyahame, motswalle wa hae Jonathane o ile a ya ho yena mme a mo tshehetsa a ba a mo kgothatsa. (1 Sam. 23:​16, 17) Ka tsela e tshwanang, Jehova o ile a kgetha Elisha hore a thuse Elia. (1 Mar. 19:​16, 21; 2 Mar. 2:2) Mehleng ena, Jehova a ka sebedisa ba malapa a rona, metswalle kapa baholo ho re tshehetsa. Le ha ho le jwalo, ha re utlwile bohloko re ka nna ra batla ho ikarola ho batho ba bang, ra batla ho dula re le bang. Ha ho makatse ho ikutlwa jwalo. Re ka etsang e le hore re amohele tshehetso eo Jehova a re fang yona?

13. Re lokela ho etsang e le hore re amohele tshehetso ya Jehova? (Sheba setshwantsho.)

¹³ Re lokela ho etsang? Leka ka thata hore o se ke wa ikarola ho batho ba bang. Ha re ikarola ho batho ba bang, re ka nna ra nahana ka rona feela le ka mathata ao re leng ka hara ona. Ho nahana ka tsela ena ho ka etsa hore re se ke ra etsa diqeto tse nepahetseng. (Diprov. 18:1) Ke nnete hore kaofela ha rona re hloka ho ba bang ka dinako tse ding, haholoholo ha re hlahetswe ke dintho tse bohloko. Empa haeba re ikarola ho batho ba bang nako e telele, re tla be re hana tsela eo Jehova a e sebedisang ho re tshehetsa. Ka hoo, ho sa tsotellehe hore na o imetswe hakae, amohela thuso ya ba lelapa, metswalle le baholo. Ba nke e le tsela eo Jehova a o tshehetsang ka yona.—Diprov. 17:17; Esa. 32:​1, 2.

JEHOVA O TLA O TSHEDISA

14. Ke maemo afe a ka etsang hore re tshohe?

¹⁴ Bothata. Ho na le dinako tseo re ka ikutlwang re tshohile. Ka Bibeleng ho na le bahlanka  ba Modimo bao ka dinako tse ding ba neng ba tshoha le ho thothometswa ke dira tsa bona kapa mathata a mang. (Pes. 18:4; 55:​1, 5) Le rona re ka nna ra hanyetswa sekolong, mosebetsing, lapeng kapa ra hanyetswa ke mmuso. Re ka ba ra tshoha hore re tla shwa hobane re kula. Dinakong tse jwalo, re ka utlwa re sa tsebe hore na re lokela ho etsang. Maemong aa Jehova o re thusa jwang?

15. Pesaleme ya 94:19 e re kgodisa ka eng?

¹⁵ Jehova o re thusa jwang? O a re tshedisa hape o kokobetsa bohloko ba rona. (Bala Pesaleme ya 94:19.) Pesaleme ena e ka nna ya etsa hore re nahane ka ngwanana e monyenyane ya tshohileng a bile a sa kgone ho robala ka lebaka la sefefo se matla se nang le lehadima. Re ka inahanela re bona ntate wa hae a kena a bile a mo kuka ho fihlela a robala. Le hoja sefefo se ntse se le teng, o ikutlwa a bolokehile a bile a se a sa tshoha ha ntate wa hae a mo kukile. Ha re tobane le diteko tse re tshosang, re ka hloka hore Ntate wa rona ya lehodimong a re tshedise ho fihlela bohloko ba rona bo kokobela. Re ka etsang hore re fumane matshediso a tswang ho Jehova?

16. Re ka etsang e le hore matshediso a Jehova a re tswele molemo? (Sheba setshwantsho.)

¹⁶ Re lokela ho etsang? Itlwaetse ho qeta nako le Jehova ka hore o mo rapele le ho bala Lentswe la hae. (Pes. 77:​1, 12-14) Haeba o etsa jwalo, etlare ha o ena le mathata, motho wa pele eo o tla kopa thuso ho yena ke Ntate wa hao ya lehodimong. Bolella Jehova dintho tse o tshosang le tseo o tshwenyehileng ka tsona. Mo mamele ka hore o bale Lentswe la hae mme o tla bona hore na o o tshedisa jwang. (Pes. 119:28) O tla hlokomela hore dikarolo tse itseng tsa Bibele di ka o tshedisa haholo ha o tshohile. Ka mohlala, o ka tshediseha haholo ha o bala buka ya Jobo, Dipesaleme, Diproverbia le mantswe a Jesu a hlahang ho Matheu kgaolo ya botshelela. Ha o rapela Jehova o bile o bala Lentswe la hae, o tla utlwa hore o a o tshedisa.

17. Re ka kgodiseha ka eng?

¹⁷ Re ka kgodiseha hore Jehova o tla ba le rona nakong eo bophelo ba rona bo leng boima. A ke ke a re lahla. (Pes. 23:4; 94:14) Jehova o tshepisa hore o tla re lebela, a re thuse hore re dule re tsitsitse, a re tshehetse le ho re tshedisa ha re ena le mathata. Esaia 26:3 e re ka Jehova: “O tla sireletsa batho ba itshetlehang ka wena ka botlalo. O tla ba fa kgotso e sa feleng hobane ba tshepile wena.” Ka hoo, tshepa Jehova mme o sebedise dintho tsohle tseo a o fileng tsona ho o thusa. Ha o etsa jwalo, o tla ba le matla le ha maemo a le boima.