1. Ke hobaneng ha re lokela ho ikgopotsa lefu la Jesu selemo le selemo?

 TEFO ya topollo ke mpho e kgolo haholo eo Jehova a re fileng yona. (2 Bakor. 9:15) Ka ha Jesu o ile a re shwela, re ka kgona ho ba metswalle ya Jehova. Hape re na le monyetla wa ho phela ka ho sa feleng. Re na le mabaka a mangata a ho leboha Jehova. O bontshitse hore o re rata haholo ka ho fana ka bophelo ba Mora wa hae e le tefo ya topollo. (Bar. 5:8) Jesu o ile a re re ikgopotse lefu la hae selemo le selemo e le hore re dule re ananela seo yena le Ntate wa hae ba re etseditseng sona.—Luka 22:​19, 20.

2. Re tlo ithutang sehloohong see?

² Selemong sena, Sehopotso sa lefu la Jesu se tla tshwarwa ka Moqebelo wa la 12 April 2025. Ha ho pelaelo hore kaofela ha rona re ikemiseditse ho ba teng. Dibeke pele ho Sehopotso le ka mora sona, re tla rua molemo haholo haeba re ipha nako ya ho nahanisisa ka seo Jehova le Mora wa hae ba re etseditseng sona. Sehloohong sena re tlo ithuta hore na tefo ya topollo e re rutang ka Jehova le ka Mora wa hae. Sehloohong se latelang re tla ithuta hore na re ka rua molemo jwang tefong ya topollo le hore na re ka bontsha jwang hore re a e ananela.

TEFO YA TOPOLLO E RE RUTANG KA JEHOVA?

3. Ke jwang lefu la motho a le mong le ka lopollang batho ba dimilione sebeng le lefung? (Sheba setshwantsho.)

³ Tefo ya topollo e re ruta ka toka ya Jehova. (Deut. 32:4)  Jwang? Ka lebaka la ho se mamele ha Adama, re futsitse sebe mme re a shwa. (Bar. 5:12) E le hore re lopollwe sebeng le lefung, Jehova o ile a romela Jesu hore a tlo re shwela. Empa ho tla jwang hore lefu la motho a le mong ya phethahetseng le lopolle batho ba dimilione sebeng le lefung? Moapostola Pauluse o re: “Jwalo ka ha ho se mamele ha motho a le mong [Adama] ho ile ha etsa hore ba bangata e be baetsadibe, ka ho tshwanang ho mamela ha motho a le mong [Jesu] ho tla etsa hore ba bangata e be ba lokileng.” (Bar. 5:19; 1 Tim. 2:6) E leng hore batho bohle ke baetsadibe ebile ba a shwa hobane motho a le mong ya neng a phethahetse ha a ka a mamela Modimo. Ka hoo, ho ne ho hlokahala motho e mong ya phethahetseng ya neng a tla mamela Modimo e le hore re lopollwe sebeng le lefung.

4. Ke hobaneng ha Jehova a sa ka a tlohela bana ba Adama ba mo mamelang hore ba phele ka ho sa feleng?

⁴ Na ehlile ho ne ho hlokahala hore Jesu a re shwele? Ke hobaneng ha Jehova a sa ka a tlohela bana ba Adama ba mo mamelang hore ba phele ka ho sa feleng? Ho batho ho ne ho ka bonahala eka ena ke yona tsela e nepahetseng ya ho rarolla bothata. Empa ho Jehova ho etsa jwalo e ne e tla be e le ho hloka toka, hobane ho ne ho ka bonahala eka Adama ha a etsa sebe se tebileng le hore bana ba hae ba phethahetse empa bonneteng ho se jwalo.

5. Ke hobaneng ha re ka kgodiseha hore Jehova o tla dula a etsa se nepahetseng?

⁵ Ho ne ho ka etsahalang haeba Jehova a ne a sa ka a fana ka tefo ya topollo yaba o tlohela bana ba Adama hore ba phele ka ho sa feleng? Ka ha o ne a tla be a sa sebetsa ditaba ka toka boemong boo, batho ba ne ba ka nahana hore a ke ke a sebetsa ditaba ka toka hape nakong e tlang. Ka mohlala, ba ne ba ka nahana hore o tla hloleha ho phethahatsa tse ding tsa ditshepiso tsa hae. Empa ha re a lokela ho tshwenyeha ka hore ntho e jwalo e ka etsahala. Taba ya hore Jehova o ile a sebetsa ditaba ka toka ka hore a fane ka Mora wa hae le hoja seo se ile sa mo utlwisa bohloko, e a re kgodisa hore o tla dula a etsa se nepahetseng.

6. Keng e susumeditseng Jehova hore a romele Mora wa hae? (1 Johanne 4:​9, 10)

⁶ Ntho e nngwe e ileng ya susumetsa Jehova hore a romele Mora wa hae ho tlo re shwela ke lerato. (Joh. 3:16; bala 1 Johanne 4:​9, 10.) Jehova o rometse Mora wa hae ho tlo re shwela hobane a batla hore re phele ka ho sa feleng le hore re be karolo ya lelapa la hae. Nahana ka sena: Ka mora hore Adama a etse sebe, Jehova o ile a mo leleka lelapeng la Hae. Ka hoo, kaofela ha rona re hlahetse ka ntle ho  lelapa la Modimo. Empa ka lebaka la tefo ya topollo, Jehova o re tshwarela dibe mme bohle ba bontshang tumelo ho yena le ho mo mamela e tla ba karolo ya lelapa la hae. Le hona jwale re thabela ho ba metswalle ya Jehova le ya Bakrestemmoho. Ka nnete Jehova o a re rata.—Bar. 5:​10, 11.

7. Taba ya hore Jehova ha a ka a pholosa Jesu e bontsha jwang hore o a re rata?

⁷ Re ka utlwisisa haholwanyane lerato leo Jehova a re ratang ka lona ha re nahana ka seo a ileng a se tela e le hore re lopollwe. Satane o re ha ho mohlanka wa Modimo ya tla dula a tshepahala tlasa maemo a boima. Ho tiisa hore Satane o leshano, Jehova o ile a dumella Jesu hore a utlwiswe bohloko pele a shwa. (Jobo 2:​1-5; 1 Pet. 2:21) Jehova o ne a shebile ha Jesu a ntse a rohakwa ke batho, a otlwa ke masole, a kgokgothelwa palong a bile a shwa ka sehloho. (Mat. 27:​28-31, 39) O ne a ena le matla a ho thibela dintho tseo kaofela ho etsahala. Batho ba ile ba re: “Haeba Modimo o a mo rata, ha a mo pholose.” Jehova a ka be a ile a etsa jwalo. (Mat. 27:​42, 43) Empa ha a ne a ka mo pholosa, Jesu a ka be a sa fana ka bophelo ba hae e le tefo ya topollo mme re ne re tla sala re se na tshepo. Ka hoo, Jehova o ile a dumella Mora wa hae ho mamella bohloko boo ho fihlela a shwa.

8. Hlalosa hore na keng e bontshang hore Jehova o ile a utlwa bohloko ha Mora wa hae a hlokofatswa. (Sheba setshwantsho.)

⁸ Ha re a lokela ho nahana hore Jehova ha a na maikutlo hobane feela e le ya matla ohle. Ka ha Jehova o re bopile re tshwana le yena mme re ena le maikutlo, ho hlakile hore le yena o na le maikutlo. Bibele e re o ‘utlwa bohloko.’ (Pes. 78:​40, 41) Nahana ka tlaleho ya Abrahama le Isaka. Jehova o ile a laela Abrahama hore a etse sehlabelo ka mora wa hae. (Gen. 22:​9-12; Baheb. 11:​17-19) Re se re ka inahanela feela hore na Abrahama o ne a ferekane hakae ha a tshwere thipa a le mothating wa ho bolaya mora wa hae. E tlameha ebe Jehova yena o ile a utlwa bohloko bo fetang ha a shebile batho ba bolaya Mora wa hae ka sehloho.—Shebella video ya Etsisa Tumelo ya Bona—Abrahama, Karolo ya Bobedi e hlahang ho jw.org/st-za.

9. Baroma 8:​32, 38, 39 e bontsha jwang hore Jehova o a re rata?

⁹ Tefo ya topollo e re ruta hore Jehova o re rata ho feta mang kapa mang, esita le ho feta beng ka rona kapa metswalle ya rona. (Bala Baroma 8:​32, 38, 39.) Re ka kgodiseha hore Jehova o re rata ho feta ka moo re ithatang ka teng. O batla ho re tshwarela dibe le hore re phele ka ho sa feleng ho feta ka moo rona re batlang ka teng. Ntho eo a ikopelang yona feela ke hore re bontshe tumelo mphong ena  le hore re mo mamele. Tefo ya topollo ke mpho ya bohlokwa e bontshang hore Jehova o re rata haholo. Lefatsheng le letjha, re tlo ithuta haholwanyane ka lerato la Jehova.—Moek. 3:11.

TEFO YA TOPOLLO E RE RUTANG KA JESU?

10. (a) Ke hobaneng ha Jesu a ne a tshwenyehile ka tsela eo a tlo shwa ka yona? (b) Jesu o ile a halaletsa lebitso la Ntate wa hae jwang? (Sheba lebokose le reng “ Ho Tshepahala ha Jesu ho Halaleditse Lebitso la Jehova.”)

¹⁰ Jesu o amehile ka ho teba ka botumo ba Ntate wa hae. (Joh. 14:31) Jesu o ne a tshwenyehile ka hore ha a qoswa ka ho se hlomphe Modimo le ho ba setlokotsebe, lebitso la Ntate wa hae le ne le tlo senyeha. Ke ka hoo a ileng a rapela a re: “Ntate, haeba ho kgoneha, senwelo sena se ke se mphete.” (Mat. 26:39) Ka ha Jesu o ile a tshepahalla Jehova ho isa lefung, o ile a halaletsa lebitso la Ntate wa hae.

11. Jesu o bontshitse jwang hore o rata batho haholo? (Johanne 13:1)

¹¹ Tefo ya topollo e boetse e re ruta hore Jesu o rata batho e le ka nnete, haholoholo balatedi ba hae. (Diprov. 8:31; bala Johanne 13:1.) Ka mohlala, Jesu o ne a tseba hore tse ding tsa dintho tseo a neng a tla di etsa ha a le lefatsheng di ne di tla ba thata, haholoholo tsela e bohloko eo a neng a tla shwa ka yona. Empa o ne a ikemiseditse ho di etsa hobane a rata batho haholo eseng hobane feela a laetswe. Jesu o ile a bontsha hore o rata batho ka hore a ba bolelle ditaba tse monate, a ba rute le ho ba thusa. Le letsatsing leo a neng a tlo bolawa ka lona, o ile a ipha nako ya ho hlatswa maoto a baapostola ba hae, a ba kgothatsa le ho ba fa ditaelo. (Joh. 13:​12-15) Le ha a se a kgokgothetswe palong, o ile a kgothatsa setlokotsebe se neng se kgokgothetswe haufi le yena a ba  a kopa Johanne hore a hlokomele mme wa hae. (Luka 23:​42, 43; Joh. 19:​26, 27) O ile a bontsha hore o rata batho ka tsela eo a neng a ba tshwara ka yona le ka hore a ba shwele.

12. Jesu o tswela pele ho itella rona jwang?

¹² Ke nnete hore Jesu o ile a shwa “hanngwe ebile e le la ho qetela” empa o tswela pele ho itella rona. (Bar. 6:10) Ka tsela efe? O tswela pele ho sebedisa nako le matla a hae ho re etsetsa dintho tse molemo tseo re di fumanang ka lebaka la sehlabelo sa hae. Nahana ka dintho tseo a ntseng a di etsa hona jwale. Ke Morena wa rona, Moprista ya Phahameng le hlooho ya phutheho. (1 Bakor. 15:25; Baef. 5:23; Baheb. 2:17) Ke yena ya ikarabellang ka mosebetsi wa ho bokella batlotsuwa le bongata bo boholo, e leng mosebetsi o lokelang ho phethwa pele mahlomola a maholo a fela. a (Mat. 25:32; Mar. 13:27) O boetse o sebedisa mohlanka ya tshepahalang ho etsa bonnete ba hore re fumana dintho tseo re di hlokang hore re sebeletse Jehova ka botshepehi matsatsing ana a ho qetela. (Mat. 24:45) Le nakong ya Puso ya hae ya Dilemo Tse Sekete, Jesu o tla nne a tswele pele ho re etsetsa dintho tse molemo. Ka nnete Jesu o iteletse rona. Ke mpho ya bohlokwa eo Jehova a re fileng yona.

DULA O ITHUTA DINTHO TSE NTJHA

13. O ka etsang e le hore o tswele pele ho ithuta ka lerato la Modimo le la Kreste?

¹³ O ka tswela pele ho ithuta ka lerato la Jehova Modimo le la Kreste Jesu haeba o dula o thuisa ka lona. Mohlomong dibeke pele kapa ka mora Sehopotso selemong sena, o ka bala Kosepele e le nngwe kapa tse mmalwa ka hloko. O se ke wa leka ho bala dikgaolo tse ngata ka nako e le nngwe. Ho ena le hoo, nka nako ya hao mme o nahanisise ka mabaka a eketsehileng a hore na ke hobaneng ha re lokela ho rata Jehova le Jesu. Ka hodima tsohle, bolella ba bang dintho tseo o ithutileng tsona.

14. Ho ya ka Pesaleme ya 119:​97, ho etsa dipatlisiso ho ka re thusa jwang hore re tswele pele re ithuta ka tefo ya topollo le dintho tse ding? (Sheba setshwantsho.)

¹⁴ Haeba o se o ena le dilemo tse ngata o kolobeditswe, o ka nna wa ipotsa hore na ho na le dintho tse ntjha tseo o ka ithutang tsona ka toka ya Modimo, lerato la hae le tefo ya topollo. Nnete ke hore ha ho mohla re tla re re qetile ho ithuta ka dintho tsena le tse ding. Jwale o ka etsang? Etsa sohle seo o ka se kgonang  ho ithuta dingolwa tse thehilweng Bibeleng. Etsa dipatlisiso ha ho ena le seo o sa se utlwisiseng ka Bibeleng. Ha letsatsi le ntse le ya, nahana ka seo o se fumaneng ha o ne o etsa dipatlisiso le hore na se o rutang ka Jehova, Mora wa hae le lerato leo ba o ratang ka lona.—Bala Pesaleme ya 119:97.

15. Ke hobaneng ha re lokela ho dula re ithuta dintho tse ntjha ka Bibeleng?

¹⁵ O se ke wa nyahama haeba ka dinako tse ding o sa fumane ntho e ntjha kapa e monate ha o ntse o ithuta kapa o etsa dipatlisiso. Boemong bona, o ka itshwantsha le motho ya batlang kgauta. Ha batho ba batla kgauta, ba qeta dihora kapa matsatsi a mangata pele ba ka fumana le ha e le lejwe le lenyenyane la kgauta. Ho ntse ho le jwalo, ha ba kgathallwe ke pere hobane ho sa tsotellehe hore na kgauta eo e nyenyane hakae, ho bona ke ya bohlokwa haholo. Dinnete tsa Bibele tsona di bohlokwa le ho feta kgauta. (Pes. 119:127; Diprov. 8:10) Ka hoo, tswela pele ho bala Bibele le ho batlisisa dintho tse ntjha tseo o ka ithutang tsona ho yona.—Pes. 1:2.

16. Re ka etsisa Jehova le Jesu jwang?

¹⁶ Ha o ntse o ithuta, nahana hore na o ka sebedisa dintho tseo o ithutang tsona jwang. Ka mohlala, tshwara batho ba bang ka toka jwalo ka Jehova. Etsisa tsela eo Jesu a neng a rata Ntate wa hae le batho ka yona. Ikemisetse ho etsa sohle seo Jehova a reng o se etse le hore o itelle Bakrestemmoho le hoja ka dinako tse ding ho ka ba boima. Hape, etsisa Jesu ka hore o rute batho ka Jehova e le hore le bona ba ka ba le monyetla wa ho bontsha tumelo mphong ena e babatsehang e tswang ho Jehova.

17. Re tlo ithutang sehloohong se latelang?

¹⁷ Ha re tswela pele ho ithuta haholwanyane ka tefo ya topollo, re tla rata Jehova le Jesu le ho feta mme le bona ba tla re rata haholo. (Joh. 14:21; Jak. 4:8) Ka hoo, a re tsweleng pele ho sebedisa dintho tseo Jehova a re fileng tsona ho ithuta ka tefo ya topollo. Sehloohong se latelang re tlo ithuta ditsela tse ding tsa ka moo re ka fumanang molemo ka teng tefong ya topollo. Re tla boela re ithute hore na re ka bontsha jwang hore re ananela lerato la Jehova.