“KOTULO e kgolo, empa basebetsi ha ba bakae. Ka hona kopang Monga kotulo hore a romele basebetsi kotulong ya hae.” (Luka 10:2) Mantswe ana ao Jesu a ileng a a bua dilemong tse ka bang 2 000 tse fetileng, a hlalosa hantle se etsahalang Myanmar kajeno. Ke hobaneng ha re tjho jwalo? Naha ya Myanmar e na le baahi ba dimilione tse 55 empa ho na le bahweletsi ba 4 200 feela ba bolelang ditaba tse molemo moo.

Le ha ho le jwalo, Jehova e leng yena “Monga kotulo,” o susumeditse bara le baradibabo rona ba bangata ba tswang dinaheng tse sa tshwaneng, hore ba tle Southeast Asia, ho tla thusa ka mosebetsi wa ho etsa barutuwa. Ebe keng e ileng ya etsa hore ba tlohe dinaheng tsa habo bona? Keng e ileng ya ba thusa hore ba fallele Myanmar? Hona ba thabela ditlhohonolofatso dife? A re ke re boneng.

Dilemo tse mmalwa tse fetileng, Kazuhiro, pulamadiboho e dulang Japan, o kile a akgeha ka lebaka la lefu la sethwathwa, yaba o iswa sepetlele. Ngaka e ile ya re a ke a qete dilemo tse pedi a sa kganne. Kazuhiro o ile a utlwa bohloko bona bo haesale. O ile a ipotso a re: ‘Ka ha ke rata bopulamadiboho, ebe jwale ke tla ya tshimong jwang?’ O ile a kopa Jehova ka tiyo hore a mo thusa hore a tswele pele ka bopulamadiboho.

Kazuhiro o re: “Kgwedi hamorao, motswalle wa ka ya dulang Myanmar o ile a utlwela ka maemo a ka a hlobaetsang. Yaba o re: ‘Mona Myanmar dipalangwang tse sebediswang haholo ke dibese. Ha o hloke hore o be le koloi hore o ye tshimong mona.’ Ke ile ka botsa ngaka hore na maemo a ka a ntumella hore ke ilo phela Myanmar na. Ke ile ka thaba ha ke utlwa ngaka e re: ‘Setsebi sa mafu a boko se tswang Myanmar, se teng mona Japan. Nka hla ka o kopanya le sona. Ha ho ka etsahala hore o akgehe hape, o tla o thusa.’ Ke ile ka nka hore ke Jehova ya nkarabang.”

Kazuhiro o ile a romela molaetsa ofising ya lekala e Myanmar hanghang, a hlalosa takatso eo yena le mosadi wa hae ba nang le yona ya ho ba bopulamadiboho moo. Ofisi ya lekala e ile ya ba araba le pele ho feta matsatsi a mahlano, ya re: “Tloong, re hloka bopulamadiboho ba eketsehileng.” Kazuhiro le mosadi wa hae Mari, ba ile ba rekisa dikoloi tsa bona, ba etsa divisa yaba ba reka ditekete tsa sefofane. Hona jwale ba sebeletsa ba thabile phuthehong ya  puo ya matsoho e Mandalay. Kazuhiro o re: “Ketsahalo ena e ile ya etsa hore re tshepe mantswe a Modimo a hlahang ho Pesaleme ya 37:5 le ho feta, a reng: ‘Rolela tsela ya hao ho Jehova, o itshetlehe ka yena, mme o tla nka bohato.’”

Dipaki Tsa Jehova tsa Myanmar di ile tsa ba le kopano e kgethehileng ka 2014. Ba bangata ba neng ba tlile kopanong eo, ba ne ba tswa dinaheng tse ding. E mong wa bona ke moradiwabo rona Monique, ya dilemo di 34 mme o dula United States. Yena o re: “Ha ke kgutla kopanong eo, ke ile ka rapela Jehova, ka mo kopa hore a mpontshe mohato oo ke lokelang ho o nka bophelong ba ka. Ke ile ka boela ka bua le batswadi ba ka ka taba ya ho fallela Myanmar. Yaba ba a dumela, empa ho ile ha nka nako hobane ke ne ke lokela ho nahana ka taba ena mme ke rapele ka tiyo pele ke etsa qeto.” A re ke re utlweng hore na ke hobaneng ha a sa ka a etsa qeto ka lepotlapotla.

Monique o re: “Jesu o ile a kgothalletsa balatedi ba hae hore ba ‘bale ditshenyehelo.’ Sena se ile sa etsa hore ke ipotse: ‘Na ebe ke tla ba le tjhelete e lekaneng hore ke falle? Na ha ke le Myanmar, ke tla kgona ho fumana mosebetsi o ke keng wa njella nako?’” Monique o re: “Ke ile ka hlokomela hore ha ke na tjhelete e lekaneng ya ho fallela Myanmar.” Jwale ebe o ile a thuswa keng?—Luka 14:28.

O re: “Ka tsatsi le leng mongaka o ile a mpitsetsa ofising ya hae. Ke ne ke tshohile ke nahana hore o tlo ntebela. Empa ho e na le hoo, o ile a nteboha ka mosebetsi wa ka o motle.” O ile a mpolella hore o tlo mpha bonase, ene, e ne e lekana hantle le tjhelete eo ke neng ke e hloka hore ke tswe dikolotong.

Haesale Monique a le tlhokahalong naheng ena ho tloha ka December 2014. Ebe o ikutlwa jwang ka ho ba tlhokahalong? O re: “Ke thabile hona hoo. Ebile ke se ke ithuta Bibele le batho ba bararo mme e mong wa bona o dilemo di 67. Kamehla ha a ntumedisa, o a nhaka. Mohlang a neng a utlwa hore lebitso la Modimo ke Jehova, o ile a ntsha meokgo ya thabo. Yaba o re: ‘Ke hola ke ba mokana, empa ke qala ho utlwa hore lebitso la Modimo ke Jehova. Ngwanaka o sa le monyenyane haholo empa o nrutile taba ya bohlokwa ka ho fetisisa.’ Le nna meokgo ya thabo e ile ya keleketla marameng a ka. Ruri ditlaleho tse kang tsena di ka susumelletsa motho hore a batle ho ya tlhokahalong.” Haufinyana tjena Monique o sa tswa ya Sekolong sa Baevangedi ba Mmuso.

Buka ya Selemo ya Dipaki Tsa Jehova ya 2013 e buang ka tlaleho ya Myanmar, e bile thulusi e ntle e ileng ya susumetsa ba bang hore ba fallele moo. Moradiwabo rona Li, ya dilemo di fetang 30, o dula Southeast Asia. Le hoja a ne a na le mosebetsi wa moshwelella, Buka ena ya Selemo e ile ya mo susumelletsa hore a nahanisise ka ho ya tlhokahalong Myanmar. Li, o re: “Ha ke ne ke ile kopanong e kgethehileng Yangon ka 2014, ke ile ka kopana le banyalani ba neng ba le tlhokahalong phuthehong ya Setjhaena e Myanmar. Erekaha ke bua Setjhaena, ke ile ka fihlela qeto ya hore nke ke ye ke ilo thusa sehlopha sa Setjhaena moo. Nna le Monique re ile ra ipopa ngatana nngwe yaba re fallela Mandalay. Jehova o ile a re putsa ka hore re fumane mosebetsi wa matsatsi sekolong se le seng, mme ka nako e tshwanang ra fumana sebaka sa bodulo haufinyane. Ho sa tsotellehe motjheso kapa ditshitiso tse ding, ke ntse ke thabela tshebeletso ya ka mona. Batho ba bangata ba mona Myanmar ba iphelela hantle feela, mme ba ipha nako ya ho mamela ditaba tse molemo. Ke ntho e thabisang ho bona hore Jehova o potlakisa mosebetsi. Ke dumela hore ke Jehova ya neng a batla hore ke bo mona Mandalay.”

Batho ba bangata ba leng tlhokahalong, ba bone ka moo Jehova a arabang dithapelo tsa bona ka teng.  Jumpei ya dilemo di 37 le mosadi wa hae Nao ya dilemo di 35, ke ba bang ba boneng ha Jehova a araba dithapelo tsa bona. Ba ne ba se ba kopanela phuthehong ya puo ya matsoho e Japan. Ke hobaneng ha ba ile ba fallela Myanmar? Jumpei o re: “Haesale nna le mosadi wa ka re labalabela ho ya tlhokahalong naheng e nngwe. Morabo rona e mong phuthehong ya rona ya puo ya matsoho e Japan, o ile a fallela Myanmar. Le rona ka May 2010 re ile ra falla le hoja re ne re se na tjhelete e kaalo eo re e bolokileng. Bara le baradibabo rona ba Myanmar, ba ile ba re amohela ka mofuthu.” Ebe o ikutlwa jwang ka tshimo ya puo ya matsoho e Myanmar? O di beha tjena: “Ha re ikwahlaele hore ebe re ile ra fihlella qeto ya ho tla tlhokahalong mona. Hobane batho ba mona ba rata molaetsa wa Bibele haholo. Le ha re ba bontsha divideo tsa puo ya matsoho, ba a hlollwa.”

Ebe Jumpei le Nao ba ile ba iphedisa jwang? Jumpei o re: “Ka mora dilemo tse tharo re ne re se re sebedisetse boholo ba tjhelete eo re ne re e bolokile, mme jwale re haellwa ke tjhelete ya ho lefella rente. Nna le mosadi wa ka re ile ra rapela ka tiyo. Re ile ra fumana lengolo le tswang ofising ya lekala re sa lebella, le re tsibisang hore re kgethilwe ho ba bopulamadihobo ba kgethehileng ka nakwana. Re ne re tshepile Jehova mme ha a ka a re lahla. Haesale Jehova a re hlokometsi ka ditsela tsohle.” Haufinyane tjena, Jumpei le Nao le bona ba sa tswa ya Sekolo sa Baevangedi ba Mmuso.

Keng e ileng ya etsa hore Simone ya di dilemo di 43, ya tswang Italy, le mosadi wa hae Anna ya di dilemo di 37, ya tswang New Zealand, hore ba fallele Myanmar? Anna o re: “Re ile ra thuswa ke Buka ya Selemo ya 2013 e neng e bua ka Myanmar.” Simone yena o re: “Ho monate haholo ho ba mona Myanmar. Bophelo ba mona bo iketlile, ebile ke qeta nako e ngata ke le tshebeletsong. Ho a thabisa ho bona ka moo Jehova a re hlokomelang kateng ha re le tlhokahalong.” (Pes. 121:5) Anna o re: “Ha ke so ka ke thaba ka tsela ena bophelong ba ka. Nna le monna wa ka re phela ka tsela e itekanetseng. Re qeta nako e ngata re le mmoho, mme kamano ya rona e ntse e tiya le ho feta. Re se re bile re na le metswalle e metjha. Batho ba mona ba rata Dipaki ebile ba ithatela molaetsa wa Bibele.” Ke hobaneng ha Anna a tjho jwalo?

Anna o re: “Ka letsatsi le leng, ke ile ka qoqa le moithuti e mong wa yunivesithi ka Bibele, mme ka mo tshepisa hore ke tla kgutlela ho yena. Ha ke kgutlela ho yena, ke ile ka fumana a bitsitse motswalle wa hae. Eitse ha ke kgutlela hape, ka fumana a bitsitse ba bang ba eketsehileng. Ha ke se ke ya hape hape, jwale ka fumana a se a tlisitse ba bang. Hona jwale ke se ke bala le ba bahlano ba bona.” Simone yena o re: “Batho ba tshimong ba botswalle ebile ba rata ho tseba dintho. Ba bangata ba rata molaetsa wa rona. Re iphumana re se re sena nako e lekaneng ya ho bala le bona kaofela.”

 Ke mehato efe e amehang ha motho a batla ho fallela Myanmar? Mizuho ya tswang Japan o re: “Nna le molekana wa ka Sachio, haesale re labalabela ho ya tlhokahalong naheng e nngwe, empa re sa tseba ho kae? Ka mora ho bala Buka ya Selemo ya 2013 e buang ka Myanmar, re ile ra ameha maikutlo haholo, yaba re qala ho nahana ka ho fallela moo. Sachio yena o re: “Re ile ra rera ho ya hlwela naha ka hore re qete beke yohle re le motse moholo wa Myanmar, o bitswang Yangon. Leeto leo la rona le le kgutshwane le ile la re thusa ho fallela mona.”

Rodney ya tswang Australia le mosadi wa hae Jane ya dilemo di 52, ba ile ba fallela Myanmar ka 2010 hammoho le mora wa bona Jordan le moradi wa bona Danica. Rodney o re: “Re ile ra susumetswa haholo ke ka moo batho ba neng ba lapetse nnete kateng. Ha e le hantle, ke ne ke ka kgothalletsa le malapa a mang hore a fallele dibakeng tse kang Myanmar.” Hobaneng? “Hobane ho ba mona ho thusa nna le lelapa la ka hore re matlafatse kamano ya rona le Modimo. Batjha ba bangata ba phathahane ka difouno, dikoloi, mesebetsi, jwalo jwalo. Bana ba rona bona, ba ithuta mantswe a matjha ao ba ka a sebedisang tshimong. Ba rata ho bua le batho ka molaetsa wa Bibele, ba fana ka dikarabo dibokeng ebile ba mafolofolo tshebeletsong ya bona.”

Morabo rona Oliver ya dilemo di 37 ya tswang United States, o a hlalosa hore na ke hobaneng ha a kgothalletsa ba bang ho ya tlhokahalong. O re: “Ho sebeletsa Jehova sebakeng seo ke sa se tlwaelang ho nthusitse haholo. Ho dula hole le hae, ho entse hore ke tshepe Jehova le ho feta, ho sa tsotellehe hore na ke tobana le maemo afe. Ho sebetsa le barababo rona bao ke sa ba tsebeng, ba ratang Jehova ka moo ke mo ratang kateng, ho nthusitse ho hlokomela hore ha hona ntho ya bohlokwa ho feta Mmuso wa Modimo.” Kajeno, Oliver le mosadi wa hae Anna, ba tswella pele ho sebeletsa ka mafolofolo tshimong ya Setjhaena.

Trazel, e leng maradiwabo rona ya tswang Australia, ya dilemo di 52, haesale a sebeletsa Myanmar ho tloha ka 2010. O re: “Ke kgothalletsa bohle hore ba ye tlhokahalong haeba maemo a bona a ba dumella. Ke ile ka hlokomela hore Jehova o tla o putsa haeba o batla ho mo sebeletsa. Ke ne ke sa nahane hore ka le leng ke tla be ke phela ka tsela ena. Ke bophelo bo kgotsofatsang le bo monate ka ho fetisisa, boo motho a ka bo phelang.”

E se e ka mantswe ana a tswang botebong ba dipelo tsa batho ba tlhokahalong Myanmar, a ka o susumetsa hore le wena o batle ho thusa batho ba dipelo di ntle, ba dulang dibakeng tse hole. Batho ba tlhokahalong ba re kopa ka tiyo ba re: “Re kopa le tsheleleng Myanmar, le tlo re thusa!”