1. Ho ya ka Bakolose 2:4, 8, Satane o leka jwang ho laola menahano ya rona?

SATANE o batla hore re kgaotse ho sebeletsa Jehova. E le hore a atlehe ho etsa sena, o leka ho susumetsa tsela eo re nahanang ka yona, ha e le hantle o batla re nahane ka tsela eo a nahanang ka yona. O leka ho re susumetsa hore re mo latele ka ho re hohela ka dintho tseo re di ratang.​—Bala Bakolose 2:4, 8.

2-3. (a) Ke hobaneng ha re lokela ho mamela keletso e ho Bakolose 2:8? (b) Re tlo tshohlang sehloohong sena?

² Na ehlile re kotsing ya ho kgeloswa ke Satane? Ka sebele! Hopola hore ha Pauluse a ne a ngola keletso e ho Bakolose 2:8, o ne a sa e ngolle batho bao e seng Bakreste, empa o ne a e ngolla Bakreste ba tlotsitsweng ka moya o halalelang. (Bakol. 1:2, 5) Bakreste bao ba ne ba le kotsing ya ho kgeloswa ke Satane mme rona re kotsing e fetang. (1 Bakor. 10:12) Hobaneng? Hobane Satane o dihetswe lefatsheng mme o ikemiseditse ho kgelosa bahlanka ba Modimo ba tshepahalang. (Tšen. 12:9, 12, 17) Ho ekelletsa moo, re phela nakong eo ho yona batho ba kgopo le baikaketsi ba ntseng ba “tloha bobeng ho ya bobeng bo fetisisang.”​—2 Tim. 3:1, 13.

³ Sehloohong sena, re tlo hlahloba ka moo Satane a sebedisang “thetso ya lefeela” ho leka ho susumetsa tsela eo re nahanang ka yona. Re tla boela re hlahlobe maqheka a mararo ao a a sebedisang ho leka ho re susumetsa. (Baef. 6:11) Ebe sehloohong se latelang, re hlahloba ka moo re ka lwantshang ditlamorao tse mpe tsa tshusumetso ya Satane. A re qaleng pele ka ho hlahloba ka moo Satane a ileng a kgelosa Baiseraele  ka teng ka mora hore ba kene Naheng e Tshepisitsweng mme re bone hore na re ka ithutang ho seo.

4-6. Ho ya ka Deuteronoma 11:10-15, ke mekgwa efe ya temo eo Baiseraele ba neng ba lokela ho ithuta yona ha ba fihla Naheng e Tshepisitsweng?

⁴ Ka mano, Satane o ile a susumetsa Baiseraele hore ba rapele ditshwantsho. Ebe o entse seo jwang? O ile a nka monyetla ka taba ya hore ba ne ba hloka dijo. Ha Baiseraele ba ne ba kena Naheng e Tshepisitsweng, ba ne ba lokela ho ithuta mekgwa e metjha ya ho lema. Ha ba ne ba le Egepeta, ba ne ba nosetsa dijalo tsa bona ka metsi a tswang nokeng ya Nile. Le ha ho le jwalo, Naheng e Tshepisitsweng ho ne ho sena metsi a tswang nokeng e kgolo. Ka hona, e le hore ba nosetse dijalo, ba ne ba hloka metsi a pula kapa phoka. (Bala Deuteronoma 11:10-15; Esa. 18:4, 5) Ka lebala leo, Baiseraele ba ne ba lokela ho ithuta mekgwa e metjha ya temo. Empa seo se ne se sa tlo ba bonolo, ka ha bongata ba batho ba neng ba tseba ka ditaba tsa temo, ba ile ba hlokahala ha ba ne ba le lefelleng.

⁵ Jehova o ile a hlalosetsa bahlanka ba hae hore maemo a bona a ne a se a fetohile. Yaba o ba fa keletso ena, eo qalong ho neng ho bonahala eka ha e amane le taba ya ho lema: “Itebeleng esere dipelo tsa lona tsa ekwa, mme la kgeloha yaba le rapela medimo e meng mme la e inamela.” (Deut. 11:16, 17) Empa ke hobaneng ha Jehova a ile a kgalemella borapedi ba ditshwantsho, le hoja a ne a bua ka mekgwa e metjha ya temo?

⁶ Jehova o ne a tseba hore Baiseraele ba ne ba tla susumelletseha ho ya ho batho ba naha eo ba neng ba sa mo rapele, e le hore ba ithute mekgwa e metjha ya ho lema ho bona. Teng ke nnete hore baahelani ba bona ba ne ba tseba mekgwa e atlehang ya ho lema mme bahlanka ba Modimo ba ne ba ka  ithuta dintho tse ngata ho bona, empa seo se ne se tla ba beha kotsing. Balemi bao ba Bakanana ba ne ba rapela Baale mme tsela ya bona ya ho nahana e ne e susumetswa ke yena. Bakanana ba ne ba dumela hore lehodimo ke la Baale le hore ke yena ya nesang pula. Ka hona, Jehova o ne a sa batle hore bahlanka ba hae ba kgeloswe ke thuto eo ya leshano. Empa ka makgetlo a mangata, Baiseraele ba ile ba kgetha ho rapela Baale. (Num. 25:3, 5; Baahl. 2:​13; 1 Mar. 18:18) Jwale, a re hlokomeleng ka moo Satane a ileng a atleha ka teng ho kgelosa Baiseraele.

7. Tumelo ya Baiseraele e ile ya lekwa jwang ha ba ne ba kena Naheng e Tshepisitsweng?

⁷ Leqheka la pele leo Satane a ileng a le sebedisa ke takatso ya ho batla hore pula e ne bakeng sa ho nosetsa dijalo. Naheng e Tshepisitsweng, pula e ne e sa ne haholo selemo le selemo ho tloha qetellong ya kgwedi ya April ho ya ho ya September. Jwale, e le hore dijalo tsa Baiseraele di hole hantle, ba ne ba lokela ho emela pula eo ka tlwaelo e neng e tla na kgweding ya October. Ka hona, Satane o ile a susumetsa Baiseraele hore ba nahane hore tsela feela ya ho atleha ditabeng tsa temo, ke hore ba etsise mekgwa ya baahelani ba bona ba bahetene. Baahelani bao ba bona, ba ne ba dumela hore ho lokela ho etswe meetlo e itseng e le hore medimo ya bona e ka ba nesetsa pula. Ka lebaka leo, Baiseraele ba neng ba sa tshepe Jehova ba ile ba dumela hore ena ke yona feela tsela ya ho fedisa komello mme ba ile ba etsa meetlo ya bohetene bakeng sa modimo wa bohata e leng Baale.

8. Ke leqheka lefe la bobedi leo Satane a ileng a le sebedisa? Hlalosa.

⁸ Satane o ile a sebedisa leqheka la bobedi ho Baiserale. O ile a ba kgadisa ka takatso ya ho etsa boitshwaro bo bobe. Ditjhaba tsa bohetene di ne di rapela medimo ya tsona ka ho etsa diketso tse nyonyehang. Borapeding bona bo nyonyehang, ho ne ho e na le banna le basadi bao e neng e le matekatse a tempele. Bahetene bana, ba ne ba amohela ho ratana ha batho ba bong bo tshwanang le boitshwaro bo bobe ba thobalano, ba bile ba nka hore diketso tsena ke tsela e tlwaelehileng ya bophelo. (Deut. 23:​17, 18; 1 Mar. 14:​24) Ba ne ba dumela hore diketso tsena, di ne di tla etsa hore medimo ya bona e ba hlahisetse dimela tse ngata. Sena se ile sa etsa hore Baiseraele ba bangata ba kgahlwe ke diketso tsena tse mpe tsa ho etsa thobalano mme ba kgetha ho rapela medimo ya bohata. Ho hlakile hore Satane o ne a ba tshwere jwalo ka diphofu.

9. Ho latela Hosea 2:16, 17, Satane o ile a etsang hore Baiseraele ba lebale hore ha e le hantle Jehova ke mang?

⁹ Satane o ile a sebedisa leqheka la boraro. O ile a etsa hore Baiseraele ba lebale hore ha e le hantle Jehova ke mang. Mehleng ya moprofeta Jeremia, Jehova o ile a bolela hore baprofeta ba bohata ba ile ba etsa hore bahlanka ba hae ba lebale lebitso la hae “ka lebaka la Baale.” (Jer. 23:​27) Ho bonahala bahlanka ba Jehova ba ile ba kgaotsa ho sebedisa lebitso la hae mme ba le nkela sebaka ka Baale, e bolelang “Monga ka.” Sena se ile sa etsa hore ho be thata hore Baiseraele ba bone phapang pakeng tsa Jehova le Baale mme qetellong ba ne ba se ba kopanya borapedi ba Baale le ba Jehova.​—Bala Hosea 2:16, 17.

10 Satane o sebedisa maqheka afe kajeno?

¹⁰ Satane o sebedisa maqheka a tshwanang le kajeno. O tshwasa batho ka hore ba batle ho kgotsofatsa ditakatso ya bona tsa tlhaho, o ba susumelletsa boitshwarong bo  bobe ba ho etsa thobalano le hore ba lebale hore Jehova ke mang. A re qaleng ka ho hlahloba hore Satane o re lebatsa Jehova jwang.

11. Satane o etsa jwang hore batho ba lebale hore na Jehova ke mang?

¹¹ Satane o etsa hore batho ba lebale hore ha e le hantle Jehova ke mang. Ka mora lefu la baapostola, batho ba bang ba neng ba ipolela hore ke Bakreste, ba ile ba qala ho phatlalatsa dithuto tsa leshano. (Lik. 20:29, 30; 2 Bathes. 2:3) Bakwenehi bana ba ile ba qala ho pata lebitso la Modimo. Ka mohlala, ba ile ba kgaotsa ho sebedisa lebitso la Modimo Dibibeleng tsa bona mme sebakeng sa lona ba sebedisa tlotla “Morena.” Sena se etsa hore ho be thata ho motho ya ithutang Bibele hore a bone phapang e teng pakeng tsa Jehova le “marena” a mang ao ho builweng ka ona ka Bibeleng. (1 Bakor. 8:5) Ba sebedisitse lentswe “Morena” bakeng sa Jehova le Jesu, e leng se etsang hore ho be thata ho bona hore ke batho ba babedi ba fapaneng. (Joh. 17:3) Pherekano ena e entse hore ho be le thuto ya Boraro bo Teroneng, e leng thuto e siyo ka Bibeleng. Ka lebaka leo, batho ba bangata ba dumela hore ha hona motho ya ka tsebang Modimo hantle. Leo ke leshano le letala!​—Lik. 17:27.

12. Bodumedi ba bohata bo susumelletsa batho hore ba etseng, hona diphello tsa seo ke dife jwalo ka ha ho hlalositswe ho Baroma 1:28-31?

¹² Satane o sebedisa takatso e mpe ya ho etsa thobalano. Mehleng ya Baiseraele, Satane o ile a sebedisa bodumedi ba bohata ho susumelletsa batho hore ba etse boitshwaro bo bobe mme o ntse a etsa se tshwanang le kajeno. Bodumedi ba bohata bo kgothalletsa le ho susumelletsa batho hore ba etse boitshwaro bo bobe ba thobalano. Ka lebaka leo, batho ba bangata ba reng ba sebeletsa Modimo, ba se ba iphapanyetsa melao ya hae e hlakileng e mabapi le boitshwaro. Moapostola Pauluse o hlalosa diphello tsa sena lengolong leo a ileng a le ngolla Baroma. (Bala Baroma 1:28-31.) “Dintho tse sa lokelang” tseo a buang ka tsona, di akarelletsa mekgwa yohle e mebe ya thobalano ha mmoho le ho ratana ha batho ba bong bo tshwanang. (Bar. 1:24-27, 32; Tšen. 2:20) Ka hona, ke ha bohlokwa hore re mamele seo Bibele e se rutang mabapi le mekgwa ena.

13. Ke leqheka lefe hape leo Satane a le sebedisang?

¹³ Satane o batla hore batho ba kgotsofatse ditakatso tsa bona tsa tlhaho. Kaofela re na le takatso ya tlhaho ya ho batla ho ithuta  dintho tse itseng e le hore re iphedise le ho hlokomela malapa a rona. (1 Tim. 5:8) Hangata ho hlokeha hore re kene sekolo mme re be baithuti ba hlwahlwa hore re fumane tsebo e itseng. Le ha ho le jwalo, re lokela ho ba hlokolosi. Dinaheng tse ngata, baithuti ba fuwa tsebo ya ho etsa mosebetsi o itseng, empa ba boetse ba ithuta bohlale ba lefatshe lena. Ba kgothalletswa hore ba belaele hore Modimo o teng le hore ba hlokomolohe seo Bibele e se rutang. Ba bolellwa hore batho bohle ba bohlale ba dumela thuto ya hore dintho di ikentse. (Bar. 1:21-23) Dithuto tseo di hanyetsa ‘bohlale ba Modimo.’​—1 Bakor. 1:19-21; 3:18-20.

14. Bohlale ba lefatshe bo kgothalletsa batho hore ba etseng?

¹⁴ Bohlale ba lefatshe bo kgothalletsa batho hore ba iphapanyetse melaomotheo e lokileng ya Jehova le ho hanyetsana le yona. Ha bo kgothalletse ditholwana tsa moya wa Modimo, empa bo kgothalletsa “mesebetsi ya nama.” (Bagal. 5:19-23) Bo boetse bo susumelletsa batho hore e be ba ikgohomosang mme qetellong e be “baithati.” (2 Tim. 3:2-4) Dintho tsena di fapane hole le seo Modimo a batlang hore bahlanka ba hae ba be sona. O batla hore bahlanka ba hae ba be bonolo mme ba ikokobetse. (2 Sam. 22:28) Bakreste ba bang ba ileng ba ya yunivesithi, ba ile ba qetella ho tadima dintho jwalo ka ha lefatshe le di tadima, ho e na le hore ba di tadime jwalo ka Modimo. A re hlahlobeng mohlala wa se ka etsahalang haeba re sa hlokomele kotsi ena.

15-16. O ithutang ho se ileng sa etsahalla moradiwabo rona e mong?

¹⁵ Moradiwabo rona e mong ya nang le dilemo tse fetang 15 a le tshebeletsong ya nako e tletseng, o re: “Jwalo ka Paki e kolobeditsweng, ke ile ka utlwela le ho bala ka dikotsi tsa ho ya yunivesithi, empa ka kgetha  ho hlokomoloha dikeletso tseo ke di fuwang. Ke ne ke nahana hore ha di sebetse ho nna.” Diphello tsa seo e ile ya ba dife? O re: “Dithuto tsa ka di ne di ntshitisa ho rapela Jehova jwalo ka pele. Di ne di etsa hore ke ikutlwe ke kgathetse ha ke tlameha ho buisana le batho ka Bibele le ha ke lokela ho lokisetsa diboka. Ho thabisang ke hore, ha ke hlokomela hore thuto e phahameng e senya kamano ya ka le Jehova, ke ile ka e tlohela.”

¹⁶ Thuto e phahameng e ile ya susumetsa moradiwabo rona jwang? O re: “Ho a nswabisa ho dumela hore thuto eo ke neng ke e kgethile, e ile ya etsa hore ke shebe diphoso tsa batho ba bang, haholoholo tsa bakrestemmoho, ho lebella hore ba etse dintho tse ka nqane ho matla a bona le ho ikarola ho bona. Ho nkile nako e telele hore ke kgaotse ho nahana ka tsela ena. Sena se nthutile hore ho kotsi ho hlokomoloha keletso eo Ntate wa rona ya lehodimong a re fang yona, a sebedisa mokgatlo wa hae. Jehova o ntseba ho feta ka moo ke itsebang ka teng. Nkabe ke ile ka mo mamela.”

17. (a) Keng seo o lokelang ho se hlokomela? (b) Re tlo ithutang sehloohong se latelang?

¹⁷ Hlokomela hore o se ke wa kgeloswa ke “filosofi le thetso ya lefeela” ya lefatshe la Satane. Le ka mohla o se ke wa dumella Satane hore a o kgelose. (1 Bakor. 3:18; 2 Bakor. 2:11) Hana maqheka ao a a sebedisang ho leka ho o lebatsa hore Jehova ke mang le hore o batla o mo rapele jwang. Ho feta moo, phela ka melao ya Jehova ya boitshwaro. O se ke wa dumella Satane hore a o susumelletse ho hlokomoloha keletso ya Jehova. Empa ho thweng haeba o hlokomela hore o se o tshwaeditswe ke tsela eo lefatshe le etsang dintho ka yona? Sehloohong se latelang, re tlo ithuta hore na ke jwang Lentswe la Modimo le ka re thusang ho tlohela mekgwa le menahano e “metseng ka matla.”​—⁠2 Bakor. 10:​4, 5.